SAN MATEO 12
12
Tisuncha yu lay kꞌamakꞌatꞌi tejkan xajulchan jastaknati
(Mr. 2:23-28; Lc. 6:1-5)
1Ex chuncha taun xajulchan jastaknati ixjunita, ni Jesús kun ixtꞌaltanan yu ixlakmalaniy va ixtapuꞌanta taꞌan ixchꞌankanta trigo. Yuꞌuncha va ayaj ixtachavanita, taꞌaqtayl talajꞌexꞌiy yu xataltsꞌi ni trigo, va taxapꞌiꞌulhaꞌalcha. 2Tejkan yu fariseos talaqtsꞌil yu tamakal, ex tajunil ni Jesús:
—Yu mintꞌaltanan tatꞌajun makanan taun tuꞌuchun yu jantu maqskꞌiniy kamakꞌatꞌi tejkan xajulchan jastaknati.
3Ex ni Jesús va lakjunil:
—¿Ex ni uxiknankꞌan jantu aqtaun pꞌutꞌeꞌeyatꞌik yu tacha makal ni David kun ixtꞌaltanan taun julchan tejkan ayaj tachavanil? 4Yucha tanul la ixchaqa ni Dios ex taꞌul ni pan yu moqslanikantacha ni Dios mas jantu ixtapaxtoqniy kataꞌul, vamun ni kuras ixtapaxtoqniy kataꞌul. 5¿Jantukaꞌ pꞌutꞌeꞌeyatꞌik ixlhachimoꞌon ni Moisés taꞌan najun xtaqkan lakatin ni kuras para katatapatsal laka ay lakatajtan mas va xajulchan jastaknati? Y jantu matichun najun ni va tamakay jatalaqalhin. 6Pero kitꞌin klajunau ni aniy alin taun tuꞌuchun apalay ay xajantu yu ay lakatajtan. 7Ka jantu malaꞌasiyatꞌik tis va suncha naunputun ixchivinti Dios yu tsꞌoqkanta, yu inchine najun: “Kitꞌin va knajun kꞌapaxkꞌanantꞌik. Jantu knajun kꞌamoqslatꞌik lapaxkan.” Va ixmalaꞌasitꞌik yu klajunau, ex ka jantu ixlakmukꞌanitꞌik laqtaqal yu kintꞌaltanan yu laqsaval vas tajunita la ixjatsukuntikꞌan. 8Ni kitꞌin yu kval Sasꞌatꞌa Lapanaki klhinajun tisuncha lay makakan ni xajulchan jastaknati.
Palay junchoqol qayntaun yu jantu lay ixmapuꞌay ixmakaꞌ
(Mr. 3:1-6; Lc. 6:6-11)
9Ex taxtulcha ni Jesús, va al laqa chaqaꞌ taꞌan ixtataqxtoꞌa ni israelitas, ancha tanuchal. 10Ancha ixꞌalinta qayntaun lapanaki yu jantu lay ixmapuꞌay ixmakaꞌ. Lati ni fariseos vachu ancha ixtaꞌalinta, yuꞌuncha va ixtatꞌajuncha lakxkaunan tacha kataputislajmal ni Jesús. Va chuncha talhisakmil ni Jesús, va tajunil:
—¿Xtaqkan lakatin para palay kꞌamakꞌachꞌoꞌo qayntaun taqanꞌan tejkan xajulchan jastaknati?
11Ex ni Jesús va lakjunil:
—Xaqayntaun ni uxiknan, va kalhitsꞌukꞌu laqataun borrego y katajul lakxkan, ¿jantu niman kapꞌiti makutunuꞌ mas va xajulchan jastaknati? 12Qayntaun joꞌati apalay ixtapal junita xajantu laqataun borrego. Ex chuncha alin lakatin para kamakꞌatꞌi yu lajꞌox tejkan xajulchan jastaknati.
13Ex ni Jesús va junil ni anchanu taqanꞌan:
—Kꞌaxnujtꞌi mimakaꞌ.
Chuncha va xnujlhi, va oxicha junchoqol tacha yu amaqataun. 14Ex chuncha ni fariseos taꞌanchoqol, va taꞌaqtaylcha tapuxkaulaqtsꞌin tas lay katapumaqnil ni Jesús.
Ni Jesús va ixꞌoqxtamati Dios yu laksakta
15Tejkan chuncha kꞌatsal ni Jesús, ex taxtul taꞌan ixvil. Lhuvaj lapanakni tatꞌaꞌal. Ni Jesús lajkꞌuchꞌuꞌol ni taqanꞌanin, 16pero ixlakchivijvay para jantu katalhitaulal ni yucha. 17Va chuncha taqayntsal ixchivinti Isaías yu maqancha ixlaqputeꞌey ixchivinti Dios, yu inchine naul:
18Aniy alinta kiꞌoqxtamati yu klaksakta.
Ikpaxkay kun tachun kilhitsukunuꞌ.
Kakxtaqniyaꞌ kiꞌEspíritu ni yucha.
Ex yucha kalakmasuniyaꞌ tapuchux lapanakni ni lakamunukpaꞌ ni alin ixlaqtaqalkꞌan.
19Yucha jantu kakiltaukꞌayaꞌ,
jantu pꞌasni katꞌasayaꞌ.
Tus jantu matichun kaqasmakniyaꞌ ixtꞌasati lakatinixnan.
20Ni yucha jantu kateꞌeyaꞌ mas maqataun makatꞌuniy kꞌiu yu lkꞌavil.
Yucha jantu kamamixiyaꞌ mas va laqataun mecha yu va tsꞌuniy maqtꞌayjiy.
Tus tejkan pꞌasni y vas kunaꞌ ixlhachimoꞌon.
21Tus tapuchux lapanakni ni lakamunukpaꞌ katapakxanꞌiyaꞌ.
Tanajun ni Jesús lhitꞌajun ixtapꞌasta aqmoqxnuꞌ
(Mr. 3:20-30; Lc. 11:14-23; 12:10)
22Ex va chuncha talhaanil ni Jesús qayntaun joꞌati yu laꞌachꞌix y janunuꞌ. Va ixlhitꞌajun aqmoqxnuꞌ. Ni Jesús va malakavanichoqol y machivinichoqol. 23Tus tachun ni lapanakni tus vak takꞌatsal, va talalhisakmil:
—¿Lhilay ni Jesús va istsꞌal David junita?
24Tejkan chuncha taqasmaklhi ni fariseos, va tanaul:
—Va Beelzebú, yu xaꞌukxtin aqmoqxnuꞌ yu xtaqniy tapꞌasta para lay kalakmaxtul aqmoqxnun.
25Ni Jesús ixkꞌatsꞌaycha yu ixtatꞌajun pastaknan, va lakjunil:
—Mas va tisuncha lhachimoꞌon incha va tatalaqlvaꞌa y talaxkajiy ni lapanakni, ex xꞌamankꞌan tatalaktꞌilhiy. Vachu incha taun putaulan u tꞌalaqaunin tatalvaqta, ex jantu lay maqan tatsukuy va talamamiꞌoniy. 26Vachu chun incha xꞌaman kamaxtuchoqokal ni Satanás, ¿ex tas kaputaqnilcha ixtapꞌasta? 27Naunatꞌik va klakmaxtuy aqmoqxnun kun ixtapꞌasta Beelzebú yu xaꞌukxtin ni aqmoqxnun. ¿Ex tas ayucha jaxtaqniycha tapꞌasta mintꞌaltanankꞌan para katalakmaxtul aqmoqxnun? Mintꞌaltanankꞌan va tamasuchoqoy ni uxiknan va alꞌoqspꞌalatꞌik. 28Yu kitꞌin klakmaxtuy aqmoqxnun va kun ixtapꞌasta ni ixꞌEspíritu Dios. Yucha naunputun yu ixlhachimoꞌon ni Dios va talaqchintancha ni uxiknankꞌan.
29’¿Tas kapulalcha matichun katanuchal la ixchaqaꞌ qayntaun lapanaki yu pꞌasni para kamaxtunil ixꞌaxtoqnuꞌ incha jantu pꞌunaj kachꞌiꞌulaꞌelal?
30’Yu jantu chꞌantaun kintꞌaval, yucha va kixkajiy. Yu jantu jalaqmaqxtoꞌa lapanakni para kintatꞌaꞌal, yucha va jalakmaputaukꞌay.
31’Xlhiyucha klajunau, tachun talaqalhin yu tamakay ni lapanakni lay malaqmixiniꞌokan, mas va tuꞌuchun yu jantu ox kanaul, yucha lay malaqmixiniꞌokan. Pero yu va kalaktuꞌul ni Espíritu Santo ex ni yucha jantu lay malaqmixinikan. 32Chavay yu kinkiltaukꞌaniy ni kitꞌin yu Sasꞌatꞌa Lapanaki, yucha lay kamalaqmixinikanaꞌ. Pero incha jantu oxi lhichiviniy ni Espíritu Santo, ex ni yucha jantu lay kamalaqmixinikanaꞌ, mas ni aniy lakamunukpaꞌ, mas yu kaꞌalinakaꞌ.
Va por xaꞌunikan va yucha pumispakan aqataun kꞌiu
(Lc. 6:43-45)
33’Yu ox kꞌiu xtaꞌa ox xaꞌunikan, yu jantu ox kꞌiu yucha jantu lajꞌox xaꞌunikan. Ex chuncha va por xaꞌunikan va yucha pumispakan ni kꞌiu. 34¡Ixlapanakni tsapulin untꞌatꞌik! ¿Tas kapulayacha kꞌanaunapitik yu lajꞌox axtoqnuꞌ incha va laktuꞌunun untꞌatꞌik? Yu naunatꞌik la minkilkꞌan yucha minachal la melhanutkꞌan. 35Yu ox lapanaki, la ixjalhanuti maꞌata yu lajꞌoxi, ancha maxtuy yu lajꞌoxi chivinti. Yu laktuꞌunuꞌ lapanaki la ixjalhanuti maꞌata yu jantu lajꞌoxi kaval, ancha maxtuy chivinti yu jantu lajꞌox. 36Pero yu kitꞌin klajunau, tejkan kachina julchan tejkan kalakmukꞌanikanaꞌ ixlaqtaqalkꞌan ni lapanakni, ex kataxtaqꞌoyaꞌ kuenta tachun laqxtoqnuꞌ chivinti yu tanajunta. 37Va por minchivinti katasuyaꞌ incha va ox unitꞌa u incha va lhitꞌaꞌun laqtaqal.
Yu talaktuꞌunun lapanakni taskꞌiniy Jesús kamakal ay axtoqnuꞌ yu lay katapumispal
(Mr. 8:12; Lc. 11:29-32)
38Va chuncha taval ni fariseos kun yu ixtamasuy ixlhachimoꞌonkꞌan va talaqltalakatanul ni Jesús, va tajunil:
—Jamalaniniꞌ, kijnan klalaqtsꞌinputunau kamakꞌatꞌi taun ay axtoqnuꞌ yu lay klapumispau.
39Ex ni Jesús va lakjunil:
—Yu jalaktuꞌunun ali maqtaqalhinin lapanakni kintaskꞌinin para kaklakmakanil taun ay axtoqnuꞌ yu lay kintapumispal. Pero jantucha apalay tuꞌuchun kaklakmasuniyaꞌ, vamun yuꞌ yu tacha tapasal ni Jonás yu maqancha ixlaqputeꞌey ixchivinti Dios. 40Yu Jonás ixtajumachal laꞌatꞌutu julchan kun laꞌatꞌutu jatatsꞌisin la ixpulakna laqataun ay jatanti. Ex yu Sasꞌatꞌa Lapanaki vachu chun katapasayaꞌ, yucha katajuyaꞌ laꞌatꞌutu julchan kun laꞌatꞌutu tatsꞌisin la ixpulakna ni lakatꞌun. 41Tejkan kachinaꞌ ni julchan tejkan kalakmukꞌanikanaꞌ ixlaqtaqalkꞌan ni lapanakni, katatayayaꞌ ni lapanakni yu maqancha machaqan Nínive. Katamukꞌayaꞌ laqtaqal, kalakmukꞌanikana ixlaqtaqalkꞌan yu chavay tatꞌajun lapanakni. Yu maqancha ixtavilanal lakaputaulan Nínive va tamakaul ixtalaqalhinkꞌan tejkan taqasmaknil ixchivinti Jonás. Pero chavay aniy alin qayntaun yu apalay pꞌas xajantu ni Jonás. 42Vachu tejkan kalakmukꞌanikanaꞌ ixlaqtaqalkꞌan ni lapanakni, ni xanati yu ixlhachimoꞌonun maqancha ixlhisur ni lakamunukpaꞌ, va ancha katayayaꞌ y kalaktislajmayaꞌ ni lapanakni yu chavay tatꞌajun. Yucha la maqati minchal para kaqasmaknil ixchivinti Salomón yu ayaj lhuu ixjatapastakꞌati. Pero chavay aniy alin qayntaun yu apalay lhuu jatapastakꞌati lhitꞌajun xajantu Salomón.
Tejkan minchoqoy yu jantu ox espíritu
(Lc. 11:24-26)
43Tejkan taun jantu ox espíritu taxtuniy qayntaun lapanaki, ex tiꞌukxuntayay mas taꞌan jaxixninta taꞌan jantu tuꞌuchun alin, lakxkajuycha toꞌoxtaycha kastaknal. Tejkan jantucha temay toꞌoxtaychacha kastaknal, va pastakchoqoy: 44“Kajkꞌanchoqoyacha laqa chaqaꞌ taꞌan ikmintachal.” Tejkan chinchoqoy la ixlakatunaj ni lapanaki va tacha taun chaqaꞌ yu tus ox japꞌalnankanta y ox jalaꞌoxikanta. 45Ex taxtuchoqoy y lhiminchoqoy pumatujun ixtꞌaꞌespíritus yu apalay talaktuꞌunun. Tus tachun chꞌantaun tatanuy la ixlakatunaj ni anchanu lapanaki. Ex ni anchanu lapanaki va apalay lhitaꞌay jun la ixjatsukunti xajantu tacha ixjunita pꞌunaj. Vachu va chun kꞌatꞌapꞌasayapitik yu chavaycha jalaktuꞌunun lapanakni untꞌatꞌik.
Ixnati ni Jesús ali ixtꞌalaqaunin
(Mr. 3:31-35; Lc. 8:19-21)
46Tejkan vananaj ixtꞌajun jalaqxaqalanaꞌ ni lapanakni ni Jesús, ex tachinchal yu ixnati kun ixtꞌalaqaunin, va ixtatꞌachivinputun ni Jesús pero va maqspaꞌ ixtayanal. 47Ex qayntaun lapanaki va junil ni Jesús:
—Yu minati kun mintꞌalaqaunin tayanal maqspaꞌ. Va tatꞌachivinputunan.
48Ex ni Jesús va naul:
—¿Tas ayucha ni kinati y tas ayuꞌuncha ni ketꞌalaqaunin?
49Ex va jalakmajkunil yu ixtꞌaltanan, va naul:
—Ni yu aniy taꞌalinta, yuꞌuncha ni kinati ali ketꞌalaqaunin. 50Chavay mas va taꞌayucha yu makay tacha lhinajun kimPay yu alintachal ni laktꞌiyan, ex yucha kintꞌalaqajun y yucha kintꞌalapanaki y yucha kinati.
ទើបបានជ្រើសរើសហើយ៖
SAN MATEO 12: tpt
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2004,Wycliffe Bible Translators, Inc. All rights reserved.
