Popular Bible Verses from Juan 3

ಶೇರ್

Yosësoꞌ yaꞌipi piyapiꞌsaꞌ paꞌpi nosoromiatërin. Napoaton aꞌnaíchin huiꞌnin nipirinhuëꞌ, isoroꞌpaquë aꞌpaimarin chiminacaso marëꞌ. Ina natëtëhuaꞌ: “Ca marëꞌ chiminin,” topatëhuaꞌ, co parisitopiquë paꞌsarëhuahuëꞌ. Yosë nohuitatëhuaꞌ, nanpimiatarëhuaꞌ.

Co anaꞌintinpoaso marëꞌ huiꞌnin aꞌpaimarinhuëꞌ. Nichaꞌëinpoaso marëꞌ aꞌpaimarin. Huiꞌnin quëran chaꞌërihuaꞌ.

—Noꞌtëquën iyasha shaꞌhuitaranquën. Co nasitaantahuatanhuëꞌ, co onporontaꞌ Yosë huaꞌanëntërinquë yaꞌconaranhuëꞌ, itërin Quisosori.

Huiꞌnin natëhuatëhuaꞌ, co Yosë anaꞌintarinpoahuëꞌ. Co natëpisopitahuëꞌ nani Yosëri yonquirin anaꞌintacasoꞌ. Inaíchin huiꞌnin nipirinhuëꞌ, co natëpihuëꞌ. Napoaton anaꞌintarin.

Quisoso isoroꞌpaquë oꞌmaton, aꞌpintërinpoaso pochin oshanënpoaꞌ anitotërinpoaꞌ. Aꞌnaquëniso nipirinhuëꞌ, co nohuantopihuëꞌ Quisoso nohuitacaisoꞌ. Co noyahuëꞌ nicacaisoáchin paꞌyatatonaꞌ, tashi pochin cancantopi. Co yanatëpihuëꞌ niꞌton, Yosëri anaꞌintarin.

Co casoꞌ nohuantërahuëꞌ piyapiꞌsaꞌ yonquiinacosoꞌ. Quisoso naꞌcon naꞌcon yonquiinasoꞌ, tënin.

Co noyahuëꞌ nipisopita co tahuëri pochin nininsoꞌ nohuantopihuëꞌ. Aꞌpininquë aꞌninquëchin huanicaisoꞌ co nohuantopihuëꞌ. Tahuëri nipachina, maꞌsha co noya nipisohuëꞌ quënanëꞌ.

Huiꞌnin natëpisopitasoꞌ, Yosë nohuitatonaꞌ nanpimiatapi. Co natëpisopitasohuëꞌ, co ina pochin nanpimiatapihuëꞌ. Nani Yosëri yonquirin anaꞌintacaso marëꞌ. Aꞌna tahuëri anaꞌintomiatarin, parisitopiquë aꞌpararin huachi.

Iráca shimashonëmapita inotëro parti paasoiꞌ, naꞌa piyapiꞌsaꞌ yaꞌhuanapi. Co noyahuëꞌ cancantopi niꞌton, Yosëri anaꞌintërin. Naꞌa yaꞌhuanoꞌsaꞌ huëcatonaꞌ, quëtëraꞌpiapi. Ina quëran Moisësë yaꞌhuan nonanpisoꞌ ninin. Huaꞌna quëran nisahuaton, naraquë achinpirin. Achinpirahuaton, inápaquë ahuanirin. Inapochachin Yosë quëran quëmapico niporahuëꞌ, aꞌna tahuëri inápaquë achinpiarinaco.

Tata Yosëri huiꞌnin paꞌpi nosororin. Chini chiníquën nanan quëtërin yaꞌipiya huaꞌanëntacaso marëꞌ.