Matìyò 10
10
Viʼi vyì a Yesò ə ntsuʼtə a viʼi ntɨm nə̀ wen
(Mak 3.13-19; Luk 6.12-16)
1-2Yesò ə nlu li ə dzàŋtə ndzɨ̀mtə̀sə bàm ə̀ wen sensə njʉ̀sə̀ bò, ə ku adyòʼ a vəwenə la vəwenə ə dzɨ̀mə̀ shìsə əzhwì ə byɨvə bè chʉʼʉ tənkyì tə kwaʼa, tò tətsèm. Ətentə ə diʼ təzhiʼ tə viʼi ntɨm a vyì. Wù ə mbi ə diʼ Simùn yi a və ə ndzàŋ nə̀ Bità, nə̀ lèmə̀ wen Andɨ̀lò; nə̀ Jems wenə lèmə̀ wen Joyn, ə vunə Zebedì; 3a bè dìʼ Filib nə̀ Bàtòlòmiyà; nə̀ Tòmos nə̀ Matìyò a ghə̀ ə̀ tinə kənsè; a diʼ Jems ə wyè Alphùyùs nə̀ Tàdyes; 4a bè dìʼ Simùn ə wu kənsɨmtə, nə̀ Judàs Iskalìyòt yi a ghə̀ nlu baʼlə Yesò.
Yesò ə shə̀ʼtə̀ kənyʉ̀ ki kə a viʼi ntɨm nə̀ wen ne shwèʼ
(Mak 6.7-13; Luk 9.1-6)
5Yesò ə nlu sə ə tɨm viʼi a venə njʉ̀sə̀ bò ə gàʼa a vəwenə la, “Kə ghə̀ŋ dyʉ̀ a əloʼ kətɨm; kə ghə̀ŋ dyʉ̀ a ntə̀ʼ Sàmalìyà no əmùʼ. 6Ghə̀ŋ bòŋsə dyʉ̀ toʼ a viʼi Islel vyì a və diʼì alì to nə̀ byisə njɨ̀ sə lèsə. 7Ghə̀ŋ dyʉ̀, ghə̀ŋ nə̀ shə̀ʼtə̀ la, əfòyn ə Nyìngòŋ ə boʼsə li. 8Ghə̀ŋ ə shə̀ʼtə̀ ali, chʉʼʉ viʼi və kwaʼa və nə̀ vyi a və kiʼ kənsòtə̀, dzɨ̀mə̀ shisə əzhwì ə byɨvə. Wìʼ ə pfʉ, ghə̀ŋ lusə wen fa ə pfʉ. Ghə̀ŋ ə nkɨ la ghə̀ŋ kiʼ adyòʼ a ghenə to kədyàŋ, ghə̀ŋ dyʉ̀ ghə̀ŋ ə nè ənyʉ̀ na venə to kədyàŋ. 9Ghə̀ŋ sə ə dyʉ̀, kə ghə̀ŋ we ə ko a kəmbò no fa mpfen. 10Kə wìʼ ə lyɨ̀ kəmbò, kə wìʼ ə lyɨ̀ ndisə sə bò kò gwʉsə. Kə wìʼ ə lyɨ̀ mbàŋ ə nyamə. Və diʼ ə ntuʼmə nə̀ wù ə shyèʼ.
11“Ghə̀ŋ kwen a ntə̀ʼ kò ghə̀ tyetə kò ghə̀ ghoʼo, ghə̀ŋ kəŋ dyʉ̀ nə̀ wìʼ, a ghə̀ kiʼ ntsìnə̀ ə jùŋ ə mù tsi tò a wenə ə ngə̀ŋ əzaʼa fa zhʉ ghə̀ŋ be lù. 12Ghə̀ŋ kwen a wìʼ a ngə̀ŋ, ghə̀ŋ toŋtə viʼi vyì a və diʼ tsu ə gàʼa la, ‘Mbwaʼmə Nyìngòŋ ə ndiʼ a ghə̀ŋ.’ 13Viʼi ngə̀ŋ a vyì ə mù shisə ghə̀ŋ a nkàyn, ə mbwaʼmə a kwen faŋ a vəwenə kətʉ; vəwenə faŋ kè shisə ghə̀ŋ a nkàyn ə mbwaʼmə a yi bwənə vi a ghə̀ŋ. 14Ghə̀ŋ kwen a wìʼ ə ngə̀ŋ kò a ntə̀ʼ, viʼi vyi faŋ kè shisə ghə̀ŋ kò vəwenə faŋ kè zhʉ̀tə kənyʉ̀ ki a ghə̀ŋ gaʼa, ghə̀ŋ nə̀ sə lù, ghə̀ŋ bwen dzèm shəŋsə a vəwenə. 15Ma gaʼa a ghə̀ŋ nəmwèʼè la à lu ə ndiʼ a kətsi kə nsoʼ ə̀ Nyìngòŋ, ə ngəʼ ndiʼ a viʼi ntə̀ʼ a vyì chò to ando ghə̀ ndiʼ a viʼi Sodòm nə̀ viʼi Gòmolyà.
Yesò ə shə̀ʼtə̀ a viʼi ntɨm ə̀ wen la və ne ə tsuʼ kəwʉ kə vəwenə
(Mak 13.9-13; Luk 21.12-17)
16“Ghə̀ŋ ə kɨ la ma tɨmə ghə̀ŋ alə̀, ghə̀ŋ dìʼ ə dyʉ̀ ə ndiʼ to nə̀ byisə njɨ̀ a ntìntìn nyamsə kəbo. Kə diʼ la ghə̀ŋ kiʼ ə tofə to nə̀ zhusə alì bè mbwaʼmə to nə̀ làto. 17Ghə̀ŋ tùʼmə̀. Və lu ghaʼ ku ghə̀ŋ la və soʼo bè ghòm ghə̀ŋ a vəwenə a loʼ soʼ nsoʼsə nə̀ a lo aloʼ ntsèntə̀sə vəwenə. 18Və lu ghaʼ dyʉ̀ tomə ghə̀ŋ ashɨ ə viʼi və soʼ və nə̀ təfòyn tə byìʼì mo, ə ghə̀ŋ shə̀ʼtə̀ ntɨm ə jùŋ ə mo a vəwenə ə bè shə̀ʼtə̀ a viʼi ətɨm. 19Və ghaʼ ghə̀ŋ ali, kə ghə̀ŋ ə kaynə mbyì la ghə̀ŋ dyʉ̀ gàʼa la gho lo, kə ghə̀ŋ kayn no la ghə̀ŋ dyʉ̀ gàʼa ale, byìʼàndo ghə̀ŋ dyʉ̀ zaʼa tsu, ə və shə̀ʼtə̀ kənyʉ̀ ki kə a ghə̀ŋ a gàʼa. 20A ko ne laynsə gaʼa ə ghə̀ŋ, a ne ə gaʼa Kəzhwì kə Tìʼ ghə̀ŋ əcho fa ghə̀ŋ.
21“Ətʉʼ a yi lu kwʉʼ, ə wìʼ ə ə̀ lyi lèmə̀ wen, ghə̀ ku la və zhwi, tìʼ ə lyi wàyn, ghə̀ ku la və zhwi. Vunə vətsenəvə lu ə nku və mpfi nə̀ və tìʼ ə bè ne və ə zhwilə vəwenə. 22Viʼi lu ə bàynə̀ ghə̀ŋ tò və tsèm byìʼì mò, alì mu à wensə no ndo ə zaʼa kəmwetə, ghə̀ a bwoŋ. 23Və tsuʼ kəwʉ ə kəŋ a ntə̀ʼ, ghə̀ŋ nyɨŋ ə dyʉ̀ tò a ntə̀ʼ ə kədyàŋ. Ma gaʼa a ghə̀ŋ nəmwèʼè la ghə̀ŋ ko nè mwetə ə shwèʼè ghə̀ŋ a ntə̀ʼsə Islel sə tsèm kenla Wàyn Wìʼ ə bwənə li vi.
24“Gaʼa ko ghə̀ŋ kɨ la wàyndyə ə zizi kò ghə̀ lə chò ndìʼsə̀ wen, kɨ to la wù ə shyèʼ ko tɨmə ə chò tìʼ Shwèʼ. 25Kə kwʉʼ la wàyndyə ə zizi, ghə̀ ndìʼ to nə̀ ə ndìʼsə̀ wen, bè kwʉʼ la wù ə shyèʼ ə kuʼ kwʉʼ ə ndiʼ to nə̀ tìʼ Shwèʼ. Və sətsèn ə ndiʼ mù və toŋtə li tì ngə̀ŋ nə̀ zhiʼ ghə̀ byɨf a nə̀ Belzibùl, və lu toŋtə no viʼi ngə̀ŋ la gho?
Yesò ə shə̀ʼtə̀ wìʼ a və diʼ nfàynə̀ wen
(Luk 12.2-7)
26“Kə ghə̀ŋ be lə fàyn viʼi byìʼì ando kəfo ko diʼ a və chitə a və ko lə ŋoʼsə, kò və lyòmtə lyomtə a və lə faŋ kè kɨ. 27Ma nyoʼtə gàʼa kənyʉ̀ a ghə̀ŋ luwen, ghə̀ŋ lu gàʼ a ndayn a viʼi, ə tsèmtə tsèmtə, ghə̀ŋ lu fʉ soʼo a woŋ. 28Kə ghə̀ŋ ə fàyn viʼi vyì a və zi ə və zhwì toʼ kətsoʼ kəwen ə wìʼ, alì mu və zi ko və zhwi kəzhwì kə wen. Ghə̀ŋ nə̀ bòŋsə fàyn tò Nyìngòŋ. Ghə̀ kiʼ kədyòʼ ə byɨsə kəzhwì kə wìʼ nə̀ kətsoʼ kə wen a zhìʼ. 29Gaʼa ko və baʼlə mənkwaloʼ mbò to a fəkotə alə̀, alì fəmùʼ fə ko diʼ a fe zi fe zaʼa a nsè, a bwen tò la à kòŋ Tìʼ ghə̀ŋ, ə Nyìngòŋ? 30No nyɨŋsə kətʉ ghə̀ŋ no sətsèm diʼ mu, Nyìngòŋ taŋtəli. 31Kə la diʼ la ghə̀ŋ ko kiʼ ə nə̀ fàynə kəfo byìʼì ando ghə̀ŋ kuʼmə chò mənkwaloʼ, mə ghoʼo tè ale.
(Luk 12.8-9)
32“No ndò a ghə̀ byɨmə ashɨ ə viʼi la ghə̀ diʼ wù ə ghòm,no nkàyntə̀ mò lə byɨmə a Tìʼ ghom a kaŋ la ghə̀ diʼ wù ə ghòm. 33A sətsèn no ndo mo mò ashɨ ə viʼi, no nkàyntə̀ a mò lə̀ mo wen ashɨ ə Tìʼ ghom a kaŋ.
Yesò ə shə̀ʼtə̀ la yi vi nə̀ soynə
(Luk 12.51-53; 14.26-27)
34“Kə ghə̀ŋ nə̀ kwòʼ la mà vi a nsè a shə̀ ə nè la viʼi ə tsi nə̀ mbwaʼmə. Ma ko vi nə̀ mbwaʼmə, mà bòŋsə vi ə nè la viʼi ə soynə. 35Mà vi ə nè la wàyn wùlɨm lu ə nsoynə tìʼ, vunə kyì soynə wenə vəmpfi və vəwenə, vəmpfi və lɨm soynə kyì vunə, kyì vunə soynə vəmpfi və lɨm. 36Viʼi kəbàyn wìʼ a mbi lu ə fʉ tò fa wen à ngə̀ŋ.
37“A kòŋ no ndo kòŋ tìʼ wen be nə̀ li wen chò to ando ghə̀ nkoŋə mò, mu ghə̀ ko kwʉʼ ə ndiʼ ndzɨ̀mtə̀ bàm ə̀ mò; à ə kòŋ no ndo kòŋ wàyn wen chò ando ghə̀ nkòŋə̀ mò, mu ghə̀ ə ko kwʉʼ ə ndiʼ ndzɨ̀mtə̀ bàm ə̀ mò. 38A wʉ̀sə no ndo ke bwèʼè kəntò kə wen ə dzɨ̀mtə̀ mò, ko ghə̀ lə kwʉʼ ə ndiʼ ndzɨ̀mtə̀ ghom. 39A mwòmsə no ndo ə tsi ə faŋ, ghə̀ a pfʉ; a pfʉ no ndo byìʼì mo, ə ghə̀ a tsi faŋ.
Yesò ə shə̀ʼtə̀ wìʼ yi a zì ghə̀ lə kiʼ ə mòʼtə̀
(Mak 9.41)
40“A tùʼmə̀ no ndo nə̀ ghə̀ŋ mu ghə̀ tùʼmə̀ nə̀ mo, à tuʼmə no ndo nə̀ mo, mu ghə̀ tùʼmə̀ nə̀ wìʼ yì a ghə̀ tɨmə mò. 41A tùʼmə̀ no ndo nə̀ wìʼ byìʼì ando wìʼ a yi ə diʼ nshə̀ʼtə̀ Nyìngòŋ, ghə̀ a kiʼi əmòʼtə to nə̀ nshə̀ʼtə̀ Nyìngòŋ, à shisə tə ndo shisə wìʼ byìʼì ando wìʼ a yi ə diʼ ti akayn ashɨ ə Nyìngòŋ, ə ghə̀ a kiʼi əmòʼtə ə wù kənyʉ̀ kətɨməkə a yì. 42Ma gaʼa a ghə̀ŋ nəmwèʼè la a ku no ndo ku te ndoŋ amù mə zhʉmə a wìʼ ə mùʼ a ntìntìn nə̀ vunə və tyətəvə venə byìʼì ando wàyn ə tyetə a yi ə diʼ ndzɨ̀mtə̀ bàm nə̀ mo, ghə̀ lə kiʼ əmòʼtə ə wen.”
ទើបបានជ្រើសរើសហើយ៖
Matìyò 10: bbkDBLnt
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
