Rutu 1
1
Naomi ha'ania Rutu
1Raona hi hairatoa nia hi na'oni painaha kira 'oni ana painaha ma mahea paina 'e to'o raona Tiuta, ma tai mane ni Peterehemu wau raona Tiuta, ha'ania huka naia ma rua mi'i naia, kira ra 'urihana ta'a mouta hana kira ka 'oni raona hanua wau Moapu hana horo'a koko'osu. 2Ratana mane 'e ha'a'hoia 'Erimereke, Ratana huka naia Naomi, ma ratana rua mi'i naia Maroni ma Kirioni. Ikira hi hakaitarena 'Eperemu mania Peterehemu raona Tiuta. Naina ma kira ra hana hanua wau Moapu ma kira ka 'oni taina.
3Naina ma 'Erimereke, koko'o Naomi, 'eka mae, ma 'e oreta'ania keni 'ene ha'ania rua mi'i naia. 4Ma kero ka to'oana rua keni wau Moapu, tai keni ratana 'e ha'ahoia 'Opa ma te keni Rutu. Puri'ana kira 'oni taina karahinia awarani harisi, 5rua mane 'ene Maroni ma Kirioni kero ka mae ru'u, ma 'e oreta'a'nia no'o Naomi puri'ana rua mi'i naia ma koko'o naia.
6Horo'a Naomi 'e noroa nonorotani wara raona Moapu nia Iawe 'e hura hana poniana hi ta'a naia ana haiponi ana kira ana hanara, Naomi ma rua keni hunona kira haitako hana kira ka ori mania Moapu no'o. 7Naomi 'e ori mania hanua 'e 'oni'oni a'i ha'ania rua keni hunona, ma kira isua tara 'e ori hi raona hanua wau Tiuta.
8Naina Naomi 'e arahu 'uri'ene tarea rua keni hunona, <<'Aru ka ori no'o hana nima tetena 'arua. Ma raita'ania Warato'o 'eka hata'inia reteha naia hana 'arua, 'urihana 'aru hata'inia reteha tarea rua mi'i nau kero mae ma inau. 9Raita'inia Iawe eka uusuma'a nia arua hana aru ka tautaria mamaroha raona nima hi koko'o haoru arua.>>
Naina Naomi 'e nono uusuma'i keroa ma kero ama paina no'o. 10Ma kero ka arahu 'uri'ene tarea Naomi, <<'Ero ka ori ha'ani 'o ke tarea hi ta'a 'o>>.
11Tai'rihi Naomi 'eka arahu 'uri'ene, <<'Aru ka ori, rua keni nau. 'Aru ka iisu nau hanaita? 'Uria na to'oana haru mera mane ru'u raona opaku, hana kira ka rau hana koko'o 'ana 'arua? 12'Aru ori no'o, rua keni nau; na noni paina rika'a no'o hana na ka 'oni ha'ania te mane ru'u. Ma 'ana na to'oana te tahara hana na ka 'oni ha'inia mane me'etani 'ene ma na ka ha'ahuta haru mera mane- 13'aru rae haimasiha tarea horo'a kero ka paina? 'Aru rae koniana 'arua mania haru mane mouta? 'E mao, rua pira nau. 'Are 'e rau aku 'ene 'e 'ahasi nau rika'a taroriua 'arua, tonaana ka'eka'ena Iawe 'e ra suara nau>>!
14Mani wara naina 'e taua kero ka ama paina ru'u. Naina Opa ka nono uusumania hunona tairihi Rutu 'e kuru ana hunona.
15Naomi 'eka arahu 'uri'ene, resia kau, <<Keni hoemu 'eka ori no'o tarea ta'a naia ma tarea hi 'aremaea naia. 'Oko ori no'o ha'ania 'Opa.>>
16Tairihi Rutu 'eka orisia 'uri'ene, <<'Osi tau ma 'o pepesi nau hana na ka ina'ani 'o ma kane ru'u 'osi pepesi nau hana na ka ori mania raha su'amu. Tahuna rihi oko ra ha'i na ka ra ha'i, ma rihi tahai 'oko 'oni a'i taina na ka 'oni a'i. Ta'a 'o kira ka rau hana ta'a nau ma Warato'o 'o 'e Warato'o nau. 17Rihi 'oko mae a'i taina na mae a'i, ma taina oha aku 'eka rao rau a'i. Raita'inia Iawe 'eka to'iha'i nau, ma wa'iha rika'a naia 'eka 'oni hahi nau, 'are mara te 'are 'eka torihitari kura na'oha maeha 'eka mosi kura.>>
18Horo'a Naomi 'e tau taria Rutu raena 'e 'okira hana 'eka ra ha'ania no'o ma 'e topo hana pareana.
19Naina rua keni 'ene kero ra no'o rara kero hura wau Peterehemu. Horo'a kero hura raona Peterehemu, 'ami'raiha paina 'e rau raona hanua ha'eraku tonaana keroa, ma hi keni kira ka arahu no'o 'uri'ene, <<Inaia Naomi no'o 'ai'ene?>>
20<<'Au si ha'ahoi nau ana Naomi,>> 'eka arahu 'urina tare kira. <<'Au ka ha'ahoi nau ana Mara, Tonaana Warato'o 'e taua maurihaku 'e 'aha. 21Na ra mania tai'ene na honu ana rautana 'are, tairihi Iawe 'e oriha'i nau mai kapukapu. Tamana ita 'au ka ha'ahoi nau ana Naomi? Iawe 'e ura suara nau ma Shaddai 'e tau ma'asianaha paina hahi nau>>.
22Naomi 'e ori mania Moapu ha'ania Rutu keni ni Moapu, hunona, kero hura raona Peterehemu, horo'a hana roiana Pari 'eka tara'ae.
ទើបបានជ្រើសរើសហើយ៖
Rutu 1: ALU
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, Islands Bible Ministries. All rights reserved.