Matyo 4
4
E kwa̧ʼra Yeso
(Mak 1:12-13; Luk 4:1-13)
1Enyɛrɛ éngɛ, azhwɛɛrɛ pɛ nu Yeso ngɔɔ efwɔ akwânked ebe dɛbli é kwà̧ʼrà engɔ. 2Yeso à shi tsɔmɔ enji èsama fyee mane ǹklì èsama fyee ne nde ala deʼ bo, éngɛ engɔ à sa gwɔn chwɔ. 3Dɛbli zeʼe ebe engɔ è ga kpe, “Mala ngwo mwɔ ŋwɔ Ngwe, ga ebe atye zɔnɔ shi a firi ende.” 4Yeso gíì kpe, “Aŋwɛʼrɛ Ngwe ye ga kpe ‘Bɔ ke ma tsɔmɔ tye me ene ende bo, e na tsɔmɔ ene abwa gimkpaʼ yɛ a ma zeʼe eklo Ngwe ngɛ.’ ” 5Éngɛ dɛbli nu Yeso è ngɔɔ a Jerusalɛm abɛ Pɛ, tɛʼ engɔ edɔm antsɛn ndɔngwe kɛ̀, 6gà ebe engɔ kpe, “Mala ngwo mwɔ ŋwɔ Ngwe, furu chimmi a chwâ, mbɔʼnga aŋwɛʼrɛ Ngwe ye ga kpe,
‘Ngwe ya ngo ndɛʼ etsɛrɛ ebe engere mɔ kpe
angɔ chɛ awɛ ebwo àmɔ̀
ne le kpe ngwo duru eloo mfyɛ ene etye deʼ bo.’ ”
7Yeso wu gíì kpe, “Bɛʼngɛ e be ga efwɔ aŋwɛʼrɛ Ngwe kpe, ‘Ngwo ke sa kpèrè Masakɛ Ngwe njɛ bo.’ ” 8Éngɛ, dɛbli wu nu Yeso ngɔ̀ɔ edɔm egu dɔɔdɔɔ deʼ, gɛ̀rɛ̀ tee ebɛ gimkpaʼ efwɔ ese mane àfɔ̀n àmɔ̀ ebe engɔ. 9Dɛbli gâ ebe engɔ kpe, “Mala ngwo gunu awɛ a chwâ è ghɔ angu, shi mmɛ wa ndɛʼ ela bɔnɔ gimkpaʼ engɛ.” 10Éngɛ Yeso gíì kpe, “Nyɛrɛ ebara mfu Asatan! Aŋwɛʼrɛ Ngwe ga kpe ‘Ghɔ Masakɛ Ngwe njɛ gɛ̀rɛ̀ sa fwɛʼ tye ebe engɔ.’ ” 11Éngɛ dɛbli saara Yeso, engere Ngwe zeʼ kpèdè engɔ.
Yeso Klada afwɛʼ mɔ a Galilii
(Mak 1:14-15; Luk 4:14-15)
12Aŋu Yeso à zo kpe a shi ge Eyɔɔ a ndɔdzɔm ngɛ, engɔ wu ngɔ̀ɔ abɛɛ abɛ Galilii. 13Engɔ à ke ndada a Nazarɛd bo, è ngɔ̀ɔ tsɔmɔ a Kapɛnaum ebara eklaba ndim Galilii, akwâ deʼ â ma zɔʼrɔ kpe Zebulun mane Naftali. 14Abwa zɔnɔ â gli énde é le kpe abwa yɛ Azaya Àmɛnɛkɔn Ngwe à shi ga ngɛ gli éŋwaʼa kpe; 15“Ebɛɛ abɛ Zebulun mane Naftali, ene aghɛʼnji é ngɔ̀ɔ efwɔ ebɔrɔndim anjid eji Joodan, Galilii efwɔ chwâ ebɛbɔ! 16Abɔ byɛ e ma tsɔmɔ adi̧iri ngɛ a shi zɔ ekɛʼ kɛ́. Abɔ byɛ e ma tsɔmɔ afwɔ yɛ azhi ewu mwɔ ngɛ a shi zɔ ekɛʼ.” 17Enyɛrɛ èndzobo chɛ Yeso klada sa sɛ̀ɛrɛ̀ ekɔn mɔ kpe, “Mbɔn saara abwa bɔɔbɔɔ ndzɔn mbɔʼnga ebwa m̀fɔ̀ ekere a shi mbín.”
Yeso zɔʼ bɔ bɛɛrɛ abwa mbèmbè mɔ
(Mak 1:16-20; Luk 5:1-11)
18Aŋu Yeso à ma zhiri eba angli Galilii ngɛ, engɔ zɔ bwɔngwaanɔm deʼ fyee, Shimun wɛ â ma zɔʼrɔ kpe Petoro ngɛ mane ghongwaanɔm mɔ Andere, e ma sòʼ shuuru ene ǹklɔ̀ efwɔ angli mbɔʼnga angɔ à na àsòʼ shuuru. 19Yeso gâ ebe angɔ kpe, “Mbɔn kiri angu, shi mmɛ wa ngo tee endɔn aŋu mbɔn ma ngo sa sòʼ bɔ ngɛ.” 20Egha ŋwaʼ, angɔ saara ǹklɔ̀rɔ̀ àmɔ̀ gɛ̀rɛ̀ kìrì engɔ. 21Engɔ dana ngɔ̀ɔ embè è wu zɔ a bwɔngwaanɔm tsɛrɛ fyee, Jems mane Eyɔɔ, bwɔ Zɛbɛdii. Angɔ à ne efwɔ ekpe nè àtɛ àmɔ̀ Zɛbɛdi ma ndèerè ǹklɔ̀rɔ̀ àmɔ̀, Yeso zɔʼ angɔ 22egha ŋwaʼ, angɔ saara ekpe mane àtɛ àmɔ̀ gɛ̀rɛ̀ kìrì engɔ.
Yeso tee abwa, sɛ̀ɛrɛ̀ ega Ngwe gɛ̀rɛ̀ gli bɔ
(Luk 6:17-19)
23Yeso à zhiri efwɔ akwâ gimkpaʼ a Galilii ma tee ega Ngwe efwɔ ndɔrɔ bɛɛrɛ abwa bɔ Juu. Engɔ ma sɛ̀ɛrɛ̀ Ǹtɔm ǹchwɔ̀ mbɔʼ ebwa m̀fɔ̀ Ngwe, gɛ̀rɛ̀ ma gli bɔ gimkpaʼ byɛ â ma gwɔn ene m̀pèrè eŋwan akɛkɛ abwaʼ angɔ ngɛ. 24Ekɔn mbɔʼ abwa yɛ engɔ à ma le ngɛ sɛ̀ʼ efwɔ abɛ Sirya gimkpaʼ, ene aghɛʼ yɛ bɔ à bwɛ bɔ byɛ â ma gwɔ̀nnɔ m̀pèrè eŋwan akɛkɛ ngɛ, bɔ byɛ à ma zɔ ǹgoʼ ene m̀pèrè eŋwan akɛkɛ mane enyii ngɛ, bɔ nè ezhwɛɛrɛ bɔɔbɔɔ mane angɔ byɛ à ma go ekli mane angɔ byɛ ebɛɛ akwa à me ku ngɛ, Yeso gli angɔ bɔ gimkpaʼ. 25Ebaŋabɔ à kiri engɔ. Angɔ à zeʼe abɛɛ abɛ Galilii, abɛɛ abɛ Dekapolis, abɛ Jerusalɛm, abɛɛ abɛ Judeya mane anjid eji Joodan.
ទើបបានជ្រើសរើសហើយ៖
Matyo 4: nbt
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2022, CABTAL
