Lûqa 14
14
Roja Sebtî dayişê şîfa
1Yew Roja Sebtî Îsa seba werdî şi keyeyê pîlanê Fêrisîyan ra yewî. Uca her kesî bi dîqet bala xwu daybî Ey ser. 2Yew mêriko ke wicûdê ey awe girewtbî ame vernîya Îsayî. 3Îsayî Fêrisîyan û alimanê Tewratî ra wina va: “Roja Sebtî nêweşan rê dayişê şîfa caîz o, yan nê?” 4Înan vengê xwu nêkerd. Îsayî destê xwu sawit mêrikî ra û şîfa da, dima o şirawit keyeyê ci. 5Fêrisîyan û alimanê Tewratî ra va “Eger lajê şima yan zî gayê şima Roja Sebtî bikewo bîr, bê ke wext vîyarnê, şima nêvejenê?” 6Ê nêeşkayî cewab bidê enê zî.
Muhîmîya mutewazîtî
7Îsayî ferq kerd, êyê ke dawetê werdî biyê, semedê roniştişî cayo tewr baş weçînenê. Enê ser o înan rê eno mîsal qisey kerd: 8“Eger yewî semedê veyweyî veng da to, kunco serîn de romenişe. Beno ke wayirê keyeyî veng dayo yewê to ra muhîmêrî. 9Eke ti kunco serîn de ronişê, beno ke wayirê keyeyî ke şima her di zî dawet kerdê, bêro to ra vajo ‘Cayê xwu bide enê mêrikî!’ O wext ti do mehcûb bibê û mecbûren şêrê tewr peynî. 10Eno semed ra wexto ke ti seba yew veyweyî dewet biyî, şo peynî de ronişe. Eyê ke ti dawet kerdê, wa o bêro to ra vajo ‘Dosto biqîmet, ti kerem nêkenê hîna vernî?’ O wext ti do çimê meymananê bînan de bibê wayirê îtîbarî. 11Çimkî o ke xwu berz bikero do bêro nizimkerdiş, o ke xwu nizim bikero zî do bêro berzkerdiş.”
Mîsalê ziyafetî
(Metta 22:1-10)
12Dima Îsayî Fêrisîyê ke ey dawet kerdbi ra va “Wexto ke ti teştare yan zî şan de şamî bidê, dostan, way û birayan, merdiman û cîrananê xwu yê zengînan dawet meke. Nêke ê zî seba werdî bîlmiqabil to dawet kenê. 13Eksê ci, eke to yew ziyafet da, feqîran û lengan û koran dawet bike. 14Bi eno qeyde, ê do nêeşkê to rê miqabile bikerê, ti do şa bibê. Çimkî roja hesabî wexto ke ti kesanê salihan dir bibê gane Homa do mikafatê to bido.”
15Êyê ke sifreyî ser o ronişteybî ra yewî gama ke enê şinawitî Îsayî ra va “Werre bi înan ke Hukimranîya Homayî de sifre de ronişenê!”
16Îsayî ey ra wina va: “Yew mêrikî yew ziyafeto zaf pîl dayo û gelek kesî ziyafetê xwu rê dawet kerdê. 17Eke wextê werdî ame, seba ke xebere bido meymanan ke sifre amade yo, xizmetkarê xwu şirawito. 18Labelê seke hemîne verî ra xebera xwu kerda yew, her yewî yew behane pê ardo. Yewî vato ‘Mi yew hêga erênayo, gereka ez şêrî bivînî. Keremê xwu ra wa mi mazûr bivîno.’ 19Yewnayî vato ‘Mi panc cotî gayî erênayê, ez gereka şêrê înan hêga de biceribnî. Mewnî qisûrê mi ra, ez nêeşkena bêrî.’ 20Yewnayî zî vato ‘Ez newe zewicîyaya. Coka ez nêeşkena bêrî.’
21“Xizmetkar ageyrayo, wayirê xwu rê wezîyet qisey kerdo. Wayirê keyeyî zaf hêrs biyo û xizmetkarê xwu ra vato ‘Haydê şo, kuçe û cehdeyanê şaristanî ra bigeyre. Feqîran, lengan, koran û seqetan bide arê biyare!’
22“Demêk badê pey xizmetkarî vato ‘Wayirê mi, çiyo ke to emir kerd mi ard ca, la hema ca esto.’ 23Enê ser o, wayirê keyeyî xizmetkarî ra vato ‘Şo, rayiranê teberê şaristanî ra, dorê çeperan ra bigeyre, to kam dî ameyişî rê îqna bike, wa keyeyê mi debo.’ 24Ez şima rê enê vajî, werdê mi ra, êyê ke mi veng da la nêameyî ra tu kes do nêeşko tenya yew loqme zî tehm bikero.”
Bedelê Îsayî dima şiyayişî
(Metta 10:37-38)
25Yew qefleyê însanan Îsayî dir ver bi Yeruşalîm rayir şiyêne. Îsa ageyra înan ser û wina va: 26“Eger şima bêrê mi het la şima dadî û babîyê xwu ra, cînî û mêrdeyê xwu ra, tutanê xwu ra, way û birayanê xwu ra, heta ke ganê xwu ra bîle nêvîyarê, şima nêeşkenê bibê şagirdê mi. 27O ke çarmixê xwu wenêgêro#14:27 Çarmixê xwu wegirewtiş: Sey tabîr yeno manaya dej, zehmetî û heta ke merg girewtiş verê çimî. û mi dima nêro, nêeşkeno bibo şagirdê mi.
28“Eke şima biwazê yew birce înşa bikerê, verî şima ronişenê û mesrefo ke do bikerê, qaso ke bieşkê karê xwu biqedênê pereyê şima estê yan çinê yê, şima hesab kenê. 29Eke şima hîm ronê û nêeşkê kar biqedênê, 30her kes do vajo ‘Enê merdimî dest bi înşat kerd feqet nêeşka biqedêno’ û bi şima tinaz bikero.
31“Yew hukimdaro ke des hezarî leşkerê ci estê, hukimdaro ke bi vîst hezarî leşkeran yeno ey serî dir herb bikero, verî ronişeno û yew mihasebe keno. 32Eger bizano nêeşkeno zorê hukimdarê bînî bibero, o hema dûrî de yo, qasidan şiraweno û şertanê aştî wazeno.
33“Eno seba şima her yewî zî eynî yo. Seba ke şima mi dima bêrê gereka şima her çiyê xwu ra fek veradê. Eke nê, şima nêeşkenê bibê şagirdê mi.
34“Sole bifayde ya. Labelê eke sole tehmê xwu vindî bikero, mimkun nîyo ke ancî tehmê sole bigêro. 35Êdî tu çiyêk rê nêbena. Ne herrî rê bena, ne zî bena zibil; erzîyena çop. Goşê kamî yê şinawitişî yo, wa bişinawo!”
ទើបបានជ្រើសរើសហើយ៖
Lûqa 14: diqSZZ
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© (Active), Wycliffe Bible Translators, Inc. All rights reserved.
