San Lucas 5
5
Rzenke bela tixeba
(Mt 4.18-22; Mc 1.16-20)
1Tzania'a, ze'a Jesús rhoa yago ki Genesaret, gokiene bagui tan dzaka bene zen rhe'ankene yenkene rson ki Diozo. 2Jesús ble'ene chopa barko rhoa nisa. Bene rzenke bela guie'azike lo rhopate'a barko zajtibike yexaj kie'ake. 3Jesús guioe' lo to barko, ta naka ki Simón te gnabe kuigue yele'atido rhoa nisa. Na'arhe grie lo barko, te denate'a gzolhoe rse'adiene ka bene. 4Kati beyochhi tan rne', gochhie Simón:
—Gche'a barko ga' rhe' loaj lo yago, te legzala yexaj kie'alhe, kinda senrha bela.
5Simón bochhie':
—Muestro, chigze'ato rhonto chhin sdote'a ye'alha le'an nitoba bine rzentoba; la loe' chirne'alho kan, ni gzalaka yexaj ni.
6Kati be'anke kan, bezi'ike tixekagolha bela kon rogoka yexaj. 7Na'arhe rtazi na'ake bledzake ka bene xhkompake dze'eke lo barko yeto', kinda tzeajke zaje'anke yodarhe. Le'ake guiajke, te bodza'akate rhopate'a barko yele'atizi ka guiajkaba xhan nisala. 8Kati ble'ene ten, Simón Pedro bze'achoe xhibe lo Jesús te rhe le':
—¡Gze'a zito ga' zea', Jesús, le'a naka to bene dolaxhkia'!
9Le'a Simón le'an yogoka xhkompe bdzebike tan gxhenke bela zen. 10Le'aksikan bdzebi Santiago le'an Juan, xhi'in Zebedeo, le'ake nakake xhkompa Simón. Te Jesús gochhie Simón:
—Bisdzebilho; denante'alha zajtobilho bene.
11Na'arhe beche'ake barko rhoa nisa, boka'anke diarha te zeajke le'an Jesús.
Jesús beyonhe to bene chhie yedzo' rzi go'ochhi
(Mt 8.1-4; Mc 1.40-45)
12To dza, ze'a Jesús lo to yechhi, bchhin to bene chhie yedzo' rzi go'ochhi; kati ble'ene Jesús, kon bze'achoe kuinhe loyote'a na gotayoe' le':
—Jesús, chen rhe'anlo, waka yeguibilho ne'adia ki yelawe'a kia' ni.
13Jesús gdanhe le' le'an ne'e, te rne':
—Rhe'anda. ¡Chibeyakalho!
Tina'azi bede'ala yelawe'a na, 14te Jesús rhe le':
—Bigslano ye'alho kan; ze'alhote'a guiaj te yajsloe kuinlo lo bxozi, te bea tan chibeyakalho to balan ka' gne'a Moisés, kinda snisieke bxozi.
15Te za'akalha kan, Jesús rhakate'aze xhen to dza to dza. Te tixekagolha bene rhedobike kinda gze'anagake kan kinda gonhe romedio yelawe'a kie'ake. 16Te Jesús rheze'e zajledze Diozo ga' bigslanodza'a.
Jesús rhezixhenhe kan rheyonhe to bene birhaka se'e
(Mt 9.1-8; Mc 2.1-12)
17To dza kati Jesús zee rse'adiene ka bene, rhe'eka na' balaka fariseos le'an ka muestro ki xhba'a zake doxhen yechhi zingo ki Galilea, ki Judea kan Jerusalén. Na balorhe ki Diozo ze'a le'an Jesús rheyonhe ka bene rhaka xhwe'ake. 18Na bchhinka balaka bene noake lo blaga to bene birhaka se'e. Go'onkene güake le' loelhe yo'o, te zajoake le' lo Jesús, 19te bibedzelhekene galha ko'oke le', le'a tan dzakane bene; te gre'anke yajo'o, na gdidajke to ye'arho ladaj teja, gchizake bene rhaka xhwe'e lo blaga, gatzajlawe lo ka bene zen, lo Jesús. 20Kati Jesús ble'ene ka' rheajkeneye'a le', te rhe bene rhaka xhwe'e:
—Migo, dolaxhkia' kio' chibedzoexhen.
21Na'arhe ka muestro ki xhba'a le'an ka fariseos gzolhoke rhonke pensarhe: «¿Nono naka bene ni rherhogüeguene rne'azie' ki Diozo? Toga Diozo wake yezixhenhe dolaxhkia'.»
22Te Jesús gokiebene ka' rhonke kuenda, na gnabene le'ake:
—¿Nobixhkia' rhongale lén kuenda kan? 23¿Nobi rhonrhe yolaj, sne'arha: "Dolaxhkia' kio' chibedzoexhen", o sne'arha: "Beyasa te dia'? 24La ni gsnisieda lén Xhi'in bene bguio' naka lone'e yezixhenhe dolaxhkia' lo lichhileyo' ni.
Na'arhe gochhie bene birhaka se'e:
—Loe' rhapa kan, beyasa, bezi blaga kio' te beyiaj lo yo'o kio'.
25Tina'azi bene birhaka se'e beyase lo ka bene zen, bezie blaga ga' gote te zeyiaje lo yo'o kie' rhonhe xhen Diozo. 26Yogokate' yajxenkene na rhonke xhen Diozo, rdzebikagaze gne'ake:
—Nan chible'erha ta banachhi.
Jesús rledze Leví
(Mt 9.9-13; Mc 2.13-17)
27De ten, Jesús broaje te ble'ene to bene rkixhaje domi ta gon chhin Roma. Rhelawe Leví, te rhie lo lataj ga' rkixhajke domi. Jesús rhe le':
—Da le'an ne'adia.
28Na Leví beyase, kon bsan ne'e diarha na gdoe Jesús.
29Gokarhe tochi'i, Leví be'anhe lo yo'o kie' to lani xhen ki Jesús; te tixeka bene rkixhajke domi ta gon chhin Roma, rhe'eke tzaxhen le'an yebalaka bene, ga' rhagoke. 30Na ka fariseos le'an ka muestro ki xhba'a rhopakate nababake tozi kue' na gzolhoke richhiekene ka bene noke Jesús. Rhe'ake le'ake:
—¿Nobixhkia' rhea'aj rhagogalhe le'an ka bene rkixhajke domi kan bene dolaxhkia'?
31Jesús bochhie':
—No zoaka wen le'an bibirhe'akieke labi rkinkene bene we'an romedio, ka bene rhakazi xhwe'ake. 32Ne'adia labibida dedilhaja bene wen, za'a kika bene napake dolaxhkia', kinda yakake bene ki Diozo.
Rnabekene le' ki tan rchiajkene ki tan bigagorha yeta
(Mt 9.14-17; Mc 2.18-22)
33Gochhike Jesús:
—Ka bene rhoke Juan le'an ka bene rhoke fariseos rchiajkeguezene tan bigagoke le'an rledzakagaze Diozo, na bene noke loe' tolizi rhea'aj rhagoke.
34Jesús bochhie':
—¿Awakale lén gonle nonga gchiajke bene noledzake ga' rhaka wetzagane', latzaka bene rtzagane' zee le'an le'ake? 35La wachhin dza xhche'ake bene rtzagane', kati xhchhin dza na, na'arhe gchiajele ta gagolhe.
36Le'aksikan bsloene le'ake ten:
—Bigslano rchogo troa'a larhe kobi kinda yeguia to larhe golha. Chen gonke kan, rchhiaguike larhe kobi; le'aksikan, troa'a larhe kobi labi yega'an chhia'a le'an larhe golha. 37Nika rga'ake xisa bedzolhi kobi lo guidi golha, le'a xisa bedzolhi kobi rhon nonga rogoka guidi, na xisa bedzolhi le'an ka guidi na rchhiaguika. 38Tanka rhe'anhe ka'arha xisa bedzolhi kobi lo ka guidi kobi. 39Te bigslano bene rhea'aje xisa bedzolhi golha te dena'a ye'anhene xisa bedzolhi kobi, le'a rne': Xisa bedzolhi golha rdoerhe wen."
ទើបបានជ្រើសរើសហើយ៖
San Lucas 5: ZAALuk
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Evangelio de Lucas en Mixe de Yalalag, Oaxaca, México © Sociedad Bíblica de México, A.C.
