Matyo 7
7
Ke sa tsɛrɛ esɛʼ ato abɔ tsɛrɛ bo
(Luk 6:37-38, 41-42)
1Ke tsɛrɛ esɛʼ ato gho deʼ bo mbɔʼtye Ngwe gɛrɛ ne esɛʼ ato njɛ tsɛd. 2Ngwe ya sɛ̀ʼɛ awɛ nkirinkin ene aghɛʼ yɛ ngwo ma sɛ̀ʼɛ abɔ tsɛrɛ ngɛ. Ebwa wɛ ngwo ma nu é sɛʼ egho wɛ anyi ngɛ gɛrɛ ne engɔ Ngwe ma nu é sɛʼ awɛ anyi. 3Ayɛ me le ngwo ma zamma zɔ êndzɔrɔ wɛ è mwɔ aghɔɔ ghongwa ngwɛ ngɛ ne kpe mbè zamma zɔ antiri azɔd yɛ a mwɔ efwɔ ènjɛ̂ eghɔɔ ngɛ bo? 4Ngwo wa da sa ga ebe ghongwa ngwɛ kpe, “Shi mmɛ chi êndzɔrɔ wunɔ aghɔɔ njɛ” wɛ ngwo me le antiri azɔd efwɔ anjɛ aghɔɔ ngɛ ene. 5Mbɔn bɔ ndooro aghɔɔ, dye chi antiri azɔd efwɔ eghɔɔ njɛ mbɔʼtye ngwo me né zɔ akwâ anchwɔnchwɔ é chi êndzɔrɔ wɛ mwɔ efwɔ eghɔɔ ghongwa ngwɛ ngɛ. 6Ke ndɛʼɛ ala yɛ a me pɛ ngɛ ebe bo bo, mbɔʼnga bo ya ghɛɛbɛ é ke awɛ. Gɛrɛ ke ndwa ela kama ekɛb mbyɛ ebe kunyɛm bo mbɔʼnga è ya ngo dzɛ̀ddɛ̀ enji ebla mɔ.
Ngà biiri, zɛ̀ʼ gɛ̀rɛ̀ gbeʼre
(Luk 12:33-34)
7“Biiri shi e ba ndɛ̀ʼ engɛ̂. Zɛʼɛ shi ngwo wa zɔ. Gbeʼre shi e ba fuʼ enduʼndɔ engɛ̂. 8Mbɔʼnga egho wɛ è ma biiri ebe Ngwe ngɛ è wa nu, egho wɛ zɛʼɛ ngɛ è wa zɔ, egho gɛrɛ ma gbeʼre ngɛ e ba fuʼ enduʼndɔ ebe engɔ.
9Àtɛ we abwaʼ ndzɔn me né ndɛʼ etye ebe ŋwɔ mɔ wɛ è ma biiri me ende ngɛ? 10Kà awɛ me né ndɛʼ jwe ebe ŋwɔ mɔ wɛ è ma biiri ma shuu ngɛ? 11Mala mbɔn bɔ bɔɔbɔɔ me né ndɛʼ ela nchwɔnchwɔ ebe bwɔ mbɔn, àtɛ ngɔn ekere ke ma ngo ndɛʼ ela nchwɔnchwɔ byɛ mbɔn ma biiri ngɛ fɔɔ éngɛ bo? 12Éngɛ, ngà le ebe abɔ tsɛrɛ ebwa wɛ ngwo ma ke kpe é le ekwa ngwɛ ngɛ. Ewunɔ na ato ega ene etsɛrɛ Mose mane abwa yɛ bàmɛnɛkɔn Ngwe à ma tee ngɛ.”
Enduʼnkɛmɛ wɛ e me fɛrɛ ngɛ
(Luk 13:24)
13“Mbɔn fɔɔ ene enduʼnkɛmɛ wɛ e me fɛrɛ ngɛ mbɔʼnga enduʼnkɛmɛ wɛ e ma ngɔɔ efwɔ edzɔwu asatan ngɛ we bɛrɛ. Aghɛʼ yɛ a ma gbee à ngɔɔ aŋu ngɛ ye zɛɛrɛ me zamma é zhiri anyi, bɔ akɛkɛ ma fɔɔ anjì aŋu. 14Bɛʼngɛ enduʼnkɛmɛ wɛ e ma ndɛ̀ʼ etyê ngɛ we kpɛɛ, enjì yɛ e ma ngɔɔ aŋu ngɛ gɛrɛ me kɔrɔ. Abɔ byɛ e me nɛɛ enjì yɛ ngɛ be kpɛɛ.”
Azɔd mane enta mɔ
(Luk 6:43-44)
15“Mbɔn nu azɔm nè bàmɛnɛkɔn andɔɔ. E na zeʼe endɔn ma tee kpe e be bwada na ǹglɔ̀rɔ̀ nɔ ene ezɔɔrɔ, bɛʼngɛ efwɔ ńtara angɔ e mwɔ ne ekùru ma gwɔn chwɔ nɔ. 16Ngwo wa ngo nɛɛ angɔ ene abwa yɛ angɔ ma le ngɛ. Ankwò ke ma kla enta ebere bo, àzòo gɛrɛ ne ma kla enta ajwɔ bo. 17Ezɔd nchwɔnchwɔ gimkpaʼ na kla enta ǹchwɔ̀. Bɛʼngɛ ezɔd bɔɔbɔɔ gimkpaʼ gɛrɛ ma kla enta bɔɔbɔɔ. 18Ezɔd nchwɔnchwɔ ke né kla enta bɔɔbɔɔ bo, azɔd bɔɔbɔɔ gɛrɛ ke né kla enta ǹchwɔ̀ bo. 19Azɔd deʼ yɛ a ne ma kla enta nchwɔnchwɔ bo ngɛ e ba gbɛ saa a chwâ ndwa efwɔ edzɔwu. 20Éngɛ ngwo wa nɛɛ bàmɛnɛkɔn andɔɔ ene abwa yɛ angɔ ma le ngɛ.”
Yeso gâ ebe abɔ deʼ kpe mbè ke nɛɛ angɔn bo
(Luk 13:25-27)
21“Ke mwɔ bɔ gimkpaʼ byɛ e ma zɔʼrɔ angu kpe ‘Masakɛ, Masakɛ’ ngɛ ma yà nyii efwɔ ebwa m̀fɔ̀ Ngwe bo. Bɛʼngɛ à tye ma angɔ byɛ e ma le abwa yɛ àtɛ ngu ekere ma ke kpe angɔ le ngɛ. 22Èndzobo chɛ Anji Tsɛrɛ esɛʼ ma yà zeʼe ngɛ, bɔ akɛkɛ ba sa ga ena kpe ‘Masakɛ! Masakɛ! Mbyɛɛ à ke ma sɛ̀ɛrɛ̀ ega Ngwe ene ekumu ngwɛ bo, mbyɛɛ à ke fli ezhwɛɛrɛ bɔɔbɔɔ gɛ̀rɛ̀ le anɛ̂ abwa akɛkɛ ene ekumu ngwɛ bo?’ 23Éngɛ mmɛ wa ga ebe angɔ kpe, ‘Mmɛ ke nɛɛ angɔn bo, mbɔn nyɛnnɛ ebara mfu abɔ ǹchù bɔnɔ.’ ”
Bàbyɛ ndɔrɔ fyee
(Luk 6:47-49)
24“Éngɛ abɔ byɛ e ma zo abwa yɛ mmɛ ma ga gɛ̀rɛ̀ ma fwɛʼ ngɛ, ne mwɔ na gho azɔm wɛ à byɛ ndɔ mɔ edɔm ekob ngɛ nɔ. 25Èndzobo chɛ m̀bò à ngwe ghɛʼ, ndimiri shwe, efùu kɛ́ fuu ene ndɔ ngɛ, ndɔ ne go bo mbɔʼnga â me chi etirindɔ edɔm ekob. 26Bɛʼngɛ egho wɛ ma zo ega ngu shi ne ma le bo ngɛ, ne mwɔ na gho atii wɛ à byɛ ndɔ mɔ edɔm ńchiri nɔ, 27èndzobo chɛ m̀bò à ngwe ghɛʼ, ndimiri shwe, efùu kɛ́ fùu ene ndɔ yɛ ngɛ, è go ene aghɛʼnji bɔɔbɔɔ.”
Yeso Kristo tee abwa nè ekama
28Èndzobo chɛ Yeso à mɛɛrɛ ga abwa zɔnɔ ngɛ, ebaŋabɔ wɛ à mwɔ aŋu ngɛ kɔ̂n ene aghɛʼnji yɛ engɔ à ma tee abwa ngɛ. 29Engɔ à ke ma tee abwa na àtee atsɛrɛ nɔ bo bɛʼngɛ à na tee abwa ene ekama ene egha mɔ.
ទើបបានជ្រើសរើសហើយ៖
Matyo 7: nbt
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2022, CABTAL
