KALAQAMA 34
34
YAIQOOBI OOSO RODOONSARA RABBISSINO RABBA
1Mitto barra Yaiqoobira Liya iltinosi beetto Diina hatte gobba seenne la'ara fultu. 2Gobbate gashshaanchi Hiwichu Hamoori beetti Sekeemi afe, wolqatenni amade macca hunise. 3Qoleno baxillisenni amadame isera wodana hagiirsiisanno coye coyi'rise. 4Sekeemino annisi Hamoorira, «Tenne beetto haa'rie» yee kuli.
5Yaiqoobi beettosi Diina Sekeemi shollishinoseta macciishshi yannara, oososi saada adhite halallira doyite hadhe no; isino oososi dagga geeshsha cince agari. 6Sekeemi anni Hamoori konne coye Yaiqoobi ledo hasaawara dayi. 7Yaiqoobi oosono konne coye macciishshite halallinni daggu; Sekeemi rodoonsa Diina shollishinohura lowo geeshsha dadillite fooggaltu; kuni coyi Israeelete gobbara saalahonna assate hasiisannokkiho. 8Hamoorino, «Beetti'ya Sekeemi beetto'ne baxillinni amadaminona, eeggatena ballo galte ikkitannosi gede uuyyesi» yee huucci'ri. 9Balluwa ikkineemmo gede, beetto'ne uuyyenke; ki'neno ninke seenne adhe. 10Baattonke baatto'neetina ninke ledo heedhe; umi'ne baatto amaxxitine dadda'litinanni hasidhiniwa heedhe.
11Sekeemino Diina anniranna roduuwisera, «Ki'nella maahoyye yitiniero, xa'mitinanniere eemmo. 12Mini-woronna miine abbi yiniero, xa'minie geeshsha eemmona, tenne beettolla uuyye"e» yii.
13Sekeemi rodoonsa Diina shollishinohura Yaiqoobi ooso isiranna annisi Hamoorira godowita godowa amadde, 14«Rodoonke barciminokki manchira aa saala ikkitinohura, hatto assa didandiineemmo. 15Konne coye maahoyye yineemmohu ki'ne ninke labbinanni gede, labballo'ne baalanka barcimshiishshinirooti; 16hakkunni gedensaanni, seennenke uyineemmo'ne; ki'ne seenneno adhineemmo; ki'ne ledo mitto manna ikkine hee'neemmo. 17Yinoommota macciishshitine barcima gibbiniro kayinni beettonke adhine ha'neemmo» yitunsa.
18Hamoorinna beettisi Sekeemi insa yitino coye sumuu yitu. 19Sekeemi Yaiqoobi beetto baxino daafira, konne coye assate dikeeshshino; isi annisi mine noori baalunkunni roore wolqaataamoho.
20Hamoorinna beettisi Sekeemi kataminsaha songote gudumaale e'e, kataminsa mannira, 21«Kuni manni keeraanotena baattonkera hee'rona; ka'a kawa hadhe dadda'litona; kune baattonke hala'ladote; seennensa adhine, insarano seennenke uyinonsa. 22Ikkirono kuni manni ninke ledo hee'rannohunna ninkeno insa ledo mitto manna ikkineemmohu insante gede ninkehuno labbaahu baalu barcimirooti. 23Hatto assinummoro, saadansanna jajjinsa baalu dininkeha ikkanno? Kunni daafira yitinore maahoyye yineenna ledonke heedhona» yitu. 24Katamu gudumaale fulino manni baalunku Hamoorinna beettisi Sekeemi abbitino mala macciishsheenna labballu baalu barcintu.
25Sayikki barra barcintino mada qoortukkinni heedheenna, Diina roduuwi Simiooninna Leewi bise adhite mittuno afikkinni katama e'e, labballo baalanka shite guddu. 26Hamoorinna beettosi Sekeemino shitu; rodoonsa Diinano Sekeemi mininni fushshite adhite hadhu. 27Wolootu Yaiqoobi ooso rodoonsa Diina shollishshinorinni kainohunni e'e katama saantu. 28Me"enna ge'reewo, lalonna harre hattono katamahonna katamu gobbaanni noo jajja baala gudhitu. 29Jironsa baalanta, qaaqquullensanna meentonsa baala qafaddu; mine noore baala soqqe guddu.
30Yaiqoobi Leewiranna Simioonira, «Tenne gobbara heedhanno Kana"aanootinna Ferizooti mereero su'ma'ya boshshitinoonni; anera lowo manni dinoe; gamba yite amadduero, anenna maate'ya guddanno» yii.
31Insa kayinni, «Rodoonke fooru meenti gede assinanna worre la'noyya?» yite dawartusi.
ទើបបានជ្រើសរើសហើយ៖
KALAQAMA 34: QulMax
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© The Bible Society of Ethiopia; Sidama Holy Bible BSE-UBS 262 P 2014