Popular Bible Verses from Kejadian 3

ಶೇರ್

Nyabukba akil arye, ayo duk ati dinmokce, utenebuk. ‘Se, ayo duk ara, urasin pia telebe. Tonda, ayo duk diptinyopura, pia telebe. Tonda ayo duk dipnyopura, kel bikna weik deiyok ning deipnutue,’ tenebuk. Utenebuka ati, ayo duk dakuka, mitik anun dobuka dibukce, el ap neika ulamdiknye Adam ati, bokuka arebukba, el babye dibuk.

Ura, Weik Deiyoknye Allah, el si Yahweh arye, talye buru tam ulamuk ning, ayala-ayala weik kwepdeiamuk bukni, kwatima ara, pia malye una ap, tenepce arye, duknubuka winina ap, pia weik winilamuk. Sik kam ulamik ning, aning-aning yuk ning nirya ara, mitik anun uka. Akwatima ara, akil dam yayukce, akil ati tenepce arye, nyabuk. “Allah arye, ‘Na wa wipsa noutamak ara, yo duk yala nirya kum dinamlyame,’ dipkoprob nyabuk do, kum do?” nyabuka tenepce arye, tilila yupu nyabuk.

Winilaminyeba, narye nyapdeipniba, an ap, akil ap, ‘Pia lik,’ tenilanamdume. Elce deipliba, dadeipdanin banamak mapu ap, ance deipminyeba, dadeipdanin balamica ani, banamak mapu ap, doyanamle talak noutamak nirya, ‘Pia lik,’ tenilanamake. Ninye nirya arye, an kisok teikuka onamkiake. Ance ninye yan dumu kisok si tobuka onamlame,” nyabuk.

Nyabukopura, Allah arye, akil ati nyabuka wenebuk. “An ap, yuk kilapu nirya ap ati, mapu delin talak ara, uk weik anun ton tabakuka, anggun nong deice delinamsine. Winipnyopura, kilapu arye, mapu delilamak talak nirya ara, weika arye uk dipliba, malye kanye bobuka ulamunce, mapu delinamlume. An ap, yuk kilapu nirya ap, anggun akanye yapu ati, ‘Ninye dopsitinge’ tenen, kanye talima uk disiliba, pia patasiliba unamlume. Sal ara, anggun kilapu ara, anggun akanye yapu deice tam uk ukirye, talibsikiba, anggunda amu tamuk unamlume,” Allah arye, Hawa ati nyabuka wenebuk.

Wini talak arye, dipdongobuka daulaminya ani, dipminyeba tuku dongopnamkiyak bukni, kam unamlam talak nirya ara, ikin pil weik aryuk dolaminya ani, kwisi meka panamkilya deice aryuk, din ning libuka dinalame. Ura, an kwepdeipkese talak ara, talye mikuka, kel-kel alamuk tuku butbuta arye, dobuka kwepdeipkisa ati, anda talye mikuka kel-kel alamle tuku butbuta atonun ulyama anya arye, dipminyeba, tuku pum weipkicopura, tamubuka tonap, talye tuku pumuk daunalame,” Allah arye, Adam ati nyabuka wenebuk.

Nyabukopura, Adam ati ayupu nyabuka wenebuk. “Ayo tonok ati, ‘Ayo duk dakuka dina meme,’ nyapkise bukni, an kil arye, nyapmaku yupu kekepmomce, ayo duk akunum dipmaruma ati ara, ayupu nyabuka wenepkene. Ance malye winipluma ati ara, narye nyapdeipniba, tukwak mutuku im sirya, mutuku sirya nirya supkina ati, ikin weik unamle. Kanye imun kanye bobuka, ikin pil weik donalama deice aryuk, tuku noutam arye panamle ninguk dinamlulume.

Nyabukba, Allah arye, “Yatanye birye, ‘An nong banang unmalame,’ nyapmakilba, bikdanmalam do? Narye, ‘Ayo tonok ara, yo duk dakuka kum dinamlyame,’ nyapkise yo duk ara, akunum dakuka dipmalam do?” nyabuk.

Bai tam yakdonokukce, im deice ulye ning, el si ara Kerubim dobuka, Eden mutuku bukni, keting yangan tam deibukba, anye birye uku buk diliba dirina weik ulamle touk, dirina weik ulamuk parang ya dobuka, yu weik ulamukce, kalikilamuk. Ara, ‘Ninye tukwak ninye arye, Kam Una Deiyok yo duk dolona ati, amutuku bisik yacak’ tenen, abisik kalikilamuk.

Ura, Adam arye, el kil si ati, Hawa nyabuka si dobuk. Hawa nyabuka deiyok ara, ‘Akil arye deipliba, dadeipdanin balamica ani, aminyan upnamak ninye nirya ara, sik deiyok kilina kil, el uka,’ tenebukce, el si ati Hawa nyabuk.