Mark 4
4
Vanten ge rrō rongta sene tatabarryean ge Iyesu rrō fe, Yafukon eb kutaōne metan te eb yekya sene.
1 # Luk 5:1-3 Mōl mōn en tahi Tee Kakre Kalili, Iyesu te rrō whure vanten nyer. Te tebyan ge vanten err ve lol ho en ōrr ge le, te rrwene ge te a ran afloo kakae ge te e rru lon tee kakre le, te te a taa rru ran te vanten ge rrlam err ho senōrr.
2Ngate, nge te rrō whure nyer ne sese te e lol lon tabarryean. Te rrō fe byane nyer ge,
3 “Gimi, mi rongta sene! Vanten hu rrō a ge eb tonton kutu wit lonōrr.
4 “Bone ge te rrō kokoō kutuye ge nyer le bya lon tan, kutuye worhu te goo nga to hal, te bwehel nyer err me yen bonga.
5 # 4:5 Kutuye ge a mwi rriu mwe yen waetbun ge ran tolongken yim rrō fe tabu ge asite myō fyōfyō. “Te worhu te goo lon tan ge verr te ho fyan. Ngate, kutuye nan nyer err rriu byaho nga, tebyan ge tan nan telōn e msul.
6 “Te bone ge yal te me mre, te ngne nyer te ete grō bonga, tebyan ge libwir te rranga te tan te mniniu ten.
7 “Te kutuye nan rrute te gogoo en ōrr ne hingi barrnye jenjen, te barrnye jenjen ge nyer le err lung fo, te te rrwene ge err rrlō nga ba.
8 “Te kutuye nan worhu mōn, te goo lon tan ge rrwu. Ngate, err rriu te err ba kii: worhu te e 30, worhu te e 60, te worhu te e 100.”
9Te Iyesu, te fe, “Gimi ge rralnyemi mo ho, emi rongta sene tili rral ge a.”
Tili rral kon eb tongve myuran mwenan vanten worhu nga, te vanten rrute efe lōn rongtakya.
10Ngate bone ge vanten rrute ge nyer a err yel metene Iyesu, nge te nga rru nga hbōn. Te vanten ge nyer ge err rrō rrutōn krinen mwenan vanten ge te 12, err me biiri Iyesu, te ete whu ge eb saarō fyaara ha nge tabarryean ge a rrō fe.
11Ngate, te fe byane nyer ge, “Gimi, Yafukon mu kutaōne metami ge mim rrō yekya yekyaan ne limhian mwena Yafukon ge mu lu ho. Te ge nyer ge err rrlō ho lon, lo ge em rrō ktu rral e limhian mwena Yafukon lon tatabarryean nga.”
12 “Tebyan vanten ge nyer le bweter mwe hel ten, Yafukon rrō kokorgoro mwenar yekyaan. Mwi yi le nge #4:12 Brrofet be vanten ge rrō fe tolo Yafukon. Brrofet Asaya te fe myarin, te fe,
“ ‘Nyer efe rrō lhe, rrō lhe
te efe lōn yekya;
efe rrō rongtane, rrō rongtane
te efe lōn rrō rongtakya.
Ge he efe rongtakya nge eb rrumyune nyer,
ngate eb holku mwenar hakbean.’ “ Asaya 6:9-10
13Ngate, Iyesu te fe me ne nyer ge, “Tebyan ge mirr rrlō yekya tatabarryean ge a, eb hel ge emi nga yekya tatabarryean rrute.
14 “Ena saarō fyaara tabarryean ge le. Vanten ge rrō rrrirrri kutuye ge a wit, mwe yen vanten ge rrō fe tolo Yafukon byanen vanten nyer.
15 “Vanten worhu em rongtane, te em yen tan ge nga to hal ge kutuye mo goo en. Nyer em rongtane tili rral ge a, te byaho nga Setan ma me, te me holkuku.
16 “Te vanten rrute em yen kutuye ge rrō goo ran tan ge verr mo ho fyan. Ge nyer le em rongtane tili rral ge a, te byaho nga ema kwarr.
17 “Ema kwarr fona, te libwir mwe rranga, ma rrwene ge err rrlō ho ba breō. Te bone ge sese ma me mwe hel, te vanten nyer em rrō rrwene mwe hel byane nyer tebyan tolo Yafukon, em goo byaho nga.
18 “Te vanten rrute em yen kutuye ge mo goo lon hingiye jenjen. Em rrō rongtane tili rral,
19 “te em rrō rrinrrin mwe lam tebyan mwenar myuran ne tan ge fyan, te wuan ne buverr ge rrō reō, te lol jejeene sese rrute mōn bwe, ema me te koōfo tili rral ge le, te tōlō nga ba wote nan lon mwenar myuran.
20 “Te vanten rrute mōn, em yen tan ge rrwu ge kutuye ge nyer a mo goo en. Te tili rral ge a mo tongve mwenar myuran, te em ba kii: worhu 30, worhu 60, a worhu 100.”
Eyi fe tolo Iyesu byane vanten bonga. Yiyinean ge vanten hu rrō rrwene tebyan tolo Iyesu, Yafukon mōn eb nga yiyine nge hbōn tolon.
21 # Mat 5:15; Luk 11:33 Ngate, Iyesu te fe byane nyer ge, “He vanten hu eba ktu atuntun eba me lon im, bu ten ne ge eb tagno ne blaye? Te eba lngi fyan hul byarr? Ehee, nge eba lngi en milite.
22 # Mat 10:26; Luk 12:2 “Atuntun ge be tolo Yafukon eb kor fyasene sese bonga. Sese bonga ge mu lu ho lon tatabarryean, a sese bonga ge Yafukon mwe seesune ho, efe nga me na mha.
23 “Gimi ge rralnyemi mo ho, emi rongta sene tili rral ge a.”
24 # Mat 7:2; Luk 6:38 Te mu surmōl mōn byane nyer ge, “Tili rral ge mim rongtane, emi rrinrrin sene; tebyan ge yiyinean ge mim rrō rrwene tebyan tolong, Yafukon mōn eb nga yiyine gimi hbōmi tolong. Te eb nga sene eb lam mōn bwe.
25 # Mat 13:12; 25:29; Luk 19:26 “Vanten ge ma ktu yekyaan ne tolong rru burr, Yafukon eb sene yekyaan eb lam mōn bwe byanen. Te vanten ge tōlō ktu te mri, yekyaan kakae ge ma ktu rru, Yafukon eb gurrku metenen.”
Yafukon nge hobōn ma kya eba rrwene ge vanten eb myur lon tolon.
26Ngate, Iyesu te fe, “limhian mwena Yafukon mwe yen vanten hu ge rrō rrrirrri kutuye nyer lon mwenan ōrr lonōrr.
27 “Bone ge ma rrrirrri kutuye ge nyer le mo nong, te rrō fwerr te rrō totor libung te liyal. Te kutuye ge nyer le err rrō rriune asite nyer te err rrō myur hobōr, te ema me lamlam. Te nge tōlōn yekya mwi yi be.
28 “Tan nga nge mwe ba myur e kutuye ge nyer le, te em rriu. Ngate asite mwe tamtee bemō, te wingite nyer mwe tamtamtee, ngate kutute nyer mwe nga ho.
29 # Joel 3:13 “Te bone ge wit ge le ma mtō, vanten ge le, ma kya e vya rre tebyan ge rengete ma me ge eb hirvi an.”
30Te Iyesu te whu, “limhian mwena Yafukon mwi yi be? Eyi fe totoōtean ge be nge eb yiyi bon e?
31 “Mwe yen kutu byang hu mu murr bya ran liye hu. Kutute mwe kakae saavi kutuye rrute lon tan.
32 “Te bone ge mwi rriu, te myumyur ma me lam, te ma me saavi liye rrute, gōrōte mwe lamlam, te bwehel bonga ema me rrō rrwene nu ne nyer fyan molmol nan.”
33Te Iyesu te rrō suuto tolon byanen vanten nyer lon tatabarryean te e lol te yi a, te rrwene telō ngrengre ge en rongtakya.
34Nge telōn rrō suuto nga bwi le byane nyer, a te rrō suuto tolo Yafukon lon tatabarryean nga. Te bone ge mwenan vanten nyer err ho nga hbōr krine nge, nge te rrō surfyaara tatabarryean bonga byane nyer.
Iyesu te hubsine mwenan helan byane mwenan vanten ne ōman nyer, te mwenar rrinketean te rranga rru.
35Ran wobung ge le, en tarariu nan, Iyesu te fe byanen mwenan vanten nyer ge, “Eyi vya en tahi tee kakre ran tan ne ōrr Kerrasa.”
36Ngate err yel metenen vanten nyer, ete ktu afloo kakae ge Iyesu te taa rru ran, te err vya. Te afloo worhu mōn err ho krinen.
37Ngate barrling hu rrhel te totor, te te uu ōrr te hel, te rrwene we ge lon tee kakre te lamlam. Ngate tevyar te vya lon tu afloo ge fyaasi bo rron.
38Te Iyesu te fwerr rru lon rru afloo kakae, te te wyal rru ran bweteawyal hu. Ngate mwenan vanten err tōtōne, err fe byanen ge, “Vanten ne Wuhuran, ōrr rrlō rrō rrinrrine ken. Eyi rronrron nge a! Te ōm ma nga rrō fwerr bwe?”
39Ngate Iyesu te totor, te sur te hel byane barrling. Te te sur byanen tee ge te rrō lamlam a, te fe, “Ō rru rongrong! Ō vya fyan!” Ngate barrling te nong, te ōrr te mlol.
40Ngate Iyesu te fe byanen mwenan vanten nyer ge, “Tebyan ha nge lumi rrō myorr mwi yi a? Mwenami rrinketean mwe rranga rru bwe?”
41Te nyer lur te myorr ge lur te myorr. Te err rrō fe fe me ne nyer ge, “Ge nyer? Si vanten nge a? Barrling te tee, mōrō rongtafyan!”
ទើបបានជ្រើសរើសហើយ៖
Mark 4: mmg
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc. All rights reserved.