ປັຣນາຍ ປາລີ່ ພາຍາ 9
9
ຕາລີ ຣາໄງ່ອ໌ ກະ ຊາກູລ
1ເງ່ ຣາໄງ່ອ໌ ຣາລັ່ງ ຈົຮ ດຸງ ອັນ,
ອັນ ປາຕຶ່ງ ຕາປູ່ລ ລຳ ຕາໂນລ.
2ຣາໄງ່ອ໌ ຣາລັ່ງ ກຍາກ ຊັນຕຣັ່ນ ດໍອ໌ ຈາ ຣໍ່ອ໌, ບອງ ເກຣີ່ງ ປາຮວມ ໂຈະ ຕຶ່ງ ບຼັອງ ອາງຸ່ນ,
ກະ ກຽມ ກູໂຕອ໌ ຈາ ແຮີ.
3ຣາໄງ່ອ໌ ຣາລັ່ງ ແປຣີ ມັຮ ມັນແຊມ ຕະ ຣານະ ອັນ ລັ່ອຮ ຊາບາວ
ແຕ ອຶນຕຸ ຕີ່ ລາລື່ ຕຶ່ງ ເມືອງ, ປາຍ ນ່ະໄນ່:
4“ມັຮ ກວາຍ ຊາກູລ ເອີຍ! ມູ່ດ ປໍ ໄນ່!”
ເຈີ່ ອັນ ການື່ຍ ມັຮ ກວາຍ ຊາກູລ ປາຍ:
5“ເປາະ ປໍ ໄນ່! ແຕີ່ອ໌ ຈາ ໂດຍ,
ກະ ງ່ອຍ໌ ບຼັອງ ອາງຸ່ນ ກາ ເກົາ ບອງ ດໍອ໌.
6ອຶງເຄາະ ເຍືາ ຕັຮ ຊັອງ ເງ່ ຊາກູລ, ເຈີ່ ເຍືາ ເຕ່ອ໌ ເບີນ ອາມົ່ງ.
ອຶງເຄາະ ເຍືາ ຕະ ເປາະ ປວາຍ ເງ່ ຣາໄງ່ອ໌ ຣາລັ່ງ.”
7ຄັນ ໄມ່ ກາໄຕ່ຮ ອາຕີ ກວາຍ ອາຊັອຮ ຈະ, ລາ ອັນ ອາເຢ່ ພາມາດ ລັ່ຮ ໄມ່.
ຄັນ ໄມ່ ຕຽຮ ກວາຍ ແຣັ່ງ, ເຈີ່ ອັນ ປາຍ ຕິ່ ລັ່ຮ ໂຈະ ໄມ່.
8ອຶນໂຈຍ ຕາໄມຮ ກວາຍ ອາຊັອຮ ຈະ, ຍ່ອນ ອັນ ອີ ຊາອັຣ ໄມ່.
ມາ ຄັນ ໄມ່ ກາໄຕ່ຮ ກວາຍ ຣາໄງ່ອ໌ ຣາລັ່ງ, ເມ່ນ ອັນ ຢຳນັ່ບ ໄມ່.
9ກູ່ ຊັນຕອຍ໌ ໄມ່ ອາຕີ ກວາຍ ຣາໄງ່ອ໌ ຣາລັ່ງ, ອັນ ແກີດ ຣາໄງ່ອ໌ ຣາລັ່ງ ເຕີມ ແອັນ.
ມັຮ ຊັນຕອຍ໌ ໄມ່ ອາຕີ ກວາຍ ຕານັ່ອງ ອໍ, ອັນ ແກີດ ດັງ ອາຊັອຮ ແອັນ.
10ຢຳນັ່ບ ເຢືາງ ເຈົາຣາຊີ ລາ ກັ່ລ ຣາໄງ່ອ໌ ຣາລັ່ງ.
ຄັນ ໄມ່ ດັງ ເຢືາງ ກາ ບຣັຮ ອໍ, ລາ ແຮງ ໄມ່ ເບີນ ຊາປຸ່ຮ ຊາອຶ່ຍ.
11ຣາໄງ່ອ໌ ຣາລັ່ງ ໂອນ ໄມ່ ເບີນ ແກີດ ກົງ ອາມົ່ງ ດູ່ນ.
12ຄັນ ໄມ່ ເບີນ ຣາໄງ່ອ໌ ຣາລັ່ງ, ລື່ ໄມ່ ເບີມ ເບີນ ເກືາ ອາຊັອຮ;
ມາ ຄັນ ໄມ່ ຕາ ແອອ໌ ຣາໄງ່ອ໌ ຣາລັ່ງ, ລາ ໄມ່ ແຕິ່ ຣາມົຮ ຕຸ່ຮ ກັ່ດ.
13ຣານະ ຊາກູລ ລາ ນ່ະ ມັນແຊມ ກາ ມັ່ກ ປູປົ່ກ ຊາແບລ ຊາກອລ;
ອັນ ຕາ ດັງ ກຍາອ໌ ຈະ ອັນ ເບີມ, ກະ ອັນ ຕາ ດັງ ແອີດ ມັນຕັ່ດ ອໍ.#9:13 ຣານາ 13 ໄນ່ ຕາ ເບີນ ແຈງ ຕຶ່ງ ປັຣນາຍ ເຮັບເຣີ.
14ມັນແຊມ ກັອຍ ດຸ ຕາກູ ຕຶ່ງ ງັ່ຮ ຕົ່ງ ດຸງ ອັນ,
ແຕີລາ ຕຶ່ງ ອຶນຕຸ ຕີ່ ລາລື່ ຕຶ່ງ ເມືອງ;
15ເຈີ່ ອັນ ຊາບາວ ໂຈະ ກວາຍ ກາ ເປາະ ເຈົາ ແຕ ຣານະ ໄລ່.
ອັນ ປາຍ ນ່ະໄນ່:
16“ມັຮ ກວາຍ ຊາກູລ ເອີຍ! ມູ່ດ ປໍ ໄນ່!”
ເຈີ່ ອັນ ປັຣຕຶ່ ມັຮ ກວາຍ ຊາກູລ ປາຍ:
17“ງ່ອຍ໌ ແດີອ໌ ກາ ເນົ່າ ຕວຍ໌ ລາ ອຶງເງືາມ ກາເລີຍ.
ຈາ ໂດຍ ກາ ເນົ່າ ຕວຍ໌ ລາ ແອມ ລາລື່ ເຕ່.”
18ມັຮ ກວາຍ ກາ ແອີດ ຕຶ່ງ ຕາລາງ ອາຕີ ມັນແຊມ ກັອຍ, ໄລ່ ຕາ ເບີນ ດັງ ເລີຍ ໄລ່ ບັອງ ຊາປິ່ລ ຕຶ່ງ ຕຣຸ່ງຕຣັ່ງ,
ລາ ອຶນຕຸ ກວາຍ ກູຈີດ ແອີດ.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
ປັຣນາຍ ປາລີ່ ພາຍາ 9: ກາຕາງ
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
© 2023 (Active) Wycliffe Bible Translators, Inc. All rights reserved.