Popular Bible Verses from Kîam 6

ಶೇರ್

MWATHANI nî aaigîrue bûbûûî mono nîûntû bwa kûûmba muntû na araithikîîra nkoroone yaawe.

MWATHANI nî oonere atî ûmaramari bwa antû bûkwingîa mono nthîgûrûûne. Ningî aroona atî antû nî baakaraga na mairîrîîria jamathûûku nkoroone ciaao magiita jonthe.

Îndî Noa nî aagwîrîrie MWATHANI.

Noa aarî muntû ûmwagîru, ûtaarî na îgi nthukîîne yaao. Noa nî eethagîrwa arî ngwatanîro na Mûrungu.

Tontû bûû, MWATHANI arauga atîrî, “Nkaathiria antû bonthe nthîgûrûûne na nthirie nyomoo na nyoni na nyamû irîa ciikuuragia na kîu nîûntû nî nkwirira gîtûmi ndaabiûmbîre.”

Naku nî gwaakarîre atîrî, antû nî baambîrîîrie kwingîa nthîgûrûûne kunthe na nî baaciarîre aarî. Biûmbe bia îgûrû nî bionere aarî bau barî babathongi, na biraithuurîra aarî bamwe baraa aka baao. Tontû bûû, MWATHANI arauga atîrî, “Roho waakwa atîtûûraga ndeene ya muntû kenya na kenya nîkwîthîrwa muntû agatûûraga kagiita gagakai ka mîaka îgana rîmwe rîa mîrongo îîrî.” Îgiiteene rîu biûmbe bia îgûrû bikûjûkia aarî ba antû nî biaaciarîre imuntû bibinene mono bieetagwa Nefilimu. Imuntû biu nîbio biaarî îgweta nthîgûrûûne.

Noa arathithia mantû jonthe kûringana na ûrîa Mûrungu aamwîrîte.

Mûrungu areera Noa atîrî, “Ndîkûgiita îgamba kûthiria antû bonthe; nîkwîthîrwa nî boojûrîtie ûgîti nthîgûrûûne. Tontû bûû, nkaathiranîria antû amwe na nthîgûrû.

Ithithîrie sabina na mîtî ya mîtarakwa, ûthithie tûnyomba ku, na ûmîthinge bwa oome na ndeene na gîntû gîtîûmba gûkûrûkia rûûjî.

Mûrungu aatega nthîgûrû aroona ûrîa îthûûki, tontû antû bonthe boojûrîtwe nî ûthûûku na mantû ja ûgîti.

Ningî ûkûrûkie biûmbe bionthe birîa birî mwoyo sabineene. Ûbikûrûkie biîrî-biîrî, ndûme na nka na biîthîrwe birî bia mîthemba yonthe nîkenda bitîgaakue.