Jénésis 4
4
Kîin ne Ébel
1Ádam kâng o/rí ne Êef mú onyi emen, ne o-koo dyifít. Ne o-fwon Kîin, o-raa o/fu, ké ochwâp mú Óburúkpâbí, nn/já wǎn-onyinchéng. 2Ka/chîrí, Êef o-chîfwon wǎn-onyinchéng mú ba/fé ǎ dyizîn, Ébel. Kîin o/mû mkpang kyifát, Ébel o/mû mbâm ebû. 3Ké nkéré mú kaa/rí, Kîin o/kúng byiryíng ḿbyí o/fuu o-chi kyifen o-kye Óburúkpâbí. 4Ébel o/yip mbwôp kashú-wǎn-etám-ebû emen, o-ju, o-kúng byipang ḿbyí byinong byinong o-chi to kyifen. Kyi/nyîn Óburúkpâbí ne Ébel ne kyifen emen, 5nké o/né Kîin ne kyifen emen. Ké bubwô ámbu, kafâ ka-bírî Kîin, bushú emen bu-bên. 6Óburúkpâbí o-bí Kîin o/fu, ebóng amu a-sa ng kafâ, ne ebóng to amu a-kpút ng kashú. 7Â wo a/mû a/chi kanong, [a/mû a/chi a-kûnyet éjwô,] nké ké nǎ, a*da/chi kanong* kyibî kii/fárâng ǒ ké ocím-dyifyi. Nkyi kyi-ryuu ng kyi/fu, nkyí kyi-cít ng ǒ, nké a-man a-kpógê kánkyí.
8Kîin o-sét wǎn-boné emen Ébel o/fu, [byiwâa ké dyikán.] Ne ké nkéré mbe ké dyikán, Kîin o-ju Ébel.
9Ne Óburúkpâbí o-bí kâng Kîin o/fu, Ébel mú wǎn-boné eyên mu nyá.
Kîin o-faa o/fu, me n*fí n-nyît ng*. Me nké m/mû n/chi n-kûtún wǎn-boné ejí?
10Ne Óburúkpâbí o-bí ǎ o/fu, ebóng a/chi kyibî-chwǒm ńkyín. Ejá nyí baróng ḿbé wǎn-boné eyên nyi e-fím m kyísí e-tii ng e-kó ng mě e/fu, me nsó ewa. 11Kántîk, wo a/firi ké kyishû ne aa*ba/chi a-chîchi bǎmkpóngé ké esí* nyí ee/bâa ocím e-koo baróng ḿbé wǎn-boné eyên ké abwô eyên*. 12Nang a-kpang kyifát, kii*fé ǒ to*. Wo a/chi a-kûyêe ké ejíí, aa*kyú ne kyise*.
13Ne Kîin o-raa ne Óburúkpâbí o/fu, busông ḿbú wo a/kye mě bu/jang ejê bu-shwôm. 14Wo aa/ró mě ké esí ejí ne ké bushú eyên. Me n/chi n-firi onet mú odayêe oyêe óyee ké ejíí, mú oo*kyú ne kyise* ne nang yeě mú o/kwárê ne me o/chi o-ju mě.
15Nké Óburúkpâbí o/faa Kîin o/fu, kyi*fí éné*. Nang yeě mú o/ju ǒ, n-só ng ǎ ewa n-ju ǎ banet ashí bujam. Ne Óburúkpâbí o-tî Kîin ekap nyí edatông banet e/fu, nang yeě nké o/kwárê ne nyǐ o*dachi o-ju ǎ*. 16Ne Kîin kâng o-dim ké bushú ḿbú Óburúkpâbí o-da-kyú ké esí nyí Nôt, ányi kyi/byí, dyiyêe, nyí nyi ké kyicê ńkyí Édin ńkyí esû edabyí.
Kyikû-Banet ńkyí Kîin
17Kîin ne onyi emen ba/fwon wǎn-onyinchéng, ba-fé ǎ dyizîn, Énok. Ne Kîin kâng o-bi oshê o-fé kámú dyizîn ńdyí wǎn emen ámu. 18Énok o-fwon Érat, ne Érat o/mû bonchí mú Mehújel, Mehújel o/mû bonchí mú Metúshel, ne Metúshel o/mû bonchí mú Límek. 19Límek o/bé banyi bafee, obónge o/mû o/bángê e Adá, mú obónge o-bángê e Zíla. 20Adá o/fwon Jábal. Jábal o/mû bonchí mú banet ḿbé ba/kyú ké boompyep ḿbú badabi ké byídí, ba-nen n byitú. 21Wǎn-boné emen mú onyinchéng o/mû o-bángê e Júbal. Júbal nké o/mû bonchí mú kángkáng banet ḿbé badaman ekim ácîng, ba-jwá ng bantán. 22Zíla o/fwon Túbal-Kîin. Nyǐ nké o/mû o-chi i kángkáng azong-byěm ké biǐré. Wǎn-boné-Túbal-Kîin mú onyinyi o/mû o-bángê e Náma.
23Límek o/raa ne banyi emen, Adá ne Zíla o/fu, jwo n̂g ńkyí mu n-sét ng běn. Me nn/ju wǎn-kyisat, ké nǎ, o/némê mě. 24Â ba/chi ba-ju banet ashí bujam ké dyishí ńdyí ba/chi ba-ju Kîin, ba/chi ba-ju bajam-banet ḿbé baa*nwa epan* â onet o/ju mě.
Sêt ne Énoshi
25Ádam ne Êef ba/chîfwon wǎn-onyinchéng okíri. Êef o/raa o/fu, Osówo oo/kye mě wǎn okíri mú o/chi o-kúng kyikit ńkyí Ébel mú Kîin o/ju. Ne o-fé ǎ dyizîn ńdyí badakó Sêt. 26Sêt o/fwon wǎn-onyinchéng mú o/fé ǎ dyizîn, Énoshi. Kyi-fím ké nkéré ámu nké banet ba/kpet ekye dyizîn ńdyí Óburúkpâbí ńdyí dyinong ofê.
ទើបបានជ្រើសរើសហើយ៖
Jénésis 4: BKY
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Published by the Bible Society of Nigeria @ 1985