ማቲወስት ወንጌል 5
5
ፈወነ 5
እየሱስ ኣበይል ኣቕ ክንሰው ክንድጝድ (ፈወነ 5-7)
1እየሱስም ንቕፀው ኽዝቭ ኣኽቭሸጘ ቓላንድ ኣበል ፍ ጐዩ፤ ጝክንደጥድም ጝጐ ኣልት። 2ጘጝም እንት ያ ክንስጠ ኪርሙ፦
እማንዝ ቀቫሸቍ እቅ
(ሉቃ. 6፡20-23)
3«መንፈስዝ ድኽ ኣቐቍ እቅ ቀቫሸቍ ጛይ፤
ምጝግስተሰማያት ጝታወ ጚነ።
4ኻዝነቍ እቅ ቀቫሸቍ ጛይ፤
ዲብሽተነው ችጝጥቍነ።#እሳ. 61፡2።
5ገርኻን እቅ ቀቫሸቍ ጛይ፤
ዝቨት ዊርስጥቍነ።#መዝ. 37፡11።
6ፅድቅ ግድርደቍ ዝቛንደቍም እቅ ቀቫሸቍ ጛይ።
እቭትጥቍነ።#እሳ. 55፡1-2።
7ስቝርት ፃቨቍ እቅ ቀቫሸቍ ጛይ፤
ጛይም ሳቝርሽጥቍነ።
8ንፅዅ እዘን ፃየቍ እቅ ቀቫሸቍ ጛይ፤
እደረት ቓልጥቍነ።#መዝ. 24፡3-4።
9ኣርቅሰቍ እቅ ቀባሸቍ ጛይ፤
እደረት ቝር ይሽትጥቍነ።
10ፅድቅዝ ማጥን ሲድሽሸቍ እቅ ቀባሸቍ ጛይ፤
ምጝግስተሰማያት ጝታወ ጚነ።#1ቢጥ. 3፡14።
11«እቅ ይቍዝ ክታት ዛሽጛንድ፣ ሲድስጛንድ፣ ኻሽትዝም ክታሽድ ጨቅጛንድ፣ ቀቫሽርነቅ የጝ።#1ቢጥ. 4፡14። 12ሲመይስ ችጝትርኑ ክታወየድ ኽየው ኣቓንስቅ ዲስ ይጥን፤ ኽየው ዲስተም ፃቭጥን፤ ክታበውገ ዊነቍ ነቭያታንድዛትም እነሽጝ ሲድስጝኵ።»#2ዚመ. 36፡16፤ ኻወ. 7፡52።
ጭወጥረዝመ መቭራትዝ ተከ
(ማር. 9፡50፤ ሉቃ. 14፡34-35)
13«ክትን ዝቨት ጭወጥረ የጝ፤ ዊገድ ግን ጭወጥረ ጝጣምነድ ባን ወረጘዝ ጣምትጡ? ቢዘይል ማልሽት እቀ ልኵዝ ደድሽጠ ኣቕሽጚ ጝዝለ ውርም ጣቅማው።#ማቲ. 5፡13፤ ሉቃ. 14፡34-35። 14ክትን ኣልሚዝ ብርኻን የጝ፤ ኣበል ተሲትረይ ኻትመ ጭቭርተ ቸላይም።#ይዃ. 8፡12፤ 9፡5። 15እቅም መቭራት ኣቭርኽዝጝ ጝኒዝ ኣቒል ፅበቍ እቂዝቅ ኣቭርኽጠ ማጥን ንየ ዲቭየይል እቝርጘኵጚ ቃቀዝ ኣቒል እቝራቍም።#ማር. 4፡21፤ ሉቃ. 8፡16፤ 11፡33። 16እኒዝጘም እቅ ክትን ሰራሽርነው ቀሰው ሰቭድየንት ቓልጝ ሲመይ ፅበው ክታይርድየንት ሚዝየንዝጛንስ ማጥን ክታብርኻንድ እቀ በዊልቅ ኣቭርኽነ።»#1ቢጥ. 2፡12።
ወሪትት ኽጊዙ ፋፅምሸነድ
17«ያን ክታግስ ወሪትት ኽጊዝመ ነቭያታኒዝ ሸርጨ ተጠር ተኪነ፤ ያን ተጠውድ ጛት ፋፅምጨ የጝጚ ሸርጨም ኣየው። 18እማንዝ የኵን፤ ሲመይስመ ዝቨስ ዲቍጥጚስቅ ወሪትት ኽግድ እጝቅቅ ፋፅምሸኵጚ ኽጊስ ላይ ፊድል ዊንም ላይ ነቍጥ እኳ ሸርሻይም።#ሉቃ. 16፡17። 19ነስየ ኣውማው እጅር እንዛይ ትዛዛኒስ ላይ እጥን ትዛዝሸንት እኳ ፋዝሽ፣ ላጥ እቂዝም ፋዝጛንስ ማጥን እነሽ ክንስሽ፣ ምጝግስተሰማያትስ እጝቂስቅ እጥን ኣጡ። እንዛይ ትዛዛንድዛት ፋፅመው፣ ላጥ እቂዝም ፋፅምጛንስ ማጥን ክንሰው ኣውማው እጅርድቅ ምጝግስተሰማያትስ ኽየው ኣጡ። 20ኣቓንስቅም ክታፅድቅድ ፈሪሳኒዝመ ወሪትት ኽግ ክንሰጢዙ ፅድቂስ ዲቊየውዝየ ስሪስቅ ምጝግስተሰማያት ጥዋይርነቅም የኵን።
21«በውገትቍ እቂዝ፦ ‹ኒቭስ ቁተ! ኒቭስ ቍወውድቅ ፍርድዝ ቐፃሽጠ ጥውሸኵ› ይሽተጘ ወሽርንኵርኑ።#ዘፀ. 20፡13፤ ዘዳ. 5፡17፤ 16፡18። 22ያን ግን ጝዝኒል ጊነዝ ቈጣሸው እጅርድቅ ፍርድዝ ቐፃሽጠ ጥውሸኵ፤ ጝዝንድየንት፦ ‹ኻጝ› የው ዛሸውድቅ ሸጐውዙ ፊርድዝ ቐፃሽጠ ጥውሸኵ፤ ‹ዲቋር› የው ዛሸው እጅር ቈሽ ግኻነመሳትዙ ፍርድዝ ቐፃሽጠ ጥውሸኵ የኵን። 23እንዝ ማጥን ክሚቨድ መሰዊየይል ፃቭር እደረስ ኣልስራንድ፣ ክት ቂይምሸው ክዝን ፅበጘ ኣጅርሽ፣ 24ክሚቨድ መሰዊየይዝ ጋቢል እቝርነ በዊል ፊትር ክዝን ጅቅ ኣርቅጭ፤ ጝዝ ግረ ዋጥርድር ክሚቨድ ኣልሽ። 25ክቃርኘድ ኪሱዝ ጝጅቅ ፍርድ ጝንል ፊትርሽ፣ ገነ ጒደነይል ፅብርና ክቃርኘይጅቅ ቲስመም፤ ኣለዝየ ክቃርኘድየን ደጘዝ ዲቍስ ይወኵ፤ ደጘድ ቈሽ እፅቈተዝ ዲቍዝ ይወኵ፤ ጘጝም ወኽኒ ጝንል ድውጡ። 26እማንዝ የኵን፤ ጝዝ ግረ ቐፃሽረው ጊንዝቪስ ላይ ሳንቲምቅ እዳቒጝቀ እጝቅትቅ ኪፍልቲስቅ ጝጊስ ፋርም።
27« ‹ሻርሙጥተ› ይሽተጘ ወሽርንኵርኑ።#ዘፀ. 20፡14፤ ዘዳ. 5፡18። 28ያን ግን፦ እውነት ቓል ጝርት ማርቕፀው እጅርድቅ ኣይንድ ጝእዘኒዝ ጝርጅቅ ሻርሙጥኩ የኵን። 29ክለው እልድ ክት ቀስሽ ጝት እለ ፊስር ማል፤ ክሰውነትድ ምሉዝ ግኻነመሳትል ጥወነዊስ ክሰውነቲስ ላው ኣካል ብራን ቺዘኵ።#ማቲ. 18፡9፤ ማር. 9፡47። 30ክለው ናንድ ክት ቀስሽ ጝት ቅዝር ማል፤ ክሰውነትድ ምሉዝ ግኻነመሳትል ጥወነዊስ ክሰውነቲስ ላው ኣካል ብራን ቺዘኵ።#ማቲ. 18፡8፤ ማር. 9፡43።
31« ‹ጝውነት ዳቕረው እጅርድቅ ጝርድቕሪዝ ማስረጀ ኣቐው ወረቂት ጝርስ ይው በርስነ› ይሽተጘ ወሽርንኵርኑ። 32ያን ግን ጝዲጊል ሻርሙጥር ችጝሽሩዝ ኣየውዝየቅ፣ ጝውነት ዳቕረው እጅርድቅ ሻርሙጥተ ፃቨኵ፤ ዳቕርሽረይ እውነት ድወው እጅርም ሸርሙጠይዝጘ እጊተኵ የኵን።#ማቲ. 19፡9፤ ማር. 10፡11-12፤ ሉቃ. 16፡18፤ 1ቈረ. 7፡10-11።
33«ቈሽም በውገትቍ እቂዝ፦ ‹ኻሽትዝ ፃርተ፤ ኣደረት በዊል ፃርደውድየንትም ሊምጭ› ይሽተጘ ወሽርንኵርኑ።#ዘሊ. 19፡12፤ ዘዅ. 30፡2፤ ዘዳ. 23፡21። 34ያን ግን ስሪስቅ ፃርትርነ የኵን፤ ሲመይዝም ኣሽ ፃርትርነ፤ ምላሰንድም ሲመይ እደረት ዙፋን የጝ።#ያይ. 5፡12፤ እሳ. 66፡1፤ ማቲ. 23፡22። 35ዝቨስም ኣሽ ፃርትርነ፤ ምላሰንድም ዝቨ እደረት ልኲዝ ደደነ ጚ። እየሩሳልየምስም ኣሽ ፃርትርነ፤ ምላሰንድም እየሩሳልየም ኽየው ንጕሲዝ ኻትመ ጚ።#እሳ. 66፡1፤ መዝ. 48፡2። 36ክታቕምትዝም ኣሽ ፃርትርነ፤ ምላሰንድም ክታፅቭቂስ ላይሸንት እኳ ፃረይት ዊንም ጝጭርት ፃቨነው ቸላይርነቅም። 37እንዝ ማጥን ዊግትርናንድቅ ክታቃልድ፦ ‹የይ› ኣቕሽ፦ ‹የይ› ኣነ፤ ‹ኣየውም› ኣቕሽ፦ ‹ኣየውም› ኣነ፤ እንዝለቱ ዊገድ ግን ሲጣኒዙ የጝ።#ዘሊ. 19፡12፤ ዘዅ. 30፡2፤ ዘዳ. 23፡21።
38« ‹እልዝ ፊንተ እል፣ እርቍዝ ፊንተ እርቍ ፍነ› ይሽተጘ ወሽርንኵርኑ።#ዘፀ. 21፡24፤ ዘሊ. 24፡20፤ ዘዳ. 19፡21። 39ያን ግን ክታጭስ የኵን፤ ጭቓ ፃቨው እጅርድየንት ተቃውምሽትርነ፤ ዊገድ ግን ክለወ ጥቋድየንት ጥፊዝ ጣዘዊዝ ፃግቭ ጥቋድየንት ቈሽ ጅልውዝር ይይ። 40ላው እጅር ክት ኪስሽ፣ ክኪተድም ፊስጠ በንሽ፣ ክኵተድየንትም ቈሽ ፊስጠር በጭ። 41ላው እጅር፦ ‹ለው ዊቱ ጒደነ ይጅቅ ፊጥ› የው ኣስግድድዝሽ፣ ክት ቈሽ ላየ ጘጝ የዊዝ ቝጠ ቈሽር ፊጥ። 42ክት ጨወዊዝቅ ይይ፤ ክጊስ እድውርጠ በነዊዝም ክጋፅድ ጨቅተ። #ዘዳ. 15፡8፤ ምሳ. 24፡29።
43« ‹ክፃምረድየንት ቀን፣ ክፃለት ሽክጭ› ይሽተጘ ወሽርንኵርኑ።#ዘሊ. 19፡18። 44ያን ግን ክታፃለታንድ ቀንጥን፤ ክታት እፀቍድዛት ጊቭትጥን፤ ክታት ሽክተቊዝ ቀሰው ፃቭጥን፤ ክታት ሲድሰቊዝ ፃልይጥን የኵን።#ምሳ. 25፡21-22። 45እኒንት ፃቭርነውዝየ ሲመይ ፅበው ክታይርስ ጝቝር ኣትርንቅ፤ ጘጝ ጭቒዝም ቀሰቊዝም ጝኰረድየንት ፊሰኵ፤ ፃድቃኒዝመ ኽጥያትኝጢዝም እስወድየንት ይወኵ። 46ክታት ቀነቍድዛት ጭቝ ቀንድርነቅ ኣርነውዝየ ውርት ወየ ችጝትርንቅ? ቀረጥ ቀቨቍድስ#5፡46 ቀረጥ ቀቨቍ፦ እን እቅድ ኣይዅዳኒዝ ፃለት ኣቐው ረውምየት ምጝግስቲዝ ኣምንሽተቍ ኣቕጝ በገዘ ጝታዊግኒስ ቀረጥ ኣኽቭጛ ዊንጛንስቅ ኣይዅዳኒዝ ጭቕጘ ሽክሸቍ ዊን። እኒንት ፃቭጘኵ ኣየውቀ? 47ክታፅኒዝ ጭቝ ዲግተ ይውርነቅ ኣርነውዝየ ላጢስ ወረጘዝ የጝ ቺዝርነውድ? ኣኽዛቫንድስ እኒንት ፃቭጘኵ ኣየውቀ? 48እንዝ ማጥን ሲመይቱ ክታይርድ ፍፅም ኣቐጘ ክትንም ፍፅማን ኣጥን።»#ዘሊ. 19፡2፤18፤ ዘዳ. 18፡13።
ទើបបានជ្រើសរើសហើយ៖
ማቲወስት ወንጌል 5: ኽምጣኣኪ
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
