Mateo 8
8
Jesoshi yovejairi avejancari
(Mr. 1.40-45; Irc. 5.12-16)
1Iroompaquea yoguirincanaja Jesoshi otapiqui, ariquea isaquiritsaeventajianacari icaramirincavaeque caquintejia. 2Icoraquepojaquequea aparo avejancari iguerovempojacari icanqueri:
—Nomajirote, arigueti pininque, pagavejaque piveajena.
3Iriraquea Jesoshi icantajempequitanaca ipamitsitari, icanqueri:
—Jeeje, noninque. ¡Pimpeanajempaja!
Iroompaqueate icanquitiguiri jac ipeanaja yavejancavejancaacagueti. 4Iroompaquea icantavajiri Jesoshi:
—Aatojate picamantitsija. Iriguenti poimotanaque saserorote ponigaapojemparija, paanajenerija viratsipae pinetsanaqueroja icanqueca Moishishini cameetsanijite iramenamajaquempinijite, ariquea incanquempi peanajimpi intsajiaquempinijite maasano peamajatanajimpi.
Jesoshi yogueshitajiri yashincaca imajirote coaretajia
(Irc. 7.1-10)
5Iroompaquea yoanaque Jesoshi Caperenaoqui. Ariquea yarejetapojacaroquea yameniriquea icoraquepojaque aparo Iromaquitica. Iriatimpa iriguenti imajironcaca 100 igoaretajiate. Iroompaquea icampojiri:
6—Nomajirote, inorijaguitani nashincaca notsovironaquitequi, teetari ironquempaji, yatsipevaetaca.
7Icanqueri Jesoshi:
—Iroosacanica noanaque nogueshitajateri.
8Icanquequea imajirote coaretajia:
—Nomajirote, aatotarite piquijitsitanarotsi notsovironaquite, notsaquetarite panaamajataquenaquea. Pincantajaniquiqueja impeapanajantempaquea nashincaca. 9Quejetaca naatimpa ichoocaveca tigarancanaca, ariqueate ichoocaque nashi nogoaretajiate notigarancajiguica. Noncanterigueti: ‘Pijate’, ari iroanaque. Itsipaquea noncanterigueti: ‘Caacate’, incoraquetaque. Aisa ichoocaque nashincaca taaca opaji nomperacarica iquemisanquenaquea.
10Irooquea iquemavaquerigueti Jesoshi icanqueca yamenanaque intati, icantajiguiri oguijaguijaiquerica:
—Arimaja noncanquempi, teequea namenimagueteji aparo acaniqui Ishiraeriqui inquejetempariji irica itsamajatigueti nagavejamajati, iquemisantamajataque. 11Noncanquempiquea irimajirontaquempagueti Inquitequitica, ariquea incoraquecoraqueipoje caquintejia irisaquiritsaevaepojaque inquenaquenaipoje jmm osamanipaequitica isotoguigueti catsirincaiteri, itsipajia inquenajiapoje iquijigueti catsirincaiteri, intsipajiapojempariquea Averaameni, Ishaaconi aisa Jacovoni irishecajiaquempaquea. 12Cotanquitsiquea irirajia joriojia inintajiavecaca Aapani Irioshi iroaroaitanaqueme aatotarite yoajiguiquea, manaquea intigarancajiqueriquea osamani ocanquegueti manquimanquimanqui. Ontaniquiquea ontaniqui incoquempanija iriraaguitempani irantsicayajijianaquempa.
13Iroompaquea ipitsocashitanacari imajirote coaretajia icanqueri:
—Poanajeja, pitsaquetarite nagavejamajati nogueshitajeri pashincaca, imaica impeanajempa.
Irooquea icanquitigui Jesoshi jac peanaja.
Jesoshi yogueshitajiro orijanintaroca imanquigare Peerero
(Mr. 1.29-31; Irc. 4.38-39)
14Iroompaquea yoanaque Jesoshi itsovironaquitequi Peerero, yamenapojiroquea ivaguirote Peerero, ashinoncajaca onorijaca ocatsirincavaeque. 15Yaavacopojaquero ariqueate ocotanaca opeanaja ogatsirincare, ariquea ocatianaja ojocacojiajiniri irishecajiaquempaca.
Jesoshi yogueshiguetajiri ashinoncajajiatsica
(Mr. 1.32-34; Irc. 4.40-41)
16Iroompaquea opitsecanaquegueti yamajiapojiniri Jesoshi icarajiavaetaque ishaquiajiacaca ampatsini. Irooquea icantaquitigui Jesoshi ariquea icohicoitanaca ampatsinipae yovashiantajianajiri ishaquiajiavecaca. Aisa yogueshiguetajiri maasano ashinoncajaguetanquitsica. 17Ari icanque paesatoniqui tsavetantatsica Isaiashini itsavetacotantaquerigueti icanque:
“Yaitanacajiro agavejavetacajica,
aisa yogueshiguetajaji ojoquijijiacagueti.”
Nintajiatsica iroguijaguijaitanaqueri Jesoshi
(Irc. 9.57-62)
18Iroompaquea yameniriquea Jesoshi icaramirincavaeque capiocaventajiapojacarica, icantajiguiri itsatacaanejia:
—Jaame amontemonteitanaquempaja intatiqueroqui.
19Ariquea icoraquepoji tsatacaantiroca itioncacotanaqueca Moishishini, icanqueri Jesoshi:
—Tsatacaantantatsica, noninque noncoguitempani noguijaguitempini querocagueti poanaque.
20Icanque Jesoshi:
—Iriraquea zorro#8.20 Ichoocati zorro tomirishiqui, iquejevecari shiishi. Iriguenti shecatarica chaapa, quepigari, maasano. chooca imoro iquijantacaca. Ariquea iquempejiaca tsimeripae chooca imencoshi, cotanquitsiquea iriraquea Irijanite Caquinte#8.20 Icanquegueti Jesoshi Irijanite Caquinte mana icantacotaca iriatimpa, mana oquejetaca icantacoqueri itsipa. Iriotaque Quirishito Meshiantatsica quenapojanquitsica jenoqui inquitequi, icaquintetapojaquetari ivoapojaque. teequeate onchoocateji itsovironaquite irimaantaquempaca.
21Iroompaquea icanque aparo itsatacaane:
—Nomajirote, nonintaveca noguijaguitempini, cotanquitsiquea iroquetita nonquitatanajeritaja aapani.
22Icanque Jesoshi:
—Poguijatanaquenaja. Pishineteri metojari ashincarica inquitatajaterita metojari.
Jesoshi ipejairoquea choviga aisa imagojatacajairo iniromotija
(Mr. 4.35-41; Irc. 8.22-25)
23Ariqueate itetanajaroquea Jesoshi quenajarontsi itsipatsipaitanacari itsatacaanejia. 24Incajaranquiguitetanaquegueti ochovigaguitetapojiquea inirojencatapojaque choviga jeoc jeoc jeoc, otamacojatanaque iniromotija oshaguishaguivaetanaqueroquea quenajarontsi. Iriraquea Jesoshi yojocanacani tin. 25Itsaroajianaque itsatacaanejia itinajitsitari icanqueri:
—¡Nomajirote, paavaquenashiatsi ojocajatempanishiatsi!
26Iriatimpa icantajiguiri:
—¿Quero ocotacani pitsaroantajianacaca? ¡Tequerata pintsamajajiguenaji nagavejamajati!
Icatiitsitanaca iquenquetsatacaitaro choviga icanquero:
—Pimpejaencatanajempaja.
Icantsitaro aisa iniromotija:
—Pinchopecajatanajempaja.
Ari ocotanaja osanticojencatanaji choviga, ari oquempetanaja iniromotija ochopecajatanaja.
27Iriatimpajia yamenamenaitanaque intati icantajianaque:
—¿Taashia ipaji irica? Jerompate oquemisantamajataqueriquea choviga aisa iniromotija.
Jesoshi yoguisotoacoventajiajiri ishaquiajiavetacaca ampatsinipae
(Mr. 5.1-20; Irc. 8.26-39)
28Oraquea yarejetapojacagueti Jesoshi intatiqueroqui, iguepatsitequi Gararaquitica#8.28 iguepatsitequi Gararaquitica. Chooca otsipa paperi otioncacotacagueti acaniqui Jerejesaquitica (gergesenos), otsipa paperi ocanti Jerasaquitica (gerasenos). icoraquejiapoji mavite caquinte ishaquiajiacaca ampatsini. Iriatimpajia iroguenti iquenaquenaipoji imperitamoroqui yojoquijitantapinijitarica metojatsica. Icatsimamajajiaque itsaroacaamajajitacari, caarica ipampoquivoquitantajitaro quenavoquirontsi oatsica ichoocajiaquegueti. 29Iroompaquea icajemitsijianaca icantajigui:
—Jesoshi Irijanite Irioshi, ¿queroquea pincojiguenani? ¿Iroocajate picoraquetashitaque pantsipetacaajiaquena imaica tequeratanicate arejetempaji nantsipetantajiaquempaca?
30Ariqueate ichoocajiaque oraniqui oshequi chancho,#8.30 Irira chancho iriguenti viratsi quejevetarica santaviri. ishecajiaca, icarajiavaequequea icanca. 31Irirajia ampatsini shaquiajiacarica icantajiaqueri Jesoshi:
—Poguisotoajiaquenagueti, iintsija noashijianaquerita irinta chanchojia, noshaquiajiapojemparita.
32Icanque Jesoshi:
—Intsiquetirote poapoaitanaque.
Icampanajanta isotosotoitapanajanti yovashiantajianaqueri ishaquiajiavecaca, irioquea yoashijiavetanaca chancho. Iroompa ishaquiajiavetapojacari ariqueate icohicoitanaca ishiajianaca ojeguironcapojacagueti itanquiretanquireitanaque yojocajajiapojaca, icampojaca teron maasanojia.
33Ariqueate yamenajiavaquerigueti quempoguijajiguirica itsaroajianaque, ishiashiaitanaca yoayoaitanaque iguintenijiacagueti icamantajiapojiri igonorojia yojocajajiacagueti chancho. Aisa itsavetantajiapojaqueriquea queroquea icohicoitanacani ishaquiajiavetapojacarigueti ampatsinipae. 34Iquemitsitaquea iriatimpajia yoayoaitanaquequea ontaniqui ichoocaquegueti Jesoshi, icantajiajiri iroanaje irovashiantsitanajeri iguepatsite.
ទើបបានជ្រើសរើសហើយ៖
Mateo 8: cot
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2005, Wycliffe Bible Translators, Inc. All rights reserved.