If you have would like a copy of this version please contact info@davaraudiobibles.org

Text: Halbi New Testament, CC-BY-SA-4.0, The Love Fellowship. Audio: Halbi New Testament Audio Biible, CC-BY-SA-4.0, Davar Partners International, The Love Fellowship, 2023

Halbi New Testament

Halbi Bible by The Love Fellowship is licensed under Creative Commons Attribution-ShareAlike 4.0 License.

हुनी दिने ईशु घर ले निकरून भाती गलील चो झील चो कटा जाऊन बसलो। आउर हुनचो लगे असन बड़े भीड़ रूंड़ा होली कि हुन ड़ोंगा उपरे चेगलो, आउर सपाय भीड़ खंडी रेटे उबा रवत। आउर हुन हुनमन ले कहनीमन ने खुबे असन गोठमन बल्लो “गोटक बुनतो बिता बीज बुनुक निकरलो। बुनतो समया खिन्डिक बीज बाट चो रेटे घसरली आउर चड़ीईमन ऐऊन भाती हुनके खादला। खिन्डिक बीज चचरली भूईं थाने घसरली, जोन थाने हुनके खुबे माटी नी मिरली आउर गड़ीयां माटी नी मिरतोर लागुन हुन झटके बाड़ली। मान्तर बेर निकरतो के हुनमन जरून गेला, आउर चेर नी धरतो के सुकुन गेली। खिन्डिक बीज लाटा-बुटामन ने घसरली आउर लाटा-बुटामन बाडुन भाती हुनमन के चेपाला। मान्तर खिन्डिक बीज अच्छा भूईं थाने घसरली, आउर फल आनला, कोनी सव गुना, कोनी साठ गुना, आउर कोनी तीस गुना। जेचो कान आसे हुन सुना।”

चेलामन लगे ऐऊन भाती हुनचो ले बल्ला, “तुय लोगमन ले कहनीमन ने केंव गोठयाय सीस?” हुन जबाप दिलो, “तुमके सरग राज चो भेदमन चो समज दिया गेली से, मान्तर हुनमन के नाई। कसनबल्लोने जेचो लगे आसे, हुनके दिया जाय दे; आउर हुनचो लगे खुबे होये दे; मान्तर जेचो लगे काई निआय, हुनचो ले जोन काई हुनचो लगे आसे, हुन बले धरा जाये दे। मय हुनमन ले कहनीमन ने ऐईकाजे गोठयाऊ आय, कि हुनमन दकते-दकते नी दकोत; आउर सुनते-सुनते नी सुनोत; आउर नी समजोत। हुनमन चो बारे ने यशाया चो ऐ अगम गोठ पुरा होऊ आय:
‘तुमी कानमन ले तो सुना से, मान्तर समजास नाई; आउर आँईकमन ले तो दका से, मान्तर तुमके नी सुझे दे।’”
“कसनबल्लोने ऐ लोगमन चो मन ठोसर होऊन गेली से,
आउर हुनमन कानमन ले ऊँचा सुनु आत आउर हुनमन आपलो आँईकमन के लिमटला से;
काहांय असन नी होओ कि हुनमन आँईकमन ले दकोत,
आउर कानमन ले सुनोत आउर मन ले समजोत,
आउर फिरून जाओत आउर मय हुनमन के चेंगा करें।”
“मान्तर धन्य आय तुमचो आँईकमन, कि हुनमन दकु आत; आउर तुमचो कान कि हुनमन सुनु आत। कसनबल्लोने मय तुमचो ले सते बलें सें कि खुबे असन अगम गिआनीमन आउर धरमीमन चाहला कि जोन गोठमन तुमी दकेसास, दकलास, मान्तर नी दकलास; आउर जोन गोठमन तुमी सुनेसास, सुनलास, मान्तर नी सुनलास।

“अदायं तुमी बुनतो बिता चो कहनी चो अरत सुना जोन कोनी राज चो बचन सुनुन भाती नी समजे, हुनचो मन ने जोन काई बुनलोर रये, हुनके हुन दुष्ट ऐऊन भाती झिकुन नेऊ आय। ऐ हुनी आय, जोन बाट चो रेटे बुनलोर रये। आउर जोन चचरली भुईं थाने बुना गेली, ऐ हुन आय, जोन बचन सुनुन भाती तुरते हरिक ने मानु आय। मान्तर आपलो ने चेर नी संगातोर लागुन हुन खिन्डिक ची दिन चो आय, आउर जिदलदाय बचन चो लागुन कलेश नाहले झंझट होऊ आय तेबे तुरते ठोकरना खाऊ आय। जोन लाटा बुटामन ने बुना गेली, ऐ हुन आय, जोन बचन के सुनु आय, मान्तर ऐ जगत चो चिन्ता आउर धन चो धोका बचन के चेपाऊ आय, आउर हुन फल नी आने। जोन अच्छा भूईं ने बुना गेली, ऐ हुन आय, जोन बचन के सुनुन भाती समजु आय, आउर फर आनु आय; कोनी सव गुना, कोनी साठ गुना, आउर कोनी तीस गुना।”

ईशु हुनमन के गोटक आउर कहनी दिलो, “सरग चो राज हुन माने चो असन आय जोन आपलो बेड़ा ने अच्छा बीज बुनलो। मान्तर जिदलदाय लोग सोहते रवत तेबे हुनचो बयरी ऐऊन भाती गऊँ चो मंजी रान बीज बुनुन जाते गेलो। जिदलदाय बीज निकरली आउर खेड़ लगली, तेबे रान बीजा चो बुटामन बले दका दिली। ऐ थाने घर चो दासमन ऐऊन भाती हुनचो ले बल्ला, ‘हे मालिक, काय तुय आपलो बेड़ा ने अच्छा बीज नी बुनुन रलीस? फेर रान बीज चो बुटामन हुता काहां ले ईली?’ हुन हुनमन ले बल्लो, ‘ऐ कोनी बयरी चो काम आय।’” दासमन हुनचो ले बल्ला, “काय तुचो मन आसे, कि आमी जाऊन भाती हुनके सकलु दें?” हुन बल्लो, “नाई, असन नी होओ कि रान बीजा चो बुटामन सकलते-सकलते तुमी हुनचो संगे गऊँ के बले झिका। काटतो दाय ले दुनो के गोटक संगे बाडुक दिआस, आउर काटतो चो समया ने मय काटतो बितामन ले बलेंदें कि पयले रान बीज चो बुटामन सकलुन भाती जरातो काजे हुनमन चो भारा बान्दा, आउर गऊँ के मोचो कोटार ने रूंड़ा करा।”

हुन हुनमन के आउर गोटक कहनी दिलो, “सरग चो राज राई चो गोटक बीज चो असन आय, जोन के कोनी माने धरून भाती आपलो बेड़ा ने बुनुन दिलो। हुन सपाय बीजमन ले नानी तो होऊ आय मान्तर जिदलदाय बाडु आय तेबे सपाय साग डार ले बड़े होऊ आय; आउर असन रूक होऊ आय कि बादरी चो चड़ीईमन ऐऊन भाती हुनचो खेंदामन ने बसु आत।”

हुन गोटक आउर कहनी हुनमन के सुनालो, “सरग चो राज खमीर चो असन आय जोन के कोनी बायले लेकी धरून भाती तीन पोसा आंटा ने मिसाली आउर होऊ-होऊ हुन सपाय खमीर होली।”

ऐ सपाय गोठमन ईशु कहनीमन ले लोगमन के सांगलो, आउर बिन कहनी चो हुन हुनमन ले काई नी बोलते रये, कि जोन बचन अगम गिआनी चो बाटले बोला जाऊ रली, हुन पुरा होओ: “मय कहनी सांगतो काजे आपलो मुंह खोलें दें मय हुन गोठमन के जोन जगत चो मुर ले गुपत रली से उजागर करेंदे।”

तेबे हुन भीड़ के छांडुन भाती घर ने ईलो, आउर हुनचो चेलामन हुनचो लगे ऐऊन भाती बल्ला, “बेड़ा ने रान बीज चो कहनी आमके समजाऊन देस।” हुन हुनमन के जबाप दिलो, “अच्छा बीज चो बुनतो बिता माने चो बेटा आय।” बेड़ा जगत आय, “अच्छा बीज राज चो पिला आय, आउर रान बीज दुष्ट चो पिलामन आत। जोन शतरू हुनमन के बुनलो हुन शयतान आय; काटतोर जगत चो आखरी आय, आउर काटतो बितामन सरगदूत आत। आउर जसन रान बीज सकला जाऊ आय आउर जराया जाऊ आत असने ची जगत चो आखरी ने होयेदे। माने चो बेटा आपलो सरग दूतमन के पटाये दे, आउर हुनमन हुनचो राजमन थानले सपाय ठोकरना चो कारनमन के आउर कुकरम काम करतो बितामन के रूंड़ा करदे, आउर हुनमन के आईग चो कुण्ड ने पका दे, जोन थाने गागतोर आउर दात कड़रतोर होयेदे। हुन समय धरमी आपलो बुआ चो राज ने बेर चो असन चमक दे। जेचो कान आसे हुन सुना।

“सरग चो राज बेड़ा ने लुकालो बिती धन चो असन आय, जोन के कोनी माने पावलो आउर लुकाऊन दिलो, आउर मारे हरिक ने जाऊन भाती आपलो सपाय काई बीकुन दिलो आउर हुन बेड़ा के घेनलो।

“फेर सरग चो राज गोटक बेबारी चो असन आय जोन अच्छा मोतीमन चो डगर ने रलो। जिदलदाय हुनके गोटक खुबे कीमत बिती मोती मिरली तेबे हुन जाऊन भाती आपलो सपाय काई बिकुन दिलो आउर हुनके घेनलो।

“फेर सरग चो राज हुन बड़े झारी चो असन आय जोन समुन्द ने डाला गेली, आउर सपाय परकार चो मछरीमन के सकलुन आनली। आउर जिदलदाय झारी भरली, तेबे मछरी धरू बितामन हुनके कटा ने झिकुन आनला, आउर बसुन भाती अच्छा-अच्छा के तो भण्डवामन ने रूंड़ा करला आउर खराप-खराप के पकाऊन दिलो। जगत चो आखरी ने असने ची होये दे। सरग दूतमन ऐऊन भाती दुष्टमन के धरमीमन ले अलग करदे, आउर हुनमन के आईग चो कुण्ड ने पकादे। जोन थाने गागतोर आउर दात कड़रतोर होयेदे।

“काय तुमी ऐ सपाय गोठमन के समजलास?” चेलामन जबाप दिला, “हव।” फेर ईशु हुनमन ले बल्लो, “ऐईकाजे सपाय शास्तरी जोन सरग राज चो चेला बनलो से, हुन घर चलाऊ बिता चो असन आय जोन आपलो भण्डार ले नवा आउर जुना तीजमन निकराऊ आय।”

जिदलदाय ईशु सपाय कहनीमन सांगलो, तेबे हुन थानले गेलो। आउर आपलो नंगर ने ऐऊन भाती हुनमन चो आराधना घर ने हुनमन के असन उपदेश देऊक मुरयालो कि हुनमन अकचकित होऊन भाती बोलुक मुरयाला, “ऐके ऐ गिआन आउर सामरत चो काम काहां ले मिरली? काय ऐ बड़ई चो बेटा नुआय? आउर काय ऐचो आया चो नाव मरियम आउर ऐचो भाईमन चो नाव याकूब, यूसुफ, शिमोन आउर यहूदा नुआय? आउर काय ऐचो सपाय भईनमन आमचो मंजी ने नी रवत? फेर ऐके ऐ सपाय काहां ले मिरली?”
ऐ परकार हुनमन हुनचो लागुन ठोकरना खादला, मान्तर ईशु हुनमन ले बल्लो, “अगम गिआनी चो आपलो देश आउर आपलो घर के छांडुन आउर काहांय बेईजिती नी होये।” आउर हुन हुता हुनमन चो अबिश्वास चो लागुन खुबे सामरत चो काम नी करलो।

Listen to मत्ती 13