Luki 3
3
Wutɔnŋ Yuhana wɔ waajulu ki
(Matiyu 3.1–12; Maraka 1.1–8; Yuhana 1.19–28)
1Masa sinaŋ Tibɛri wɔ faan ki jiri bwununtaantɔnŋ ki, Pɔnsi Pilati wuru Yude kɛniŋ ki ŋununtiŋ ki i. Ɛrɔdi i ji Galile kɛniŋ ki ŋununtiŋ ki i, wú tindaŋ Filipu i ji Iture niŋ fa Tarakoniti sɔɔta kiri ŋununtiŋ ki i. Lisaniyasi wuru Abilɛni sɔɔta ki ŋununu. 2Anasi fa Kayifu wuru niŋ waarinŋ ki ru Kirinŋ tɛ sarakawɔrɔtɔnŋ kiri ŋununtiŋ kiri i. Niŋ waaci ki ru, Kirinŋ Jakaliya danshuru Yuhana cin-i awɔ wulu ki wu. Yuhana wuru Yude, jaŋ fan. 3Niŋ ki ra, Yuhana i tiri Yurudɛn baa tonfan mani kiri bataa ra. Ntiŋ wuru ǹʼsunjo-a konaŋ kiri tɛ tu kí ntɔri bi arɔɔ bijɛ mamaan kiri ra, kí i na Kirinŋ tɛ, kí i wu, nwɔma Kirinŋ i kɔ́ɔ́ bijɛ kiri tu kí tɛ. 4Niŋ ma-i, miŋ tu ǹʼsɛbɛ-i Kirinŋ wɔ cintɔnŋ Esayi wɔ sɛbɛ ki ru ɲaan wɔ̀ tɛ tu :
« Koŋ bɛɛ i fali-la jaŋ ki faninmwuŋ tu :
‹ Á Ŋuntiŋ ki wɔ saa ki ramɔni,
á i ǹʼwɔ saa pyaanŋ kiri teli.
5Kukuta kiri bataa ra na naye,
tɔnŋ kiri fa tintiŋ kiri bataa ra na gwu kɛɲɛ.
Saa kɛrimaan kiri bataa ra na teli,
demaŋ jɛ kiri fɔn i ramɔni.
6A niŋ ma, koŋ bataa ra na Kirinŋ wɔ koŋ mwuka ɲaan ki ja. › »#Esayi 40.3–5.
7Jama wɔ̀ri wuru ta-a Yuhana tɛ, tu arì wu, ntiŋ wuru ǹʼbi-a nini tɛ : « Ábɛɛ fɔnfɔniŋ daŋ kari! Nkɛnŋ ábɛɛ racin á i bili po san-ni Kirinŋ wɔ tɔnkwulu naanna ki jɛŋ sa? 8Á bi shɔɔrinŋ ni ma, nwɔ̀ri ra ǹʼji tu ábɛɛ ntɔri bi áwɔ bijɛ kiri ra. Á fa ǹʼsunu tu ábɛɛ Aburahamu daŋ ni i#3.8 Aburahamu daŋ ni i : Yawutu kiri bɛɛ ri wuru ǹʼbi-a tu arìbɛɛ Aburahamu daŋ ni i, tu niŋ a arìbɛɛ mwu Kirinŋ wɔ kiti ki wu. Yuhana 8.33, 37, 39 niŋ mani ki kali., tu niŋ a ábɛɛ mwu kì dɛ! Míŋ a ǹʼbi ábɛɛ tɛ, tu nupobi ki ji i, ńʼtu Kirinŋ a so kwɔ kari ji-i Aburahamu daŋ ni i. 9Á á yɛri paka tɔ dɛ! Pulu ki fɛshi-i jirinŋ ki fa a kanaŋ ki kwurumaanna ki tɛ kɔ. Jirinŋ finŋ woo finŋ daŋ shɔɔrinŋ pa-a kì, niŋ bataa ra kwuru bo tuu ru. »
10Jama ki wuru Yuhana nanɔri-ra : « Niŋ na, yibɛɛ kakan yi i nfɛnŋ ma? »
11Ntiŋ wuru kí rupwulu-la tu : « Jɛrɛbi fuuli i nwɔ̀ gbɛ, niŋ tenŋ wɔri ǹʼbali tɛ. Nufinŋ i nwɔ̀tiŋ gbɛ, niŋ niŋ nukila a fa nufinŋ bali ki bɛɛ tɛ. »
12 Ɲinisarakɔlɔtɔnŋ kari fɔn wuru na-a Yuhana tɛ, tu arì wu. Nini i ntiŋ nanɔri tu : « Kalimɔɔ, yibɛɛ kakan yi i nfɛnŋ ma? »
13Ntiŋ i kí rupwulu tu : « A jalinŋ tɔnŋ wɔ̀ bi ábɛɛ tɛ, á fa ǹʼtɔri mwu bo niŋ sun kì. »
14Surudashi bɛɛ ri i Yuhana nanɔri : « Yibɛɛ ji? Yibɛɛ kakan yi i ǹʼdanwɔ ma? » Ntiŋ tu kí tɛ : « Á fa koŋ wɔ jalinŋ mwu san ntiŋ wu faan sun walima puru sun kì, á tu áwɔ sali ki sun. »
15Konaŋ kiri wuru Kirinŋ Ɲaannakonshimaan ki na ki saarashɛɛli ki wɔ̀ tan-a, niŋ na, kí wuru arì ciiru kwuru-ra Yuhana sun, tu mìntiŋ ki a ji niŋ i. 16Niŋ ki ra, Yuhana i ǹʼbi kí bataa tɛ :
« Míŋ i ábɛɛ wu-a ju ra, nka koŋ bɛɛ yirira i nmaŋ, nwɔ̀ wɔ so ki gbɛ-i mɔ́ɔ́n ki wu, míŋ ŋuniŋ kuru-i niŋ wɔ kari yaa pilitɔnŋ i. Niŋ a na ábɛɛ wu Ɲiniwɔlinŋ ki fa tuu ra. 17Ntiŋ wɔ finŋ numyɛɛn kɛrinŋ#3.17 kɛrinŋ : Kɛrinŋ ki i sɔɔ-ra bilanaŋ ki fa ǹʼkɛnŋ ki i san amaŋ na. Niŋ ɲaan ki tɛ, ǹʼkɛnŋ ki i tiri-ra faa fan. ki i ntiŋ gbɛɛra, ntiŋ a na bilanaŋ ki fa ǹʼkɛnŋ ki po san arìmaŋ nu awɔ kiniŋ ki ra. Ntiŋ a na bilanaŋ ki bo awɔ cinŋ ki ru, ntiŋ i ǹʼkɛnŋ ki bo tuu ru, tuu wɔ̀ byi-a kì. »
18Yuhana konaŋ ki racin-i niŋ wulu ki bishi mwɔɔnna wu. Niŋ ɲaan ki tɛ, ntiŋ i Kirinŋ wɔ Wulujii ki bi kí tɛ.
(Matiyu 14.3–4; Maraka 6.17–18)
19Nka jibi bɛɛ, Yuhana i na jɛbi Ɛrɔdi Antipasi gbɛ, niŋ i kila, ntiŋ a tindaŋ Filipu wɔ mari Ɛrɔdiyadi mwu san wuru niŋ wu. Ntiŋ i níŋ ji awɔ mari i, niŋ fa, ŋì i bo ntiŋ wɔ bi kulinŋ mamaan mwɔɔnna tɔri ri sun. 20Ntiŋ i ǹʼbɛɛ bo awɔ bi kulinŋ mamaan ki sun sɛbɛ, ntiŋ i Yuhana pa bo nkasu ru.
Yesu wu bi ki Wutɔnŋ Yuhana gbɛ
(Matiyu 3.13–17; Maraka 1.9–11)
21Waarinŋ wɔ̀ ru, Yuhana bo-ri nkasu ki ru sun kì, konaŋ ki bataa wuru a wu-a ntiŋ gbɛ. Yesu yɛrima ki i na a wu. Yesu wumaan ki kɔɔtɛ, ntiŋ i a bo Kirinŋ nafɛ sun. Ntiŋ tu-i niŋ na, kirinpɔli ki i nawwulu. 22Ɲiniwɔlinŋ ki i ji miŋ tu kilaaŋ fɔ, ŋì i jɛri ntiŋ sun. Wulu bɛɛ i po kirinpɔli ki ra, ŋì i ǹʼbi : « Miŋ i míŋ dintɛ Danshuru ki i. Miŋ bi ki gbɛ-i míŋ gbɛ haali. »#Shu kiri 2.7; Esayi 42.1.
Yesu cunsaa ki
(Matiyu 1.1–17)
23Yesu jiri kɔniŋ fa byinŋ bishi kila-i waarinŋ wɔ̀ ru, ntiŋ i awɔ baara ki tɔnpa.
Ŋì i kɛɲɛ konaŋ kiri wɔ ɲakilila ki wu, Yesu i Yusufu daŋ i.
Yusufu i ji Eli daŋ i.
24Eli wuru Matati daŋ i,
Matati i ji Lewi daŋ i.
Lewi wuru Mɛlɛki daŋ i,
Mɛlɛki i ji Yanayi daŋ i.
Yanayi wuru Yusufu daŋ i,
25Yusufu i ji Matatiya daŋ i.
Matatiya wuru Amɔsi daŋ i,
Amɔsi i ji Nawumu daŋ i.
Nawumu wuru Esili daŋ i,
Esili i ji Nagayi daŋ i.
26Nagayi wuru Maati daŋ i,
Maati i ji Matatiya daŋ i.
Matatiya wuru Semeŋ daŋ i,
Semeŋ i ji Yosɛki daŋ i.
Yosɛki wuru Yoda daŋ i,
27Yoda i ji Yowanaŋ daŋ i.
Yowanaŋ wuru Eresa daŋ i,
Eresa i ji Nsorobabɛli daŋ i.
Nsorobabɛli wuru Salatiyɛli daŋ i,
Salatiyɛli i ji Nɛri daŋ i.
28Nɛri wuru Mɛlɛki daŋ i,
Mɛlɛki i ji Adi daŋ i.
Adi wuru Kosamu daŋ i,
Kosamu i ji Elimadamu daŋ i.
Elimadamu wuru Ɛri daŋ i,
29Ɛri i ji Yesu daŋ i.
Niŋ Yesu tɔ ki wuru Eliyɛnsɛri daŋ i,
Eliyɛnsɛri i ji Yoromu daŋ i.
Yoromu wuru Matati daŋ i,
Matati i ji Lewi daŋ i.
30Lewi wuru Simeyɔnŋ daŋ i,
Simeyɔnŋ i ji Yuda daŋ i.
Yuda wuru Yusufu daŋ i,
Yusufu i ji Yonamu daŋ i.
Yonamu wuru Eliyakimu daŋ i,
31Eliyakimu i ji Mɛlɛya daŋ i.
Mɛlɛya wuru Mɛna daŋ i,
Mɛna i ji Matata daŋ i.
Matata wuru Natamu daŋ i,
Natamu i ji Dawuda daŋ i.
32Dawuda wuru Yesayi daŋ i,
Yesayi i ji Yobɛdi daŋ i.
Yobɛdi wuru Boonsi daŋ i,
Boonsi i ji Sala daŋ i.
Sala wuru Naasɔn daŋ i,
33Naasɔn i ji Aminadabu daŋ i.
Aminadabu wuru Adimini daŋ i,
Adimini i ji Arini daŋ i.
Arini wuru Ɛsirɔmu daŋ i,
Ɛsirɔmu i ji Farɛsi daŋ i.
Farɛsi wuru Yuda daŋ i,
34Yuda i ji Yakuba daŋ i.
Yakuba wuru Ishaka daŋ i,
Ishaka i ji Aburahamu daŋ i.
Aburahamu wuru Teraki daŋ i,
Teraki i ji Nahɔri daŋ i.
Nahɔri wuru Seruku daŋ i,
35Seruku i ji Aragawu daŋ i.
Aragawu wuru Falɛki daŋ i,
Falɛki i ji Ebɛri daŋ i.
Ebɛri wuru Sala daŋ i,
36Sala i ji Kayinamu daŋ i.
Kayinamu wuru Arifasadi daŋ i,
Arifasadi i ji Sɛmu daŋ i.
Sɛmu wuru Nawu daŋ i,
Nawu i ji Lemɛki daŋ i.
37Lemɛki wuru Matusala daŋ i,
Matusala i ji Enɔki daŋ i.
Enɔki wuru Yarɛti daŋ i,
Yarɛti i ji Malɛlɛyɛli daŋ i.
Malɛlɛyɛli wuru Kayinamu daŋ i,
38Kayinamu i ji Enɔsi daŋ i.
Enɔsi wuru Sɛti daŋ i,
Sɛti i ji Adama daŋ i.
Adama i ji Kirinŋ daŋ i.
ទើបបានជ្រើសរើសហើយ៖
Luki 3: JOB
គំនូសចំណាំ
ចែករំលែក
ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc.