लूका 9
9
बारां चेल्लैं का घलाया जाणां
(मत्ती 10:5–15; मरकुस 6:7–13)
1पिछैं यीशुऐं बारैं चेल्लैं कु सात्थी बुलाइकना, उनकु दुष्टात्मा काढणैं अर बिमारीयैं कु दूर करनै कि शक्ती अर हक दिया। 2अर पिछैं उनकु परमेश्वरा के राज्जा का प्रचार करनै अर बिमारैं कु ठीक करनै वास्तै घलाया। 3अर यीशुऐं उनथै कैहया कि, “आपके सफरा वास्तै काइं भी सात्थी ना लवैं ना खुण्डीया, ना झोळी, ना रोट्टी, ना पैसा, अर नाही दो-द्दो कुड़ते। 4अर थम जिस घरा म जावो, ओठ्ठी रहिय्यो, जिदा ताइं थम उस शहरा थ निकळी ना जावो। 5अर जो कोइ थारा आदर ना करै, तो उस शहरा थ निकळतिया हाणी आपके पाँवां कि माट्टी झाड़ी लियो, कि उनकै खिलाफ या गवाही होवै।”
6अर वो ओठ्ठै थ जाई गाँवैं-गाँवैं म शुभसमाचार सुणाउवते रहे, अर हर जाघ्घा लोक्कैं कु बिमारीयैं थ सूल करते रहे।
हेरोदेस्सा का उळझणा
(मत्ती 14:1–12; मरकुस 6:14–29)
7 #
मत्ती 16:14; मर 8:28; लूका 9:19 अर गलील परदेस्सा का राजा हेरोदेस, जो होया करया वो सुणीकना घबराई गया, क्योंकि कइय्यैं इदा कैहया कि, “यहून्ना मरोड़ैं माहला जीवी उठ्या।” 8अर कइय्यैं या कैहया, कि एल्लियाह दिस्या है, अर कइय्यैं या कैहया, कि पुराणे नबीयैं माहला कोइ जीवी गया, 9पर हेरोदेस्सैं कैहया, “इब या कोण आया, जिस्के बारे म हूँ ये बात्तां सुणया करता हैं? क्योंकि यहून्ना का सिर तो मैं ही कटवाया थिया।” अर राजैं उसथै मिलणैं कि कोशिश करी।
पाँच हजार लोक्कैं कु खुआणा
(मत्ती 14:13–21; मरकुस 6:30–44; यूहन्ना 6:1–14)
10जिद #9:10 प्रेरीत, जिस्का मतलब वो बारां चेल्ले जिनकु यीशुऐं खास अधिकार अर शक्ती देइकना सेवा के काम्मा वास्तै घलाया।चेल्ले पुठ्ठे यीशुआ धौरै आये, अर उनूर जो काइं करया थिया सारा काइं उसकु बताया, पिछैं यीशु उनकु आपकै सात्थी चुप-चाप एक बैतसैदा नावाँ के शहरा म लेई चल्या गया। 11अर जिद भीड़ा कु इस बात्ता का पता चाल्या तो वो भी उसकै गैल्लै चले गये, अर वो उनथै खुश होई मिल्या, अर उनथै परमेश्वरा के राज्जा कियाँ बात्तां बताणैं लाग्गी गया, अर जो बिमारीयैं थ आच्छे होणा चाहते थे, उनकु आच्छा करया।
12अर जिद साँझ होणैं लाग्गी, तो बारां चेल्लैं आइकना यीशुआ थ कैहया, “भीड़ा कु घलाइद ताकी धौरै के गाँवैं म अर ढाणियैं म जाई बसेरा करैं, अर रोटिया कि त्यारी करैं, क्योंकि हम तो सूनिया जाघ्घा म हाँ।”
13यीशुऐं उनथै कैहया, “थमी उनकु खाणैं दो।” उनूर कैहया, “म्हारै धौर तो पाँच रोटियैं अर दो मछीयैं क अलावा काइं भी कोइन, पर शायद, अगर हम मोल्ला कि रोट्टी इनकै वास्तै लवां तो काइं होई सक्ता है।”
14क्योंकि ओठ्ठै लगभग पाँच हजार सिर्फ मर्द थिये। पिछैं यीशुऐं चेल्लैं थ कैहया, कि “इनकु पचासैं-पचासैं के झुण्डा म बिसाई दवो।”
15अर उनूर इदा ही करया अर सारैं कु बिसाई दिया। 16पिछैं यीशुऐं पाँच रोटियाँ अर दो मछीयाँ लेइकना, स्वर्गा वळ दे ख्या अर शुकर करया, अर रोटियाँ तोड़-तोड़ी चेल्लैं कु देत्ता गया अर वो लोक्कैं कु बाँटते रहे। 17अर जिद सारे रोट्टी खाई धाप्पी गये, पिछैं चेल्लैं बचोड़े टोट्टैं माहले बारां भरोड़ियां टोक्करीया चाइंयाँ।
पतरसा का यीशुआ कु मसीह मानणा
(मत्ती 16:13–19; मरकुस 8:27–29)
18एक बारी जिद यीशु एकला प्रार्थना करया-करया, अर उस वक्त चेल्ले उसकै सात्थी थिये, तो उनु उनथै बुझ्झया, “लोक मेरे बारे म क्या कैहते हैं कि हूँ कौण हैं?”
19 #
मत्ती 14:1,2; मर 6:14,15; लूका 9:7,8 उनूर जवाब दिया, “कोइ तो चिकु यहून्ना बत्तीस्मा दैणैं आळा कैहते हैं, अर कई एल्लियाह, अर कई कैहते हैं कि पुराणे नबीयैं माहला कोइ जीवी आया है।”
20 # यूह 6:68,69 उनु उनथै कैहया, “पर थम मिस्कु क्या मानते हो कि हूँ कौण हैं?” पतरसैं जवाब दिया “परमेश्वरा का घलाओड़ा मसीहा।”
21पिछैं यीशुऐं उनथै चिताइकना हुकम दिया, “या बात किसी थ भी ना कहीयो।”
यीशुआ का आपकिया मौत्ती के बारे म बताणा
22यीशुऐं आपके चेल्लैं थ कैहया, “या बात तो जरूरी है, कि इन्सान्ना का बेट्टा घणैं दुखैं कु झेल्लगड़ा, अर यहूदी अगुवे अर यहूदी शास्त्रीयैं अर प्रधान याजकैं के जरीये थ नकारया जाग अर मरवाया जाग। पर तीसरे दिन दुबारै जिवाई दिया जाग।”
23 #
मत्ती 10:38; लूका 14:27 पिछैं यीशुऐं उन सारैं थ कैहया, “अगर कोइ भी मेरै गैल्लै आणां चाहता है, तो अपणे-आप्पा का त्याग करी दै, अर रोज़ आपका क्रूस चाई मेरै गैल्लै होई लवै। 24#मत्ती 10:39; लूका 17:33; यूह 12:25क्योंकि जो कोइ आपकी जान बचाणा चाहता है, वो उसकु खोइ दैग, अर जो कोइ मेरै वास्तै आपकी जान गवागड़ा, तो वो उसकु बचाई लैग। 25अगर इन्सान पूरीया दुनिया कु हासील करी लै, अर आपकी जान गवाई दवै, या फैरी उसका दु:ख चावै, तो उसकु क्या फैदा? 26जो कोइ मेरै थ, अर मेरीयैं बात्तैं थ शरम करगड़ा, तो इन्सान्ना का बेट्टा भी, जिद आपकिया, अर आपके बाप्पा किया अर पवित्र स्वर्गदुत्तैं किया महीमा सात्थी आउगड़ा, तो उसथै भी शरम करग। 27हूँ थमकु सच कैहता हैं, एठ्ठै खड़े लोक्कैं माहले तो कई ऐस्से भी हैं, जिनकु परमेश्वरा का राज देक्खे बिना मौत कोइन आवै।”
मूसा अर एल्लियाह सात्थी यीशु
(मत्ती 17:1–8; मरकुस 9:2–8)
28इन बात्तैं के लगभग आठ दिनै बाद यीशु, पतरस यहून्ना अर याकुबा कु लेइकना प्रार्थना करनै पहाड़ा पर गया। 29जिद यीशु प्रार्थना करया-करया, तो यीशुआ के मोह का रूप ही बदली गया, अर उसके कापड़े चमकी गये अर चिट्टे होई गये। 30-31अर जिधी महीमा म होइकना मूसा अर एल्लियाह यीशुआ थ बात्तां करते दिस्से, अर वो यीशुआ थ उसकिया मौत्ती के बारे म चर्चा करया करे, जो यरुशलेम्मा म होणैं आळा थिया। 32पतरस अर उसके सात्थी निन्दा थ भरोड़े थे, अर जिद वो पूरीया तरीक्के थ जगी आये, तो उनूर यीशुआ कि महीमा अर उन दोन्नो जणैं कु जो यीशुआ सात्थी उब्भे थिये देक्खे। 33अर जिद वो दोन्नो जणे उसकै धौरले जाणैं लाग्गे, तो पतरसैं कैहया, “हे गुरू म्हारा एठ्ठै रहणा कितनी आच्छी बात है, अर हम एठ्ठै तीन तम्बू गाड्डंगड़े, एक तेरै वास्तै अर एक मूसा वास्तै, अर एक एल्लियाह वास्तै।” पर उसकु साच्चैं ही पता कोइन थिया कि वो क्या कैहया करता है।
34अर ये बात्तां पतरस कैहया ही करया, जिधी एक बाद्दळ छाई गया अर उनकु घेरी लिन्हा, अर जिद वो उस बादळा थ घिरया करे तो वो डरनै लाग्गी गये। 35#मत्ती 3:17; 12:18; मर 1:11; लूका 3:22#2 पत 1:17,18अर जिधी उस बादळा माहली या अवाज़ आई, “या मेरा चुणोड़ा बेट्टा है, इसकी सुणो।”
36इस अवाज्जा क बाद्दाम, उनकु यीशुआ क अलावा ओठ्ठै कोइ भी कोइन दिस्या, अर उनूर या बात आपकै ताइं ही राक्खी, अर जो काइं उनूर देख्या थिया उन दिनै म उसके बारे म किसी थ काइं भी कोइन कैहया।
दुष्टात्मा थ लड़के कु छुटकारा
(मत्ती 17:14–18; मरकुस 9:14–27)
37अगले दिन यीशु अर उसके चेल्ले पहाड़ा थ उतरी आये, अर एक बड़ी भीड़ यीशुआ थ मिली। 38पिछैं भीड़ा माहला एक बन्दा ऊँचिया अवाज्जा थ कैहणैं लाग्गी गया, “गुरू जी हूँ तेरै थ हाथ जोड़ी कहता हैं, मेरे बेट्टे पर ध्यान दे, क्योंकि वो मेरा एकलोत्ता बेट्टा है। 39देख, इस्कु एक दुष्टात्मा पाक्कड़ती है, अर या एकला कुकता है, अर वो इस्कु इदा मरोड़ती है, कि इसके मोह म झाग भरी जात्ता है, अर उसकु घणी औक्खी छोड़ती है, अर वो इसकी जान लैणा करती है। 40मैं तो तेरे चेल्लैं थ मीन्त करी थी, कि वो इस्कु काढ्ढी दवैं, पर वो कोइ काढ्ढी सके।”
41यीशुऐं जवाब दिया, “अरे अविश्वासी अर भटकोड़े लोक्कों, हूँ किदा ताइं थारै सात्थी रहंग अर थारीयाँ सहता रहंग? तेरे बेट्टे कु मेरै धौरै लेइआ।”
42अर जिद वो आया ही करया तो दुष्टात्मैं उसकु पटकीकना मरोड़ी दिया, पिछैं यीशुऐं उस गन्दिया दुष्टात्मा कु झिड़क्या, अर लड़के कु सूल करीकना उसके बाप्पा कु सोंप्पी दिया।
43वो सारे लोक परमेश्वरा किया महान शक्तिया थ चौंक्या करे,
यीशुआ का आपकिया मौत्ती के बारे म दुबारै बताणा
(मत्ती 17:22,23; मरकुस 9:30–32)
अर जिद लोक यीशुआ के सारे काम्मैं थ चौंक्या करे, तो यीशुऐं आपके चेल्लैं कु कैहया। 44“ये बात्तां थारै कान्नै म हमेशा रैहैं, क्योंकि इन्सान्ना का बेट्टा, इन्सान्नै के ही हात्था थ पकड़वाया जाणैं आळा है।” 45पर चेल्ले इन बात्तैं कु कोइ समझते थिये, इसकरी ये बात्तां उनथै छपाओड़ियाँ थिया ताकी वो समझी ना सकैं, अर वो इन बात्तैं के बारे म उसथै बूझणैं थ डरते थिये।
सारैं थ बड़ा कोण?
(मत्ती 18:1–5; मरकुस 9:33–37)
46 #
लूका 22:24
एक बारी चेल्लैं म या बहस होणैं लाग्गी गई कि म्हारै माहला बड़ा कोण है? 47पर यीशुआ कु उनके मनैं कि बात पता थी, अर उनु एक्की बच्चे कु आपकै धौरै उब्भा करया, 48#मत्ती 10:40; लूका 10:16; यूह 13:20अर उनथै कैहया, “जो कोइ मेरे नावाँ थ इस बच्चे कु अपणात्ता है, वो मिस्कु अपणात्ता है, अर जो कोइ मिस्कु अपणात्ता है, वो मेरे घलाणैं आळे कु अपणात्ता है, इसकरी थारै माहला जो सारैं थ ल्होड़ा है, वो ही बड़ा है।”
जो थारा बैरी कोइन वो थारै सात्थी है
(मरकुस 9:38–40)
49यूहन्नैं कैहया, “हे गुरू, हमु एक्की जणे कु तेरे नावाँ थ दुष्टात्मैं कु काढतोड़ा देख्या है, अर हमु उसकु या करनै थ रोक्या भी, क्योंकि वो म्हारे सात्था का कोइन थिया।”
50यीशुऐं उसकु कैहया, “उसकु ना रोक्को, क्योंकि जो थारा बैरी कोइन वो थारै वळ ही है।”
सामरी लोक्कैं का यीशुआ कु नकारना
51जिद यीशुआ का स्वर्गा म उठाये जाणैं का दिन नेहड़ै आणैं पर थिया, तो यीशुऐं यरुशलेम शहरा म जाणैं का मन बणाई लिया। 52अर उनु आपके कुछ दुत्तैं कु पैहलै ही आग्गै घलाई दिया, अर वो सामरीया#9:52 सामरीया सामरी इल्लाक्कै म रैहणैं आळे, इस्राएल्ला के लोक जिनु दुसरीयैं जातियैं थ ब्याह करे थिये उनकियैं पीढ़ियैं कु सामरी कैहते हैं। अर वो यरुशलेम्मा म अराधना कोइ करते थिये। अर यहूदी लोक उनकु बेकार समझते थिये। के एक्की गाँवाँ म गये, ताकी उसकै वास्तै त्यारी करैं। 53पर सामरीया के लोक्कैं यीशुआ का आदर कोइन करया, क्योंकि वो यरुशलेम शहरा म जाया करया। 54अर या देक्खी उसके चेल्ले याकूब अर यहून्ना कैहणैं लाग्गी गये, “प्रभु अगर तौं चाहता हैं, तो हम हुकम देंवा, कि आसमान्ना थ आग आई इनकु भस्म करी दवै?”
55पर यीशुऐं उनकै वळ मुड़ीकना देख्या अर उनकु झिड़क्या, अर कैहया, “क्या थमकु कोइन पता कि थम किस आत्मा के हो? क्योंकि इन्सान्ना का बेट्टा लोक्कैं किया जान्नी कु खतम करनै नाही, बल्की बचाणैं वास्तै आया है।” 56पिछैं वो किसी होरी गाँवाँ म चले गये।
यीशुआ गैल्लै चालणैं का मतलब
(मत्ती 8:19–22)
57अर जिद वो रस्ते म जाया ही करे, तो किनी यीशुआ थ कैहया, “जड़ै-जड़ै तौं जांगड़ा, हूँ तेरै गैल्लै चालंग।”
58यीशुऐं उसकु कैहया, “लोमड़ियैं के दर, अर अकाश्शा म उड़णैं आळे पंछिय्यैं के घोसले होत्ते हैं, पर इन्सान्ना के बेट्टे कु सिर ढकणैं कि भी जाघ्घा कोइन।”
59पिछैं यीशुऐं दूसरे कु कैहया, “मेरै गैल्लै होइजा” उनु कैहया, “हे गुरू पैहलै मिस्कु जाई मेरे बाप्पा कु गाड्डी लैण दे।”
60यीशुऐं उसथै कैहया, “मरोड़ैं कु आपके मुर्दे गाड्डण दे, अर तौं जाई परमेश्वरा के राज्जा का प्रचार कर।”
61एक्की होर जणैं उसथै कैहया, “हे प्रभु, हूँ भी तेरै गैल्लै होई जाँग, पर पैहलै मिस्कु घरलैं थ विदाई लेई लैण दे।”
62यीशुऐं उसथै कैहया, “जो कोइ आपका हाथ हळा क उप्पर धरी गैल्लै मुड़ी देखता है, वो परमेश्वरा के राज्जा क लायक कोइन।”
ទើបបានជ្រើសរើសហើយ៖
लूका 9: Sansi
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
New Life Literature
