Matayo 3

Yohane Umubatisi idalika

(Maliko 1:1-8; Luka 3:1-18; Yohane 1:19-28)

1Imitalo gila ekwali Yohane umunyakubatisa, neke avange ukudalika mubalali iya ku Yudaya, 2idalika itigila, “Mupelage, pakuva uwutwa uwa kuchanya wuhegelye.” 3Uyu yemwene yeemulonge nu muvisi Yesaya itigila,

“Iliswi lya umunu lyapulise mubalali:

Muwuyapage ing'asi iya Mutwa

ifikolo mbefili figolokage.”

4Umwene Yohane afwalige umwenda umutive na ulubahila ulwa ingamiya, neke na umusipi ugwa ing'ingo Mukigudi. Neke ikilyo che alisige saali manzi na uwuuki wa inzuki. 5Avanu mbevali vaasile kwa Yohane uluhuma ku Yelusalemu, ku Yudaya na vahuma mung'i isilimwipi na mumukoga ugwa Yolodani, 6swe vipela inzanangifu sawo, neke avabatise mu Yolodani.

7Ave iwona lino peawene Avafalisayo na Avasadukayo wolofu vakusa sambi vabatisiwe, ndawe avatigilige, “Nyenye nye mbegalo va inzoka! Ye nani ye avalonje ulwa mwepage ililakaali lya Nguluvi ilikusa? 8Apo mupigage ifipigo ifilagila ukuta mupesile nu kusileka inzanangifu. 9Ino mulahosa ukutigila, ‘Twinave Udadetu Abulahamu!’” Nene nguvalongela ulwa, Nguluvi ahwanite apitule amaganga iga gave vana va Abulahamu. 10Nayilino de isilanga yilimwisina lya umubiki; umubiki gula gwesigwagwiveleka amaveleko, gwidumulwa neke gutagwe mumoto. 11Nene nguvabatisa na ululenga sambi mupituke na ukupela. Ino yeakusa mu mbele mwa nene ina ludali ukulutila nene, nene sinywaniti nambi ukuhogosa inzisi sa indatu sakwe. Uyo avabatisa na uludali lwa umuhe umwelu na umoto. 12Uluhelo lulimumawoko gakwe ipeta imeke sakwe sambi akong'ase ingano mukisande, neke umwelelo anyanya mumoto gwesigwisimagi.

Ukubatiswa kwa Yesu

(Maliko 1:9-11; Luka 3:21-22)

13Ndawe Yesu aasige uluhuma ku Galilaya mbaka ku Yolodani kwa Yohane, sambi abatisiwe na Yohane. 14Neke Yohane amukanile, itigila, “veve yuke umbatisage nene, ino veve ukusa kwa nene?” 15Ndawe Yesu amupitulige, “Leke luve ndahihyo pakuva tuva twikwisa sila seisaka Nguluvi.” Ndawe Yohane idikisige.

16Nave Yesu peyeabatisiwe, ahumite uluhuma mululenga. Ndawe kwilanga kwadindukige, swe akumuwona umuhe umwelu uva Nguluvi akwika nda nziva pachanya pa umwene. 17Swe lipulisa iliswi uluhuma kuchanya litigila, “Uyu ye Mwanangu umwende, ye ndinogelwa.”

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Matayo 3: HeNT2004

Highlight

ಶೇರ್

ಕಾಪಿ