San Mateo 8
8
Teeçx piçthẽ'j wã'jy weete ãça'sa's Jesus nuykatxhini
(Mr 1.40-45; Lk 5.12-16)
1Jesusa' thã'j vxiçu kĩhte', nasa iiméh wala kuh pkhaakhetx. 2Aça' teeçx piçthẽ'j wã'jy wee seena' kazxsate ãça'sa Jesus tasxte utxaaçxa peejxũkweçxa na'jĩnak pxthaa we'we:
—Adxa's peeygãhçxa' nuykatxhine'ga naa weeju jĩte', 3Jesusa' na'jĩnak kuseju jxa'dx:
—Ahçemée peeygãanisag, naa pa'ga katxhiçxa mneeyũu jĩçpkaçxha', txãa wã'jy weeju katxhiçxak neeyũu. 4Aça' Jesusa' na'wẽk jxkaah:
—Maa yuhtxwa pta'sxmeene'ga, naasáa sacerdote yuuçxáana iidx kakwe's txwesya' me'j. Sa' Moises ma'wẽga jxkaaja' txã'sçxáa kxtey yuune'ga, kxah nasa jxukaysa jiyutxna idx ew katxhiçxa neeyũutewa jĩk.
Soldau kpiitan jxpe'jnisa's Jesus nuykatxhini
(Lk 7.1-10)
5Txajũ' Jesusa' Kapernaum çxhabte pa'the', soldau kpiitan romanowe'sx utxaaçxa' pxthaa we'wek na'jĩna:
6—Adx yatte jxpe'jnisa uuya' yã'j ũsa' ẽseya' ãjameeçxa jĩte', Jesus pasçxa':
7—Adxa' u'jçxa nuykatxhi'nja jĩk. 8Aça' kpiitana' na'wẽk pas:
—Adxa' iidx dxi'pte kĩhte yuhwa seelpimeesath. Txãasath adx yatte iidx pa'jni's thaame', naasáa çxhãçxhana jĩna mwe'we aççxáa adx jxpe'jnisa' katxhina. 9Adxwa ma'wẽtka walasa jxkaahnitxi' nwẽese'je', sa' adxna nwẽese'jsa soldauwe'sx iijxpe'th txãawe'sxtxi teeçxsa's me'j jĩte', adx jxkaahni's kxtey yu'k. Sa' vxite's pa'yate', txãawa kxtey nwẽese'je'k. Sa' adxna selpisa's kĩh jxkaathewa kxtey yu'k jĩk.
10Txã'wẽ we'weni's Jesusa' wẽse'jçxa', wala kuh yajkxku, sa' na'jĩnak we'we txãa yakh yuusatxi':
—Isath we'we', Israelwe'sx jxukaysa mteewe'sx yuhwa txã'wẽ adx we'weteçxáa katxhina sũhsa yu' iiuymeeth naa piçthẽ'j na'wẽsa yu'. 11Na'jĩ'th na', judiu ji'jmeeçxawa wala yuh pa'jatxna sek kãanijũwe'sx vxite' sek khẽenijuwe'sx majũwe'sxwa jxuka, sa' Abrahan, Isaak, Jakob txãawe'sx yakh ũ'ya' kaçxhiitxna cielute Dxus jxkaahna ũsnite. 12Naapkaçxha' kxtee ũswa'jsata' jĩnisa yu', kutxi'jçxa çxhi'dx walate akhni yuutxna. Kxteea' seena' yuh pebeena ki'thtxi ksuusu'jutxna ũukhna jĩk. 13Sa' Jesusa' ki' we'wek kpiitana's:
—Yatna me'j, aça' idx ma'wẽne'ga jxthãasu' txã' kxtey yuuna jĩçpkaçxha', txãa kpiitan jxpe'jnisa' katxhinik yuu.
Pedro nyu njĩ'ja's Jesus nuykatxhini
(Mr 1.29-31; Lk 4.38-39)
14Txajũ' Jesusa' Pedro yatnak u'j, sa' kxteea' Pedro nyu njĩ'ja' kakwesekte uuya' ũstek uy. 15Aça' kusete jxa'dxku, naapkaçxha' kakweseka' ũçxhak. Txajũ' txãa u'ya' kiiteçxa selpiiya' kasejk. 16Sa' txãa en jxuka çxhi'dxiçte', Jesus tasxte wala jxũna pa'jtx eçx iiyamunisatx. Aça' tee dxi'j we'weni yakhçxáa txãa eçxtxi' ũusuh kutxi'kh, sa' ãça'sa jxukaysatx nuykatxhik. 17Nyafxíi Dxus yuwe pta'sxsa Isaiasa' na'jĩnak we'we:
Txãaíik kwe'sx çxhãçxhamée fxi'zeni vxite' kwe'sx ãça'na fxi'zeni's jxuka txuhde jĩ'k txã'jĩni kxtey yuukahnçxáak txã'wẽ yũu.
Jesus yakh fxi'ze wẽesa
(Lk 9.57-62)
18Txã'wẽ nasa wala pkhaakhete', Jesusa' ĩkh kuten u'jwe'nja'w jĩnak we'we. 19Txã'jĩte', ley kaapiya'jsa teeçxsa Jesus tasxte utxaaçxa', na'jĩk:
—Idx yakh yuu wẽeth idx mtee u'jweçtewa jĩte', 20Jesus pasçxa':
—Yu'kh niimal yuhwa deewa'j kafx ji'phta', txã'wẽy vxiçxakwewa yat ji'phta'. Nawa Dxus Nçxi'k Nasa Yuusa' mtee yuhwa txajx dxiktheçxáa yuja'swa khikhwa'j ji'phme'.
21Naapkaçxha' Jesusna nwẽese'jsa teeçxsa' na'jĩnak we'we:
—Adxa's mkaah adx tata khuẽ'yna pedaawa'j ji'phthu jĩte', 22Jesus pasçxa':
—Uusaawe'sxa' peekx uusáa pwe'sx ya'pedaatxna. Aça' idxa' adx yakh txutemée myuh jĩk.
Marte wejxa wala's Jesus kxuuju'jni
(Mr 4.35-41; Lk 8.22-25)
23Txajũ' Jesusa' barkote khẽek aça' txãa yakh u'jusawe'sxa' pi'kxna u'jtx. 24Txã'wẽ ĩkhte u'jweçpkaçxha', wejxaa wala sẽjk, aça' yu'tũçxhasa' barko's aphya'wak yu'. Nawa Jesusa' deenik yu'. 25Aça' txãa yakh u'jusawe'sxa' fxĩtxtxi na'jĩna:
—Kwe'sxtxi jxpe'jsa, meen nwe'we. Txã'wẽme', ĩkh dxiikhẽ khẽjeçtha'w jĩte', 26na'wẽk pas:
—¿Kĩjxa'kwe txakwe wala ũukhu'? ¿I'kwe'sxa' Dxusna yajkxya' yu' ew jiimeewá'kwe? jĩçxa', kiiteçxa wejxa vxite' ĩkh txãatx we'wek, aça' jxuka yujuk. 27Txã'wẽ yũute', barkote u'jsawe'sxa' wala kuh yajkxçxa na'jĩnatx we'we:
—Naa piçthẽ'ja' ¿kimna açki'tx wejxa ĩkh txã'wẽsa yuhwa nwẽese'je'? jĩ'tx.
Gadara kiwetewe'sx eçx iiyamunisa
(Mr 5.1-20; Lk 8.26-39)
28Txajũ' Jesusa' ĩkh kuteju Gadara kiwete pesathe', e'z piçthẽ'j uusáa pedani kafxju kasehçxa Jesus tasxte utxaatx. Txãa e'zsa' eçx iiyamunisatx yu', txãasatx iiméh seena' weeswée yu', txãa pa'ga txãa dxi'jsu kim yuhwa skhẽwya' ãja'çmeeta'. 29Txãa eçx iiyamunisa' na'jĩnatx sus we'we:
—Dxus Nçxi'k Jesus, kwe'sx nxuste ũswa'j en ãhmeyna, ¿nxuste akhya' yuwe'wá'ga? jĩ'tx.
30Kxsũ thã'jsu kuçxi wala ũsu'tx aphna. 31Aça' txãa eçxa' Jesusa's pxthaa we'wetx:
—Kwe'sxtxi neeuççxa', txãa kuçxi ũussu khẽeya' u'khan mkaah.
32Txã'jĩte', Jesusa' kxtey yuukaakh. Aça' txãa eçxa' nasa ũusuh kasehçxa txãa kuçxi ũustetx khẽe. Txã'wẽ yũute', txãa kuçxi' penxakhẽ peluçxa ĩkhkhẽ khẽeçxa jxuka uutx. 33Aça' kxsũ kuçxi thegsa' ũukhçxa wuwuuçxáa çxhabna u'jçxa pta'sxtxi kĩh yũuni'swa jxuka. Sa' txãa e'z piçthẽ'j eçx iiyamunisawe'sxtxi kĩh yũutewa jxukatx pta'sx. 34Txajũ' çxhabte nasa jxuka thegya' u'jtx Jesus ũsnite. Sa' uyçxa' Jesusa's txãawe'sx kiweju kasehna u'khaahtx.
ទើបបានជ្រើសរើសហើយ៖
San Mateo 8: pbbNNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 1984, Wycliffe Bible Translators, Inc. All rights reserved.
