Mateo 15
15
Deoso ati ai nofi nafihi
1Mose‑ka yama hani ati‑ya mai ka‑kamina mai toha, fariseo mai toha na, Yerosare‑ya mai wi‑wina mai kakemaroni. Yeso‑ya mai weena,
2“Hini yamata‑bone tiwa‑ya mai da‑daba ai‑ka idi mai ati‑ya mai nofariti?
‘Ai tafabone, ai yehe‑ya ai sorokariteni.’ Ai‑ka idi mai ati teni.
Tiwa‑ya mai da‑daba mai yahi towe tafateni.” Fariseo mai ati namaroni.
3“Ai‑ka idi mai ati dai nofabisa, Deoso ati‑ya dai tokadabarani.
4‘Abi, ami, mai na, mai tinofahi. Mai‑ka abi, mai‑ka ami, mai na, mai one‑ya mai weena, —Towe amatini.— Mai ati na, mai abahi.’ Deoso‑ka yama hani ati nineni. Haa‑nima dai ati nibisa,
5‘Abi, ami, oka yama dai kayafabone dai ati na, oka yama dai‑ya daa·orabone, Deoso‑ya yama daa·oni hawa ohani.’ Ati ne,
6‘Sibarini, hika yama‑ya Deoso‑ya daanebona, badi, madi, mai na mai hinofare, yama sibarini.’ Dai ati teni.
Deoso ati‑ya dai nofara, ai‑ka idi mai ati dai nofabisineni.
7Towe dai amani. Deoso ati‑ya i‑di Isa·iya kamine, fare dai tamine‑ya kanahanone,
8‘Owa‑ya mai nofamone mai ati na, hiniya keyehe‑ya mai hirina, owati‑ya mai tokadabarani.
9Mai ati omita, ya‑yai·oni awirini. Owati‑ya mai kaminamone mai ati na, mai one ati‑ya mai kaminabisineni.’ Deoso ati ne, ati‑ya i‑di Isa·iya kanahanomatane.” Yeso ati nemarine.
10Mai dama mai‑ya Yeso haane,
“Owati dai mitahi. Owati dai watohi.
11Ai tefe ene ai towe tohaterani. Ai ati towe ene ai towe tohabisateni.” Yeso ati nemarine.
12“Tiwati ihi fariseo mai yawa, mai tiwini?” Yeso‑ya oda da‑daba oda ati namaroni.
13“Fadara‑ya yama towe yana, Okobi yama hikamara‑ya mai borenaboneni.
14 # 15:14 Fariseo mai tamine amani. Deoso ati yokana‑ya mai watora mai one‑ya mai kanawata, mai nafi tosawariteni. Mai noki wadara‑nima mai teni. Mai noki wadikimara mai fami towaka, mai ibi yofikanabone mai ati na, hodi‑ya mai fami sonirisikimaboneni.” Yeso ati nemarine.
15“Tiwati oda watora, oda yofitikana, oda tikanawato tinahi.” Bedoro ati nemarine.
16“Ka! Hibati‑ya owa‑ya dai daba, owati‑ya dai wato awisarani.
17Yama dai watohi. Ai tefe ene ai towe tohaterani. Yamata ai kaba, ai nabadi‑ya toka, ai miiniya, wadamaterani.
18Ai atibodi towe toha, ai ati towe tohateni. Ai atibodi‑ya yama towe yanana ihi ai towe tohateni.
19Yama towe‑ya mai nokotonihe mai toha, mai one‑ya mai nanahaba mai toha, fana one‑ya mai ide mai toha, fana mai dama mai‑ya mai nokotonihe mai toha, yama‑ya mai bote mai toha, keyehe‑ya mai hirina mai toha, mai one‑ya mai weena mai toha na, mai atibodi ihi mai ihi towe toha teni.
20Ai yehe ai sorokari awiri‑ya ai tafiya, ai towe toharani. Ai atibodi towe tohiya, ai towe tohateni.” Yeso ati nemarine.
Fana Kanaha‑ka Yeso ati‑ya nofani
21Hiyari hawa tohe, tokawahe, Tiro toha, Sidoho toha na, fara yakari‑ya tokemarine.
22Kanaha mai‑ka fana kamake, Yeso‑ya hiyara,
“Ayo, oka hidi amatini. Dafi‑ka nodi amatini. Owa tikasomahi. Madi towe ene okoto kiyani nafeni.” Fana ati namaroni.
23Yeso ati yanare, Yeso‑ya oda da‑daba oda ati yananibisa,
“Yeso, yara fana tokahi, ati fawararo.” Oda ati na, oda ati damamaroni.
24“Yara mai‑ya Deoso owa‑ya yosere, Yodeo, Deoso ati‑ya mai watora mai‑ya Deoso owa‑ya yosebisemarine.” Yeso ati nemarine.
25Yeso yowi‑ya fana yobati tati‑kaya ita, Yeso‑ya hiyara,
“Ayo, owa tikasomahi.” Fana ati namaroni.
26“Ai‑ka madehe tafe‑ya yomahi‑ya ai daaterani.” Yeso ati nemarine.
27“Ayo, fara amani. Owati timitaharihi. Yome hidi tafa, tafe ibe bofe‑ya sona‑ya yome mai kabateni.” Fana ati namaroni.
28“Hehe, owati tinofi nafini, tiwati‑nima yama naboneni.” Yeso ati ne, ati ene fana bide kitamawahamaroni.
4.000 mai kana mai‑ya Yeso natafe
29Karireya‑ka wara webote widi‑kaya Yeso tokomatase, adami webote‑ya tokomorose, itarimarine.
30Mai dama mai tokomake, mai kiyana mai‑ya mai kakamamaroni. Mai ka‑kakona mai toha, mai noki wadara mai toha, mai ati fawana mai toha, mai kiyana mai toha na, mai‑ya mai kakama, Yeso noko‑kaya mai mai hinafore, mai nafi‑ya Yeso nakitamemarine.
31Mai ati wadara mai ati yananawaha, mai mani yanara mai mani yananawaha, mai ka‑kakona mai yakanawawaha, mai noki wadara yama‑ya mai awawaha, mai namaroni. Yeso ene‑ya mai awa,
“Ka! Isara·eo‑ya ai wi‑wina ai‑ka Deoso ene kitane.” Mai ati namaroni.
32Yeso‑ya oda da‑daba oda‑ya hiyare,
“Ai‑ya mai sa‑sawi mai okasomaboneni. Ai amoni 3 kani‑ya ai‑ya mai sawe, mai tafe wadarani. Mai oyoseya, fimi ihi mai abariyahi.” Yeso ati nemarine.
33“Ebeni‑kaya mai dama mai tafe‑ba ai kanikibati? Yobe awire‑kaya ai nahoneni.” Oda ati namaroni.
34“Dai‑ka baho emeniti?” Yeso ati nemarine.
“Oda‑ka baho 7 kana toha, aba bidi mai fa‑famaraba nihi nani.” Oda ati namaroni.
35Yeso ati ene mai nafi nahokosamaroni.
36Baho toha, aba mai toha na‑ya Yeso damakane, tefe tamine‑ya Deoso‑ya Yeso hiyare, baho‑ya kebi, Yeso‑ya oda da‑daba oda‑ya baho kote‑ya daa, aba bidi mai‑ya daane, mai nafi‑ya oda daanamaroni.
37Mai dama mai tafa, mai korimana, tefe kote hasina oda teena, hisiri 7 kana oda nakibamaroni.
38Maki mai 4.000 kana, mai fanawi dama, madehe dama na, mai tafamaroni.
39Mai korimana, mai tabori‑ya mai‑ya Yeso yosemarine. Yeso oda eyehe kanawa‑ya foye, wami oni Makada toha‑ya oda tokamaroni.
ទើបបានជ្រើសរើសហើយ៖
Mateo 15: jaaNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
