DATU MITA IMITÁNEA 1
1
Ki Datu Daud kon dodai in nogoguyangdon
1Ki Datu Daud in nogoguyangdon totok. Umpakabí dinaingandon in sia in daing inta mobunod, táe umuranbí domandon tumonow in sia. 2Bo pogawainea mita in noguman, “Inta momulia, maníka potayakan nami kon mongodeaga tobatú inta mogutun moyotakin i Tuang datu bo monompia kon i Tuang datu. Mosiugdon in sia moyotakin i Tuang datu sinbá umatúdon in awak i Tuang.” 3-4Bo sinayakdon kon bayongan in Israel in mongodeaga tobatú inta totok in moḷunat. Dá nouḻídon kon Sunem in mongodeaga tobatú inta totok in moḷunat tangoinea in ki Abisag. Dinia in sia minayá kon i datu, bo iḷukadannea in ki datu poḷat sinompiamai. Táe diábí siniugan i datu in sia.
Ki Adonia momakisa mobaḻí datu
5-6 #
Sam.2. 3:4
Popisí in ki Absalom ain minatoi, dá ki Adonia, adí ḷoḷaki i Daud nogindua in nobaḻí adí guya-guyang. Ki inánea in ki Hagit. Ki Adonia naa in ḷoḷaki inta moḷunat. Diábí dodai onda in torúan i amánea in sia aka momia kon inta moitaḷá. Ki Adonia in moibogbí totok in mobaḻí datu, dá nosadiadon in sia kon tongonumai in kereta in parang bo tontara mita inta tumotakoi kon kabaḷo takin moḷoḷukadnea ḻima nopuḷú. 7Bo minayá in sia noyosingog i Yoab bo i Imang Abyatar. Ki iná in Yoab naa in ki Zeruya. Ki Yoab bo ki Imang Abyatar noibog kon onu in ḷongasion i Adonia tua. 8Táe ki Imang Zadok, ki Benaya adí i Yoyada, ki Nabi Natan, ki Simei, ki Rei bo moḷoḷukad kon i Datu Daud in doíbí kon i Adonia.
9Kon singgai tobatú kon tampat inta sinangoian Batu Uḷag kon diug in bokaká in tubig in En-Rogel, ki Adonia noposumba in kuruban domba, sapi koḷakian bo ki adí in sapi inta mongoḷomumu. Nogoiní in sia kon i adí mita ḷoḷaki i Datu Daud inta ibanea, bo pogawai mita in komaḻig nongkon suku in Yohuda mamangoi kon rame pobogoian kon kuruban tatua. 10Táe ki Salomo ki ai-ainea, bo ki Nabi Natan takin ki Benaya bo moḷoḷukad i Datu Daud in diábí inoinínea.
Ki Salomo dinuí nobaḻí datu
11 #
Sam.2. 12:24
Dá minayá in ki Nabi Natan nokipodungkuḷ kon i Batsyeba, ki iná i Salomo, bo noguman kon inia, “Degá ki Buḷoi Datu in diápa nokodongog kon ki Adonia, adí ḷoḷaki in Hagit, ain dinumuí nobaḻí datu, bokaka ki Datu Daud in diápabí nonotaau kon onu bo onu soaḷ tatua? 12Aka moibog in ki Buḷoi Datu sinbá ki Salomo bo ki Buḷoi Datu in mosaḷamat doman, dá naa in tongginaku, 13Ḷagidon bayá kon i Datu Daud, bo pogumandon nanaa kon inia: ‘Ki tuang datu ain nongibot kon inakó kon ki adíku ḷoḷaki ki Salomo in baḻíon datu momaḷui kon inakó! Yo tanaa in nongonubí sin ki Adoniabí in nobaḻí datu?’ ” 14Nanaa doman in guman i Natan, “Bain kon wakutu in ki Buḷoi datu moyosingogmai i datu, tumuot in akuoi sin mogintotuu kon onu inta ain siningog i Buḷoi Datu.”
15Dá minayádon in ki Batsyeba kon tayowon i datu kon bonu in gopotnea. Kon dodai intua ki datu nogoguyangdon totok, bo ki Abisag, mongodeaga in Sunem tua, mobantungmai kon inia. 16Ki Batsyeba sinumungkud kon tayowon i datu, bo ki datu in noḻibó, “Onu in koibogmu?”
17Ki Batsyeba in notubag, “Tuang datu Inta Momulia, Ki tuang datu in nongibotdon kon inakó pinodoyon kon tangoi i Tuhan, Allah i tuang datu, kon ki adíku ḷoḷaki ki Salomo in baḻíon datu momaḷui kon i tuang datu. 18Táe tanaa in diá kinotaa-taauanmai i tuang datu, ki Adonia in nobaḻídon datu. 19Sia in noposumbadon in kuruban in domba nobarong, sapi koḷakian bo ki adí in sapi inta mongoḷomumu. Sia in nogoiní domandon namangoi in rame tatua in ki adí mita ḷoḷaki i tuang datu bo ki Imang Abyatar takin ki Yoab, inta tongguḷu totok in tontara mopoparang i tuang datu. Táe ki Salomo in diábí inoinínea. 20Tuang datu Inta Momulia, bayongan rayat in Israel tanaa mako in dongkabí mogoḷat mako kon kotantúan in tosingogon i tuang datu mongo ki ine in momaḷui kon i tuang datu mobaḻí datu. 21Aka diá in kotantúan in tosingogon i Tuang datu, dá notantú bidon kon naonda in ki tuang datu matoi, akuoi bo ki adíku ḷoḷaki in pomiaan naonda bo moḷoḷawang.”
22Kon dodai in ki Batsyeba mongongumanpamai, ki Nabi Natan nodapotdon kon komaḻig. 23Bo pinotaaudon kon i datu in kinoangoian i Natan. Ki Batsyeba iḻumuai, bo ki Natan in sinumuot, bo sinumungkud kon tayowon i datu. 24Ki Natan in noguman, “tuang datu Inta Momulia, degá ki tuang datu aindon nopotaau kon ki Adonia in momaḷui kon i tuang datu mobaḻí datu? 25Singgai naa doman sia in noposumbadon in domba mobayong, sapi koḷakian bo ki adí in sapi inta mongoḷomumu. Bayongan adí ḷoḷaki i tuang datu ain inoinínea. Ná doman tua in Tongguḷu totok in tontara mopoparang i tuang datu, bo ki Imang Abyatar. Tanaa mako mosia in yogotdon morame takinnea bo morogiow in moguman, ‘Mobiag in ki Datu Adonia!’ 26Táe diábí in sia nogoiní kon inakó. Ki Imang Zadok bo ki Benaya takin ki Salomo in diábí doman inoinínea. 27Degá ki Tuang Datudon in nopotabá kon inia momia kon bayongan naa, bo diá nopotaau kon pogawai mita i tuang datu ki ine in momaḷui kon i tuang datu?”
28Ki Datu Daud in noguman, “Oiní in ki Batsyeba.” Dá iḷumuaidon in ki Nabi Natan bo ki Batsyeba in sinumuotdon bui kon tayowon i datu. 29-30Bo ki tuang datu in noguman kon inia, “Totuu kon akuoi in nodandidon kon inimu, pinodoyon kon tangoi i Tuhan, Allah in Israel, kon ki Salomo adímu ḷoḷaki in momaḷui kon inakó mobaḻí datu. Tanaa modandidon in akuoi kon inimu podoyon kon tangoi i Tuhan inta nobiag, inta ain nopoḷuat kon inakó nongkon bayongan in rorigaku, kon singgai naa doman intompodankudon in dandiku kon inimu.”
31Dá sinumungkudon in ki Batsyeba poḷat noguman, “Umurandon mobiag in ki Tuang datu!”
32Bo ki Datu Daud nopotabá nokioiní kon i Zadok, kon i Natan bo kon i Benaya. Naonda in mosia namangoi, 33ki datu in noguman kon i monia, “Oinídon in porwiraku mita bo bayádon kon i Salomo adíku ḷoḷaki poyotakin monia. Popotakoidon in sia kon bagalku tontaní, bo diádon in sia kon bokaká in tubig in Gihon. 34Kon tua ki Zadok bo ki Natan in musti moduí kon inia mobaḻí datu in Israel. Mopaḷut mako kon tua moiko in musti mogirup kon torompet bo mobaḷu, ‘Mobiag in ki Datu Salomo!’ 35Onda intua takinaidon in sia mobui mangoi kon naa sin ḻimitú kon ḷoḻitúanku, sin siabí inta ain piniḻíku mobaḻí datu momaḷui kon inakó momarenta kon Israel bo Yohuda.”
36“Mopia, Inta Momulia,” tubag i Benaya, “igumon mako ki Tuhan, Allah i tuang datu, moginrigon kon parenta i tuang datu tua. 37Ná doman onda in yoyotakin i Tuhan kon i Tuang Datu, yo igumon mako in natua doman in pononakin-Nea kon i Salomo. Igumon mako ki Tuhan momaḻí kon pomarentaannea in moḷobe-ḷoben nongkon pomarentaan i tuang datu.”
38Dá ki Zadok, ki Natan, ki Benaya bo moḷoḷukad i datu nogumandon kon i Salomo kon tumakoidon kon bagal i datu, bo dinia monia minayá in bokaká in tubig in Gihon. 39Onda intua ki Zadok nogamá kon tampat in ḷana zaitun inta ain dinianea nongkon Ḷoḷaigan i Tuhan, bo dinuíneadon in ki Salomo nopomaké in ḷana tatua. Bo torompet in inirupdon bo bayongan intau inta namangoi intua nomaḷú, “Mobiag ki Datu Salomo!” 40Noiduduimai kon tua mosia komintan nonakin kon inia nobui sindaḷan norogiow bo nogirup kon bansí, nodapot in butá naonda bo mobotak sin rame tatua.
41Ki Adonia bo intau mita inta inoinínea bagupa nopaḷut norame, kon dodai in mosia nokodongog kon rame tatua. Kon dodai in ki Yoab nokodongog kon singog in torompet, noḻibó in sia, “Onu in nobaḻí kon kotá nodapot in moramedon totok?” 42Diápa nopaḷut in ki Yoab nosingog, indoianmai daḻídon namangoi in ki Yonatan adí i Imang Abyatar, “Igai tumuot,” guman i Adonia. “Iko nion intau mopia, dá notantúbí kon inta diniamu nion in habarbí inta mopia doman.”
43“Ampungdon, deemanbí habar mopia,” tubag i Yonatan. “Ki Datu Daud ain noduí kon i Salomo nobaḻí datu! 44Ki Zadok, ki Natan, Benaya bo moḷukad i datu aindon pinotabá nonakin kon i Salomo. Mosia ain nopotakoi kon inia kon bagal i datu, 45bo ki Zadok takin ki Natan ain noduí kon inia kon bokaká in tubig in Gihon. Tanaa mosia in nobuidon kon kotá sindaḷan morogiow morame, bo bayongan in kotá modoḻiok. Tuata in rame inta dinongog monimu koina. 46Ki Salomo ain nobaḻí datu in tanaa. 47Nodapot in bayongan porwira i datu ain minayá nopoyaput in tosingogon saḷamat kon i Datu Daud. Mosia in noguman, ‘Igumon mako ki Allah i tuang Datu in mopobaḻí kon i Salomo mobaḻí ponango-nangoian moiḻiu kon i tuang datu; igumon mako pomarentaan i Salomo in mopia-pia nongkon pomarentaan i tuang Datu.’ Onda intua kon tosiugannea, ki Datu Daud sinumungkud nosumba kon i Allah, 48bo nosambayang, ‘Dinayo-dayowdon in iko, o Tuhan, Allah inta sinumba in umat Israel. Singgai in naa intau tobatú nongkon buíku aindon dinuí-Mu nobaḻí datu nonoḻiu kon inakó. Bo akuoi in inogoian-Mupa in kobiagan noindoi kon tua!’ ”
49Mokokiangoi mita i Adonia inangoiandon in ondok, dá mosia in sinimindogdon komintan bo minayá, minayádon kon inia-inia. 50Dá noondokdon totok in ki Adonia kon i Salomo, nodapot in sia noḷagui minayá in Ḷoḷaigan i Tuhan bo nokadai kon popod mita in mezbah#1:50: popod mita in mezbah: Popod mita inta noiḷontú inta naonda bo tungoi kon mezbah. Intau inta kinumadai kon popod in mezbah tua in diábí motaau ḻimodon. kon tua. 51Intau in nopotaau in tua kon i Datu Salomo. Pinotaau monia kon popisí in ki Adonia totokdon in moondok kon i Salomo, dá minayádon in sia in mezbah bo kinumadai kon popod mita in mezbah tatua poḷat noguman, “Akuoi in diápabí mayá nongkon naa kon dodai in ki Salomo diápa mongibot kon inakó kon diábí moḻimod kon inakó.”
52Ki Salomo in notubag, “Aka dodianea mopia, yo diábí in sia hukumon umpakabí tongá topiḻikmai, táe aka momia in sia kon inta moraat, yo mustibí in sia ḻimodon.” 53Bo ki datu in nopotabá in intau minayá nogamá kon i Adonia nongkon mezbah tatua. Dá namangoidon in ki Adonia kon tayowon i datu, bo sinumungkud kon tayowonnea. Bo ki datu in noguman, “Motaaubí mobui in iko!”
ទើបបានជ្រើសរើសហើយ៖
DATU MITA IMITÁNEA 1: INOMOG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Alkitab Singog In Mongondow Masa In Tanaa © Indonesian Bible Society, 2016.