Matiu 6
6
Yesu kanigir amur pe amǝtǝle ɓoro
1 Wu tsǝk kir wun, wu kǝa pakki aturo-ɓoarna ma'wun a ɓamǝsǝ aɓwana ace mǝnana ɓǝa sǝn wun ngga ɗang. Ɓǝ̀ wu kǝ pa anggo ka, pa wu nǝ̀ kum ɓe kǝ tangnakusǝu aban Tár wun mana a kuli ka ɗang. # 6:1 Ɓalli gbal aɓa:
Mat 23:5
.
2 Ɓǝ̀ wu nǝ̀ pe amǝtǝle ɓoro ka, wu kǝa ham nǝ ce, kǝla pě mala amǝ'kunɓarina aɓalǝ andakpapi mala amǝ Yahudi andǝ mur anjarɓala ka ɗang. À kǝ pa anggo ace mǝnana ɓǝ̀ aɓwana sǝn aturo-ɓoarna malea ɓǝa ɓwangsǝia. Ən nggǝ bangga wun mǝsǝcau, à angŋǝna tangnakusǝia cikcik. 3Ɓǝ̀ a wu nǝ pe amǝtǝle ɓoro ka, ce a eare ɓe kǝɓwa sǝlǝce gir mǝnana a pakkiyi ka ɗang, 4ace mǝnana ɓǝ̀ pagir mo ka ɓǝ̀ pa aɓa sǝmbǝrǝa. Sǝ Tarró mana kǝ sǝn gir mǝnana a kǝ pe aɓa sǝmbǝrǝa ka nǝ̀ po tangnakusǝo.
Kanigir mala Yesu amur Hiwi
(Luka 11:2-4)
5 Ɓǝ̀ wu nǝ̀ pak hiwi ka, wu kǝa pe a pě mala amǝ'kunɓarina ɗang, mǝnana à kǝ earce camnggi aɓalǝ andakpapi andǝ agauwata anjarɓala sǝ à nǝ̀ pak hiwi, ace mǝnana ɓǝ̀ aɓwana sǝnia ka. Ən nggǝ bangga wun mǝsǝcau à angŋǝna dǝmbǝa à kumǝna tangnakusǝia. # 6:5 Ɓalli gbal aɓa:
Luk 18:10-14
. 6Sǝ we ka, ɓǝ̀ a wu nǝ pak hiwi ka, kuti a ndà mo, gir kun-nda sǝ pak hiwi aban Tarró mǝnana à sǝnggiyi raka. Sǝ Tarró mana kǝ sǝn gir mǝnana a kǝ pe aɓa sǝmbǝrǝa ka, nǝ̀ po tangnakusǝo. 7Sǝ ɓǝ̀ a nda ban pak hiwi ka, kǝa camarǝ ɓǝsǝlǝki acau mana ɓalǝia pà kàm raka, kǝla pě mala amǝ'kpatalú ka ɗang. À kǝ̀ sǝni kǝla ɓǝsǝlǝki acau malea ka nǝ̀ tsǝa Ɓakuli nǝ̀ oea. 8Wu kǝa pa kǝla yia ɗang, acemǝnana kaniama wu nǝ̀ zǝm ngga, Tár wun angŋǝna dǝmbǝa surǝna rǝ gir mǝnana wu earkiyice ka.
9 Ani ka, sǝ wu nǝ̀ pak hiwi:
“We Tár sǝm mǝnana a kuli ka,
ɓǝ̀ lùllǝo kum gulo.
10 Domurǝm mo ɓǝ̀ yiu.
Gir mǝnana a earkiyice ka,
ɓǝ̀ sǝm pe a ɓanza,
kǝla mǝnana à kǝ pe
a kuli ka.
11 Pa sǝm girlina mala yalung.
12 Twala sǝm ban
acauɓikea ma'sǝm,
kǝla mǝnana sǝm
nggǝ twali aɓwana
mana à kǝ pakka sǝm
cauɓikea ka.
13 Bwala sǝm ɓǝ̀ sǝm kǝa kuti
aɓa karǝkiban ɗang,
amsǝ sǝm a bu Mǝɓealɓikea.
[Domurǝm, andǝ rǝcandǝa,
andǝ gulo ka amo na kat,
mana masǝlǝate pà kàm raka,
Amin.]”
14 Ɓǝ̀ wu twali aɓwana ban acauɓikea mana à kǝ pakka wun ngga, Tár wun mǝnana a kuli ka nǝ̀ twala wun banì gbal. # 6:14 Ɓalli gbal aɓa:
Mar 11:25,26. 15Sǝ ɓǝ̀ wu twali aɓwana ban acauɓikea mana à kǝ pakka wun raka, Tár wun gbal ka pà nǝ̀ twala wun ban acauɓikea ma'wun ɗang.
Yesu kanigir amur Gilmur
16 Ɓǝ̀ a nǝ gilmur ka, ce a kur ɓamǝsǝo kǝla pé mala amǝ'kunɓarina ɗang. Pak ka à kǝ kiɗiki ɓamǝsǝia ace mǝnana ɓǝa lǝmndǝì aɓwana ama à ndarǝ gilmur ka. Ən nggǝ na wun mǝsǝcau à angŋa dǝmbǝa à kumǝna tangnakusǝia. 17Sǝ we ka, ɓǝ̀ a wu nǝ gilmur ka, lak ɓamǝsǝo sǝ wu hasǝ muru. 18Anggo ka aɓwana pà nǝ̀ sǝlǝ ama a ndarǝ gilmur ɗang, she kǝ Tarró mǝnana à sǝnggiyi raka. Sǝ Tarró mǝnana kǝ sǝn gir mana a kǝ pe aɓa sǝmbǝrǝa ka nǝ̀ po tangnakusǝo.
Kanigir mala Yesu amur tsǝk gǝna a kuli
(Luka 12:33-34; 11:34-36; 16:13)
19 Wu kǝa rambǝi ɓamur rǝ wun gǝna a kani a ɓanza ɗang, yì ban mǝnana a kàm ngga nkungga andǝ sásà nǝ̀ kiɗiki, sǝ amǝn'i nǝ̀ ɓun kam à nǝ̀ kutio à nǝ̀ pwani ka. # 6:19 Ɓalli gbal aɓa:
Jem 5:2,3. 20Ndikǝna wu tsǝk gǝna ma'wun a kuli, aban mǝnana nkungga andǝ sásà pà nǝ̀ kiɗiki raka, sǝ ban na mǝnana amǝn'i pa nǝ̀ gandǝ kutio à nǝ̀ iun'i kam raka. 21Ban mǝnana gǝna mo pak kàm ngga a kàm sǝ ɓabumo nǝ̀ pa gbal.
22 Mǝsǝu ka nda kǝla pitǝla mǝnana kǝ pe ɓwa tǎlaban ngga. Ɓǝ̀ amǝsǝ ɓwa ka amǝɓoarne na ka, nǝ̀ sǝn gir mana pakkiyi ka pepe. 23Sǝ ɓǝ̀ amǝsǝ ɓwa ka amǝɓane na ka, pà nǝ̀ sǝn gir mana pakki ka ɗang. Sǝ ɓǝ̀ ɓwa kǝ sǝn gir mana pakki ka pepe raka, lǝmndǝ ama pǝndǝa mǝnana nda ɓālǝi ka mǝgule na kǝrkǝr.
24 Ɓwa pà nǝ̀ gandǝ duk guro mala amǝtala ɓala ɓari a tarǝia ɗang. She ɓweni nǝ̀ ɓinǝ mwashat atea sǝ nǝ̀ earce ɓi, ko nǝ̀ pa ɓamuri aban ɓwa mwashat sǝ nǝ̀ ɓǝsǝki ɓi. Wu pà nǝ̀ gandǝ kpata Ɓakuli andǝ boalo a tarǝia ɗang.
Yesu kanigir amur guli arǝ Ɓakuli
(Luka 12:22-34)
25 Nda ǝn nggǝ na wun ama, wu kǝa pe rǝ wun tanni nǝ ɗenyicau ɓangciu amur do ma'wun, ace gir mǝnana wu nǝ̀ li andǝ mǝnana wu nǝ̀ nu ka ɗang; ko ace gir mǝnana wu nǝ̀ oasǝo arǝ wun ngga. Nggearǝì ka yilǝmu kuti girlina re, sǝ nggurǝu kuti agir-nggurǝu re? # 6:25 Ɓalli gbal aɓa:
Filp 4:6; 1Bit 5:7. 26Wu sǝn anyal a kuli; à kǝ ɓeal ɗang, à kǝ can ɗang sǝ à kǝ rambǝa a bà ɗang. Sǝ Tár wun mǝnana a kuli ka kǝ li nǝia. Wun ngga wu kuti anyal re? 27Yana ata wun nǝ̀ gandǝ tsǝk anonggeo mala yilǝmi ɓǝa yàl kam bǝti nǝ́ pe rǝì tanni aɓa ɗenyicau?
28 Palang sǝ wu kǝ pe rǝ wun tanni ɓa ace agir-nggurǝu? Wu sǝn to mala apwasǝo-bondo mǝnana a takuri ka. À kǝ pak kǝ turo ɗang sǝ à kǝ swari ɓamuria agir-nggurǝu ɗang. 29Sǝ ǝn nggǝ na wun ama nggearǝ Murǝm Solomon aɓa gulo andǝ kume male ka oasǝ agir mǝɓoarjami kǝla apwasǝo-bondo mǝnia ka ɗang.#6:29 Ɓalli gbal aɓa: 1Amur 10:4-7; 2Kpa 9:3-6. 30Ɓǝ̀ Ɓakuli kǝ pakki abondo agir-nggurǝu anggo ka, mǝnana à ndakam yalung sǝ li ka à pisǝnia a bǝsa ka, pà nǝ̀ pakka wun agir-nggurǝu mǝnana kuti mǝno ka re? Ma'wun ngga guliarǝu mana wu ndanǝi aban Ɓakuli ka nda ɓiki kyauwe ka!#6:30 Ɓalli gbal aɓa: Mat 8:26; 14:31; 16:8. 31Ce wu kǝa ɓuanǝbum wun ama, “Mana sǝm nǝ̀ li, ko mana sǝm nǝ̀ nu, ko mana sǝm nǝ̀ oasǝo” ka ɗang. 32Amǝnia ka à ndaka gir mǝnana amǝɓanza alkiyitea ka. Tár wun mǝnana a kuli ka sǝlǝna ama wu kǝ pak tǝle amǝnia yì agir ka. 33Wu tsǝk alta Domurǝm mala Ɓakuli andǝ pakki agir mǝnana earkiyice ka a dǝmbǝa, sǝ amǝnia yì agir kat ka à nǝ̀ pa wun nia. 34Ɓǝ̀ ɓalǝ wun ɓǝ̀ kǝa kasǝkya amur cau mala li ɗang, acemǝnana pwari mala lí ka ndanǝ amale yì tanni. Ko ya pwari ka ndanǝ atanni male mǝnana à kārǝa rǝì ka.#6:34 Ɓalli gbal aɓa: Mat 19:28; Mar 10:29-30; Luk 18:29-30.
ទើបបានជ្រើសរើសហើយ៖
Matiu 6: mbu
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc. and © The Nigeria Bible Translation Trust 2016
