मत्ती 5
5
ईसु बुरू रेय चेडतेड कुआ
(लूका 6:20-23)
1ईसु भीड़िय ञेंलकेते बुरू रेय रकब यनु, अवुर हें-डेय दुड़ूब यनु, तहाँ चेला कुतय हेंय थरे कू मेजेना। 2अवुर हेंय हेंकू नआँ घयते कहनी केतेय चेडकू दोहो एनु।
बढ़ियाँ टेबोः
(लूका 6:20-23)
3“मन रे दीन इदान कुआ, हेंकू आसीस कू ञाँमा, कहेकि सरग राज हेन कुराः हवे। 4अब दुख राः इस्तिथि रे इदान कुआ, हेंकू आसीस कू ञाँमा, कहेकि हेंकू सान्ति कू ञाँमा। 5नम्र गिआकू, हेंकू आसीस कू ञाँमा, कहेकि हेंकू धरती राः हँकदारी कू होयाआ। 6भगवान राः नँजेर रे धरमिः लगड रँगेज ततँग केन हेंकू, आसीस कू ञाँमा, कहेकि भगवान हेंकुय पुरो कुआ। 7दयाः हेंकू, आसीस कू ञाँमा, कहेकि हेंकू थरे होय दयाआ। 8जे जे राः मन सुद्ध गिआ, हेंकू आसीस कू ञाँमा, कहेकि हेंकू भगवान कू ञेंलेया। 9मिमीलोः हेंकू, आसीस कू ञाँमा, कहेकि हेंकू भगवान रेनकू चोंडिजकू कहोआ। 10#1 पतरस 3:14धरमिः राः चलते तेकू सतो कुआ, हेंकू आसीस कू ञाँमा, कहेकि सरग राज हेन कुराः हवे। 11#1 पतरस 4:14अपे, होड़कू ईञाः चलते तेकू निंदा पेरे, अवुर कू सतो पे, अवुर झूठ मुठ ते टेबोः केते, अपे केय गोटंग अनाप सनाप तेकू टेबोः नसो पेरे, अपे आसीस पे ञाँमा। 12#परेरित 7:52हेना तोलोग अपे खुसी अवुर बहाली पे मनो, कहेकि अपे लगड सरग रे बडेआ ईनाम इदाना। नेन घयते अपे वरी पहीलाःकू भविस्यवक्ताकू होकू सतो तेडकुआ।”#2 इति 36:16; नहेम 9:26; मत्ती 6:1; 23:31,37; परेरित 5:41; 2 कुरि 12:10; 1 थिस्स 2:15; इबरानी 11:36-40; एकूब 1:2; 5:10,11; 1 पतरस 1:6; 4:13
बुलुंग अवुर इंजोत
(मरकुस 9:50; लूका 14:34,35)
13 #
मरकुस 9:50; लूका 14:34,35 “अपे ओतेत रेनकू बूलुंग कू हवे, लेकिन बुलुंग राः चहट उजड़ जोम रेदो, हेना ची ते चहाटेआ? फेर हेना दो कनर काम रे एरो मेजेना। नआँ बहेर हनतेकू घी रेआ अवुर होड़कू हेना कू तिका बयो वेआ। 14#एहुन्ना 8:12; 9:5अपे धरती रेनकू इंजोतकू हवे। बुरू अगस रे दोहोना सहर मेने उकुआ। 15#मरकुस 4:21; लूका 8:16; 11:33अवुर दीया जबके ते होड़कू टुकवाः ते मेने कू हरूबेआ, लेकिन हेना अगस रेकू टेंगवा तआ, हेंडे हेना ओड़ाः रेनकू सींड़कू मरसल वकुआ। 16#1 पतरस 2:12नेन घयते अपे राः जीवन हो मरसल घयते होड़कू मड़ंग रे चमकोऊ, हेंडे हेंकू अपे राः बढ़ियाँ काम कू ञें-ला, अवुर सरग रे इदानिया अपे रेनिय भगवान अपापेकू बडेय वया।”#मत्ती 9:8; एहुन्ना 15:8; 1 कुरि 10:31; इफि 5:8,9; फिलि 1:11; 1 पतरस 2:12
ईसु मूसा राः नियम पूरा लगाडिय मेजेना
17“इंञ धरम नियम चहे भविस्यवक्ताकू लिखो केडा कागद#रोमि 3:31; 10:4-10 रादे लगाडिंञ मेजकेना मेनते अलोपे अड़िंगू। इंञ हेना रादे लगड मेने, बल्कि हेना पूराय लगाडिंञ मेजकेना। 18#लूका 16:17इंञ अपे थरे सही मेतेंञ कहनी यडा, अगस अवुर ओतेत भले मिटियोऊ, लेकिन मूसा राः नियम वरी मियाँटंग अक्छर अवुर बिंदू घली बेगर पूरा ते एरो मिटियो एना। #सिरिंग 119:89; एसा 40:8; 55:11; मत्ती 24:35; मरकुस 13:31; लूका 16:17; 21:33 19हेनाते कनय नआँ हुकूम मेंडे कनर मियाँटंग दमभरा अहोय टोवीजे, अवुर होड़कू हेनेन घयतेय चेडकू रेदो, हेंय सरग राज रे सींड़कू वरी होडिंञय कहोआ। लेकिन जे नआँ हुकूमिय मनोआँ, अवुर नअय चेडकुआ, हें-नी सरग राज रे बडेअय कहोआ। 20इंञ अपे थरे सही मेतेंञ कहनी यडा, अपे राः धरमी जीवन एहूदी नियम चेचेडकू अवुर फरीसिकू राः धरमी जीवन वरी बढ़ ते मेने दोहोन रेदो, अपे सरग राज रे एनेरो पे सेन सको एना#रोमि 10:3।”#5:20 फरीसिकू अवुर एहूदी नियम चेचेडकू अनाकू धरमी गिआले मेनते कू पसींदे दोहो एनु
धकोः अवुर ञेंड गोगोज राः बारे ते
21“अपे मरिताःकू थरे न याःते कहनी केड हेना पे अँजोम केडा, ‘अलोपे ञेंड गोजकू’, अवुर ‘कनायिय ञेंड गोज हेंय, कोट कछेरी रे सजा ञँम लायिक गिआयू।’ 22लेकिन इंञ अपे थरे नआँ घयतेंञ कहनी यडा, कनय अपन भाई धकोवाः हेंय, कोट कछेरी रे सजा ञँम लायिक इदानिया, अवुर कनय अपन भाई बे-कमाअय मेनतेय कहनी वयू, हेंय दरबार रे सजा ञँम लायिक इदानिया, अवुर कनय, ‘ए, बोया’ मेनतेय कहनियू, हेंय नरक राः सेंगेल रे सजा ञँम लायिक इदानिया। 23अगर अम धाम रे भेंट मी रकब तोलोग, अवुर हेना रे अमाअय भाई राः मन रे अमाः बिरोध रे कनारा इदाना, हेनाम उहयर ञँम रेदो, 24धाम मड़ंग रे अमाः भेंट मी बगीवा, पहले अम अपन भाई सुदाम मेल परेम कोऊ, हेना वरी मेजकोःते अमाः भेंट मी रकाबू। 25अम अमाअय मुदेय कोट कछेरी हनतेय गोःमी तोलोग होनोर भर्रे हेंय सुदा बरोबर कोःमी, नहीं तदो हेंय न्यायी थरेय इदी मिआँ, अवुर हेंय पुलूस कुय जिमा वआँ, अवुर हेंकू जेहेल रेकू डलो मिआँ। 26इंञ अपे थरे सही मेतेंञ कहनी यडा, एगो एगो अनायिन पे भरोवे मेन दिन हेना वरी एरो पे उडूंग एना।”
लंद फँद
27अपे, “अलोपे लंद फँदुऊ” मेनते कहनी केड हेना पे अँजोम केडा। 28इंञ अपे थरेंञ कहनी यडा, जे होड़ कनय कोड़ीहोन गलत नँजेर तेय ञेंलेयू, हेंय अनेज राः मन रे हेंय सुदा लंद फँद कामिय करो केडा। 29अगर अम जोम हन मेड मी एर पाप मी रेदो, हेना उडूंग केतेम घिर गोत्ते; कहेकि सींड़ होड़ोम नरक रेम एर डलोः सेथा दो, मियाँ अंग नासुःऊ हेना बढ़ियाँ गिआ। 30अगर जोम हन तीम एर पाप मी रेदो, हेना बोंगेर केतेम घिर गोत्ते; कहेकि सींड़ होड़ोम नरक रेम एर डलोः सेथा दो, मियाँ अंग नासुःऊ हेना बढ़ियाँ गिआ।
ईसु छुटा छुटीः राः बारे तेय लाय तेडा
(मत्ती 19:9; मरकुस 10:11,12; लूका 16:18)
31“नआँ घयते कहनी केड हेना हो इदाना, ‘कनय अनेज कन्याँय बगिवय रेदो, हेंय पंचनमा कागद बनो केतेय ओवायू।’” 32लेकिन इंञ अपे थरेंञ कहनी यडा, कनय हो अपन कोड़ीहोन लंद फँदुः वरी कनर एटाः घियाः चलते तेय बगिवय रेदो, हेंय लँद फंदु अयिय बनो यडिया; अवुर कनय हेंय बगी वडिया कोड़ीहोनिय असुलू, हेंय लंद फाँदुः तनायू।
कीरिया
33“अपे मरिताःकू थरे न याःतेय कहनी केड हेना पे अँजोम केडा, ‘जलिया ते अलोपे कीरियाऊ, अपे परभु लगड कीरिया केन हेना पे पूरोवे।’ 34लेकिन इंञ कहनी वपे तना, कबोह अलोपे कीरियाऊ; न दो सरग सुदा, कहेकि हेना भगवान राः सिहासन हवे; 35न दो धरती सुदा, कहेकि हेना हेंय कटा राः चवकी हवे; न दो एरुसलेम सुदा, कहेकि हेना बनाडेअय राजा राः सहर हवे। 36अपन भोः सुदा हो अलोपे कीरियाऊ, कहेकि अपे मियाँटंग ऊब हो एरो पे पुंडी तेडा, न पे हेंदे सकोआ। 37लेकिन अपे ‘हे’ मेंडे दो ‘हे’ ‘एरोः’ मेंडे दो ‘एरोः’ मेनते पे कहनियू; कहेकि जो कुछ न वरी बगरा होयाआ, हेना सयतान हनवरी होयाआ।”
बदला मिड़ाः हेना राः बारे तेय चेडतेड कुआ
(लूका 6:29-30)
38“अपे नआँ घयते कहनी केडा हेना होपे अँजोम केडा, ‘मेड बदला मेड, अवुर तिरींग बदला तिरींग।’ 39लेकिन इंञ अपे थरेंञ कहनी यडा, अपे सुदा खराब कामिय कामा, हेंय सुदा बदला अलोपे मिड़ागे, अगर कनय हो मियाँ गतर जोहापे रेय चाड़ोवे रेदो, एटाः गतर होपे ओयठा वयू। 40अगर कनय दरबार रे बदी केपे ते अपे वरी अँगाय असी रेदो, हेंय कोट होपे ओवायू। 41कनय अपे कोस भरिय गोःपे लगाडिय जिदहाय पे रेदो, हेंय सुदा दूय कोस पे सेनुऊ। 42जरूरत रे कनय असी पेरे रेदो, हेंय ओवाय पे, कनय उधारिय असी पे रेदो, हेंय ओवाय पे।”
मुदेयकू सुदा मया मिलन
(मत्ती 19:9; मरकुस 10:11,12; लूका 16:18)
43“अपे, ‘अपन परोसी सुदा परेम तेपे दोहोनू, अवुर अपन मुदेयकू थरे खुरेस सबता’ मेनाआँ टेबोःपे अँजोम केडा।” 44लेकिन इंञ कहनी वपे तना, अपे रेनकू मुदेयकू सुदा मया मिलन तेपे दोहोनू, अवुर अपेकू सतो पेआ, हेंकू लगड पे बिनतिऊ। 45ताकि अपे, सरग रेनिय अपा रेनकू चोंडिज कुपे बनोऊ। कहेकि हेंय बढ़ियाँ होड़कू अवुर खराब होड़कू लगड हो बे-रिय उगोआ, अवुर धरमी होड़कू लगड अवुर अधरमी होड़कू लगड हो दाईय एर उयुआ। 46कहेकि अपे सुदा मया मिलन तेकू दोहोना, हेंकू सुदा मया मिलन तेपे दोहोन रेदो, अपे ची फल पे ञाँमा? न घयते दो, अपे पापी होड़कू मेनते पे कहनी वकुआ, हेंकू मलगुजारी तिला कुहो कू करो वेआ। 47“अगर अपे अपन भाईकू पे जोहारवा रेदो, बड़ा भारी काम पे काम यडा किदो? न घयते भगवान मेने पपाड़िकू हो मेने कू करो वेआ किदो? 48हेनाते, जे घयते अपे रेनिय अपा पक्का गिआ, हेन घयते अपे हो पक्का पे बनोऊ।”
ទើបបានជ្រើសរើសហើយ៖
मत्ती 5: ksz
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2022, Wycliffe India. All rights reserved.
