LUKASI 24
24
Muregeo hayi wa Insa
(Mat 28:1-10; Mar 16:1-8; Yuh 20:1-10)
1Asuɓuhi na mapema ya iSuku ya handra ya umufumo, yaãni Mufumov̄ili#24:1 Mufumov̄ili: iShigiriki isurongoa isuku ya handra ya mufumo, yaãni, isuku ɓaanda ya iSuku ya Uv̄umuzi ilio amba yakofanyiwa kula Mufumotsi., watruwashe wale warenge yamatra manukatro waka wayarengeledza, wandre kaɓurini. 2Wapara amba liɓwe laka latrilwa mulongoju mwa likaɓuri, liv̄ingirisiwa. 3Ungia yawo, kawapara umwili wa Raɓi Insa. 4Sa ile waremwa na ushangavu na itrongo ile. Ɓas, v̄uwav̄enushia watruɓaɓa waili, wakana nguo zakov̄ev̄ena. 5Waremwa na trisidzo, ata wanyamisa sura zawo v̄otsi. Ɓadi watru wale wawaambia: «Manatrini muzunguhao mutru alio hayi hari mwa uwafu? 6Kav̄o v̄anu, ɓadi aregezewa hayi! Namunahane zitrongo akomuambianizo wakati raha aka Galilaya, 7iv̄o akorongoa: ‹Ilazimu uMwana wa Mwanadamu av̄elehwe mihononi ha watru maãswifu, aremwe mizumari hari mwa muri wa pawa, amwesa isuku ya raru aregeye hayi.› » 8Sa ile wanahana yamarongozi ya Insa yale.
9Urudi yawo ulawa kaɓurini hule, wajudza piya trongo zile ha kumi na moja wale na ha piya wasalia. 10Wao wakoambia yaMav̄ingizi-Risala trongo zile waka ɗe Mariama wa Magidala, Yuhana, Mariama mayahe wa Yakoɓu, na uwatruwashe wasalia waka na wao. 11Ɓadi yaMav̄ingizi-Risala waono marongozi ya watruwashe wale mauri upuzi, ata kawakowaamini. 12Ɓadi Monye ahimi, areme mbio andre kaɓurini hule. Unyama yahe ha utsungia, kaona neka tsi ɗe zitamba zaka v̄otsi. Amwesa aregea hahe ha ushangavu na itrongo yaka yahidjiri.
Insa asuv̄enushia watru waili hari mwa indzia ya Emausu
(Mar 16:12-13)
13Ɓasi suku ɗe wiyo ile, v̄ulawa maswihaɓa maili ya Insa yakwendra hari mwa mwana ɗago ahiriwao Emausu, aka aɓaushiana na Yerusalemu hari mwa mwendro wa sa mbili. 14Na wao wakohadisiana piya trongo zile zaka zahidjiri. 15Ɓas, v̄ale waka ju la ulagua na uzihadisi, ɗe Insa waye-waye awajilia, aɗungana na wao. 16Ɓadi matso yawo yaka yaɓalidziwa yasumujuwe.
17Awaambia: «Trini ɗe mwendrao na uilagua, ata yamutriani hamu namuna iyo?»
18Moja mengoni mwawo ahiriwao Kleoɓasu, amudjiɓu: «Hari mwa piya wadjeni walio Yerusalemu, wawe tu ɗe kwajua trongo zahidjiri zisuku zini?»
19Sa ile awadzisa: «Trongo trini?»
Ɓas, wamudjiɓu: «Ɗe zapatana na Insa wa Nazareti. Aka mutrume mwendza ushindzi hari mwa zitrendro na marongozi mbeli za Mungu na mbeli za piya wanadamu. 20yaMatolezi Maɓole ya Masadaka na makizi-mbeli watru, wamuv̄eleha andre ahukumulwe aulawe, amwesa wamurema mizumari hari mwa muri wa pawa. 21Na wasi rakotumaini amba waye ɗe atsokomboao iIsraila. Ɓaanda ya v̄av̄o, leo suku ya raru rangu trongo zizo piya zahidjiri. 22Na tsena ɓaãdhwi ya watruwashe mengoni mwatru warishangidza ha kusudi. Asuɓuhi na mapema wandre kaɓurini, 23wala kawapara umwili wahe. Waja warongoa amba v̄uwav̄enushia malayika, ziwaambia amba a hayi. 24Ɓaãdhwi ya watru waka v̄umoja na wasi wandre kaɓurini hule, amwesa wapara zitrongo mauri ɗe inamuna watruwashe wale waka wazirongoa; ɓadi waye, kawamuona.»
25Sa ile Insa awaambia: «He wanyu kamuna ãkili muliona roho ndziro za uamini piya izo zarongolwa na yimitrume! 26Hali kayaka yalazimu Kristi aondesheha na trongo zizo, iv̄o angia hari mwa utukufu wahe?» 27Ɓas, ha uandrisa na Musa na piya yimitrume, awaeledza zitrongo zaangihwa zapatana na waye moni na piya yimiangishio.
28Wakati waka kariɓu na liɗago wakwendra, afanya mauri akotsaha andre mbeli, 29ɓadi wamuzia ha umuambia: «Ɓaki na wasi, mana jua litso, uku usujongia.» Ɓas, angia amba aɓaki na wao.
30Wakati aka mezaju na wao arenge dipe, na ɓaanda ahimidia Mungu, alikutrua, amwesa awav̄alo. 31Sa ile matso yawo yaɓuha, ata wamujua. Ɓadi v̄ale azimia mbeli zawo. 32Ɓas, wakoambiana wao na wao: «Hali roho yatru kayakovua moni hatru wakati akorihadisia ndziani na urieledza yimiangishio?»
33Wahimi kamwe sa ile, waregea Yerusalemu, wandre wapara kumi na moja wale wangulidzana na wasalia waka na wao, 34waambilwa: «Ha kweli Raɓi aregea hayi, amuv̄enushia Simoni.» 35Ɓas, wawaambia izo zawahidjiria ndziani na inamuna wamujua hari mwa umukutrulio wa lidipe.
Insa asuv̄enushia maswihaɓa yahe
(Mat 28:16-20; Mar 16:14-18; Yuh 20:19-23; Mav̄ 1:6-8)
36V̄ale waka ju la ueledzana trongo zile, Insa waye-waye ahimi hari-hari na wao. Awaambia: «Salama naimuendreleyeni.» 37Ha inamuna wasikwa na trisidzo na faza, wakoona mauri wav̄enushiwa na mufu. 38Ɓadi awaambia: «Manatrini mwamenyeha ziroho zanyu, muliona fikira za udzidzisa rohoni? 39Namuangaliye yimindru na yimihono yangu, ha kweli ɗe wami. Namunisike muone, mufu kakana nyama, wala miɓa, mauri ɗe iheli munionao.»
40Iv̄o akorongoa trongo zile, awaonesa yimihono na yimindru yahe. 41Ɓasi ɓaanda raha kawakoamini ha siɓaɓu ya ifuraha na ushangavu wawo, awadzisa: «Muna shitru ya uɗya v̄anu?» 42Wamuv̄a gudru la fi yaohwa; 43alirenge, aliɗyi mbeli zawo v̄ale.
44Amwesa awaambia: «Zini ɗe nakomuambianizo wakati raha naka v̄umoja na wanyu, amba piya trongo zanihusu zaangihwa moni mwa iSharia ya Musa, yimitrume na iZaɓuri, zilazimu zitsimidzihe.» 45Ɓas, awaɓulia zifikira pare waelewe uMuangishio Mutwaharifu. 46Awaambia raha: «Tsizini zaangihwa: Kristi ilazimu aondeshehe, amwesa aregezewe hayi ha ulawa ufaju isuku ya raru. 47Na itrongo ya uendra toɓa na yamadhambi yaswamihiwa, zilazimu zijudziwe ha lidzina lahe ha piya zinishani, uandrisa rangu Yerusalemu. 48Wanyu mwa mazahidi wa trongo zizo. 49Na wami nitsomuv̄elesheani itrongo Ɓaɓangu aitolea wahadi. Ɓadi wanyu, namuɓaki ɗagoni ata mupaka mupindrisiwe ushindzi wa uju.»
Insa asuhea pev̄oni
(Mar 16:19-20; Mav̄ 1:9-11)
50Amwesa awav̄ingi ata mukaɓala wa Ɓaitihaniya. Adzua yimihono, awaɓariki. 51Ɓas wakati akowaɓariki v̄ale, awaɓaushia, ahedzewa andre pev̄oni. 52Na wao ɓaanda wamuãɓudu, waregea Yerusalemu na furaha ɓole. 53Ha dahari-dahari wakoka moni na iNyumba Ndzitwaharifu ha [umusifu] na umutukuza Mungu.
ទើបបានជ្រើសរើសហើយ៖
LUKASI 24: swb
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2021, Wycliffe Bible Translators, Inc. All rights reserved.
