San Mateo 8
8
Jesús leprata jípuremta tütek
(Mr. 1:40-45; Lc. 5:12-16)
1Jesústa júya káu bétana kömä siiko juebena gente áa sáu kaatey. 2Huanäi senu yoreme tüisi takahuat sähuaka leprä tíamta jípureka áu yepsaka tónommia áu kíkteka, ínel áu jiaahuak:
—Señor, empo júnel éäteko, arë nee tüte.
3Jesús mám rútukteka át mámtek, ínel jíaka:
—Jeehui, júnelne éiya; türiäe.
Huanäi jü leprata jípureme sejchúkti kaita jípureka taahuak. 4Huanäi Jesús ínel áu jiaahua:
—¡Juyú! Katë jábeta téttejhua, ál‑lë áman huéiye, jü tiöpopo nésahuemtahui. Juka Diosta baysahueka tiöpou totoijhuamtë áman huéria, Moiséjta nésahuekä pámani, bempörim jüneenakë béchïbo.
Jesús centuriónta jóapo sáyhuamta kökoremta tütek
(Lc. 7:1-10)
5Capernaum pueblou Jesústa yebisiseyo, senu centurión sontarommeu yäut áu rukteka jiokot áu jiaahuak, 6ínel jíaka:
—Señor, jü ín sáhuëhui ín jóapo böka káraktilataka, kökosi kaa huéeläpo áu ínnëaka.
7Huanäi Jesús ínel áu jiaahuak:
—Ínapone áman sika kökoata ä úhuaanake.
8Të sontarommeu yäut ä yómmiaka ínel áu jiaahuak:
—Señor, kanne ín jóata bétuk enchi mabetpo yúmala; ál‑lë kía nokta téhua; huanäi jü ín sáhuëu türinake. 9Bueïtuk ínapone yóremtaka huatem ino béppa nésahueme jípure, entokne sontarom ín nésahue bétuk jípure. Huanäi senuk jákun nee ä jaasek áman sisime; juka senuk éntok: “Binë huéiye”, ti nee áu jiay inou sisime; juka ín sáhuëu jita nee ä yáa sáhuey, ä jojoa.
10Huanäi Jesús ínel ä jiay ä jíkkajaka, áa bétana buére ëeak. Huanäi ínel ámeu jiaahuak, jume áa sáu katemmehui:
—Lútüriapone ínel enchimmeu jiaahua, pueblo Israelpo júnene kaa ä téula, juka Diostat úttesi éehuamta. 11Inenne két enchimmeu jiaahua, juebénakam yáijnake, täata yeu huë bétana entok täata áman huéchë bétana; huanärim Abrahamtamak, Isaactamak entok Jacobtamak jotenake, jum téhuekapo Diosta réytaka nésahuepo. 12Të huame Diosta üusimpo näikiatukaïhuim, päkunim kaa machikun yeu bébna; ímïrim kökosi éaka buannake, emo tám kumeka.
13Huanäi Jesús sontaro yäuttau ínel jiaahuak:
—Ámanë huéiye, bueïtuk em ä súalekä páman yáatunake.
Huanäi huämi orapo jü jóapo sáyhuame sep türilataka taahuak.
Jesús Perota asu kökoremta tütek
(Mr. 1:29-31; Lc. 4:38-39)
14Jesús Perota jóau yepsak. Huanäi Perota asu bitchak, táij huécheka bökamta. 15Huanäi mámpo áachä mámtek, jü táij huéchiria ä tójjak; huanäi yejteka jita am joria táytek.
Jesús juebena kökoreme tütek
(Mr. 1:32-34; Lc. 4:40-41)
16Të chúkula tukariu yúmako, juebénakam lemooniom jípureme áu nüpahuak; huanäi jü nokiy jume lemooniom yeu béebak, entok jume kökoreme sïmem tütek, 17jukä profeeta Isaíasta nokakäu chúpnakë béchïbo, ínëli ä jiäpo: “Áapo juka itom kökoa nüka entok itom kökosi éäu núk siika.”
Jume Jesústat sáu kat báreïhuim
(Lc. 9:57-62)
18Jesús juka genteta áa chíkola anemta bíchaka, nésahuek bahue huáytana bíchaa kat béchïbo. 19Senu escriiba áu yepsaka ínel áu jiaahuak:
—Maestro, jákun em huëu bíchane émomak huéenake.
20Jesús ínel áu jiaahuak:
—Jume ayesim buía guojökum jóuhuak; jume huikichim éntok toosak; të ínapo jü Yoremta Üusi jita mútekaka ín bönakeu júnene kaa jípure.
21Täbui, ä disciipulohua ínel áu jiaahuak:
—Señor, nechë licensia áman sika bát ín áchay ín mäanakë béchïbo.
22Jesús ínel ä yómmiak:
—Ino sáukë huéiye, Akë am tójja eläpo jume kókkolam bem kókkolam mäanake.
Jesús buere jékata yánti tahuatuak
(Mr. 4:35-41; Lc. 8:22-25)
23Áapörik barcopo jämuko, ä discíipulom áa sáu sájjak. 24Huanäi buere jéka bahuepo áu tóboktiak; jume bäa máresim éntok röakteka barcotam patpattiay; të Áapo kótchey. 25Ä discíipulom áu yájaka ä bússak, ínel jíaka:
—Señor, ¡itomë jínëu, bueïtukte abe kókko!
26Áapo ínel ámeu jiaahua:
—¿Jatchiakasem májhue, eme yoremem kaita súalëram?
Huanäi yejteka, jü jekatau entok bahuetau kutti nónokak; huanäi sïme yánti taahuak. 27Huanäi jume yoremem áa bétana buére éiyay, ínel jíaka:
—¿Jábesa ïri yoreme, juka jekata entok bahueta sáhueme? ¡Ímëi éntok ä nokäu johua!
Jume gadarenom lemooniom jípureme
(Mr. 5:1-20; Lc. 8:26-39)
28Ínëli bahue mayoa huáytana ä yepsako, gadarenom buiapo, guoyikam ä nánkek, lemooniom jípureka, ánimam mamahuäpo yeu sákalataka; jujuëna jéjjeyhuiaka chuu yoyolim bénaaka. Íäri béchïbo ïri böot kaabe ára áma huam huéiyey. 29Huanärim chay nónokak, ínel jíaka:
—¿Jítasë itomak jípure, Jesús, Diosta Üusi? ¿Jachë itom kaa pappeetua báreka äbo yepsa, ketune kee tiempota yúmaisu?
30Ímï éntok ili ámeu mékka juebena kohuim áma jïbuä sásakay. 31Huanäi jume lemooniom jiokot áu nookak, ínel jíaka:
—Itom yeu béebakäteko, huame kohuimmechë itom kimutua.
32Huanäi Áapo ínel ámeu jiaahuak:
—Ámanem kaate.
Huanäi bempo yeu sájaka kohuimmet kiímuk; ínëli sïme huame kohuim siba bénëku ámanim bahuéu kón huátteka áma kókkok.
33Huamë kohuim suayaïhui éntok tennek. Huanärim buere jóärau yájaka sïmeta ettejhuak, jáchin jume lemooniom jípureïhui jita ámeu yeu sikähui. 34Huanäi sïme jume buere jóäraapo jóakame, Jesústam nankirika yeu sájjak. Huanärim ä bíchaka jiokochim áu jiaahuak, bem buíäraapo yehuä huée sáhueka.
ទើបបានជ្រើសរើសហើយ៖
San Mateo 8: mfy
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2014, Wycliffe Bible Translators, Inc. All rights reserved