Lûqa 8
8
Cînîyê ke Hetkarîya Îsayî Kenê
1Badêna, Îsayî dest pê kerd dewan û şaristanan ra geyra. Şarî rê waezî û mizgîna Hukimranîya Homayî da. Diwês hewarîyê ci zî Ey dir bî. 2Sewbîna zî cînîyê ke Îsayî ê cinan û nêweşîyan ra xelisnaybî Ey dir bî. Nînan ra yewe Meryema Mejdelije bî. Îsayî aye ra hewt cinî qewirnaybî. 3Cînîya Xûzayî Yohena, Sosine û gelek cînîyê bînî zî Îsayî û hewarîyanê ci rê refaqet kerdêne, îmkananê xwu gore înan rê ardim kerdêne. Xûza, kehyayê qral Hîrodesî#8:3 Hîrodes: Lajê qralo pîl Hîrodesî, Hîrodes Antîpa bi.
Mîsalê Citêrî
(Metta 13:1-23; Marqos 4:1-20)
4Îsayî qelebalixo pîl ke şaristananê ciyayan ra amebi Ey het rê eno mîsal da: 5“Yew citêr şiyo ke toxim bierzo. Gama ke toxim eşto, tayê hebî rişîyayê kişta rayirî, binê lingan de pelixîyayê û teyran enê toximî werdê. 6Tayê zî kewtê tehtan ser. Eke enê toximan zîl dayo zî bêawîye ra wuşk biyê şiyê. 7Tayê zî kewtê miyanê telîyan. Telîyî zîlan dir biyê pîl, zîlî fetisnayê. 8Tayê bînî zî kewtê herrîya başe. Enê toximî biyê pîl û se qat mehsûl dayo.” Badê, Îsayî bi vengo berz va: “Goşê kamî yê şinawitişî yo, wa bişinawo!”
9Şagirdanê ci persa ke eno mîsal yeno çi mana.
10 #
Yeşeya 6:9-10
Îsayî wina cewab da: “Sirrê derheqê Hukimranîya Homayî de şima rê eşkera biyî. Labelê ez sewbîna kesan rê bi mîsalan vana. Bi hawayê ke,
‘Do biewnîyê feqet nêvînê,
Do bişinawê feqet fam nêkerê.’
11“Manaya mîsalî ena ya: toxim kelamê Homayî yo. 12Êyê kişta rayirî de, kesê ke kelam şinawito. Feqet badê pey Îblîs yeno, seba ke bawer nêkerê û nêxelisîyê, kelamî qelbê înan ra vejeno beno. 13Êyê ke kewtê tehtan ser, kelam şinawito û bi keyfweşî qebûl kerdo. La enê kesî seba ke nêeşkayê kok bigêrê, ancax midetêk bawer kenê. Kesê winasî wexto ke bêrê ceribnayiş îman ra ageyrenê. 14Êyê ke kewtê telîyan miyan, kelam şinawito la zemanî dir miyanê endîşe, zengînî û zewqê dinya de xeniqîyayê, eno semed ra nêeşkenê mehsûl bidê. 15Êyê ke kewtê herrîya başe zî kelamî şinawenê û bi qelbêko baş û pêt girêdiyenê. Enê bi sebir deyax kenê, mehsûlêko zêde danê.”
Roşnê Xwu Menimnê
(Marqos 4:21-25)
16“Kes qendîle tanêfîneno û bi firaq nênimneno, yan zî nêkeno binê sedirî. Eksê ci, qendîldane de nano ro ke êyê ke dekewenê keye zî roşnî bivînê. 17Çimkî tu çiyo pinanî ke nêro eşkerakerdiş çinê yo; tu çiyo nimite ke nêro zanayiş, nêkewo roşnayî ver çinê yo. 18Eno semed ra dîqet bikerê ke şima senî goşdarî kenê. Kam waqif o, do ey rê hîna zaf bidiyo, la kam ke waqif nîyo, çiyo ke bawer keno waqif o zî do ey ra bigêrîyo.”
Aîleya Eslî ya Îsayî
(Metta 12:46-50; Marqos 3:31-35)
19Dadî û birayê Îsayî ameyî, la qelebalix ra nêeşkayî bêrê nizdîyê Ey. 20Xebere diyaye Îsayî ke “Dadî û birayê to teber de yê. Wazenê to bivînê.”
21Îsayî va “Dadîya mi û birayê mi ê yê ke, kelamê Homayî şinawito û anê ca.”
Îsa Firtineyî Vindarneno
(Metta 8:23-27; Marqos 4:35-41)
22Rojêk Îsa û şagirdê xwu weniştî qayixe. Îsayî înan ra va “Ma vîyarê weverê gole.” Bi eno qeyde, bi qayixe gole ser o aver şiyî. 23Wexto ke qayixe gole ser o aver şiyêne Îsa şi hewn a. Nişka ra gole de firtineyêko pîl wurişt. Gama ke qayixe awe girewte, dekewtî halêko tehlîke. 24Şagirdê ci şiyî Îsa kerd aya. Ey ra va “Seyda, Seyda, ma xeniqîyenê!”
Îsa wurişt, emir da ke, va û pêlê harî vinderê. Firtine vindert, her ca resa sikûnetî. 25Îsa ageyra şagirdanê xwu ser, va: “Kanî îmanê şima?”
Şagirdî tersayî û ecêb mendî. Yewbînan ra va “Eno merdim kam o ke va û awe bîle emrê ci rê îtaet kenê?”
Îsa Şîfa Dano Mêrikê Cinêrî
(Metta 8:28-34; Marqos 5:1-20)
26Îsa û şagirdê xwu resayî mintîqeyê Girasînîyan ke weverê Celîle de mendêne. 27Îsa gama ke vejîya qerax, şaristan ra yew mêrik ame Ey vera. Eno mêrik cinêr bi. Demêko derg ra viran geyrayne. Neke keyeyê xwu de, şikeftê ke sey mezelca ameyne bikarardiş de cûyayne. 28Gama ke ey Îsa dî qîra û vernîya ci de şi erd, bi vengo berz wina va: “Îsa, ey Lajê Homa tealayî, Ti mi ra çi wazenê? Ez bextê to de ya, Ti îşkence bi mi nêkerê!” 29Çimkî Îsayî cinî rê emir kerdbi, vatbi “Mêrikî ra vejîye!” Cin tim biyêne miseletê mêrikî. Mêrik bi zincîr û qeydan amebi girêdayiş; nobedar ey ser o bi. Labelê zincîrê xwu visnayne, hetê cinî ra ver bi cayanê xewle ameyne berdiş.
30Îsayî ey ra persa va: “Nameyê to çi yo?”
Ey zî va “Nameyê mi Artêşe”, çimkî bolêk cinî dekewtbî zereyê ci. 31Cinan, seba ke înan nêşirawo xorînîyanê bêbinan,#8:31 xorînîyê bêbinî: Çala bêbine ke Îblîs û ruhê xirabî do şêrê uca, cayo ke cinî do tede bêrê cezakerdiş. Îsayî rê zaf lavey kerd. 32A esna de, verardê koyî de yew garana pîle ya xozan estbî ke uca çerayne. Seba ke destûr bido ê dekewê zereyê xozan, cinan Îsayî rê lavey kerd. Ey zî destûr da. 33Cinî mêrikî ra vejîyayî şiyî dekewtî zereyê xozan. Garana xozan verardê tîk yê koyî ro acêr vazda, xwu eşt gole û xeniqîyayî.
34Înanê ke xozî çerênayne gama ke enê qewimîyayişî dîyî remayî, şaristan û dewan de ena xebere vila kerde. 35Enê ser o, şar vejîya ke qewimîyayişî bivîno. Ameyî verê Îsayî, mêriko ke cinan ra xelisîyabi dî. Mêrik verê linganê Îsayî de ronişte bi. Kincî daybî xwu ra, aqilê ci amebi sere. Şarî saw girewt. 36Înanê ke eno qewimîyayiş dî, sewbîna kesan rê qal kerd ke Îsayî senî mêrik cinan ra xelisnayo. 37Pêro şaro ke mintîqeyê Girasînîyan de cûyayne zaf tersa. Coka înan waşt ke Îsa uca ra şêro. Îsa zî seba ke ageyro Celîle wenişt qayixe. 38-39Eno mabeyn de, mêriko ke cinan ra xelisnabi seba ke Ey het bimano Îsayî rê lavey kerd. Labelê Îsayî ci ra va “Ageyre keyeyê xwu, Homayî semedê to se kerdo, qal bike” û mêrik şirawit. Mêrik zî şi, Îsayî semedê ci se kerdo, her cayê şaristanî de vila kerd.
Keyneka ke Bena Gane, Cîneka ke Şîfa Vînena
(Metta 9:18-26; Marqos 5:21-43)
40Îsa gama ke ageyra Celîle qelebalix şi Ey vera, çimkî her kes paweyê Ey bi. 41A esna de yew îdarekarê xavra vejîya ame, nameyê ci Yayîros bi. Kol bi linganê Îsayî û seba ke piya şêrê keyeyê ci lavey kerd. 42Çimkî keynaya eya yeweka diwês serra verê mergî de bî.
Îsa gama ke şiyêne keyeyê Yayîrosî qelebalixî her hetan ra O tehn dayne. 43Înan miyan de yew cînî zî estbî ke diwês serrî bî aye ra gunî şiyêne. Ena cînî pereyê xwu pêro dabi hekîman la tu yew nêeşkabi şîfa bido aye. 44Îsayî dima ameye û destê xwu sawit pêşê ci ra. A game de gunîşiyayişê ci vindert. 45Îsayî persa va: “Kamî destê xwu sawit mi ra?”
Her kesî înkar kerd ke destê xwu sawito ci ra. Petrûsî va “Seydayê ma, qelebalixî dorê to girewto, to tehn danê.”
46Labelê Îsayî va “Yewî destê xwu sawit mi ra. Mi hîs kerd ke zereyê mi ra yew hêz vejîya.” 47Cîneke fam kerd ke nêeşkena biyayişî binimno, bi lerzayiş aver ameye. Kol biye linganê Îsayî. Vera her kesî de aye qal kerd ke çira destê xwu sawito Îsayî ra û senî ke destê xwu sawito senî şîfa dîya. 48Îsayî cîneke ra va “Keynaya mi, îmanê to ti xelisnaya. Bi silametî şo.”
49Îsayî hema qisey kerdêne, yewo ke keyeyê îdarekarê xavra ra ame, ey ra va “Keynaya to merde! Êdî Seydayî narehet meke.”
50Îsayî ke eno şinawit, Yayîrosî ra va “Meterse! Tenya îman biyare, keynaya to do bixelisîyo.”
51Îsa ame keyeyê Yayîrosî. Petrûs, Yûhena, Yaqûb û dadî û babîyê keyneke ra teber kes nêgirewt zere. 52Her kesî dayne xwu ro, bermayne. Îsayî înan ra va “Mebermê. Keyneke nêmerda, hewn de ya.”
53Bi tinaz Ey rê huyayî. Çimkî înan zanayne keyneke merda. 54Labelê Îsayî destê keyneke girewt û veng da ci, va: “Keynaya mi, wurze payanî!” 55Newe ra ruh dekewt keyneke, tavilî wurişte payanî. Îsayî emir kerd ke tayê werd bidê ci. 56Dadî û babîyê keyneke heyret mendbî. Îsayî ê tembî kerdî ke kesî rê behsê enê biyenan nêkerê.
ទើបបានជ្រើសរើសហើយ៖
Lûqa 8: diqSZZ
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© (Active), Wycliffe Bible Translators, Inc. All rights reserved.
