Luk 21
21
Jeju ɔsɨgon dekɨdẽ ngengawkoi'n ad Luwah nyaɓetron tube
(Oo Mrk 12:41-44)
1Jeju un kumɨn oon ngényag'n ɗa lan kadkarig lod kam sund nart. 2Oo ngengawkoi kɨ ngendo tɔ ɗe la gursɨ joo kamt. 3Jeju el an: Rota la m'ndɨ m'elsɨ ye; nya'n ngengawkoi kɨ ngendo'n non la kam sundt ye, tɔi lodg tube, 4kɨta ĩgɨn non tube ɔin kam nyamajgt lod kɨ ngãi la lan kadkarit ye, na dekɨdẽ'n non ɔi kam nyandot lon la ad nya tube'n to jiat kɨta ɓet'n ron.
Jeju elta kete dɔ nujt'n a nujɨn kuj ndub Luwah
(Oo Mat 24:1-5; Mrk 13:1-37)
5Deg madg ɗa elɨn na ta dɔ mbalgt kɨmaj'n ɗan ne kuj ndub Luwah kɨ kadkarig'n deg lan adɨn Luwah tɔ, na Jeju el an: 6Nyag 'nten tube ĩgɨn i ndɨ oon ye, ndɔ madg a ɗen nõ, ĩn a nyan mbal mad kɨɗa dɔ madt al, na a tɔsɨ tɨland tube.
Yaɓood kamkil kɨ darondo
(Oo Mat 24:3-14; Mrk 13:3-13)
7Ndɨjena anan: Ngendoo deg, nyag'n non a ɗan nya ɗɨngãt a? Nyakɔj kɨ ɗi tɔ a ɗa nya kad deg gerɨn ne ndɔ ɗe woi, kad nyag'n non ɗan nya a? 8Jeju turd an: Oon maj ot kad'n de mad goolsɨ. Kɨtɔ deg ngãibe a unɨn tɔm ɗen ne, anan: Mĩ la mĩ Krist ye, a elɨn tɔ anan: kaglo i nderbe. Ot ndulon go deg'n non. 9Lon oon hoi ɗɔɔg kɨ kah ɗɔɔg ye, ot kad'n ndilsɨ tee saw, kɨta nyag'n non kari na a ɗan nya kamtã na dɔboia nãi ɓaitɔ. 10Kamla eld an: Girrdeg madg a ɓai ɗɔɔn kɨ girrdeg madg, kõɓe mad a ɓai ɗɔɔ kɨ kõɓe mad, 11yee dɔning kɨbobog, kɨ ɓo kɨ õ, kɨ yokoosɨg a son kɨ log kɨ dang dang, nyag kɨkootɓool kɨ ga deg kɨngasat a ɗan nya, nya kɔjg kɨbobo a teen ko kɨ dõ dɔrãt.
12Na kete nõ nyagt 'nten tube, a hɔsɨn, a dan rosɨ ndo, a lasɨn ji kɨbogt kɨ kuj kawnat lo Juipg, a lasɨn dangait, a awɨn sesɨ nõ ngargt kɨ ngékõɓeg kɨtatɔm. 13Nyag 'nten a teen dɔsɨt i kɨtakad i ngahn ne kaglo kad i man ne naj. 14Kɨtɔ 'nten i ndan kamsɨt kad i soolɨn ngãi dɔ tatɨn a elɨn ɔrrɨn ne ta dɔsɨt al. 15Kɨtɔ mĩ m'a m'adsɨ ta kad elɨn m'a m'adsɨ goosɨ kelta na ngéndoorsɨg a asɨn maj sesɨ ta al ho a asɨn tursɨ ta al ho tɔ. 16Ngékoojsɨg kɨ ngankõsɨg, kɨ noojsɨg kɨ namsɨg a lasɨn ji degt, na a tɔlɨn kɨmadg kusɨt. 17Deg tube a mbetsɨn kɨtatɔm, 18na ke bisɨdɔsɨ kɨkɨɗa kaa a tuj al. 19Kɨ lo hɔtɔgbat losɨ la a ajɨn ne rosɨ ye.
Jeju elta dɔ nujt'n a nujɨn ɓebo Jerusalem
(Oo Mat 24:15-21; Mrk 13:14-19)
20Na lon a oon ngéɗɔɔg lan na gugɨn dɔ ɓebo Jerusalem a ne, a i gerɨn tela gotɓe i nderbe. 21Kamla ad ĩgɨn ndɨn dɔning Jude kɨ ãin na kɨ kam mbalgt, ĩgɨn ndɨn ngawden Jerusalemt kɨ teen kɨtɨga tɔ. Na ĩgɨn ndɨn ngan ɓegt kɨ kadat, ye kɨ ot kandɨn kamt. 22Kɨtɔ ndɔg'n non ĩn ndɔ nda ngɨra kɨ a ɗen kad tɔlɨn ne ta tag tube'n ndangɨn kam Maktubt. 23Na dekɨdẽ kokemg kɨ ĩgɨn ndɨ adɨn mba ngang kam ndɔgt'n non ye, a i nyakookumtondo kɨ tɔd, kɨta kamkɔl kɨbobe a ɗe dɔningt 'nten, na wong kɨ tɔl sɔkɨr lo Luwah a ɗe dɔ degt'n ɗan tɔ. 24A tɔlɨnd kɨ kiyaɗɔɔ, girrdeg kɨ dang dang a hɔnd awɨn sed ɓert, deg kɨ gerɨn Luwah al a nujɨn ɓebo Jerusalem mbã kad kaglo lod asɨn.
Ngon de a tel a ɗe
(Oo Mat 24:29-31; Mrk 13:24-27)
25Deg a oon nyakɔjg kam kàdt kɨ nah kɨ kɨmẽg, kam kɨ gang ngalang a ɗa girrdeg kɨ dang dang dɔningt. Kamd a dad ta paa tɔ, kɨta bahbo kɨ a ko wu wu, mang a ɓain ngãi. 26Ɓool a tɔl deg sɔkɨr, ad rod oi siw lo ngoo nyagt'n ndɨ ɗen dɔ dɔningt, kɨta a yeen tɔgg kɨ kam dɔrãt dõ. 27Kamla a oon Ngon de ndɨ ɗe kam kilndiit nat kɨ tɔg kunj kɨɗangeɗeng kɨbobe. 28Na lon nyag'n non mbã girr ɗa nya a ne, i ɓai i ɗan dõ, oon lo kɨ dõ kɨta Luwah a ad i ngahn dɔsɨ nderbe.
Ta nyandoo dɔ kag mbaiɓoodt
(Oo Mat 24:32-35; Mrk 13:28-31)
29Jeju eld terrta mad an: Oon kag mbaiɓoodg kɨ kagg tube. 30Lon ɗa ɓan mbid a ne, kɨgo koot'n oon nõ i gerɨn ɓet kad ɓar kɨkud i nderbe. 31Titbe tɔ ĩn, lon oon nyag'n non ndɨ ɗan nya a ne, kɨ i gerɨn ne kõɓe lo Luwah i nderbe. 32Rota la m'ndɨ m'elsɨ ye, deg kɨkaglot'n ɗan a tɔin kɔ al bat, mbã kad nyag'n non tube ɗan nya kamtã. 33Dɔrã kɨ dɔning a tɔin kɔ, na tag lom a tɔin kɔ al bat.
Kari na deg lo Luwah a oon go rod maj
34Oon go rosɨ maj, na ɓeta sanyaboot, ke kasɨ kɨɗa, ke sool ĩn deg ndɨ soolɨn dɔ nyaɓetrot adɨn kamsɨ oi siw, ad ndɔ'n non ɓasɨ ɓer bɔp, 35tit gum be kɨta titbe la a ɓan deg tube ngéndɨ dɔningt kɨtaagbe. 36Kɨtɔ 'nten, dɔ kaglo kɨɗen kaa i ndɨn dɔgt, i hɔn kelta kɨ Luwah, kɨtakad i ngahn ne tɔg tee ta nyagt tube'n a ɗan nya, kad i ɗan ne nõ Ngon det tɔ. 37Jeju ndɨ ndoo deg kàda kam kuj ndub Luwaht, na tee ndɔ aw to dɔ mbalbot'n tɔa i mbalbo kagbirg. 38Deg tube ndɨ awɨn kɨroat kɨsĩ kam kuj ndub Luwaht kad kɨ n'oon dɔ ta loa.
ទើបបានជ្រើសរើសហើយ៖
Luk 21: MlL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mbai Bible Revision © Bible Society of Chad, 2015.
