Lûqa 16
16
Serweto heqîqî
1Îsayî şagirdanê xwu ra wina va: “Zemanêk yew mêriko zengîn estbiyo. Seba ke karê ci îdare bikero yew kehya girewto. Rojêk, eno kehya seba ke malê ci bîlasebeb xerc keno ameyo îxbarkerdiş. 2Wayirê ci veng dayo ey, vato ‘Enê çi yê, derheqê to de ez şinawena? Ka hesabê kehyatîya xwu bide. Êdî ti nêeşkenê bibê kehyayê mi.’
3“Kehyayî xwu rê vato ‘Ez do nika se bikerî? Wayirê mi do mi kar ra vejo. Qaso ke ez hêga de bixebitî biqewet nîya. Ez parskerdiş ra zî fedî kena. 4La ez zana ez do se bikerî. Ez do xwu rê hevalan bivînî, bi eno qeyde, gama ke ez kar ra bêrî vetiş, ê do mi dawetê keyeyê xwu bikerê.’
5“Enê ser o, çi kesê ke wayirê ey rê deyndar ê, yew bi yew veng dayo înan. Yewinî ra persayo vato ‘Çiqas deynê to wayirê mi rê esto?’ 6Deyndarî zî vato ‘Se dore zeyt.’ Kehyayî zî ey ra vato ‘Ca de senedê xwu bigêre ronişe û deynê xwu pancas dore binusne.’
7“Dima yewna deyndarî ra vato ‘Deynê to çiqas o?’ Deyndarî zî vato ‘Hezar çiwalî xele.’ Kehyayî zî vato ‘Bigêre senedê xwu, heşt sey çiwal binusne.’
8“Wayirê ci, seba ke kehyayo hîlekar aqilane têwgeyrayo, o teqdîr kerdo. Axir însanê dinyewî,#16:8 Zafê mumînê heqîqî semedê Hukimranîya Homayî ke do bêro amadekarîya ke hewce kena nêkenê. Oxro ke însanê dinyewî têkilîya xwu ya bi sewbîna kesan de bala xwu danê menfîetê xwu ser; semedê enê her tewir xeyretî kenê. têkilîya mabeynê xwu de, însananê ke Homayî ê roşindar kerdê ra hîna aqilane têwgeyrenê.
9“Ez şima rê enê vajî, serweto xapênayox yê dinya ke nika şima wayir ê, seba ke şima bibê wayirê dostanê daîmîyan xerc bikerê. Wina ke, wexto ke malê şima biqedîyo, êyê ke do şima meskenanê ebedî de qebûl bikerê, wa bibê. 10Keso ke karanê qijekan de layiqê îtîmadî bo, karanê pîlan de zî beno layiqê îtîmadî. Keso ke karanê qijekan de hîlekar bo, karanê pîlan de zî beno hîlekar. 11Eke şima derheqê serwetê xapênayox yê dinya de layiqê îtîmadî nêbê, kam serwetê ebedî emanetê şima keno? 12Eke şima derheqê malê sewbîna kesan de layiqê îtîmadî nêbê, seba ke şima wayir vejîyê, kam çiyêk dano şima?
13“Yew xizmetkar nêeşkeno di wayiran rê qûlîtî bikero. Yan yewî ra hes keno, êyê bînî ra nefret keno, yan zî, yewî rê beno sadiq êyê bînî nêşinasneno. Şima nêeşkenê hem Homayî rê hem zî pereyî rê qûlîtî bikerê.”
14Fêrisîyê ke pere ra hes kenê, gama ke enê vateyê Îsayî şinawitî, bi Ey tinaz kerd. 15Îsayî înan ra wina va: “Şima xebitîyenê ke vera însanan de xwu pak vejê. Feqet çiyo ke qelbê şima de yo, Homa pê zano. Çimkî çiyo ke mabeynê însanan de zaf biqedir o, Homayî rê mekruh yeno.
16“Wehyê Tewratî û pêxemberan hetanî zemanê Yehyayî dewam kerdî. Enê ra pey, dest bi dayişê mizgîna Hukimranîya Homayî bi û her kes xebitîyeno bi zorkanî dekewo uca. 17Ez şima rê enê vajî, meydan ra wedarîyayişê erd û asmînî, vindîbiyayişê tek yew herfa Tewratî ra bîle hîna asan o.”
Zewicîyayiş û veradayiş
18“Bigoşdarê, keso ke cînîya xwu verado û yewna cînî dir bizewicîyo seke zîna kerda hesibîyeno. Keso ke cînîya veradayî dir bizewicîyo zî seke zîna kerda hesibîyeno.
Mêriko zengîn û Lazar
19“Zemanêk yew mêriko zengîn estbiyo. Kincê tenikê ketenî yê binefşî dayne xwu ra, miyanê şetefatî de her roje keyf kerdêne. 20Yew mêriko feqîr zî estbiyo, nameyê ci Lazar biyo. Pêro wicûdê Lazarî miyanê kul û birînî de biyo. Tim kêberê enê zengînî de ameyo verdayiş. 21Seba ke pişwerde ra pîzeyê xwu mird bikero, gan dayne. Yew het ra zî, kutikî ameyne û birînê ci liştêne.
22“Rojêk, Lazaro feqîr merdo. Melekan o berdo Îbrahîmî het. Eno mabeyn de mêriko zengîn zî merdo û ameyo definkerdiş. 23Alemê merdeyan de ezabêkê pîlî de biyo. Dûrî ra Îbrahîm û Lazaro ke ey het de yo, dîyê. 24Veng dayo vato ‘Babîyo Îbrahîm, mi rê bêre rehme! Lazarî mi rê bişirawe, wa serê engişta xwu dekero awe miyan û ziwanê mi bikero honik. Miyanê ena kile de ez ezab ancena.’
25“Îbrahîmî vato ‘Lajê mi, yeno to vîr, dinya de to senî heyat ra keyf girewtêne! Lazar zî halêko perîşan de bi. Nika o tiya teselîya xwu gêno, ti zî ezab ancenê. 26Ancî, terîşêko winî mabeynê ma de ronîya ke, ne tiya ra yew eşkeno bêro to het, ne zî uca ra yew eşkeno bêro tiya.’
27“Enê ser o, mêrikê zengînî wina vato: ‘Ez bextê to de ya babîyo Îbrahîm, o wext Lazarî apey bişirawe dinya, keyeyê babîyê mi. 28Panc birayê mi estê. Wa şêro înan îqaz bikero ke, ê zî nêkewê enê cayê ezabî.’
29“Feqet Îbrahîmî vato ‘Ê wayirê vateyanê Mûsayî û pêxemberan ê. Wa nînan rê dîqet bikerê, bes o.’
30“Mêrikê zengînî vato ‘Nê! Babîyê ma yo Îbrahîm, ancax merdeyan ra yew şêro înan het, tewbe kenê.’
31“Îbrahîmî zî ey ra vato ‘Eger birayê to îtaetê vateyanê Mûsayî û pêxemberan nêkenê, merdeyan ra yew bibo gane bîle îqna nêbenê!’”
ទើបបានជ្រើសរើសហើយ៖
Lûqa 16: diqSZZ
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© (Active), Wycliffe Bible Translators, Inc. All rights reserved.
