João 5
5
Jesus Hiktehatshri Hitskalajyawaka Piranapni
1Waneya wane pnut-hohne tsru niklu hohnetnakni himretkaluru hohne judeu-neya, Jesus Jerusalém poktshi nwaka hya.
2Jerusalém poktshi carneiro jihlokawakle tshinikowakastsi rawa satu honha paji cinco hiphaptoterutu. Xye paji wan-tshinka judeu tokanuya “Betesda”.
3Hixolune hahijewaktshi kachitanune wane hwa. Tshiji rukoluhakanatna mtsawane, myankane, hiktehatshine. Honha hiyolikle hkahwakakanatna.
4Pa katkaka hserpika hiwejikaluru Hoyakalu towreru tenhohne hajeru ruyolikkajyawaklu honha. Hiwejikaluru Hoyakalu towreru tenhohne hajeru hiyolikajinru honha, waneyakni mitshikananhapka honha katsretatshri hima kluneruktako hyeyixale rutskalhiya.
5Wanekanan-koxlu satu yineru hahijewaktshi kachreru, trinta e oito mhale pejnu.
6Waneya Jesus hetlu hikoluhatshri hiyrun-koxa rimaxinixkalu hix-hohne wan-rixyawakatka waneya wla htshinatkalu jeji:
— Paluk-hitskalhalethe?
7Waneya jeji hiktehatshri wla tshinru:
— Tsru Hixikatshriwa, hikeni satu yineru honha nutakjeru, ruyoljinipa honha. Hiyáhoni nyahot-jihlokletka pchini satu hapka jihlojyanatkano.
8Waneya Jesus wla tshinru:
— Pyotunotanu, pkochtshekjekomtanu. Pyanutka.
9Waneya waneklukawa rexnawa jeji rutskalajikowakatka. Hkochtshekjekomtatka hyanatka. Seyni hapnanuxikalur-hohneni wale hohne.
10Hiyáhoni judeu-ne wan-tshinru hitskalakalurutka:
— Xawakni hapnanuxikalur-hohneni. Hinanchitkalurni putjijekoxyawaka xye hohne.
11Hiyáhoni ruhitna, wla htshinatkana:
—Nutskalakjeru wan-tshinno: “Pkochtshekjekomtanu. Pyanutka.”
12Waneya repomhatkaluna, wla htshinruna:
— Hanurnihe jeji xye pkamhakjixjeru?
13Seyni jeji hitskalakalurutka hi himathetlu rutskalakjeru katuktani klu tshinanu Jesus hixolune yine tskala ramhiyatka.
14Waneya wane pnut-hohne Jesus yoptotlu Hoyakalupjiya waneya wla htshinru:
— Petanu. Putskalakkatka. Hiyáhoni xawakni hi pnute hektuwaka pkamhanu, hmakanhayehixyawakanupyi hektutu wane yohnikalutu.
15Wane ruchpajyatka jeji waneya runkakna tsrukakalune judeu-ne, Jesus tshinkaluru hitskalaklu.
16Hiyáhoni tsrukakalune judeu-ne yinuwaka kamniretlu Jesus, hiyrunu wannamka haluk-hiylaletlu klu tshinanu xyekaka hkamha hapnanuxikalur-hohneya.
17Seyni Jesus wla tshinna:
— Nuru haté xawakni hkamrurewata. Hiyrun-koxa hit-koxa kamrurewjeta.
18Hiyáhoni tsrukakalune judeu-ne hijha hiylaletlu wane yohnika, hi hapnanuxikalur-hohne hma kahwakpiraxyawakanu tshinanu tsonni seyni Hoyakalu pixka rixnawakwa tshinanni. Klu tshinanu wale wan-tshina, Hoyakalu potuko hima ruruta.
Jesus Hinkaklexyawaklu Hkamrure Piranapni
19Waneya Jesus wla tshinna:
— Halikakni, halikakni wla ntshinhi: Whentshi tshinkalurno hike numukata kamhaleta Nuru mepixkanuklunno. Klu tshinanu kamrurtshi kluneruktako net-kamhaletlu Nuru waleko nkamha hita Whentshi tshinkalurno. Kluneru kamrurtshiktako hkamha Nuru wale potuko nkamhajeta hita Whentshi tshinkalurno.
20Klu tshinanu Nuru hamotlu Whentshi tshinkalurno. Rekhitlu Whentshi tshinkalurno ptowru potuko hkamhaleru. Xye kamrurtshikaka yohnikalutu rekhirewatanu, himyejyawakapa hixa.
21Nuru hiwekkakjetna hipnatshine, hiweklu renekjetna. Hiyáhoni waneko pixka nix-hita Whentshi tshinkalurno. Hanuruktako yineru naluk-hiwekkakleta, niwekkaklu.
22Hiyrun-koxa Nuru hi satukna yineru rukolukanuwnajixa seyni renekno hita Whentshi tshinkalurno ptowru potuko nukolukanuwniywakapa.
23Wan-rixa ptowru yineru kahwakpiraxyawakno hita, Whentshi tshinkalurno, Nuru hkahwakpiraxyawakna pixka. Yineru hanuruktako, mkahwakpiratkanuklunupno hita Whentshi tshinkalurno, Nuru Hoyakalu nyokanatjeru koxa hi hkahwakpirata.
24Halikakni, halikakni wane ntshinhi, ntokanu jematshri, nyokanatjeru halixatshritka himwalu hiweklu hike rixiniko mnikawnakatu. Hike jikolukanuru waneylu. Seyni hipuktshi riknokajikatka hiweklu hjihlokatka.
25Halikakni, halikakni wane ntshinhi, hipnatshine Hoyakalu Whene tokanu hjemyawakna papko hinamta hiyrunu rapokatka. Hiyrunu htokanu jematshine hiwekkakko.
26Nuru Hoyakalu hiwekatshrini waleko rumukatle tshinanu. Waneko pixka nix-hita Whentshi tshinkalurno renejyano niwejya hitako numukatle tshinanu.
27Hiyrun-koxa renekno hitakkaluru yine nukolukajyawakapa klu tshinanu Yineru Whene tshinkalurno.
28Hi himyekanu xye pirana tshinanu. Klu tshinanu rapokhohnetanu yinni ptowrunnika hipuktshi yehi hwatshinni, htokanu hjeminipna waneya hipuktshi yehi ruchpajinna.
29Kihleru kamhatshine, riwekkakkona riwejyawakapna seyni hektutu kamhatshine riwekkakkona rapnokaxikowakapna.
30Hike numukata kamhaleta hitako nalujyawaka tsonu tshinanu. Hanuruktako Nuru Hoyakalu hikolukanuwnajixno wale nukolukanuwnakaklewaxya. Hiyrun-koxa potukalni nukolukanuwnajixle. Klu tshinanu hi nujhalu hitako nohchinikanu nomkahixyawaka seyni Nuru Hoyakalu nyokanatjeru hihchinikanuko naluk-homkahreta.
31Hitapka hinkaklexinri nopirana waneya hike yineru hetko halixanru nuphujetleru pirana.
32Seyni waneru satu nopirana hiphujetatshri. Hiyrun-koxa nimatlu halikakni htshinyawaka, nopirana ruphujtatanru.
33Hixa yokananwakatlu João nopirana hepomhatshinepa. Hiyrunu wale hiphujtatlu halikakalutu pirana.
34Halikaka hi nujhalu yinerucha hiphujtale. Seyni xyekaka pirana ntshinhi hiwekkajikolupa.
35Nikotapi nikotle tsrur-potuko pixka rixatka João. Hixa hijhatkalu pchini tsonu himuwpotuxyawaka xye hnikotle tshinanu.
36Seyni waneru nuphujtatjeru João yohnik-halukkaluru. Kamrurtshi Nuru Hoyakalu henejyano nnikaxyawakapa, xyekaka nkamhaleru, walekni hiphujtatlu nopirana, Nuru Hoyakalu yokanaxyawakno ruphujeta.
37Nuru Hoyakalu nyokanatjeru walekni hiphujtatno hita. Seyni hix-yinhi hikeklu jematkalu htokanu hiyrun-koxa hikeklu hetatkalu himane.
38Htokanu hi hixa hitokote hwa. Wan-rixa klu tshinanu hi halixatkalu hyokanatanru.
39Hethapotjetlu Hoyakalu tokanu yonatkaluru, hanu htshina. Klu tshinanu hixa kahwaklu wale yonatkaluru tshinanu hikchikanru hiweklu hikeklu hohne mnikawnakatu. Haha walekni hiphujtatlu kat-potno hita.
40Hix-yinhi hi haluk-homkahretno, hiwekkajikolupa.
41Hi nujhalu yineru tokanuwnale.
42Seyni nimathethi hi Hoyakalu hichinikanreta haji hitokoteya.
43Nuru Hoyakalu hiwaka nunya seyni hi haluka yoptoletno. Seyni satuko waleko hhiwaka runikmaka walemka halikaka hyoptohihlenutanu.
44Hanhe hixa halixletlu hixa, pimrine tokanuwle hjemleru? Seyni hi hijhatkalu tokanuwnalu Hoyakalu satupkalutu nwaka hichpajikatshri.
45Hi hkahwakanu njihyehixyawakhi Nuru Hoyakalu yehi. Hixa hikolukjerni Moisés-ni, hixa munanhaleru potuko, walekni hikolukanhi.
46Klu tshinanu Moisés-ni halixkamka waneya hit-koxmaka halixanutka. Klu tshinanu nopirana yonatatshrini wale.
47Moisés-ni yonreru hmalixkanuklunu hanu hixa halixletokanutanno hita?
ទើបបានជ្រើសរើសហើយ៖
João 5: mpdBiblia
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
