If you would like a copy of this version please contact info@davaraudiobibles.org

Sirmouri New Testament, CC-BY-SA-4.0, The Love Fellowship. Sirmouri New Testament Audio Bible, CC-BY-SA-4.0, Davar Partners International, The Love Fellowship, 2022.

Sirmouri New Testament

Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.

जोबै यीशुए लोगौआरी सौबै बातौ कौरी पैई, तोबै सै कफरनहूम नगर दा ओऊवा। तिथै कोसी सूबेदार का ऐक नोकर थिया, जू तैसका प्‍यारा थिया, औरौ बीमारी लैई मौरणौ पांदी थिया। जोबै सूबेदारे यीशु कै बारै मुंजी शुणु तौ यहूदियों कै कैई बुड़ेईको खै यीशु कैईंदै बिन्ती कौरणौ कारिए तैसकै धोरे छाड़ै कै आयौ मैरै नोकर कै ठीक कौरे दै। सै यीशु कै धोरे ओऊवे, औरौ तैसीयादै बैजाए बिन्ती कौरेयौ बौलदै लागै, “ऐजा आदमी तैरी मौदद का हकदार औसौ। जिथुकै सै अमारै जातिआरी प्यार राखौ, औरौ तैणैई अमारै यहूदी सभा-घोरो कै बाणै राए।” यीशु तिनकै साथै हौटा, पौरौ जोबै सै घोरो कै नेड़िक थिया, तौ सूबेदारे तैसकै धोरे कैई दोस्तो कै ऐजौ बौलणौ खै भैजै, “ओए रै प्रभु हांव इथकै लायक ना आथी, की तू मैरै घोरे आएँ। औरौ इयौं बौजैह शै हांव आपी खै ऐसी लायक बै ना सौमझु कै हांव तैरै धोरे ओऊं, पौरौ सिरफ बौल़ै दै तौ मैरा सेवक ठीक हौए जांदा। हांव बै कोसी आदमी कै औधिकारियो तौड़ी औसौ, औरौ सिपाही बै मैरै साथै औसौ, जै ऐकी खै बुलू, ‘जा’ तौ सै जांव, औरौ दूजै खै बुलू ‘आ’ तौ सै आए जांव; औरौ आपणै कोसी नोकर खै बुलू, ‘ऐजौ कौर’ तौ सै तिथु कौरौए।” ऐजौ शौणैबा यीशु हैरान हौए गौआ, औरौ तैणै मुँह फिरैयौ तियौं भीड़ शै जू तैसकै पाछैदै आन्दै लागै रौए थै बौल़ौ, “हांव तुऔं खै साचौ बुलू, कै मुखै इस्राएल देश दा ऐक बै ऐशणा आदमी ना भैटी जू ऐसी बैगानै यहूदी कै जैशणा मुं पांदी बिशवाश कौरौ।” औरौ भेजेयोंदे दोस्‍ते घोरे आयौ तैसी नोकर खै ठीक ठाक दैखा।

दैणिक दूसौ कै बाद सै नाईन नांव कै ऐक नगर कै हौटा, तैसकै चैलै औरौ बौड़ै भीड़ तैसकै साथै हांडै रौए थै। जोबै सै नगर कै दवारो पांदी पोऊंचा, तौ दैखौ, लोगै ऐकी मौरेयौंदे कै बायरै लाए लोआ थिया; ऐजा आपणी माँ का ऐकैई बैटा थिया, औरौ सै विधवा थै; औरौ नगर कै बौहितै सारै लोग तियांरै साथै थिए। तियौं दैखैयो प्रभु कै गिणौ लागी, औरौ तियौंखै बौल़ौ, “रौया नै।” तोबै तैणै नेड़िक आयौ लाश कै छोऐं, औरौ टिपणौ वाल़ै रौकै गौवै, तोबै तैणै बौल़ौ, “ओए रै नोजवान, हांव ताखै बुलू, ऊबा बिज़!” तोबै सैजा मुर्दा ऊबा बिज़ा, औरौ बौलदा लागा: औरौ यीशुए तैसीकै तैसकी माँ कै सौंपै दिया। ऐजौ दैखैयो सौबै लोग डौर गौवै, औरौ सैजै पौरमेशवर की बौड़ाए कौरदै लागै, “अमारै बीच मुंजीदा ऐक बौड़ा पौरमेशवर कै बातौ बौताणौवाल़ा बिज़ रौआ, औरौ पौरमेशवर आपणै लोगौ कै मौदद कौरदा आए रौआ।” औरौ यीशु कै बारै मुंजी ऐजै बात सारै यहूदिया प्रदेश दै औरौ आंडे-पांढे कै सारै देशो सै फोयलै गौए।


यूहन्ना बपतिस्मा दाता खै तैसकै चैलै इनु सौबी बातौ का समाचार दिया। तोबै यूहन्ना बपतिस्मा दाताए आपणै चैलै मुंजीदै दु कै बौएदैयौ प्रभु कै धोरे ऐजौ पूछणो कारिए भैजै, “का तू ही सैजा मसीह औसौ, जैसी छाड़णौ का वादा पौरमेशवरे कौरे राए थिया या आमै कोसी ओकी कै ठोल़नाए कौरु?” तिनुऐ तैसकै धोरे आयौ बौल़ौ, “यूहन्ना बपतिस्मा दाताए आमु कै तैरै धोरे ऐजौ पूछणो कारिए छाड़ै राए, कै का तू ही सैजा मसीह औसौ, जैसी छाड़णौ का वादा पौरमेशवरे कौरे राए थिया, या आमु कोसी ओकी कै ठोल़नाए कौरु?”
तैसी सौमय यीशुए बौहितै कै बीमारियों औरौ पीड़ो औरौ दुष्टआत्मा शै छुड़ाए औरौ बौहितै शै आन्धै की आखी खै ठीक कौरी। औरौ तैणै तिनु बौल़ौ, “जू किछै तुऐं दैखौ औरौ शुणु, जाऐबा यूहन्ना खै बौल़ै दैंव; कै आन्धै दैखौए, औरौ लोंगड़े हांडदै फिरदै लागै रौवै, औरौ कोढ़ी ठीक हौए गौवै, औरौ जायरै शुणदै लागै रौवै, औरौ मुर्दै जियुंदी हौए गौवै, औरौ गरीबो खै सुसमाचार प्रचार शुणाया जांव। धन्‍य औसौ सैजै जू मुं पांदी बिशवाश कौरणा ना छोड़ो।”
जोबै यूहन्ना कै भेजेयोंदे लोग हौटै गौवै, तोबै यीशु यूहन्ना बपतिस्मा दाता कै बारै मुंजी लोगौ खै बौलदा लागा, “तुऐं शुनशान जौगैह पुंडे का दैखदै हौटै रौवै थिए? तुऐं ऐशणै आदमी कै बात शुणणौ कारिए तिथै ना हौटै रैई थी, जैणै आपणै सौंदेश दैणौवाल़ै कै ढंग खै बौदलै दिया, जैशैकै ऐक डैंगा जू हावा लैई औगौड़ियौ पौछौड़ियौ हिंजल़ोए। तौ तुऐं का दैखदै हौटै रौवै थिए? का मौंगै खोटणो बाम्बेयोंदे आदमी कै? दैखौ, जू भड़कीले खोटणो बांबो, औरौ सुखी रौंव, सै राजमहलो दै रौंव। तौ का दैखदै हौटै रौवै थिए? का कोसी पौरमेशवर कै बातौ बौताणौवाल़ै कै दैखदै थिए? हां, हांव तुऔं खै बुलू, ऐजा सैजा औसौ जू पौरमेशवर कै बातौ बौताणौवाल़ै दा बै बौड़ा औसौ। ऐजा सैजाई औसौ, जैसकै बारै मुंजी पवित्र शास्त्र दो लैखै राए:
‘दैख, हांव आपणै सौंदेश दैणौवाल़ै कै तैरै औगौड़ियौ भैजु, तौ सै लोगौ कै बौताए सौकौ कै सै तैरै आणौ कारिए आपी खै तैयार कौरौ।’
हांव तुऔं खै बुलू की जू बैटमाणिशौ पौरैशै जन्मे रौवै, तिनु मुंजीदा यूहन्ना बपतिस्मा दाता दा बौड़ा कुणजाई ना आथी पौरौ जू पौरमेशवर कै राज्य दा नानड़ै शै नानड़ा औसौ सैजा तैसीदा बै बौड़ा औसौ।”
जोबै तिनुऐ यीशु कै बौलेयौंदी बात खै शौणै, तौ सौबै लोगै इथै तौड़ी कै मामला लोणो वाल़ै बौल़ौ “पौरमेशवर धरमी औसौ, जिथुकै तिनुऐ यूहन्ना शै बपतिस्मा लौआ।” पौरौ फरीसी लोगौ औरौ यहूदी शास्त्र कै ज्ञानीए यूहन्ना कैईंदा बपतिस्मा लोणो शै मोना कौरे दिया ऐशै कौरेयौ तिनुऐ आपणै बारै मुंजी पौरमेशवर कै मोरजी कै टाल़ै दै।
“औरौ हांव ऐसी युगो कै लोगौ कै तुलना कैशैखै कौरु कै सैजै कोसी साए औसौ? सै तिनु नानड़िया साए औसौ, जू बोईजारो दै बोठेयो ऐकी दूजै की चुगली कौरौ कै, ‘आमुए तुऔं कारिए खुशी कै गाणै गोऊवे, औरौ तुऐं ना नाची, औरौ आमुए शोग मौनौऊं औरौ तुऐं ना रुई!’
जिथुखै यूहन्ना बपतिस्मा दाता ना तौ रोटी खांदा ओऊवा, औरौ ना ही नौशीला रस पीयों थिया, औरौ तुऐं बौल़ौ थिए कै तैसदै दुष्टआत्मा औसौ। हांव आदमी का बैटा खांदा पींदा आए रौया; औरौ तुऐं बौल़ौ, ‘दैखौ, हांव पेटू औरौ पियक्कड़ आदमी, मामला लोणो वाल़ै औरौ पापियों का दोस्त औसौ।’ पौरौ ऐकी आदमी कै काम साबित कौरौ कै बुध्दिमान कुण औसौ।”

तोबै कोसी फरीसी लोगै तैसीयादै बिन्ती कौरे कै तू मैरै साथै खाणौ खा; औरौ सै तैसी फरीसी कै घोरे जायौ खाणौ खांदा बोठा। तैसी नोगरो कै ऐक वेश्या बैटमाणिश कै जोबै ऐजा पौता लागा कै यीशु तैसी फरीसी आदमी कै घोरे खाणौ खांदा बौठै रौआ, तौ तिएं संगमरमर कै पाथरो कै बासणौ दो मोंगौ इत्र लोऊ। औरौ रुंदै बैई यीशु कै पौछौड़ियौ तैसकै लातो कै धोरे खौड़ै हौए गौए, औरौ तैसकै लातो कै आशुओं लैई धौयौ, औरौ आपणै मुंडौ कै बाल़ो लैई गुशदै लागै, औरौ तैसकै लातो पांदी बार-बार चूमियो तिथपांदी इत्र मोल़दै लागै।
ऐजौ दैखैयो सैजा फरीसी जैणै तैसी बोइदै राए थिया, आपणै मनो दो सुंचदा लागा, “जै यीशु पौरमेशवर कै बातौ बौताणौवाल़ा हौंदा तौ जाणै पांदा कै ऐजै जियैं ऐसीखै छुए लौआ, सै कुण औसौ, औरौ ऐजै कैशणी बैटमाणिश औसौ, जिथुकै ऐजै तौ वेश्या बैटमाणिश औसौ।” यीशुए तैसकै विचार जाणैबा तैसी जोवाब दिया, “ओए रै शमौन मैरै ताखै किछै बौलणौए।” तैणै बौल़ौ, “ओए रै गुरु बौल।” यीशुए तैसीखै उदारण देएबा बौल़ौ, “कोसी महाजन कै दो कर्जदार थिए, ऐक पाँच शो, दूसौ कै धियाड़ी का औरौ ओका पचाश दूसौ कै धियाड़ी का कर्जदार थिया। जोबै तिनुवांगो कर्जा पाछु कौरणौ कै किछै ना रोई, तोबै तैणै दु का कर्जा माफ कौरे दिया। इथकारिए तिनुमुंजी दै सौबिदा जादा प्यार कुण कौरदा?” शमौने जोवाब दिया, “मैरै सौमझ शै सैजा, जैसका तैणै जादा कर्जा माफ कौरा।” यीशुए शमौन खै बौल़ौ, “तुऐं ठीक बौल़ौ।” औरौ तियौं बैटमाणिश कै ढौबौ फिरैयौ यीशुए शमौन कै बौल़ौ, “का तुऐं इयौं बैटमाणिश कै दैखै? हांव तैरै घोरे ओऊवा तुऐं अमारै भोवार कै हिसाब शै मुखै लात धोणो कारिए पाणी बै ना दी, पौरौ इयैं मैरै लात आपणै आशुओं लैई धोए दिए, औरौ आपणै बाल़ो शै साफ कौरे।” तुऐं अमारै भोवार कै हिसाब शै मुखै चूमे ना रैई, पौरौ जौल़ौ दा उंडा हांव आए रौआ, तौलौ दौ ऊंडो इयैं मैरै लातो कै चूमणै ना छुड़ी। तुऐं मैरै मुंडो पांदी जैतून कौ तेल बै ना मुल़ी, पौरौ इयैं मैरै लातो पांदी मौंगौ इत्र मौल़ौ। “हांव ताखै बुलू; कै ऐजै मुखै जादा प्यार इथकारिए कौरौ जिथुकै इयौंकै पाप माफ कौरे राए जू बौहितै थिए; पौरौ जिनकै दैणिक पाप माफ कौरे राए सै मुंआरी दैणी शा प्यार कौरौ।” औरौ तैणै बैटमाणिशौ खै बौल़ौ, “तैरै पाप माफ हौए गौवै।” तोबै जू लोग तैसकै साथै खाणौ खांदै बौठै रौवै थिए, सै आपणै-आपणै मनो दौ सुंचदै लागै, “ऐजा कुण औसौ जू पापौ कै बै माफ कौरे दैंव जू सिरफ पौरमेशवर कौरे सौकौ?” पौरौ तैणै बैटमाणिश खै बौल़ौ, “पौरमेशवरे ताखै बौचाए दी, जिथुकै तुऐं मुं पांदी बिशवाश कौरे राए। शान्तै शै आगु जा।”

Listen to लूका 7