Mfa' Ghantum 4
4
Pétro mba Yohané mbwe ghatsho'te ntsha
(Mfa' Gha. 3.1-16; Mat. 10.17-20,26-33; Yoha. 15.20,21)
1Ngelaṅ Pétro mba Yohané ke nke' ntshob nu benntùn nà, ghale'te Nsi, ghatshagte Ndà Nsi mba ba Sadukai se', 2nja ntù mba bo ke ntswite benntùn mbèn nke ntshob nelo num vù njam Yésu là. 3Bo yab mbu num Pétro mba Yohané, ma' yub ndàtsha tà nèn nkum ndamnjù, nummbe a na' mb'a mfetnjù. 4Mba ndùlala ben tse bo na' nju' ntshob là bam; njoṅ benntùn fa tse bo bam nà be bandum nguan ntsha' tàn.
5Njù be làne, kamkam ntùm ngô, ghakwé mbwe mba ghalèn ṅwa'ni Nsi tse'te Yérusalém, 6mba Hànà, ngale'te Nsi ze ndùb, Kaïfa, Yohané, Aléksaṅdre mba njoṅ benntùn fa tse bo b'a ntùm tunndà ghale'te Nsi tse ndùbndùb là. 7Bo te Pétro mba Yohané netèt bo, mbètte yub ndù: Bin ke ndo' à zit ngù' mba lén we ngù yen nu là yi à?
8Pétro dun Ywèt Nelàn ntshob bo ndù: Kamkam ntùm ngô mba ghakwé mbwe, 9mba bin tshwèt ntsho'te yag sènni mba bag ghù numebwô ngangokèt, mba mb'a na' njate là, 10a bwô njoṅ zin fa mba njoṅ ba Israél fa lèn ndù a b'a num lén Yésu Kristô ze Nazarèt ze bin na' nkwimt'é num fanta'tù, Nsi bam i num vù là, a tshùa à num i kà yen mèn ni njate, mbèn ntswite wul i bin. 11Yen #Yobk. 118.22Yésu li b'a loṅ se tu wut tsin ghakut ba' na' ngua' là, a bèn nkaṅ ntù' loṅ tôgndà.
12Yôg ke mo' mènghua, nummbe tun bam kamànyam, mo' lén mènghua ke bwe se bo na' mfà benntùn ndù be tshùa bwe nse' njôg là. 13Bo be yen mba Pétro mba Yohané tshob ke bwôg là, ntshàm neshu, nummbe bo lèn ndù bo b'a ba ntùm ngô, ke be ndù bo zi'te sàm ju. Bo lèn ndù boa Yésu lo be. 14Là mba bo yen mèn ze bo yat'é tsin tù mbaṅ bo là, bo ke bèn ngù sàm nu netshobe.
15Ndùlala bo tshob ndù Pétro mba Yohané tum dù' netsho'te ntsha. Bo ghù ntse'te netèt bo, 16ntshob ndù: Be nsi ghù à ke tshen ben n'à? Bo ghù mo' nsà ndùb ze njoṅ ba Yérusalém fa lèn nà, be ke' ku'ni negha. 17Là netshèt ndù kà yen nu là zin netèt njoṅ benntùn fa kua' mà yàme, be to' yub ndù kà bo bèn ntshob nu sàm mèn mfà num sen lén nà. 18Bo tsiaṅ yub ntshù' yub ndù kà bo bèn ntshobe, ke tswite sàm nu num lén Yésu. 19Là Pétro mba Yohané bùnte ntshob bo ndù: Bin lôte zin tu a be z'a be nunetsin mbwe Nsi neju' bin ntshùa Nsi là. 20Nummbe mba bag là, bag ke' ku'ni nebe ke tshob tshu tse bag na' njen mbèn nju' là. 21Bo bèn ntshobte yube, ke fon mat ze bo so ntsha yi tu bo là, nummbe bo lo ke mbwôg benntùn tse bo ke ngamte Nsi num nu z'a tôg là. 22Yen mèn ni ze bo na' ngù nsà, njat'é là, ngu'njù tse lo tôg ṅam nkuà.
23Ngelaṅ ze bo kag yub là, bo se' mbaṅ fètfèle, nsoṅ yub njoṅ nu fa ze ghale'te Nsi tse ndùbndùb mba ghakwé mbwe tshob bo là. 24Bo #Netu. 20.11; Néh. 9.6; Yobk. 146.6be miagte neju'u, nde'te Nsi njoṅ yub fa, ntshob ndù: Tshùaben, wù z'o nabte kamànyam, tsha'a, dibantse mba njoṅ tshu fa ts'a be ntùm bwe là, 25o #Yobk. 2.1-2lo tshob njam Ywèt Nelàne, ntshùa num ntshu tà yag David ngafa' o ndù:
Numke ngôngô nke nyi't'à?
Numke benntùn nke njab nkwatenu mub num tshu banban à?
26Fenfen ntùm njù kame,
kamkam ghù ntse'te netèt bo
num nebàn Tshùaben mba Kristô i.
27Nummbe #Mat. 27.1-2; Mark. 15.1; Luk. 23.1,7-11; Yoha. 18.28-29Hèrodé mba Pontio Pilato boa ngôngô mba benntùn ntùm Israél lo ghù kua' ntse'te ntùm yen ngô li num nebàn ngafa' o ze nelàne, Yésu z'o yo' i mfèt là, 28num neghù ndù njoṅ tshu fa tse bu o mba yu nekô na' njà nabte tà fe mbwe là bumte. 29Tshùaben, ndonni, lôte yag num kebàn tshobe, fà neta ghafa' tsho ndù bo ke ntshob ntshob mu ke bwôg, 30nyit bu o ndù bo ke njate ghangokèt, mba ndù bo ke ngù nsà mba ba nu netshàme, njam lén ngafa' o ze nelàn Yésu. 31Ngelaṅ bo le'te Nsi là, dù' ze bo na' ntse'te bwe là nyi'te. Njoṅ yub fa dun Ywèt Nelàne, nke ntshob ntshob Nsi ke bwôg.
Nkôni mbwe benkristô
32Njoṅ #Mfa' Gha. 2.44-45benntùn fa tse bo bam nà na' mb'a ntù ntshù' mba zwiag ntshù'. Mèn lo ke be tshob ndù ju z'a ghù là b'a ze tù' i, là njoṅ tshu fa na' mb'a ntam netèt bo. 33Ghantum lo ke nkwé nta Tshùaben Yésu z'a lo num vù là ntùm neta ndùb; kondèn ndùb be num njoṅ yub fa. 34Sàm mèn netèt bo lo ke tswe ntùm bwoṅ, nummbe njoṅ benntùn fa tse bo ghù nà ke mba' lo là, lo ke nswène, nse' nkàb ze bo swèn yi là, 35njab mbaṅ nku ghantum. Bo nke ngabte netèt bo, mfà mba we lo be mb'a ku'ni num i là.
36Ndùlala Yosèf, mo' Lévi z'a fe Kiprô, ghantum nke ntsiaṅ i Barnaba, yen nà bagt'a ndù mèn fitentù là, 37lo ghù mo' nà. A swèn, ndo' nkàb i, nse' njab mbaṅ nku ghantum.
ទើបបានជ្រើសរើសហើយ៖
Mfa' Ghantum 4: BMa
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
La Sainte Bible en Bamiléké-Medùmba © Alliance Biblique du Cameroun, 1993. All rights reserved.
