San Mateo 3
3
Juan Bautista nasa u'pnimée kiwesu Dxus yuwe's pta'sxni
(Mr 1.1-8; Lk 3.1-9, 15-17; Jn 1.19-28)
1Txãa ensu' Juan Bautista' Dxus yuwe's pta'sxna pa'kh Judea kiwesu nasa u'pnimeesu. 2Sa' na'jĩ'k:
—Pkaltxi nvxihtçxa Dxus tasxte misxawedwe. Txã'wẽme', Dxus jxkaahwa'j ena' ãjxã'kh jĩ'k.
3Naa Juana'sku we'wena fxi'j Dxus yuwe pta'sxsa Isaiasa' na'jĩna:
Nasa u'pnimée kiwesu sus we'weni pthũusek:
Dxus pa'jwa'ja's mpheu'jwe,
Dxi'ja's ku'le phaadena jĩ'k.
4Juana' kamelxo khas atxh athçxa kha'txku jxtudu'. Sa' txajx ũ'nisa yu', khã'sx wala çxhi'dx miltxi yu'. 5Kxtee wẽse'jya' pa'jtx Jerusalenuwe'sx vxite' Judea kiwesuwe'sx jxuka vxite' Jordan yu'wala utxasuwe'sxwa. 6Sa' txã'wẽ pkalsatha'w jĩna Dxusa's perdon pẽjxna pa'jsatxi' Juana' Jordan yu'walate bautisaĩ'k.
7Nawa fxariseowe'sx vxite' saduceowe'sx txã'wẽ thegya' yuhte uyçxa', Juana' na'jĩ'k:
—I'kwe'sxa' ul weesweesa ji'ji'kwe txãa pa'ga kastigo seena'sa yuja', aça' txajũ iyuwa'ja's ¿kimga pta'sx? 8Txã'wẽ kastigo seena'saju iyuwa'ja's jiyuyã'jçxa', ewçxáa yũuna mfxi'zewe, kxah maawa ew fxi'zeni's uysa': Naawe'sxa' pkaltxi nvxihtçxa Dxus luuçx yuh yuuta sũjutxna. 9Txã'jĩte', i'kwe'sxa' na'wẽ iiwejçx yaakxnuwe: Kwe'sxa' Abrahan ji'tha'w na' pkalsameetha'w sũhna yaakxwa'j ji'phmée i'kwe. Na'jĩ'th na': Naa kwet yuhtxwa Abrahan ji'j vxit-ya' ãjana Dxusa'. 10Txã'wẽ ew fxi'zemeete', ama' ih yã'j ũsa' fxtũutasxtxi spẽ'thya'. Maa fxtũutasxwa ew yũnsameetxi' spẽ'thçxa ipxte kabwa'jçxáa yuuna. 11Adxa' i'kwe'sxtxi' yu'teçxáath bautisaĩ' pkaltxi nvxihtçxa Dxus tasxte sxawedsatxi'. Nawa adx e'suh vxite yuja' txã' Dxus Espiritu ipx na'wẽsate bautisaĩna. Txã' adxte jxthaakwe ãjawa'jsa', aça' adxa' txajx pelgatxiçxáa yuhtxwa ũsya' seelpimeesath. 12Txã' skuutxh kweejxa'jni plaatu's kusete at yã'jçxa ũsa' na' skuutxha's tamaju txudena sũupi'jna. Txã'wẽ yũuçxa skuutxha's jxaawuuna. Nawa tama yu'sa' kabuna ipx bagaçxte yuhwa ũçxhawa'jmeesate jĩ'k.
Jesus ya'bautisãyni
(Mr 1.9-11; Lk 3.21-22)
13Naapkaçxha' Jesusa' Galilea kiweju yuhçxa Jordan yu'wala pukate Juan ũsnite pa'kh, Juan yu'te bautisãykahn. 14Nawa Juana' Jesusa's bautisãy wẽemeeçxa na'jĩk:
—Wejx yuuwa idx adxa's bautisãywa'jsag, sa' ¿ma'wẽga adxa's pi'ki' idxa's bautisãykahn? jĩte', 15Jesusa' na'wẽk pas:
—Dxus jxthãasni's kxtey yuuní wejx ewna jĩte', Juana' kxtey nwẽese'kh. 16Aça' Jesusa' yu'te ya'bautisãyçxa kasejeçpkaçxha', cielu' phaatek, aça' Jesusa' uyku Dxus Espiritu tub çxihme na'wẽsa txajx kajkwete kĩjaçte. 17Aça' we'weniwa pthũusek cieluju na'jĩna:
—Naaíi Adx Nçxi'k wala wedxnisa'. Txãa pa'ga wala weçxana ũsthu jĩk.
ទើបបានជ្រើសរើសហើយ៖
San Mateo 3: pbbNNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 1984, Wycliffe Bible Translators, Inc. All rights reserved.
