Matius 7
7
Ka kete mfyasale tomwatar nema Ratu kete nfasale kmi
7:1-5
(Luk. 6:37-38; 6:41-42)
1Yesus nfalak ber tomwat ngayadin, “Ka kete mfyasale tomwatar nema Ratu kete nfasale kmi. 2Fali farlan kmi mtyetak feti tomwatar rose sale, keta Ratu ntetak feti kmi myose sale nbal. Ma Ratu keta nal yayatrwar ma mpyaki la mtyetak tomwatar nir salar a ne la ntetak mir salar a nbal.#Mrk. 4:24 3Katutun sit ma namin wamir matnir e kmi msyalan, ma balak ma namin matmir e to mkyeban. 4Mpa ka kete mfyalak ber wamir feti, ‘Awa, mwa ma kwalin kalin katutun sit kof matam dalam a ne,’ safo balak ma namin matmir a ne to mkyeban. 5Hei tomwatar ma myose felmir farlan tomwat ngamonar, myalin kalin balak ma namin matmir dalam a ne fuky, nema mkyeban miflyonri ma bise myalin kalin katutun sit myof wamir matnir.”
Ka kete myal kabain ngafelar nof Ratu ber tomwatar ma to rlangun I
7:6
6Yesus nfalak tnyanuk pupule farye, “Ka kete myal kabain ngamonar ma nof Ratu ne ber asu, fali keta asu ne nbal i ma nkarat a kmi. Ma kete myal mutiara ber babi, fali keta babi natai motak mutiara ne, mpa to ubany sasaf.”
Yesus naftutu tomwatar ma rtak safe ma rperlu rof Ratu
7:7-11
(Luk. 11:9-13)
7Yesus nfalak, “Mtyak dedesar myof Ratu, keta I nal ber a kmi. Ma minriak safe ma mpyerlu myof I a ne keta nal ber a kmi. Ma dedesar ma mtyar ngarany nema keta nbanril fofolat ber a kmi. 8Fali tomwate ma ntak nof Ratu keta nal ber i. Tomwate ma nanriak ni perluar nof Ratu keta nal ber i. Ma tomwate ma dedesar ma ntar Ratu ngarany, keta nbanril fofolat ber i a nbal. 9No mdyaun, farlan tomwatar sa nof a kmi ye, anaky a ntak roti keta myal bati ber i e? 10Nre ntak ian e keta myal kasi ber i e? Tate nre. 11Boloka tomwat yatkar a kmi nempa mifai ma myal kabain ngamonar ber angkimir. Ma nlengan e Amir ma namin surga ne, fali I nafai desar ma nal kabain ngamonar ber sir ma rtak rof I a ne.”
Anftutu ma ubany desar
7:12
12Yesus nfalak, “Safe-safe ma kmi mpyeang ma tomwatar rose ber a kmi, ka myose farane ber sir a nbal. Fali ni botuan e iane anftutu ma ubany desar. Ma safe-safe monuk ma rarengi na tetetkar ma Ratu nal ber Musa, ma nabyar nir kitpar a ne, iane nof anftutu ma ubany desar a ne.”#Luk. 6:31
Dalamtene ma nor tomwatar ma ronri momorip dedesar iane dalamten mpalole
7:13-14
(Luk. 13:24)
13Yesus nfalak, “Wangur, farlan mireke ma myonri momorip dedesar, ka mpyan milyole fofolat mpalole, fali dalamtene ma ral far neraka ne melabar ma tomwatar yadin nlanre rof a ne. 14Nempa fofolat ma dalamtene ma nor tomwatar ma ronri momorip dedesar a ne marumat ma mpalole. Ma lan tomwatar ketnir ma rlanre rof a ne.”
Ka mijake kmi myof nabi wawatar nir anftutwar
7:15-23
(Luk. 6:43-44)
15Yesus nfalak, “Ka mijake kmi myof tomwatar ma rose felnir far nabyar ma rafwibar Ratu Ni ngribatnir, nempa ni botuan e sir rayatak desar farlan asw alas mangaresar. 16Kmi bise ma mifai feti sir a ne Ratu Ni nabyar nre nabi wawatar nof nir adat ma rfatutu ne. Iane feleles farlan kit tafai katutun a ne nof buany. Ma tomwatar to rtikar ara buany rof skiki kakari, ma to rtikar anggur buany rof katutun matdyemnir. 17-18To katutun fen lese ma nangafel ma keta buany to nangafel, nre to katutun fen lese nbal ma to nangafel ma keta buany nangafel. Ma farlan katutun ma nangafel keta buany nangafel, nempa katutun ma to nangafel keta buany to nangafel a nbal. 19Ma katutun ma nabu e to nangafel la rketan ma ryebas far au dalam.#Mat. 3:10; Luk. 3:9 20Katutun a ne farlan tomwatar ma rose felnir far nabi wawatar. Mpa kit bise ma tafai feti sir a ne Ratu Ni nabyar nre nabi wawatar tof safe ma sir rose ne.”#Mat. 12:33
21Yesus nfalak, “Tomwatar yadin rtar ngarangw ma rfalak feti, Yakw ye nir Mangnrure, nempa lan ketnir nof sir a ne ma keta reluk Ratu Ni tomwatar noak ma I nfarete neluk Rai. Ma lan sir ma rose rlarat Amangw ma namin surga ne Ni mpempeang ma keta reluk Ratu Ni tomwatar. 22Na lere ma Ratu ntetak tomwatar nir ngriar keta yadin ma rfalak, ‘O Mangnrure Ko, kam mal Ko ngaram ma mafwibar Nim ngribatnir lo. Ma kam mal Ko ngaram ma matian kalin smwangat yatkar, ma mose ngrimpasalnar a nbal.’ 23Mpe keta kfwalak desar ber sir, ‘Yakw to kufai kmi! Kmi ye ma myose kabain yatkar. Mbyie myof ye!’”#Mzm. 6:9
Das ma namkoran ma das ma to namkoran
7:24-27
(Luk. 6:47-49)
24Yesus nfalak a nbal, “Tomwate ma ndengar Ningw ngribatnir ye ma nose a nlarat, keta i farlan tomwate ma ni andaun ngamone ma nafdiri ni das na bati das. 25Nait ma udan a mnaur ma kjaip nma ma nose ma nrake das a ne, keta das a ne to namprak fali rafdiri das a ne na bati das. 26Ma tomwate ma ndengar Ningw ngribatnir ye nempa to nose nlarat, i farlan tomwat mode ma nafdiri ni das na knryai. 27Nait ma udan a mnaur ma kjaip nma ma nose ma nrake das a ne, keta das a ne namprak ma namsos desar.”
Yesus naftutu tomwatar nor Ni kuase
7:28-29
28Lama Yesus naftutu monuk, tomwat ngayadin a ne rampriang desar, ma rdengar Ni anftutwar. 29Fali I natanuk e farlan tomwat sa ma Ni kuase, ma to far mangaftutu Musa ni faretar.#Mrk. 1:22; Luk. 4:32
ទើបបានជ្រើសរើសហើយ៖
Matius 7: YMD
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Yayasan Pemberdayaan Masyarakat Desa © Wycliffe Bible Translators, Inc. All rights reserved.
