Roka 7
7
Sodado mai‑ka hidi Yeso ati‑ya nofe
1Yeso mai‑ya hiyari hawa toheya, Kafanaho‑ya toke, kobonematane.
2Sodado mai‑ka hidi hika yo‑yose owa‑ya nofi nafi, hika yo‑yose kiyani nafi, abi yanatonematane.
3Yeso tamine‑ya mite, Yodeo mai‑ka hidi mai one‑ya yosematane, Yeso‑ya mai kakamabonehe, hika yo‑yose Yeso hinakitamebonaha.
4Yeso‑ya mai kobona, Yeso‑ya mai haana,
“Yeso, ai tokomahi, Sodado‑ka hidi tikasomabonehe. Sodado mai‑ka hidi ati some, ene amosane.
5Sodado mai‑ka hidi ai nafi‑ya nofe, Deoso‑ya mai hi‑hiyara‑ke yobe‑ya wamanemarine.” Mai ati nameteni.
6Sodado tabaro‑ya mai toka, mai koboni yanatoniya, Sodado mai‑ka hidi‑ka no‑nofa mai one hiyosemakitasameteni, fai ati‑ya mai tokaminamakitasabonehe.
“Yeso, oka hidi webote amatini. Oka yobe‑ya tikariyahi. Towe ama·oni. Amosabotebisa amatini.
7Towe ama·oni. Fara ihi tiwa owawitirani. Tiwati yanana, tiwati ihi oka yo‑yose kitamebonane.
8Oka hidi ati‑nima oteni. Oka sodado owati‑nima mai teni. Fara‑nima tiwati yananiya, oka yo‑yose kitamebonane.” Sodado mai‑ka hidi ati nematane.
9Ati tamine Yeso himite, Yeso ya‑yaine, mai dama mai naha mai‑ya hiyare,
“Owati dai mitahi. Sodado mai‑ka hidi owati‑ya nofi nafine, Yodeo ai toha, owati‑ya dai nofi bi‑bidi neni.” Yeso ati nematane.
10Sodado mai‑ka one mai hiyari hawa tohe, mai winitonama, sodado mai‑ka hidi‑ka yo‑yose kitame‑ya mai awameteni.
Fana maki wadamare bidi‑ya Yeso nakitame
11Yeso hika mai da‑daba mai eyehe Nahi‑kaya toke, mai one dama mai tokomakemeteni.
12Sidadi‑ka nokobi yakari‑ya mai kakiya, yetene abo‑ya mai diwakana, mai‑ya Yeso awematane. Hibati‑ya badi abe, madi ohari wama, bidi ohari abamakitasematane. Nahi‑ya mai wi‑wina mai dama fana‑ya mai dabameteni.
13Yetene madi ohina‑ya Yeso awe, atibodi komahari, ati yanane,
“Ohitiriyahi.” Ati nematane.
14Abo foya‑ka‑ya Yeso boyone ene mai maanake,
“Yetene, tikitamahi.” Ati ne,
15Yetene itarimisame, ati yananamematane. Yetene‑ya Yeso daatonamematane, yetene madi‑ya.
16Yeso ene‑ya mai awa, mai habi siitona, Deoso‑ya mai kahiyara,
“Deoso ati ene Deoso ati‑ya mi‑mita oda‑ya dabawahane, kitabote amane. Deoso‑ka ai amani, ai‑ya kasomane.” Mai ati nameteni.
17Yetene‑ya nakitame tamine‑ya mai hiyara, Yodeya‑ka mai tabori dami‑ya mai ati tamine‑ya mai mita, Yodeya yakari‑ka mai ati tamine mai himitaharemeteni.
Deoso‑ka amatiraniha?
18Yowaho‑ya mai da‑daba Yeso ene tamine‑ya mai kamineni, Yowaho‑ya.
19Hika mai da‑daba mai fama mai‑ya yose, Yeso ati‑ya mai mitabone,
“‘Deoso‑ka kakibona mai ati namete fara amatiraniha? Fara tihi awiriya, Deoso‑ka yokana oda nimanaboneni.’ Dai ati niyahi.” Yowaho ati nematane.
20Yeso‑ya mai tonaka,
“Yowaho Batita oda‑ya yosene, tiwati oda mitabonehe. Deoso‑ka kakibona mai ati namete fara amatiraniha? Fara tihi awiriya, Deoso‑ka yokana oda nimanaboneni.” Mai ati nameteni.
21Mai demena mai noki‑ya Yeso mai dama mai‑ya nakitamematane. Mai kiyana mai toha, mai hi‑hiyana mai toha, madi foyi‑ka mai toha, mai na, Yeso mai‑ya nakitame, yama‑ya mai awaramete Yeso ene yama‑ya mai awawahameteni.
22Yowaho‑ya mai da‑daba mai‑ya Yeso hiyare,
“I‑di Yowaho‑ya dai towakamiya, owa ene dai kamina, owati dai kamina, dai nahi. Yama mai awaramaro yama mai awawaha, mai ka‑kakona‑maro mai yakanamawaha, mai mese towe tohamaro mai mese amosawama, mai narabi hawiramaro ai ati‑ya mai mitawaha, mai abamaro mai kitamawaha, yama mai kihara Deoso ati amosabote‑ya mai mitawaha nineni.
23Owa tamine‑ya mai miti‑ya mai yawi awiriya, Deoso mai‑ya kasomebonane.” Yeso ati nematane.
24Yowaho‑ka yo‑yose mai towakama, mai nowati‑ya i‑di Yowaho tamine‑ya mai dama mai‑ya Yeso hiyare,
“Hibati‑ya i‑di Yowaho‑ya dai toka, hini yamata dai awabone dai tokiti? Watikoro henerikane dai awabone dai tokiraniha?
25Bora amosabote‑ya sakone dai awabone dai ati na awineni. Yama dama mai kiha bora amosabote mai sakona, kabani‑kaya mai winatera, hidi webote‑ka yobe‑ya mai winateni.
26Deoso ati‑ya mi‑mita‑ya dai awabone dai ati na, fare Yowaho i‑di Deoso ati‑ya mi‑mita amane. Yowaho‑ya Deoso yosemarine.
27Fara Deoso‑ka yama hani ati dai mitahi.
‘Owati timitahi. Oka yo‑yose bofe‑ke oyoseboneni, tiwa hawine‑bone‑ya hawa tonihibonaha.’ Deoso‑ka yama hani ati na,
i‑di Yowaho Batita tamine amane.
28Yowaho Batita amosi nafi, hibati‑ka mai nafi amosi bi‑bidi nibisa, Deoso ai nafi‑ka hidi kitabote tohawahe‑ya mai sawiya, mai nafi amosi ba‑basi naboneni.” Yeso ati nematane.
29Kofeno‑ka yinero‑bona‑ya mai ha‑haa mai toha, mai one dama mai toha na, hibati‑ya Yowaho mai‑ya habanirise, Yeso ati‑ya mai mita,
“Deoso ene amosabote amane.” Mai nafi ati nameteni.
30Fariseo mai toha, Mose‑ka yama hani ati‑ya mai ka‑kanawato mai toha, mai na, Yowaho mai‑ya habanirisi awire, Deoso ati‑ya mai nofarameteni.
31“Hini yamata‑nima dai niti?
32 # 7:32 Madehe one ya‑yai, mai one ohi na, mai one hiniya naha, mai ya‑yaina mai‑ya mai nofara, mai ohina mai‑ya mai nofaharirani. Fara mai‑nima fariseo mai toha, Yowaho Batita‑ya mai nofara, i‑di Yeso‑ya mai nofaharirani. Haa‑nima dai nineni. Madehe nahore, mai ibi hiyara, haa‑nima mai ati na,
‘Ka! Kaida oda afona, dai wayomi awirani. Mai tabiyo oda ohina, dai ohini awirani.’ Madehe one ati na,
mai one‑ya mai nofara mai‑nima dai nineni.
33Yowaho Batita baho‑ya kabare, fino‑ya fawarihi ne,
‘Madi towe i‑di Yowaho‑ya foyane.’ Dai ati teni.
34Dai‑ka Ayo neme‑ke tafi ba‑basi ne, fino‑ya fawane,
‘Yeso towe amane, tafi nafi, fino‑ya fawa, kofeno‑ka yinero‑bona‑ya mai ha‑haa mai toha, mai ihi amosara mai toha, mai na, mai‑ya Yeso nofatene.’ Dai ati teni.
35Yama‑ya mai wata mai ai awa, mai ai watoteni.” Yeso ati nematane.
Yeso teme‑ya fana sokona
36Fariseo mai‑ka owa Yeso‑ya himanematane, fai tabaro‑ya tafebonaha. Mai towakama, mai tafameteni.
37Fariseo‑ka yobe yakari‑ya fana wina, fana ihi amosara, Yeso tamine‑ya mita, yama mahi amosa‑ya damakana, tokomakemeteni. Yama mahi amosa wiye yati amosa wamani meteni.
38Yeso teme‑kaya itarisa, ohina, noki fahi‑ya Yeso teme‑ya nowinihe, tati kone‑ya Yeso teme‑ya tamo, Yeso teme‑ya toma, yama mahi amosa‑ya Yeso teme‑ya sorokaremaki, Yeso teme‑ya tamo, fai teme‑ya toma nameteni.
39Fariseo fana ihi‑ya awe, yawe,
“Yeso‑ya fana boyona, fana towe amani. Yeso i‑di Deoso ati‑ya mi‑mita tohe‑mana, fana tamine‑ya wato nane.” Atibodi ati nematane.
40Fariseo‑ya Yeso hiyare,
“Simaho, owati timitahi.” Ati ne,
“Naki, tiwati omitabani.” Ati nematane.
41“Ai owa defeni 500 toha, ai owa defeni 50 toha mai nineni.
42Makobote yinero mai kihara, yinero mai daatonamara, yinero hidi mai‑ya kasome, yinero‑ya haanamarebona ati nane. Ebeni‑ke yinero hidi‑ya nofi nafibati?” Yeso ati nematane.
43 # 7:41-43 Ai‑ya kasomi nafi ai nofi nafine. Ai‑ya kasomi nafire ai nofi nafirene. Fara Yeso ati ene fana ihi towe manakone‑ya Deoso haanamare, Yeso‑ya fana nofi nafemetemoneni. Simaho hini‑ya kahiyare, “owa ene amosa hinama amani.” Atibodi ati ne, Yeso‑ya nofi nafirematamonane. “Yinero hidi‑ya defeni ba‑basi nemari‑ta hidi‑ya nofi ba‑basi nibisebonane.” Simaho ati ne,
“Fara amani. Tiwatoneni.” Yeso ati nematane.
44Fana‑ya kakatomeya, Simaho‑ya hiyare,
“Fana ihi tiawahi. Tika yobe‑ya okiyoma, owa teme sokoni‑bone‑ka faha‑ya daatira, fana noki fahi‑ya owa teme‑ya nowina, tati kone‑ya owa teme‑ya tamoneni.
45Owa noko‑ya tomatini awirani. Fana kobona owa teme‑ya tomanasa nibisani.
46Owa tati‑ya oyo‑ya sorotikanari awirani. Owa teme‑ya fana yama mahi amosa‑ya sorokaribisineni.
47Hibati‑ya fana ihi towe dama, ihi towe manakone wadamarani. Owa‑ya nofi nafineni. Mai ihi amosamone mai ati na, owa‑ya mai nofi nafirani.” Yeso ati nematane.
48“Sima, tiwa ene towe manakone wadamarini.” Yeso ati nematane.
49Yeso eyehe mai tafa Yeso ati‑ya mai mita,
“‘Tiwa ene towe manakone wadamarini.’ Yeso ati ne,
ai ati ene ai owa ene towe manakone fawaterene.” Mai ati nameteni, mai ibi hiyararo.
50“Sima, owati tinofa ihi Deoso ai nafi‑ka hidi kitabote tohe‑ya tisaweboneni. Tiwa tabaro‑ya tikamahi.” Yeso ati nematane.
ទើបបានជ្រើសរើសហើយ៖
Roka 7: jaaNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
