ភីលីព 4:1-13 បង‌ប្អូនស្ងួន‌ភ្ងា ជាទីរឭក ជាទីត្រេក‌អរ និងជាមកុដរបស់ខ្ញុំអើយ ចូរឈរឲ្យមាំ‌មួនក្នុងព្រះ‌អម្ចាស់ចុះ ឱបង‌ប្អូនជាទីស្រឡាញ់របស់ខ្ញុំអើយ។ ខ្ញុំសូមទូន្មានដល់នាងអ៊ើរ៉ូ‌ឌា និងនាង | ព្រះគម្ពីរបរិសុទ្ធកែសម្រួល ២០១៦ (គកស១៦)

ភីលីព 4:1-13 គកស១៦

បង‌ប្អូនស្ងួន‌ភ្ងា ជាទីរឭក ជាទីត្រេក‌អរ និងជាមកុដរបស់ខ្ញុំអើយ ចូរឈរឲ្យមាំ‌មួនក្នុងព្រះ‌អម្ចាស់ចុះ ឱបង‌ប្អូនជាទីស្រឡាញ់របស់ខ្ញុំអើយ។ ខ្ញុំសូមទូន្មានដល់នាងអ៊ើរ៉ូ‌ឌា និងនាងស៊ុន‌ទីចដែរ ឲ្យមានគំនិតតែមួយក្នុងព្រះ‌អម្ចាស់។ ហើយខ្ញុំក៏សូមដល់អ្នក ឱគូកនស្មោះត្រង់របស់ខ្ញុំអើយ សូមជួយស្ត្រីទាំងពីរនោះ ដែលបានតតាំងជាមួយខ្ញុំ ក្នុងដំណឹងល្អផង ហើយលោកក្លេ‌មេន និងគូកនខ្ញុំផ្សេងទៀត ដែលគេមានឈ្មោះកត់ទុកក្នុងបញ្ជីជីវិតដែរ។ ចូរអរសប្បាយក្នុងព្រះ‌អម្ចាស់ជា‌និច្ច ខ្ញុំប្រាប់ម្តងទៀតថា ចូរអរសប្បាយឡើង! ចូរសម្តែងឲ្យមនុស្សទាំងអស់បានស្គាល់សេចក្ដីសម្លូតរបស់អ្នករាល់គ្នាចុះ ព្រោះព្រះ‌អម្ចាស់ជិតយាងមកហើយ។ កុំខ្វល់ខ្វាយអ្វីឡើយ ចូរទូលដល់ព្រះ ឲ្យជ្រាបពីសំណូមរបស់អ្នករាល់គ្នាក្នុងគ្រប់ការទាំងអស់ ដោយសេចក្ដីអធិស្ឋាន និងពាក្យទូលអង្វរ ទាំងពោលពាក្យអរព្រះ‌គុណផង។ នោះសេចក្ដីសុខសាន្តរបស់ព្រះដែលហួសលើសពីអស់ទាំងការគិត នឹងជួយការពារចិត្តគំនិតរបស់អ្នករាល់គ្នា ក្នុងព្រះ‌គ្រីស្ទ‌យេស៊ូវ។ ជាទីបញ្ចប់ បង‌ប្អូនអើយ ឯសេចក្ដីណាដែលពិត សេចក្ដីណាដែលគួររាប់អាន សេចក្ដីណាដែលសុចរិត សេចក្ដីណាដែលបរិសុទ្ធ សេចក្ដីណាដែលគួរស្រឡាញ់ សេចក្ដីណាដែលមានឈ្មោះល្អ ប្រសិន‌បើមានសគុណ និងសេចក្ដីសរសើរណា ចូរពិចារណាពីសេចក្ដីនោះចុះ។ ការអ្វីដែលអ្នករាល់គ្នាបានរៀន បានទទួល បានឮ និងឃើញក្នុងខ្ញុំនោះ ចូរប្រព្រឹត្តតាមសេចក្ដីទាំងនោះចុះ ដូច្នេះ ព្រះនៃសេចក្ដីសុខសាន្ត ទ្រង់នឹងគង់នៅជាមួយអ្នករាល់គ្នា។ ខ្ញុំមានអំណរជាខ្លាំងក្នុងព្រះ‌អម្ចាស់ ដោយព្រោះឥឡូវនេះ អ្នករាល់គ្នាបាននឹកដល់ខ្ញុំឡើងវិញ អ្នករាល់គ្នាបាននឹកដល់ខ្ញុំជា‌និច្ចដែរ តែមិនមានឱកាសសម្តែងពីទឹកចិត្តនោះ។ ខ្ញុំនិយាយដូច្នេះ មិនមែនដោយខ្ញុំខ្វះខាតទេ ដ្បិតខ្ញុំបានរៀនឲ្យចេះស្កប់‌ចិត្តចំពោះអ្វីដែលខ្ញុំមាន។ ខ្ញុំធ្លាប់ទ្រាំក្នុងការចង្អៀតចង្អល់ ហើយក៏ធ្លាប់មានសេចក្ដីរីក‌រាយដែរ ខ្ញុំធ្លាប់ទាំងឆ្អែត ទាំងឃ្លាន ទាំងមានទាំងខ្វះ ក្នុងគ្រប់សារពើទាំងអស់ហើយ។ ខ្ញុំអាចនឹងធ្វើគ្រប់ទាំងអស់បាន ដោយ‌សារព្រះ‌គ្រីស្ទចម្រើនកម្លាំងដល់ខ្ញុំ។

អាន ភីលីព 4