Mak 7
7
Sesesrakan non jibidini
1Ajinan goah rat wuhu Temwat bi goah rat sesra Temwat niah rat tepma dini ut Jerusalem, ram mapma ben Jisas. 2Rat kita goah datngin tarut non Jisas rat kanleut ba rat ba lehvi baworate ngaa nga li halan goah ajinan goah rat wuhu Temwat rat tok nelehvi ngaa.
3Ajinan goah rat wuhu Temwat, bi Jiusni rat wuhu lelian non jibini atmate. Entorah rat ba lehvi baworate nga nga li halan goah jibini rat lehvi ngaa, ba rat ba kanleut tenga. 4Io rat ba kante apma nga ah rat kele le maket, tigoah rat ba lehvi baworate apma nga nanong. Rat wuhu lelian halkawu lengleng ah tapmak. Halan goah rat lehvi no lah, bi no kuro, bi no dis temdepdep bi kabwali ba tei hal watwatnende ma.
5Ajinan goah rat wuhu Temwat, bi goah rat sesra Temwat ram uhleli i Jisas nuhu, “Ani u apma nagoah nom tarutni rat ba dahkuru halan lelian nga niah jibimani rat telngi? Halan gavak nagoah rat ba lehvi bawora ngaa nga ba ramga gan?” 6Jisas bep mini ni nuhu, “Aesea ajinan dalen God, tevep luhmwi vehuran u gimi niah nomi vihnian kakaruak tapmak goah teulu. Niah God tevep nuhu,
‘Tarutni rahe ba ram matpe nan nge li bongo,
Ba u no vihnian ba mwidi nawut lengleng dini nana.
7Ramsip masen nge nokok,
Gonani le no sesesrakan ba ram sesra dalek telingling ah ajini nge ratgalngi,
Bi ram gam leli tekeni goah God telngi.’ ”
8Jisas bep mini ni nuhu, “Kamling gabarani dalek telingling non God bi kam ioh mini sesesrakan ah aji nge mwesesra.”
9Jisas bep mwetani mini ni nuhu, “Rowommi matkolsik li goah kabarik dalek telingling ah non God, bi kamabuhu sesesrakan ah nomi. 10Moses telngi dalek telingling mini gimi niah tevep nuhu, ‘Konetpe temam nuru dajim.’ ‘Aji ah bep vehuran tekapma vanokon teman nuru dajin, ba aji nanong ba man ihbamtean.’ 11Bi kamu sesra ajini i goah tigoah non leut mandi niah bat teililngi go bat beji teman nuru dajin nokon, bi bep nuhu, ‘Apma ahe ba Koban’ (meramnan vehuran nong, ba bep nuhu, ‘Apma nong ba non God’), 12kabep vehuran nong, bi kam leli mwidi goro u goah bat beji teman nuru dajin. 13Li halan lelian nanong ba kam leli ba dalen God bibi apma bilos nge, halan sesesrakan ah kam geheni mapma dini goah rat tok mwate mwesesra ni. Bi halan lelian halkawu lengleng ah kam leli ah rat kapma.”
Apma ah mweleli aji mwegapma lemtan God
14Jisas muhmwetani tarutmumu mapma ben, bi bep mini ni nuhu, “Gimi seranae karu rongtani nana, bi neililngi mwatwen apma ah nama vep mini gimi. 15Apma tebulong ah mwegapma bawo alwop niah aji man gani bi mweleli mwegapma lemtan God. Ba bibi apma ah baut lejinen aji niah mweleli ba aji mwegapma. 16Aji ah dalingan manetka ba nerorongtak dihi.”
17Entorah temlu dini tarutmumu ah ratti, bi ban le val. Non tarutni ram uhleli mwerani maun vehuran i tetwo mini ni nong. 18Jisas bep mini ni nuhu, “Gavak, goi gimi bi kat baililngi vehuran nga ahe? Tedapmak ah, apma tebulong alwop niah mwisip le jinen aji bi mweleli mwegapma lemtan God. 19Gonani apma ah tapmak ba teba van nga le non masan, ba mwisip le jinen bi ban gabarak nge dini mamjin.” Entorah tevep vehuran nong, bi bep nuhu, hinak sera ba tekabis nge u goah man ganan.
20Mumu bep mwetani nuhu, “Apma ah baut le aji, niah mweleli ba aji mwegapma lemtan God. 21Gonani bibi le aji, bi le non masan niah vihninan leut ah rat kapma baut. Vihninan lelbasalan bi vihninan goah aji mambwingi aji, bi vihninan goah aji bwal las i aji. 22Bi vihninan lelbasalan mini atleiman aji watnende. Bi toninan leut non aji watnende, bi mweleli halan lelian ah rat kapma, bi vihninan keketan, bi mweleli kapmwaan, bi jigabkawuan, bi kitkitriakan. Viviran, bi vepajian, bi aji mwidi gabkawu. 23Leutni na rat kapma nong ah baut le jinen aji, bi mweleli aji mwegapma lemtan God.”
Vihni mwetakngaan non aji havin
24Jisas mamlu bi ban li vinini rah sasari vini ah Taea. Bi mwesak le val, tebadoni tenga nuhu aji bat teililngite ut ah tedi iginan. Tehu ba bat badi surak bwiri nga. 25Te aji havin tedok iginan ah nujun ah dalan tedo ah loah tedi lelen. Terongo vepnan Jisas, bi morop mapma ben bi maiah lewokon. 26Aji havin nong ba tei tewo li vini ah Ponisia, tei datngin vinini ah Siria. Muhleli i Jisas tokol nuhu nema koro loah dini jujun. 27Tehu ba Jisas balu ini bep nuhu, “Taneskak bawora hinaksi mini havakni. Teba woswos tenga nuhu tan neskakte hinak kan havakni mini kuli.”
28Ba aji havin nong balu ini bep nuhu, “Subu, goi kuli bi ram gani songorin hinak kan havakni, niah ram ganmis ini.” 29Jisas bep mini nuhu, “Kita ngai kot walu dihi tapmak ba komul, loah tevante dini nujum.” 30Aji havin nong tegamu ban, ba loah tevante dini nujun, bi tetpote nemju gololo li kabwalin.
Jisas tevamwesa aji ah tei dilingbubuko, bi teba doptop tenga
31Jisas malngi vininan at Taea, bi muhural ban li vini go niah tei han ah Saedon. Tevan ali vini go niah tei vini Tesangwul nge iginan, bi mapma bi le sileng ah Galili. 32Ajini rat tetkae aji mapma ben Jisas ah tei dilingbubuko bi teba doptop tenga. Ram mapma bi ram uhleli i Jisas nuhu nematrani ngan lin. 33Jisas matkae silik i aji nong dini tarutni, bi mwesesrani warungun le dalingan aji nong. Bi mwegasu bi mali kasunan bi malngi li mian aji nong. 34Jisas mwigit vale bini, terongo ah le non vihnian tei temres basla. Bi bep nuhu, “Epata,” meramnan vehuran nong ba bep nuhu, “Komdu.” 35Tei vilbwaleh ba aji nong morongo ut, bi mian bitki bi modoptop.
36Jisas maskani dalekte tetkol mini ni nuhu ran ba vep seresere tean mini tarutni. Entorah rat rongo goah Jisas teskani vehuran nong mini ni ba ratmu van ngate bi nebep rorop ini. 37Gosera ah rat rongo ba rat tetkoh tokol ini, rabep nuhu, “Aji ahe ba mweleli apma halkawu lengleng ah rat kabis. Gonani goah rabi dilingbubuko bi goah rat ba doptop nga ba mweleli ba ram doptop, bi ram rongo ut.”
ទើបបានជ្រើសរើសហើយ៖
Mak 7: APMA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Published by the Bible Society of the South Pacific in 1977.