Matteyo 7

Aŋocio Hiram Omuk

(Luk 6:37-38, 41-42)

1“Hèŋototo eram omuk, oŋida buo fe Hollum obeŋ oŋot eram hatai. 2#Mar 4:24Nyio, oŋot adi Hollum eram hatai ihuo enne iŋociette itai eram hullomuk. Ekoi enne iŋociette itai eram omuk, inyi adi buo fe onno oŋocierek eram hatai. 3Nyio igonyu iyye aboroti to honyek illahoi, buo ibeŋ igonyu abeleri otto honyek hoi? 4Kuyya aŋai irinyak iyye ajiaran jio illahoi, ‘Illa, hadi eduhu ni addi aboroti otto honyek hoi ania,’ buo abeleri owon ihonyek hoi? 5Jai! Iyye etihanani huan olo, iduhu do addi abeleri otto honyek hoi; buo diya, iremik adi iyye ihum igonyuna buo fe iduhuna addi aboroti otto honyek illahoi.

6“Hèsiatta aŋohe ariŋ elibo; nyio, oyitonie adi isi itai, ette ihony itai; hèsiatta buo fe asihira hatai jio abataha, nyio, irrirriei adi isi asihira hunia.

Ifiyete, Ottifiati, Ikukuhoto

(Luk 11:9-13)

7“Ifiyete, buo isiori adi jihatai; ottifiati, buo inyurana adi itai; ikukuhoto, buo aŋahini adi ekat jihatai. 8Nyio, lia, elle ifiyo 'to, ifuotu adi; buo fe lia, ollo ottifia 'to, onyurak adi; buo fe lia, elle ikukuho 'to aŋahini adi jihonyi. 9Jihatai monyie, elle ifiyo lonyi hoi iyye emune, isio adi iyye inyi amoruo? 10Kuyya alla amojo inyi ahami, isio adi iyye inyi amunu? 11Elle imijana itai, hulle irrohojata 'to, esiorio hirre hunno oyiji 'to jio aduri hatai, aŋai 'tadi Monyatai ettedou, obeŋ 'tadi esiorio honyi erre ayijok jio hia hulle omojoi 'to jihonyi, agalik!

12 # Luk 6:31 “Ihanie jio aati hullomuk ihuo iwak iyye isi oŋida ihanie jihoi; inyi ania awoyo hiram ono efahita Mose iko ettiyenita huno ekianak Hollum.

Akol Ollo Ottida 'to

(Luk 13:24)

13“Ojiŋara ta akol ollo ottida 'to; nyio, alat akol onno ojiŋarik iferno. Iliaha ekoi onno ofuarik diya, buo fe aati hullo ojiŋari 'to tenyi, oluaji. 14Ati ottida akol maji ono nesu. Ogol ekoi onno ojiŋarik diya; omutari buo fe aati hullo onyurani 'to inyi.

Ayyani iko Eŋijit Honyi

(Luk 6:43-44)

15“Ihumata mijio ekianak enyabak, hullo ojiori 'to jio ekiana isi eram Hollum. Itanyalami isi ahuattek ihuo akioro, buo to tuajin hosi arai luŋa ihuo elewoo. 16Imijana adi itai isi te ehanita hosi. Obeŋi aŋarria oŋijani eŋijiti fino, buo fe ekua obeŋi oŋijani aŋabolo. 17Oŋijak ayyani onno oyyu 'to eŋijiti hunno oyiji 'to, buo ayyani onno orroho 'to oŋijak eŋijiti hunno orrohoji 'to. 18Ati, ittallik ayyani onno oyyu 'to iŋijana eŋijiti hunno orrohoji 'to, buo fe ayyani onno orroho 'to ittallik iŋijana eŋijiti hunno oyiji 'to. 19#Mat 3:10; Luk 3:9Buo ayyani, onno obeŋ 'to oŋijak eŋijiti hunno oyiji 'to, olloŋori adi inyi addi, ette ibironia ihima. 20#Mat 12:33Tania, imijana adi itai ekianak enyabak hullo ojiori 'to ekiana isi eram Hollum, te ehanita hosi.

Atimo Nyia ni Itai

(Luk 13:25-27)

21“Obiaŋara adi aati 'daŋ, hulle iloŋoi 'to ani jio, ‘Lamonye, Lamonye,’ ojiŋari Ilobie ono Hollum; arari fe hia hama, hulle ihanie 'to erre hunna awak Monyoŋ ettedou. 22Iholoŋ ono Aŋacio Hiram, ofuonni adi aati arriai jiaran jihoŋ, ‘Lamonye, Lamonye! Ettittoyo nyia hohoi asayyo Hollum ta afure hoi. Efuhatio nyia hohoi aminiaŋa addi, buo fe ehanio eduariti arriai ta afure hoi!’ 23Ati apulok adi ni jihosi jiojio, ‘Atimo nyia ni itai; ifuatta addi jihoŋ, itai arrohojak hulo!’

Aduhok Hasik Arrihai

(Luk 6:47-49)

24“Tania, atulo elle itaniŋio 'to ekenita hoŋ buo fe oniŋio isi, ara adi inyi ihuo atulo elle ilofioro 'to, ollo oduhok 'to aaji honyi imoruoi. 25Attati ahide sayo buo aari ette ibuluno, ette buo fe oyyami ihut aaji ania bebe, buo inyi obeŋ oritihoro; nyio, oduhoni nyia inyi imoruoi.

26“Buo atulo elle itaniŋio 'to ekenita hoŋ buo omesio isi, ara inyi ihuo atulo ollo obeŋ hou, ollo oduhok 'to aaji honyi isuluŋayo. 27Attati ahide sayo buo aari ette ibuluno, ette buo fe oyyami ihut aaji ania bebe, ette inyi iritihoro. Orroho nyia ekuahit honyi bebe.”

Elohittok ono Yesu

28Ninyia atuhok Yesu ekiana erre hunia, illilliha nyia eluluŋ waati ekoi enne ittiyeniere inyi. 29Nyio, obeŋ nyia inyi ittiyenio ihuo ettiyanak ifahita, ati ittiyenio nyia inyi isi te elohittok.

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Matteyo 7: EA2003

Highlight

ಶೇರ್

ಕಾಪಿ