Mataayi 2
2
Avakagʉsi va nhondue vilʉta kʉkʉmwɨmɨka ʉYesu
1ɄYesu alyaholilue mʉ kɨkaaja ɨkya Betelehemu, mʉ kɨghavo#2:1 Kɨghavo, je ɨɨsi jɨno akalongosyagha ʉntwa ʉnʼdebe jʉno akavombagha mʉ vʉtavʉlɨlua vwa ntwa ʉmʼbaha ʉKaisali. Ɨmba kʉ Vʉghanʉle vwa Masio aMahesia. ɨkya Yudea, ʉnsiki ghʉno alyatemile ʉntwa ʉHelode. ɄYesu ye aholilue, avakagʉsi va nhondue kuhʉma kʉvʉdibulo vakafika mʉ lɨkaaja ɨlya Yelusalemu, 2vakava viposia viiti, “Alɨ kʉʉghi jʉno aholilue, ʉNtwa ghwa Vayahudi? Tʉjaghile ɨnhondue jɨno jihʉfia kuholua kwa mwene jɨhʉmile kʉvʉdibulo, fye nambe twisile kʉkʉmwɨmɨka.”
3Ʉntwa ʉHelode ye apʉliike isio, akapumuka mʉ mwojo ghwake. Nava vaanhu vooni ava mʉ lɨkaaja ɨlya Yelusalemu voope vakapumuka. 4Pepano akakongʼhania avavaha va vatekesi#2:4 Avavaha va vatekesi: Ɨmba ɨlɨsio Vatekesi kʉ Vʉghanʉle vwa Masio aMahesia. vooni palɨkɨmo na vavʉlanɨsi va ndaghɨlo,#2:4 Vavʉlanɨsi va ndaghɨlo: Avaanhu ava vakavʉlanɨsyagha indaghɨlo sa Ngʉlʉve. Ɨmba kʉ Vʉghanʉle vwa Masio aMahesia. akavaposia akati, “ɄKɨlɨsite iholua kʉʉghi?” 5Aveene vakamwamʉla vakati, “Iholua mʉ kɨkaaja ɨkya Betelehemu, mʉ kɨghavo ɨkya Yudea. Tʉkagwile isio, ʉlwakʉva se sino alyalembile ʉmʼbɨli kuuti,
6‘Na jʉʉve ghwe kɨkaaja kya Betelehemu,
ghwe jʉno ʉlɨ mʉ kɨghavo ɨkya Yudea,
nʉlɨ nʼdebe nambe padebe
mʉ makaaja agha mʉ Yudea!
Ʉlwakʉva mʉlyʉve mwe muno ihʉma ʉmʉlongosi,
jʉno iiva nʼdɨɨmi ghwa vaanhu vango aVaisilaeli.’ ”#Mika 5:2
7Pe ʉHelode akavakemeela kʉ vʉsyefu avakagʉsi vala ava nhondue, kuuti vamʼbʉʉle vʉnono ʉnsiki ghʉno vajaghile ɨnhondue jɨla. 8Pe akavasuungʼha kʉ Betelehemu, akavavʉʉla akati, “Lʉtagha, mʉposelesie vʉnofu vwɨmɨla ʉmwana ʉjuo. Mʉngamwaghe, mwisaghe ngʼhaningʼhaani mʉmbʉʉle, neke na jʉʉne nɨlʉte kʉkʉmwɨmɨka.”
9Avakagʉsi vala ava nhondue ye vapʉliike amasio gha ntwa, vakavʉʉka vilʉta. Lolagha, ɨnhondue jɨla jɨno vakajaghile kʉvʉdibulo, jɨkavalongolela, voope vakava vikʉjɨvɨngɨlɨla kuhanga jɨkafika na kukwɨma pano pwealyale ʉmwana. 10Ye vajaghile kange ɨnhondue jɨla, vakahovoka kyongo. 11Pe vakingila mʉ nyumba, vakamwagha ʉmwana palɨkɨmo nʉ ngʼina ʉMaliya, vakafughama, vakamwɨmɨka. Vakavopola inyambe saave, vakamʼbonola ʉmwana, vakahʉmia: ɨsahabu, ʉvʉfumba#2:11 Ʉvʉfumba, kyale kɨɨnu kɨno vakanyanyagha kuleeta ʉlʉnuusi ʉlʉnono. ni manemane ghano ghaale mafuta amanya lʉnuusi ʉlʉnono. 12ɄNgʉlʉve akavapavɨla mʉ njosi kuuti, navangakililaghe kange kwa Helode. Pe vakakilila ɨsɨla ɨjɨngɨ kugomoka kʉ lɨkaaja lyave.
ɄYosefu, ʉMaliya nʉ mwana vikɨmbɨlɨla kʉ ɨɨsi ɨja Misili
13Avakagʉsi va nhondue ye valʉtile, ʉnyamhola ghwa Mʉtwa akamʼbonekela ʉYosefu mʉ njosi, akamʼbʉʉla akati, “Sisimuka! Ʉntoole ʉmwana nʉ ngʼina, mʉkɨmbɨlɨle kʉ ɨɨsi ɨja Misili, ʉlwakʉva ʉHelode ɨkʉmʉlonda ʉmwana ʉjuo kuuti amʼbude. Mukalaghe kʉla kuhanga ʉnsiki ghʉno nilikʉvavʉʉla kuuti mʉgomoke.” 14Ɨkɨlo jɨla jɨla ʉYosefu akasisimuka, akantoola ʉmwana nʉ ngʼina, akakɨmbɨlɨla kʉ Misili. 15Vakikala kʉla kuhanga kufika ʉnsiki ghʉno ʉHelode ifua. Ʉluo lʉlyavombiike kukwɨlanɨsia ɨlɨsio lɨno ʉMʉtwa alyajovile kukilila ʉmʼbɨli ghwake kuuti, “Nɨlyankemelile ʉmwanango kuhʉma kʉ Misili.”#Hosea 11:1
Avaana avadɨɨmi vibudua
16ɄHelode akakagʉla kuuti, avakagʉsi va nhondue vala vansyangile, akakalala fiijo. Pe akavasuungʼha avaanhu kʉ Betelehemu na mʉ makaaja ghano ghalyale mʉlʉbale, kuuti vavabude avaana avadɨɨmi vooni, kutengʉlɨla avafyele kufika avanya maaka ghavɨlɨ. Akavomba ʉluo kulɨngʼhana nʉ nsiki ghʉno alyavaposisie avakagʉsi va nhondue. 17Ʉluo lʉlyavombiike kukwɨlanɨsia ɨlɨsio lɨno ʉMʉtwa alyajovile kukilila ʉmʼbɨli ghwake ʉYelemia kuuti,
18“Ɨlɨsio lɨpʉlɨkiike mʉ lɨkaaja ɨlya Lama,
avaanhu vikoola na kulɨla fiijo.
Lɨsio lya Laheli, ɨkʉvalɨlɨla avaana vaake,
naikwɨtɨka kunyamasivua,
ʉlwakʉva avaana vaake vafwile.”#Yelemia 31:15
ɄYosefu, ʉMaliya nʉ mwana vigomoka kʉ Isilaeli
19Pambele ʉHelode akafua. ɄYosefu ye ajiighe kʉ Misili, ʉnyamhola ghwa Mʉtwa akamʼbonekela kange mʉ njosi. 20Akamʼbʉʉla akati, “Sisimuka! Ʉntoole ʉmwana nʉ ngʼina, ʉgomoke mʉ ɨɨsi ɨja Isilaeli, ʉlwakʉva vano valondagha kʉkʉmʼbuda ʉmwana, vafwile.”
21Pepano ʉYosefu akasisimuka, akantoola ʉmwana nʉ ngʼina, vakagomoka mʉ ɨɨsi ɨja Isilaeli. 22Neke ye apʉliike kuuti ʉAlikelao ghwe jʉno ahaliile pa viise ʉHelode kutema ɨkɨghavo ɨkya Yudea, akoghopa pilʉta kʉla. Akapavɨlua mʉ njosi kuuti naangalʉtaghe ʉkuo, pe akalʉta kʉ kɨghavo ɨkya Galilaya. 23Ʉkuo, akikala mʉ kɨkaaja ɨkya Nasaleti. Ʉluo, lʉlyavombiike kukwɨlanɨsia ɨlɨsio lɨno ʉMʉtwa alyajovile kukilila avavɨli kuuti, “Itambʉlwagha Mʉnasaleti.”
ទើបបានជ្រើសរើសហើយ៖
Mataayi 2: wbi
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© (Active), Wycliffe Bible Translators, Inc. All rights reserved.
