Popular Bible Verses from Iruka 18

ಹಂಚಿಕೊಳ್ಳಿ

Miꞌi hawyi poꞌog Iesui henoi tehay iãꞌãkap wuo -Uiwyriaꞌin e waku ahehay kahato Tupana kape e. Waku yt aipohep hin i Tupana wywo eiwoꞌoehay hamo e. Pyno ahenoi teran uhehay hãꞌãkap wuo aikotã waku wahenoi Tupana kapiat koꞌi hap etiat e.

Pywo ti rat Tupana yt mekewat miit saꞌag ewy hin i katupono Tupana tikyꞌe kahato temiitꞌin pote toiꞌatupowyro teran kahato yne niatpo hap mowaku hamo. Taꞌi Tupana niatpo hap toimohãpyk aru iraniaꞌin minug saꞌag ehetiat koꞌi wahẽtup hawyi e temiitꞌin me. Taꞌi areineꞌen Eheykeꞌet Uito miꞌi pote uhuut hap eꞌat turan atiꞌatuꞌapiheg kahato iraniaꞌin minug saꞌag uimohey haria etiat e. Mekewat eꞌat pe atikat kahato uimohey sese hanuaria sio toĩ sio yt hap e Iesui temiitꞌin me.

Miꞌi hawyi Iesui tiꞌatuwesat -Pywo miitꞌin yt uwe i teke kuap atipy pe e maꞌato Tupana yn tiꞌatuehakyeraꞌat kuap miitꞌin e. Tupana yn miitꞌin ehakyeraꞌat kuap e. Yt kat i niatpo Tupana wanetup hawe e. Miitꞌin yt minug kuap koꞌi i yt niatpo hin i Tupana pe e. Tupana tiehakyeraꞌat kuap miitꞌin hekat rakaria pykai e.

Maꞌato so mekewat uwe waku uwe yt e hat yt tuwanetup hin hiwu kape. Maꞌato yt ipohep hin I hẽtup hamo. Aat kaꞌap tohẽtup tope ipowyro hamuat hap. Yt ipowyro teran hin I pykai wẽtup eꞌat pe toꞌe tuwepe. -Are paĩ e yt arekenꞌẽ i Tupana pupi e. Iꞌewyte iraniaꞌin mupi yt arekenꞌẽ hin i maꞌato mesuwat hiwu uimosero kahato raꞌyn e. Taꞌi uimosero kahato rat mekewat haryporia hiwu yt ipohep i ẽtup hamuat e so. Miꞌi pote atipowyro hawyi yt tuut i e so tuwepe.

Pywo pe ti eweiwat teran aikope Tupana toineꞌen morekuatno hap kape pote waku hirokaria mohey hap ewywuat eweiwat o are e. Maꞌato yt pote yt eweihytꞌok kuap i e.

Maꞌato Iesui tikay kay temiitꞌin tuwewowi hawyi toꞌe iꞌatuepe -Yt waĩ eweiꞌe i kat pote Yt eweiꞌatupyhyp teiꞌo hirokaria katupono hirokaria timohey kahato Tupana are e. Taꞌi hirokaria tuwehytꞌok teran kahato Tupana etama pe e. Miitꞌin hirokaria ewywuaria tukupteꞌen kuap aikope Tupana tukupteꞌen morekuatno hap tote.

-Pyno waku raꞌyn emikyꞌesat ewy atunug e Iesui. Eraꞌakasa raꞌyn katupono uimohey kahato hap emoehãite hap topyhuꞌat e Iesui yt iha pytig i rakat pe.

Miꞌi hawyi Iesui toꞌe -Kat poteĩ Wakuat En ereꞌe uhepiat pe e. Tupana yn ni wakuat sese watikuap e.