Matai 10
10
1Pwu akavalundamanya avakongi va mwene kitsigo navavili akavapa amaka ga kuvahumya imepo imbivi naga kuponya uvutamu nuvulema vwoni. 2Agene amatavwa ga vapositili avali kitsigo navavili gwu aga: Undongotsi ale vi Simoni uvi vatetsaga vi Petele ilinge ilitavwa, nu-Andileja ununave nu-Jakobu uńa-Sebetai nu-Johani ununave 3nu-Pilipo nu-Balitolomai nu-Toma nu-Matai unsangutsi nu-Jakobu uńa-Alipai nu-Lebai uvi vatetsagavi Tatai ilinge ilitavwa 4nu-Simoni uva mu-Kana nu-Juta uva mu-Kalyoti uvi amendamaga ulwambele unkuludeva.
5Avakitsigo navavili ava vwu akavasuṅa inzila UJesu akavalagila akata: Ndagendaga kunzila ijilotsitse kuvapanzi, kwu bako ukutsikwingila mbutsenge vwa va-Samalija. 6Lola kuṅolo tsa ńumba jya Isilaeli itsijagile kwu mbihage. 7Vwu mugenda mukasimilitsage lilya kuta: Uludeva lwa kukyańa lwitsile luhegelye, 8mukavaponyage avatamu mukavatsusage avaswe mukavaponyage avańabuba mukatsihumyage imepo imbivi. Lola ndivapye vuvule uńe, nuńe mukavapetsage vuvule avene ngave mukuvapa. 9Kwu bako ukukava indalama nitsa sahabu nitsa pesa nitsa kimanga itsa kuvika mumpako gwińo gwa mungwamba. 10Kwu bako nukwivopela nimbopo jya munzila, kwu bako ukuva nigyańingilitsa givili, kwu bako ukuva nisikato, kwu bako ukuva nulukongotsa. Mańa uvi ivomba imbombo vi anogye ukuta vampetsage isinu sya mwene sya kulya. 11Ngave mutsisike mbutsenge uvunge–vungave vuvaha vungave vudebe–mwu mukandondage umu uvi anogye, mukagone pamwene mukasike lulwa mwiluta. 12Vwu mukwingila nńumba pwu mukavapembetsage avanńumba, 13Vangave vanogye pwu ulunotsehetso lwińo ulwu mukuvapembehetsa lukujitsilaga ińumba jya vene. Lola vangave navanogili pwu ulunotsehetso lwińo lukuva-kilivukilaga uńe ńi venenalwo. 14Vangave vabelile ukuvupilila vabelile nukupulihitsa itsu mwitsova, pwu mukahumage nńumba jya vene nkahumage nambutsenge vwa vene, nkatovele nulusumbe kumalunde. 15Jilweli-lweli ndikuvavula ndita: Ilitsuva lilya lya kuhigila inongwa, pwu itsa vamu-Sotomu nitsa vamu-Gomola tsilava ńebepe ku tsa mbutsenge uvu.
16Lola upwu ndikuvasuṅa pwu ndikuvasuṅa ukuta ṅolo tsihanga niṅanu inalamu. Mbetsage nuluhala ndińandalwe, mańa mbetsage vavalatse ndingundya. 17Mbandikage avanu. Mańa valavavika kuvahiganongwa, valavatova nńumba tsa vene tsa kwisajilamwo. 18Valavavika nakuvavaha nakuvakuludeva ulwakuva ndi vanu vango. Tsu tsivetsaga tsa kumańilamwo avene navapanzi. 19Apene vangave vikuvakunga vuvule-vule, pwu mulisagililaga ṅani ukuta nda tugahage ndeti, nda tutsovage liliku? Mańa unkuludeva alavapa pakavalilo aka itsa kutsova. 20Ulwakuva namulatsove uńe, Bako ju Mepo va dadajińo vi alatsovela mwańe. 21Navene navanamunu valagegana avene ukwu vibudwa, namwene umunu udadaje alangega ukwu umwana va mwene, navene navana valavahambukila navahotsi va vene valavabuda. 22Voni avanu valavasula uńe ulwakuva ndi nilitavwa lyane. Lola uvi ińwilila itsisika kuvusililo vi iponaga. 23Apene ngave mbwene vikuvaswima mbutsenge uvunge uvu, pwu mukakimbile mbunge. Mańa ndikuvavula jilweli ndita: Uńamunu alitsa vwu mukanale nukumala uvutsenge vwoni mwa Isilaeli umu. 24Nakuli nujyunge unkongi uvi andutile uvuvaha umańisi va mwene; nakuli nujyunge unkivaga uvi andutile uvuvaha unkuludeva va mwene. 25Angave unkongi ali ndumańisi va mwene pwu valiṅine vuvule, pwu angave unkivaga ali ndunkuludeva va mwene pwu namwene valiṅine vuvule. Vangave umweneńumba vampye ilya Belisibuli, pwu vate vavaleke avanńumba jya mwene? 26Ndavadwadaga uńe. Mańa twoni utwu tungave twiswikile tulaswikulwagwa, twoni utwa kuvutitu tulamańikivwa pavuvalasu. 27Itsu ndikuvavulila kuvutitu, tsu nkatsovelage pavuvalasu. Nitsu ngave muhehelwa mumbulukutu tsu nkatsilange vuvule vwu mwimile pakyańa pańumba. 28Avene avibuda gwu mańa gwene uvwu guvalemile ukubuda untima vwu ndadwadaga. Vi mundwadage lweli uvi avumańile ukujatsihitsa ndugenge lwa mwoto syoni nagu ntima nagwu mańa. 29Umunu nda nigula isilutundulu sivili nakahela kapamato? Nupwu singave sili vuvule-vule uvwebepe nakigwa ikinge pasi vwu natsovili udadajińo. 30Uńe lweli natsi nzwili tsa kuntwe avalile umwene. 31Kwu bako ukudwada uńe, Mańa nsilutile isilutundulu si syongosu uvuluti uńe. 32Uvi ikitsova kwane vwu vipulika avanu ita ndimmańile uńe, vi nune ndilatsova kumwene vwu ipulika udada kukyańa ndilatetsaga ndimmańile nune. 33Lweli uvi ibela kwane vwu vipulika avanu ita namańili une, vi nune ndilabela kumwene vwu ipulika udada kukyańa nandimmańili uńe.
34Mulisagilaga ukuta humbe nditsile nkuvika ulunotsehetso nkilunga umu. Nanditsili nkuvika ulunotsehetso, bako ndigegile ji ngoha lweli. 35Mańa nditsile nkuvapalaṅanya avanu. Nunswambe ikumambukilaga udadaje numwalive ikumambukilaga uvańina va ngosi. 36Navene navanńumba jya munu vikipelaga ukuva vatavangwa va mwene. 37Uvi avaganile sitso nudadaje nuvańina, angave alutilye umwu anganile une pakuvagana avene, vi nanogili kwańe. Namwene uvi avaganile sitso avana va mwene nunswambe numwalive angave pakuvagana avene alutilye umwu anganile une, vi nanogili kwane. 38Namwene uvi nikitwika ikidamiṅanye kya mwene, angave nikuṅonga mumbele, vi nanogili kwane. 39Uvi ita avuponitse uvwumi vwa mwene, vi avwambuhitse ṅani, lola uvi uvwumi vwa mwene ambuhitse mwane, vi ikuvuponehetsaga. 40Uvi ikuvupilila uńe vwu ańupilye une, uvi ikuńupilila uńe vwu amwupilye uvi ansuṅile uńe. 41Uvi uńamalago ikumwupilila vuvule ulwakuva namalago, vi alahombwa uluhombo lwa namalago. Namwene uvi ungolosu ikumwupilila vuvule ulwakuva ngolosu, vi alahombwa uluhombo lwa uvugolosu. 42Namwene uvi ujyunge uva vadebe ava anwesitse ka kanwelo kapamato ka magasi amatsitsimu, angave anwesitse vuvule ulwakuva nkongi, jilweli ndikuvavula ndita: Isya kumomba nalalemwe umwene.
ទើបបានជ្រើសរើសហើយ៖
Matai 10: Kinga
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
New Testament in Kikinga © British and Foreign Bible Society, 1961.
