Matai 14
14
1Mmwaka ugwu unkuludeva UHeloti akapulika itsa Jesu itsa kupulikika umwene. 2Pwu akatsova navo avanu va mwene akata: Uju vi vi Johani umwotsi. Atsukile umwu aswe, pwu ipela isipelwa sisisi. 3Mańa UHeloti amwibite UJohani atye nukunkunga atye nukundindila nńumba jya vańololo panongwa tsa Helotya undala va lukololwe uva Pilipo. 4Mańa UJohani ambulile atye: Tsu mwiko ukuva nave uve. 5Umwene sikutsoni atetsaga ndimbude, mańa akadwada kuvavanda, ulwakuva avene vakata ńamalago. 6Pwu palitsuva lya kukumbuhitsa ukuholwa UHeloti, pwu akalive ka Helotya kakanema umwu vakinaga, kakanoga nakwa Heloti. 7Pwu umwene UHeloti akata: Dovaga kwane isyu vunogwa, syoni ndikukupetsaga. Akanjigila nulujigo baho. 8Umwene akata: Umetsage apa pandelema untwe gwa Johani umwotsi. Ulwakuva uvańina amovye ṅani. 9Pwu unkuludeva akasusuvala, ulwakuva ajiganikye ṅani, ulwakuva vapulike navene uvwu alitsaga navo isinu, pwu akata: Mumpetsage. 10Akansuṅa umunu va kuntema untwe UJohani nńumba jya vańololo, 11Vakagugega untwe pandelema vakahilika kuminza, vi akatsikumpa uvańina. 12Pwu avakongi va mwene vakatsikugupimba unsimba gwa mwene vakatsikunsila, Pwu vakatsikumbula UJesu.
13Umwene UJesu vwu apulike tsitsitsi, pwu akipaka mwiboti akakimbilila ndukungu mwu akatsikijekela mwene. Avene avanu vwu vapulike, pwu vakahuma mwoni mbutsenge vakagenda ija pamwambo ukwu ale umwene. 14Vwu ahumile uku pwu akavona avanu va vongosu ikipuga vuvule. Pwu ikisa kikambona mwitumbu, akavaponya avatamu va vene. 15Vakavona vuhwe avakongi va mwene pwu vakatsitsova nave vakata: Mwu ndukungu umu, vuhwe lino, uvatavulage avanu vabihage mwoni mbutsenge vakigulilage isya kulya. 16Umwene UJesu akata: Vabihage viki? Mbapetsage uńe isinu. 17Avene vakanda vakata: Mańa natuli nasyo isinge apa. Si sivanda sihano, syu tuli nasyo nisomba ivili vuvule. 18Umwene akata: Mugege kunu. 19Akata: Avanu vatame poni palińasi. Pwu akatola isivanda sihano sisyo nisomba ivili, akalola kukyańa akasana. Pwu akameńulanya isivanda akavapa avakongi va mwene, avene avakongi vwu vakavapa avanu. 20Pwu voni vakalya vakiguta. Pwu vakalundamanya utumeńukila utwu vasigitse avanu, tukadiga isiswiswi kitsigo nasivili. 21Avene avalitsaga umwu vavelye mbaelipu vahano (5000) uvwongosu ukuvala vene avagosi kitavala navadala navana.
22Pwu UJesu akavavula avakongi va mwene akata: Mwipakilage ṅani mwiboti mulongolage ukulovoka umwambo gulya, ndivatavulage tango avanu. 23Pwu vwu avatavwe avanu pwu akatoga pakidugala umwene, pwu akatsikijekela mwene akisaja. Pwu pakimihe vwu ali baho mwene vuvule. 24Ilyene iliboti vwu lili pagati pańanza vwu lilwa namajiga, mańa imepo jihumile ukwu lilotsitse. 25Pakilo pakavalilo kani umwu vivalila avilonda pakilo, pwu akavakonga umwene akakada vuvule pakyańa pańanza ukugenda. 26Avene avakongi vwu vambwene ukugenda vuvule pakyańa pańanza pwu vakajetuka mwitumbu vakata: Humbe mwitsitsi gugenda. Pwu vakakuta uludwado. 27Pwu UJesu akatsovela ṅani akata: mukivage vuvule mańa nene, kwu bako ukudwada. 28Pwu akanda UPetele akata: Nkuludeva ungave veve umbulage nune ndigenda pakyańa pamagasi, nditsage kwave ukwa. 29Umwene akata: vwitsage. Pwu UPetele akahuma mwiboti akagenda vuvule pamagasi, akabiha kwa Jesu. 30Vwu alivwene ilikuluguta pwu akadwada Pwu akatwivila. Pwu akakuta akata: Nkuludeva umoke! 31Pwu UJesu akagolosa ikivoko ṅani-ṅani vuvule akamwibata akata: Vi lwidiko ulwebepe uve vukwinana kiki? 32Pwu vakipaka vwu vavili mwiboti, pwu ilikuluguta likanunala. 33Avene avale mwiboti vwu vakatsibiluka kumwene vakata: Jilweli vi nswambe va Nguluve uve. 34Pwu vakalovoka vakatsisika pakilunga kya mu-Genesaleti. 35Avanu va mumwa vwu vammańile ukuta vi jujwa, pwu vakasuṅa undomo mwoni nkilunga mumwa. Pwu vakavagega voni avatamu kumwene. 36Vakatekelesa kumwene vakata: Twabasage ikilundwa kyako kumalunde vuvule. Voni avamwabasaga vwu valikupona jilweli.
ទើបបានជ្រើសរើសហើយ៖
Matai 14: Kinga
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
New Testament in Kikinga © British and Foreign Bible Society, 1961.
