Luka 2
2
Wuh Yesu
(Matta 1:18-25)
1Aba ahan de sahan tsaw, Agustus bay Ruma təfkəla me gurɗay ene, gəni ɗá hadzakude sləmay ɗa gə a duniya de ba cecena. 2Həts sləmay ɗaha hay zuŋŋuna sahan ga, gak a zamane de gə Kiriniyus gure higay Siriya saŋa. 3Ɗaha hay ba cecena, gha wiya kini laka a həts sləmay ene aba a hu ene de. 4Zhuzef kini, slabakakude ada Nazaret‑a a Galile, huwak ala a Betlehem hu bay Davit a higay Zhude de. Lak ala akənahan sahan, aɗaba wuran nayede aba ada jiba Davit‑a sahan. 5Ɗa laka a həts sləmay tan atə hər ene Mari gə i tənday ane. 6A aŋəde wutə a akənahan sahan ga, tənday wuhɗay bərika Mari. 7Wuhkede mikure ene kine humas, fuɗide a kacakaca de, hənkəlakade a ipə s'away daba hay de, aɗaba mene niba cine a kudak de gə mbirkwe hay ɗa cukke ede saŋa.
Malika nenilhətan Labara Sələmna a ɗa tsəgɗay
8Ɗa tsəgɗay s'iŋgeɗe ɗa zak akiɓde aba a higay sahan de, ɗa tsəgək ŋgaɓa tan luvaɗ. 9Malika Ɗuduwuna mbəslkəlhətan ŋa ene, duna tsəre Ɗuduwuna zləŋəktənariya i pə s'aray ene, wutan ane ɗa zləgutsaka awiba. 10Amá malika ane dzəktəna, wa: «Zləŋwaɗ á viɗkwene ba, aɗaba əŋ mikun Labara Sələmna gə ɗaha hay ba cecena à ɗá higiya duna ede saŋa. 11Luvaɗ bəkwa saŋa ga, ɗa wahəkkunka Ɗu Zlu ɗaha a hu Davit de, ba wuran aŋa Kristu Ɗuduwuna. 12Na alama gə à kwá sənede a kine sahan apəna: À kwá le a nzə kine s'avenjanja i fuɗəɗay a kacakaca de, i hənɗay a ipə s'away daba hay de.»
13Ciɗa malika hay s'iŋgeɗe zləkte tan niba ɗa fataya ada askwaf‑a ala a ma ene de, ɗa takənmandar‑a a zəmbəl s'Askwaf, wa:
14«Zhimbilinməna Askwaf gə kwalala a askwaf de saŋa,
a duniya de kini lapiya tsəre á za apə ɗa gə ka wuran mictan saŋa.»
Ɗa tsəgɗay ɗa like a Betlehem
15A aŋəde malika hay ɗa harəktənde, ɗa mbəɗəkŋa ala a askwaf de ga, ɗa tsəgɗay ane ɗa dzaka a duvak tan de, wa: «Linmena ala a Betlehem sahan ba səgan, ma like a tsaɗika igə lakede, Ɗuduwuna a dzəkməna saŋa.» 16Wutan ane ɗa lak ba yakwa yakwa, ɗa laka nzə wutə Mari atə Zhuzef, ŋa kine s'avenjanja ane i hənɗay a ipə s'away daba hay de. 17A aŋəde ɗa tsək kine ane ga, ɗa ruvəktənede igə malika dzəktəna ala apə kine sahan‑a. 18Ba cecena ɗa gə ɗa sənay a me gə ɗa tsəgɗay ɗa ruvəktəna saŋa, ɗa gək ba s'ajipu ene. 19Amá Mari ga, bəride me hay sahan aba a ŋa ene de, gha a i gəna de kini dzəm ba s'ahan. 20Mezlene ɗa tsəgɗay ane ba mbəɗɗiŋa tan ala a mazaɗay tan de, ghaya ɗa ɗəɗəma Askwaf a duna tsəre ene de, ɗa zəmbəla aɗaba s'igə wutan ɗa sənay atə igə ɗa tsaka al aray tan ba cecena saŋa, aɗaba gaka aba apə aŋa ka malika dzəktəna sahan.
Ɗa laka a mbəslɗila kine a adaw s'Askwaf de
21Hənɗay ala apə zhire, sərte slaɗin baŋwe a kine slaka ga, ɗa ɗəfkənka sləmay Yesu, apə aŋa ka malika zak haɗiya, kwa zlama ba tənday ene kini ɗa nzəka bə saŋa. 22A aŋəde sərte slaka a ayitəna a bunɗika ŋa tan apə i me gurɗay Musa ka ga, ɗa ləkəla kine ane ala a adaw s'Askwaf de a Zheruzalem a mbəslɗilhan a Ɗuduwuna. 23Aɗaba niya i hətsɗay a me gurɗay Ɗuduwuna de, wa: «Ba kəla kine humas mikure ga, ǎ za ande a Ɗuduwuna#Huwaɗayede 13:2, 12, 15.» 24Ɗa nay atə a vərɗin sadake, apə aŋa ka me gurɗay Ɗuduwuna sahan təfkəla, wa: «Takalak hay caw, bi wayə takalak masare hay caw#Lewi 12:6-8,» waka saŋa.
25Dagwa s'iŋgeɗe zak a Zheruzalem sahan, sləmay ene Simeyuŋ. Wuran ɗu jire, ɗəf mbəray apə Askwaf‑a, bək ba nəɗay ɗu zlu s'Israyila gə ǎ nay nəɗay saŋa. Shinekw Cuɗiɗɗina kini niya atə ayina. 26Shinekw Cuɗiɗɗina sahan zak dzaɗina, gəni wuran micke ba, abə tsaka bə Kristu ɗu slənɗay Ɗuduwuna saŋa. 27Mezlene Shinekw ane ləkəla ala a adaw s'Askwaf de. Aba ahan de sahan ga, wutə Mari atə Zhuzef ane kini ɗa ləkəla kine tan Yesu a gəɗin igə me gurɗay dzaka ala apəna saŋa. 28Simeyuŋ təvide kine sahan a alay de, zəmbəlkakude Askwaf, wa:
29«Səgan gə Ɗuduwuna hwa ga, igə kə dzaka ane, gaka.
Vərən ciba a ɗu sləra aka á mats a lapiya tsəre de.
30Aɗaba əŋ tsək ɗu zlu ɗaha al aray hwa,
31ɗu gə ike kə sluməktənka a ɗaha hay‑a ba cecena saŋa.
32Wuran parakka tsəre gə ǎ mbezlɨlkina a ma jiba hay s'iŋgeɗe de,
daradza a ɗagadiyaka ɗa s'Israyila#Ezayi 42:6; 49:6; 52:10.»
Simeyuŋ mbəɗnande me s'Askwaf a Mari
33Wutə pəban atə məman a Yesu ane, ɗa ge ba s'ajipu apə me ka gə Simeyuŋ ruvəka ala apəna saŋa. 34Simeyuŋ gəktənaŋade barka, dzakəna a Mari məman a kine ane, wa: «Askwaf təfkede kine saŋa gəni ɗaha hay duna a ɗa s'Israyila de à ɗá tataŋa, ɗa s'iŋgeɗe à ɗá paŋakude aɗaba wuran. Wuran ǎ za alama gə ɗaha hay à ɗá təvaŋade bə saŋa. 35Ǎ miyede dzəmŋa ɗaha hay gə i shuɓəɗay a bembec hay tan de saŋa. Ike i ŋasaray aka kini, zlama zlaɗa ǎ njislkɨna ande a bembec ba ka mbərkwa.»
Anna mbəɗtənande me s'Askwaf a ɗaha hay
36Hər s'iŋgeɗe kini zak, ɗu mbəɗɗitənande me s'Askwaf a ɗaha hay, sləmay ene Anna, di Fanuwel a jiba s'Aser de, ghalaka ba kurcukkwa. Zak pəɗika aveŋ ciɓa adə humas, sləŋa humas mətskənaŋa. 37Zak ba wudəge hərmana, ha cikika aveŋ kurkur zhire ŋa ene fuɗaw. Luvaɗ luvaɗ ba, lapas lapas ba, zheke aba a adaw s'Askwaf de a hətsɗin galəmnzay, bər meshahwam, giya atə maduwa. 38Wuran kini laka a ahan de sahan, takənmandar‑a sləkəɗɗin me ene a Askwaf, dzəktən me kine sahan a ɗa gə ba cecena tan ɗa ba ba sərte gə Zheruzalem ǎ nje ŋa ene apəna saŋa.
Mbəɗɗiŋa ala a Nazaret
39A aŋəde wutə pəban atə məman a Yesu ɗa kəɗkəla gə s'igə me gurɗay Ɗuduwuna təfkəla ga, ɗa mbəɗəkŋa atə ayina ala a hu tan de a Nazaret a higay Galile de. 40Kine niya ghirke, nzəɗa ene atə həŋkale ene ɗəfkənaŋade awiba, Askwaf gəkənka səlam tsəre ene.
Yesu a adaw s'Askwaf de a Zheruzalem
41Ba kəla vaɗay, wutə pəban atə məman a Yesu, ɗa ləlak a gə wumbri Paska a Zheruzalem#Huwaɗayede 23:15; Me Gurɗay 16:1-6. 42A aŋəde Yesu gaka kine s'aveŋ jaŋwa brecaw ga, ɗa lak atə ayina ala akənahan apə isaɗe wumbri sahan‑a. 43Wumbri kəɗaka ga, wutə pəban atə məman ba huɗay tan ala adaw, mbatse Yesu zayakade a Zheruzalem, wutan ɗa səna ba. 44Ɗa gurəkəl niya a dagava ɗa gə de ɗa like caca, ha ɗa fəgəmak dəppa a ləɗay, ta ɗa takənmandar‑a a gusɗiya a ma yaha hay tan de atə a ma ɗa gə de ɗa səna a zhek. 45Amá ɗa nzəka ba, si ɗa mbəɗəkŋa adəɓa ala a Zheruzalem a ləɗay a gusɗiya. 46Hənɗay ala apə məŋgan, ta ɗa laka nzəɗiya i zaɗay a adaw s'Askwaf de a dagava malum hay s'i Zhuwif hay de, tsukw dzaɗay tan, ghaya mbucetənamiya me hay. 47Ba cecena ɗa gə ɗa tsukw dzaɗay ene saŋa, ɗa ge ba s'ajipu apə həŋkale ene ka atə jawapa hay gə vurɨtəna saŋa. 48Wutə pəban atə məman ane ba ɗa hadzəkpan aray ga, ɗa ge ba s'ajipu ene. Məman dzakəna, wa: «Kine hwa, amnaya zla kə gɨməna aŋa? Mene atə pabay dəgiya ŋa man wushakakude a gushɗiken.» 49Wuran ane zləmkənhətənaŋa, wa: «Amnaya kwa guskənaw? Kwa səna bə gəni ənne saŋa si əŋ zheke a adaw Paba de təku?» 50Amá wutan ɗa sənkede ba a igə wuran dzəktəna sahan.
51Mezlene Yesu ane tsukwika me tan, huwak atə ayitəna ala a Nazaret. Məman ga, bəride ihay sahan ba cecena a ŋa ene de. 52Yesu təf ba ghərɗay, həŋkale ene kini təf ba ɗəfɗinaŋade, Askwaf hiyiika, ɗaha hay kini ba cecena ɗa hiyiika.
ទើបបានជ្រើសរើសហើយ៖
Luka 2: mlr
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© (Active), Wycliffe Bible Translators, Inc. All rights reserved.
