LUK 6
6
Apééla Nyodí Longem Pobosuname
(Mt 12:1-8; Mk 2:23-28)
1Apééla nyodí longekonem, Jisuke arík raadalok gídagem bíkkelo luyilsuna kídíde ambengem lakpyolo yirla ambínem doto. 2Pharisi kídíe íngkíto, “Sabbath longelo ibaa manam atíem nolu kapeila idune?”
3Jisu bí bulum poyansuto, “Dabidlang bíkke angong kídíe kenoduem inamem nolu porimanía? 4Bí Shédíke ekumlo aala mirikídí petomke dope namem Shédíkíng binam ettíngem laala doto. Delo bí bíkke angong kídí emte bisuto, dem nolu porimanía?” 5Delo Jisu bí bulum poto, “Tanike Oode Sabbath lokke Ruutume.”
Alage Sinakonem Jisuke Ipíkuname
(Mt 12:9-14; Mk 3:1-6)
6Sabbath longe konlo bí kumkeng ekumlo gíla luyil dungem, lakbík alage sina amiko katuai. 7Pharisi kídíe kelang ukil kídíeke Jisu bí Sabbath longelo ipíyédí ipímadí emla, bím lupe géépeko pongkok matala bím kanggap bomdungai. 8Idokom bulu ingkueke mííbom dungadí dem Jisu bí kénto delokke alag sina amidem poto, “Takam keralo dakreptola.” Delo bí gerepla delo dakbito. 9Delo Jisu bí bulum poto, “Ngo nolum íngkídung; Sabbath longelo aina agér inamdía ma, atímana agér inamdía, turnamem mosing kunamdía ma, nyokmo namdía aiyane?”
10Bí bulum kanggo supala amidem poto, “Nokke alage yamtarto.” Bí depe ibito, delo bíkke alagde aikaku. 11Idola bulu marla Jisume kape imíloi emla buluke aralo pobo sulenkai.
Jisuke Tomlíknam Íying Kolang Annyiem Ullenname
(Mt 10:1-4; Mk 3:13-19)
12Depe iduem Jisu bí etpang teyolo kumsukape emla saala, yoh rubungem delo Shédíme kumsula duutíto. 13Roh píange karyédem, bí bíkkelo luyilsuna kídíem tomnín supala delo íying kolang annyidem ullento, dem bí Tomlíknam emla amín mínlíkto: 14Simon (bím bí Pitor emto), bíkke bíro Andria, Jems, Joan, Philip, Bartholoma, 15Mati, Thoma, Alphaike oo jems, Simon Jilot, 16Jemske oo Juda delokke míírí míínyona Judas Iskariot bulu.
Jisuke Luyildola Ipíname
(Mt 4:23-25)
17Bí bulum lekope oibosu langkula yiibe amongkolo dakto. Bíkkelo luyilsuna kídíke ami mílí delo yédo, delokke Jirusalem lokke aana Judia ami kídíe, siyéng ampelo duuna Tur lokkelang Sidon lokke ami kídíe, 18bíkke ngiitomem tatpe emla delokke buluke kinamem ipí kosupe emla aadumsuto. 19Ralname bíkke lok gílenla bulum takam ipíkolok, takame bím ukkípe emla iyinto.
Ashéng Elang Ankíe
(Mt 5:1-12)
20Bíkkelo luyilsuna kídíem kaasudola, bí poto,
“Opanna nolu gérne,
kapeila Shédíke amode noluke.
21Supakke akii kenona nolu gérne,
kapeila nolu keno yimayé.
Supakke kapna nolu gérne,
kapeila nolu ngilyéku.
22Tanike Oo legape
tani kídíke kangkinam nolu,
lupu luyééla mepaknam nolu
atímana amín gena nolu gérne.
23“Delo longedelo nolu ashénge séngéé langka, kapeila teyotelo bottena amanem nolu paayé. Buluke abu kídíe kaaluna miri kídíem sikepe ito.
24“Idakkom mirem kídía, nolu ankí kenoyé;
kapeila nolu noluke ashéngem paatobong.
25Supakke dodarna kídía
kapeila nolu kenoyéku;
26Supakke ngilna kídía
kapeila nolu ankí kenola kapyéku.
Kapeila noluke abukídíe, yadgoona kotoki kídíem depe ito.”
Miruem Ayalangka
(Mt 5:38-48; 7:12a)
27“Ngokke agomem tatna kídí nolum podung: Noluke miruem ayalangka, nolum kangkina kídíem aina agér ibilangka, 28nolum bééna rolna kídíem lubéé langka, nolum míírí míínyona kídíem kumbilangka. 29Akone kémkém konem piyémílo akonemte geka subilangka. Akone noluke galugem rotbín yémílo, bím iyasumape dem laamotoka. 30Nolukelok kona miyongem bilangka, delokke akone noluke ekurangem laadumílo, dem kolat suku mapeka. 31Amie nolum kape kísa ibiduama emla nolu míídudí dekepe nolukom amiem ilangka.
32“Nolum ayana petomem, nolu ayayémílo kape kísa yidnamem paayéne? Ayanem paab gena kídíete ayado! 33Nolum aipe ina petomem nolu aipe iyan sumílo, ingkona areko nolu paayén? Paabna kídíete dem idung. 34Delokke noluke paayan supeko petomlo nolu atíem biyémílo noluke ingko areko kadun? ‘Paab gena’ kídíete bitonam aduem apíípe paadokupe emla paab gena ami terengem bido. 35Idakkom noluke miruem ayalangka, bulum aina atíem ibilangka, bulukelok atíem pangkupe emla míímape atíem bilangka. Delo noluke amane botteyé, delokke nolu kedon yalumna Shédíke oope iyé, kapeila bí mikit sorit kídí lolang atímana kídílote ayadung. 36Yaasam langka, noluke Abuekom yaasamdung.
Akone Akonem Bisar Bosumapeka
(Mt 7:1-5)
37“Bisar bosu mapeka, demílomin nolumkom lukaa mayéne; maab bosulangka, demílomin nolumkom maab biyéne. 38Bibosutoka, demílomin dem nolumkom biyéne. Aipakpe kíkíla, níísiila, ngensiila, delokke bíípok dope noluke bayélo toolík biyéne. Nolu ingkolok kíkí dudí delok nolumkom kíkíyéku.”
39Bí luyiisunam lokte sikepe pokanto: “Mingmana tanide mingmanem gíbo layénía? Annyi pakde deerulo olík mayé langa? 40Porikoode pori babuem kedon yamang idakkom apíípe terníng ina miyode bíkke pori babu kísape iyé.
41“Agíke amig takodem kénsumape, noluke bíro lokke amig takodem nolu kapeila kangkane? 42Kape kísa nolu noluke bíruem ‘Bírue nokke amig takodem ngom laalenmoi’ emyéne? Nolu agí agíke amig takodem kaasu lamang. Aromana nolu, kerape noluke amig takodem laabín sutola demílomin noluke bírolokke amig takodem laabíndope kaapayéne.
Esing Kolang Sokke Ayé
(Mt 7:16-20; 12:33-35)
43“Ardana esiide ardamana ayé éémang, ardamana esing dekom ardana ayé éémang. 44Esing miyodem ayé engkorlok kangkéndung. Tanie taanyum payémlok tapang ayém, demangkom onggur ayém pílmang. 45Aina amide aina aanglok aina atíem laalen sudung, idola atímana amide atímana aanglok atímana atíem laalen sudung. Kapeila bíkke aapí aang míngad emmin nappalok polendune.
Ekum Mona Midum Annyiko
(Mt 7:24-27)
46“Nolu kapeila ngom, ‘Ruutume, Ruutume, emla gokkane, idola ngokke ponampe imane? 47Ngokkíng aala, ngokke agomem talla, delokke dekedem igedudí, bulu kapenedí dem ngo nolum lengkanyé. 48Sékodí agíke ekumem modungem eerídope koopala, ekumem líírelo molíkdune, bíkke kísape ine bí. Méélamdem asi puumue aabomla, gumnamde níída sulate ekumde beleemang, kapeila dem edíírupe motung. 49Idakkom séko ngokke agomem taddola dem ige madudí de amide ekum gaangem amolo aipe díílíkmane. Méélamdem gumname aala ekumdem nííname, ekume bénla delokke bénmík sukai.’ ”
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
LUK 6: adiBSI
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
