Wakatu Ruma Isa edana dou mamboto ede, Sia tekana ese doro to'i. Sawa'u b̄a doho Sia, anamorid̄oho-Na mai rakana Sia. Edempara Sia tampu'una ngoa ra tei siad̄oho:


”Taho ra ntikara dou
ma iu rome ra dawa'u ro mawi'i weki d̄i Ruma mpoampa;
Siad̄oho eded̄u anggota Karaja'an Saroga!
Taho ra ntikara dou mancoki ade;
Ruma Hatalla d̄imarere siad̄oho!
Taho ra ntikara dou ma kab̄awa weki;
Ruma Hatalla d̄imambei au rasake-Na d̄i siad̄oho!
Taho ra ntikara dou ma ne'e poda kalampa kane'ekai b̄a Ruma Hatalla;
Ruma Hatalla d̄imambei kancihi siad̄oho!
Taho ra ntikara dou
ma kasi ade d̄i dou malakai;
Ruma Hatalla d̄imakasi ade d̄i siad̄oho rau!
Taho ra ntikara dou ma raso adena;
siad̄oho d̄imapata Ruma Hatalla.
Taho ra ntikara dou ma
wa'a dame d̄iwoha manusia;
Ruma Hatalla namangakuku siad̄oho kai ana-ana ndai-Na!
Taho ra ntikara dou ma susa ra ncoki rakancoki b̄a dou
b̄ara karawina au rakane'e b̄a Ruma Hatalla;
siad̄oho eded̄u anggota Karaja'an Saroga!
Taho ra ntikara nggomid̄oho, nggara b̄ara Nahuna nggomid̄oho d̄ikatuna ra kab̄awa, d̄ikancoki, ro d̄ikafitina. Nabi-nabi ma mori sawatipu b̄a nggomid̄oho rau, wa'ura kancoki b̄une nggomid̄oho. Kasanara ademu ro kad̄ihira ademu, b̄ara na'eku ufamu d̄i saroga rasadia wea b̄a Ruma d̄i ru'u nggomid̄oho.”


”Nggomid̄oho eded̄u sia dunia. Sia nawa'usi cab̄a sab̄ua loaku d̄ikandanga mbali? Watid̄u wara onena, malaisi d̄i pakira ro d̄itonda-tonda b̄a dou.
Nggomid̄oho eded̄u taroa dunia. Kota ma wara ese wawo doro to'i wati loa d̄icili. Wati wara dou makalea ilo, sawa'u b̄a ede mab̄onto ilo ede kai roa. Pala nawi'iku ta ese hid̄i ilo, loakud̄u mbeina taroa d̄i sanikina dou mawara d̄i ade uma ede. Ndede rau taroamu pab̄uapu mbei taroa d̄i tando dou, loakud̄u siad̄oho eda samenana karawimu ma taho, edempara roi rawadina Amamu d̄i saroga.”

”Aina wi'ikaimu Nahu maiku d̄imakambora hukum Musa ro rateikai b̄a nabi-nabi. Nahu maiku laina d̄imakamborana, pala d̄imatei ao ra ma'anana mapoda. D̄i kawaramu! Salama langi ro dana mbuipu warana, sab̄ua huruf atao sab̄ua titi ma to'i poda rau d̄i ade hukum ede wati d̄ikambora, nggara sara'ana watipu ndad̄ina. B̄ara ndedena, cou-cou masapa sab̄ua rau raparentakai ede, kone mato'i rau, ro ngoa ra teina dou makalai karawi b̄une ede rau, sia ede d̄imandad̄i to'i poda d̄i ade Karaja'an Saroga. Ndede rau, cou-cou makarawi parenta Ruma ede, ede nangoa ra teiku dou makalai b̄une ede, sia ede d̄imandad̄i na'e d̄i ade Karaja'an Saroga. Ndad̄i, d̄ikawaramu: Nggomid̄oho wati pehemu d̄imandad̄i anggota Karaja'an Saroga, nggara watisi karawimu au rakane'ekai b̄a ndai Ruma Hatalla, makalalo guru-guru agama ro dou-dou Farisi.”


”Nggomid̄oho mab̄adeku b̄a one d̄i wa'i ra waro ndaita wara ngoa ra tei b̄une ake: Aina hade dou; cou-cou mahade dou, pab̄ua d̄i hukum. Pala ake Nahu manggahi d̄i nggomid̄oho, cou-cou mambani d̄i dou ma kalai, d̄i adi; ro cou-cou ma'i'a dou makalai, d̄i paresa d̄itando Mahkama Agama. Ro cou-cou manggahi d̄i dou makalai, ’Sampula kagoko’, sia ede patu d̄ipaki ade afi anaraka. B̄ara ndedena, nggara warasi sab̄ua dou d̄i ade weki nggomid̄oho, mawunga d̄onggo ra mbei ntauna d̄i Ruma Hatalla, edempara kawarana b̄a one warapu dou ma iha ade d̄i weki ndaina, sia ede pab̄uaku tu'u wi'i wa'una au rad̄i d̄onggo rambeina ede d̄itando mezeba, sawa'u b̄a ede lao dame wa'uku lab̄o dou raka'iha wea adena ede. Sawa'u b̄a ede, sia naloara mai mbali d̄onggo ra mbeira au ra mbeina d̄iru'u Ruma Hatalla.
Nggara nawarasi dou mada'awana nggomid̄oho aka mahkama, taho angi lab̄opu dou ede salama mbuipu wara wakatu sawatipu b̄a rongga aka mahkama. Nggara watisi kandedemu, dou ede nad̄onggoku nggomid̄oho d̄i hakim, hakim d̄imad̄onggo nggomid̄oho aka palisi. Edempara palisi d̄imakalu'u nggomid̄oho d̄i ade uma bui. Ro kawarapu: Pasti nggomid̄oho wati loamu losa d̄i ade uma bui ede, sawatipu b̄a cola sara'amu denda ede.”

”Nggomid̄oho mab̄adeku wara ngoa ra tei b̄une ake: Aina jina.
Pala ake Nahu manggahi d̄i nggomid̄oho: cou-cou mantanda dou siwe sampe mai adena, dou ede nawa'ura jina lab̄o dou siwe ede d̄ei adena. Nggara mada wanamu makamaikaimu dosa, cingga pakipu isi madamu ede! Nancewi tahopu mbora sarunde anggota sarumbumu, b̄aib̄a sara'a sarumbumu d̄ipaki ade anaraka. Nggara rima wanamu makamaikaimu dosa, dompo pakipu rimamu ede! Natahopu mborana sab̄ae rimamu b̄aib̄a sara'a sarumbumu lu'una ade anaraka.”


”Wara rau ngoa ra tei b̄une ake: sanikina dou ma wi'i weina, pab̄uaku mbeina sura ncengga d̄i weina ede. Pala ake Nahu manggahi d̄i nggomid̄oho: cou-cou mawi'i weina sapodakaina weina ede wati bengkena lab̄o mone makalai, sia nakamaiku jina weina ede, nggara nanika walisi weina ede. Ro cou-cou manika lab̄o dou siwe rawi'i b̄a rahina ede, najina rauku.”

”Nggomid̄oho mab̄adeku aipu wa'i ra waro ndaita wara ngoa ra tei b̄une ake: Aina sake cowa au rawa'umu sakekaimu sumpa d̄itando Ruma Hatalla, pab̄uapu karawimu b̄a nggomi. Pala ake Nahu manggahi d̄i nggomid̄oho: Aina sumpa kone sakali, nataho sumpakaimu langi, b̄ara langi eded̄u hid̄i dohokai Ruma Hatalla, ro taho kai dana, b̄ara dana lamakai ed̄i Ruma Hatalla; atao kai Yerusalem b̄ara Yerusalem eded̄u kota Sangaji na'e. Ai rauna sumpa te'emu tutamu, b̄ara ndai nggomi wati loamu ndawi kab̄ura atao kame'e honggomu, kone salela. Nggahimpa ’Io’ atao ’Wati’ ari mai b̄a ede ramaina ta Ibilis.”


”Nggomid̄oho mab̄adeku wara rau ngoa ra tei bune ake: isi mada cepe kai isi mada, woi cepe kai woi. Pala ake Nahu manggahi d̄i nggomid̄oho: Aina cola cepemu d̄i dou ma karawi ma'iha d̄i weki ndaimu. Nggara warasi dou matopa rawe wanamu, co'opu sia matopa wali rawe ku'imu. Ro nggara warasi dou mada'awa nggomid̄oho d̄i hakim b̄a ne'e weana b̄ajumu, mbei raupu jumbamu d̄i dou ede. Nggara nawarasi dou mana'ekaina mapakasa nggomid̄oho kauna lemba wa'a barang-barang nasakilo mete d̄o'ona, lemba weapu d̄ua kilomete d̄o'ona. Nggara nawarasi dou maraho au-au kombi d̄i nggomi, mbeipu. Ro aina dambeimu dou ma ne'e sepe au-au d̄i nggomi.”


”Nggomid̄oho mab̄adeku wara rau ngoa ra tei b̄une ake: meci ra ca'upu lengamu ro aina meci musumu. Pala ake Nahu manggahi d̄i nggomid̄oho: meci ra ca'upu musu-musumu, ro do'a weapu dou-dou ma rakancoki nggomid̄oho. Loakud̄u nggomid̄oho ndad̄i ana-ana Amamu ma aka saroga. B̄ara Ruma Hatalla kawontuna liro-Na d̄i ru'u dou mataho ro d̄i ru'u dou ma dab̄ae rau. Sia kalondona ura d̄i ru'u b̄a dou ma karawi mataho ro d̄i ru'u dou ma karawi madab̄ae rau. Nggara nggomid̄oho meci ra ca'u mpa dou ma meci ra ca'u nggomid̄oho mpoa, d̄i auna Ruma Hatalla pab̄uakaina cola racepe rawi nggomid̄oho ede? Dou-dou mataki tagi bea rau nakarawi b̄une ede. Ro nggara nggomid̄oho mawa'a salam hampa lenga ra iwa mpoamu, aujaku ncewina? Dou-dou ma wati pata Ruma Hatalla nakarawi b̄une ede rau! Amamu d̄i saroga nameci ra ca'uku samenana dou kai sampuruna. Nggomid̄oho rau pab̄uapu b̄une ede.”

Listen to MATIUS 5