អេម៉ុស 5
5
បទទំនួញចំពោះអំពើបាបរបស់អ៊ីស្រាអែល
1ឱពូជពង្សអ៊ីស្រាអែលអើយ ចូរស្តាប់ពាក្យដែលខ្ញុំស្មូត្របទទំនួញអំពីអ្នករាល់គ្នានេះចុះ!
2អ៊ីស្រាអែលជាស្ត្រីព្រហ្មចារីបានដួលចុះ
ក្រោកឡើងវិញមិនបានហើយ
នាងត្រូវគេបោះបង់ចោលនៅលើទឹកដីខ្លួន
គ្មានអ្នកណាលើកនាងឡើយ។
3ដ្បិតព្រះអម្ចាស់ព្រះយេហូវ៉ាមានព្រះបន្ទូលដូច្នេះថា
ទីក្រុងណាដែលលើកទ័ពចេញទៅមួយពាន់
នឹងសល់តែមួយរយ
ហើយទីក្រុងណាដែលចេញទៅមួយរយ
នឹងនៅសល់តែដប់ប៉ុណ្ណោះ ។
4ដ្បិតព្រះយេហូវ៉ាមានព្រះបន្ទូលមកកាន់
ពូជពង្សអ៊ីស្រាអែលដូច្នេះថា
ចូរស្វែងរកយើង នោះអ្នករាល់គ្នានឹងរស់នៅ
5កុំស្វែងរកបេត-អែល ឬចូលទៅក្នុងគីលកាលឡើយ
ក៏កុំឆ្លងទៅបៀរ-សេបាដែរ
ដ្បិតគីលកាលប្រាកដជានឹងត្រូវនាំទៅជាឈ្លើយ
ហើយបេត-អែលនឹងត្រូវសូន្យបាត់ទៅ។
6ចូរស្វែងរកព្រះយេហូវ៉ាវិញ
នោះអ្នករាល់គ្នានឹងរស់នៅ
ក្រែងព្រះអង្គឆាបឆេះឡើង
ដូចជាភ្លើងនៅក្នុងពូជពង្សយ៉ូសែប
ហើយបញ្ឆេះអស់រលីងទៅ
ឥតមានអ្នកណានៅបេត-អែល
អាចនឹងពន្លត់បានឡើយ។
7ម្នាលអ្នករាល់គ្នាដែលបង្វែរយុត្តិធម៌ឲ្យទៅជាស្លែង
ហើយបោះសេចក្ដីសុចរិតចុះទៅដីអើយ!
8ព្រះអង្គដែលបានបង្កើតផ្កាយកូនមាន់
និងផ្កាយនាយព្រាន
ក៏ធ្វើឲ្យភាពអន្ធការប្រែទៅជាព្រលឹមស្រាង
ហើយធ្វើឲ្យថ្ងៃត្រឡប់ទៅជាយប់
ព្រមទាំងហៅទឹកសមុទ្រមកចាក់ស្រោចលើផែនដី
ព្រះនាមរបស់ព្រះអង្គ គឺព្រះយេហូវ៉ា
9ព្រះអង្គធ្វើឲ្យមហន្តរាយកើតដល់
មនុស្សខ្លាំងពូកែយ៉ាងទាន់ហន់
ដល់ម៉្លេះបានជាបន្ទាយទាំងឡាយក៏ត្រូវវិនាសដែរ។
10គេស្អប់អ្នកដែលបន្ទោសនៅត្រង់ទ្វារក្រុង
ហើយគេខ្ពើមអ្នកដែលនិយាយសេចក្ដីពិត។
11ដូច្នេះ ដោយព្រោះអ្នករាល់គ្នាជាន់ឈ្លីមនុស្សក្រីក្រ
ហើយរឹបអូសយកស្រូវពីគេ
អ្នករាល់គ្នាបានសង់ផ្ទះដោយថ្មដាប់
តែមិនបានរស់នៅក្នុងផ្ទះនោះទេ
អ្នករាល់គ្នាបានដាំចម្ការទំពាំងបាយជូរជាទីគាប់ចិត្ត
តែមិនបានផឹកស្រាទំពាំងបាយជូរពីចម្ការនោះឡើយ។
12ដ្បិតយើងដឹងហើយថា
អំពើរំលងរបស់អ្នករាល់គ្នាមានច្រើនណាស់
ហើយអំពើបាបរបស់អ្នករាល់គ្នាក៏សម្បើមណាស់ផង
អ្នករាល់គ្នានេះហើយដែលធ្វើទុក្ខមនុស្សសុចរិត
ហើយស៊ីសំណូក
ក៏បង្វែរមនុស្សកម្សត់ទុគ៌តនៅទ្វារក្រុង ។
13ហេតុនេះ មនុស្សឈ្លាសវៃ
នឹងស្ងៀមនៅក្នុងគ្រាបែបនេះ
ដ្បិតនេះជាគ្រាមួយដ៏អាក្រក់។
14ចូរស្វែងរកអំពើល្អ កុំស្វែងរកអំពើអាក្រក់ឡើយ
ដើម្បីឲ្យអ្នករាល់គ្នាបានរស់នៅ ដើម្បីឲ្យព្រះយេហូវ៉ា
ជាព្រះនៃពួកពលបរិវារ
ព្រះអង្គនឹងគង់នៅជាមួយអ្នករាល់គ្នា
ដូចអ្នករាល់គ្នាធ្លាប់និយាយហើយ។
15ចូរស្អប់អំពើអាក្រក់ ហើយស្រឡាញ់អំពើល្អ
ចូរតាំងឲ្យមានយុត្តិធម៌នៅត្រង់ទ្វារក្រុង
នោះប្រហែលជាព្រះយេហូវ៉ា ជាព្រះនៃពួកពលបរិវារ
ព្រះអង្គនឹងសម្ដែងព្រះគុណដល់សំណល់នៃពួកយ៉ូសែប។
16ហេតុនេះ ព្រះយេហូវ៉ា ជាព្រះនៃពួកពលបរិវារ
គឺព្រះអម្ចាស់ ព្រះអង្គមានព្រះបន្ទូលដូច្នេះថា
មនុស្សនឹងទ្រហោយំនៅគ្រប់ទាំងទីធ្លា
ហើយនៅគ្រប់ទាំងផ្លូវគេនឹងពោលថា
"វរហើយ វរហើយ!"
គេនឹងហៅពួកអ្នកស្រែចម្ការឲ្យមកយំសោក
ហើយពួកអ្នកដែលប្រសប់ទួញទំនួញមកទ្រហោយំ
17នៅគ្រប់ទាំងចម្ការទំពាំងបាយជូរ
នឹងមានសំឡេងទ្រហោយំ
ដ្បិតយើងនឹងដើរកាត់កណ្ដាលអ្នករាល់គ្នា
នោះជាព្រះបន្ទូលនៃព្រះយេហូវ៉ា។
ថ្ងៃរបស់ព្រះអម្ចាស់ ជាថ្ងៃងងឹតសូន្យសុង
18វេទនាដល់អ្នករាល់គ្នា
ដែលសង្វាតចង់បានថ្ងៃរបស់ព្រះយេហូវ៉ា
ហេតុអ្វីបានជាអ្នករាល់គ្នាចង់បានថ្ងៃរបស់ព្រះយេហូវ៉ា?
ថ្ងៃនោះជាថ្ងៃងងឹត មិនមែនភ្លឺទេ
19ប្រៀបដូចជាមនុស្សម្នាក់ដែលរត់រួចពីសិង្ហ
ហើយទៅជួបនឹងខ្លាឃ្មុំ
ឬចូលទៅក្នុងផ្ទះ ហើយច្រត់ដៃនឹងជញ្ជាំង
រួចត្រូវពស់ចឹក។
20តើថ្ងៃរបស់ព្រះយេហូវ៉ា មិនមែនជាថ្ងៃងងឹត
ហើយឥតពន្លឺ ជាថ្ងៃអន្ធការ គ្មានរស្មីទេឬ?
21យើងស្អប់ យើងខ្ពើមពិធីបុណ្យរបស់អ្នករាល់គ្នា
ហើយយើងក៏មិនរីករាយនឹងការប្រជុំយ៉ាងឱឡារិក
របស់អ្នករាល់គ្នាដែរ។
22ទោះបើអ្នករាល់គ្នាថ្វាយតង្វាយដុត
និងតង្វាយម្សៅដល់យើង
ក៏យើងមិនទទួលតង្វាយរបស់អ្នករាល់គ្នាដែរ
ហើយយើងក៏មិនអើពើនឹងសត្វធាត់ៗ
ដែលអ្នករាល់គ្នាថ្វាយ ជាតង្វាយមេត្រីឡើយ។
23ចូរដកយកសំឡេងកងរំពងនៃចម្រៀងរបស់អ្នករាល់គ្នា
ចេញពីយើងទៅ
យើងមិនចង់ស្តាប់សំឡេងពិណរបស់អ្នករាល់គ្នាទេ។
24ប៉ុន្ដែ ត្រូវឲ្យមានសេចក្ដីយុត្តិធម៌ហូរដូចជាទឹក
ហើយសេចក្ដីសុចរិតដូចជាស្ទឹងមិនចេះរីងស្ងួតវិញ។
25ឱពូជពង្សអ៊ីស្រាអែលអើយ ក្នុងរយៈពេលសែសិបឆ្នាំ តើអ្នករាល់គ្នាបានយកយញ្ញបូជា និងតង្វាយផ្សេងៗ មកឲ្យយើងនៅទីរហោស្ថានឬទេ? 26អ្នករាល់គ្នាបានរើសយកស៊ីគុត ជាទេវរាជរបស់អ្នក និងគីយុន ជារូបព្រះរបស់អ្នក ព្រមទាំងផ្កាយរបស់ព្រះដែលអ្នករាល់គ្នាបានធ្វើសម្រាប់ខ្លួន 27ដូច្នេះ យើងនឹងនាំអ្នករាល់គ្នាទៅជាឈ្លើយនៅខាងនាយក្រុងដាម៉ាស នេះជាព្រះបន្ទូលរបស់ព្រះយេហូវ៉ា ដែលមាននាមថា ព្រះនៃពួកពលបរិវារ។
ទើបបានជ្រើសរើសហើយ៖
អេម៉ុស 5: គកស១៦
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2016 United Bible Societies