ខគម្ពីរពេញនិយមពី ଲୁକା 3

ចែក​រំលែក

ଯୋହାନ୍ କେ ଜେଲ୍ଅଡ଼୍ଆଃ ରେ ଆଦେର୍ ସିଦା ଚିମ୍ତା ସବେନ୍ ହୋଡ଼ୋକୋ ବାପ୍ତିସ୍ମା ଇଦିକେଦାକୋ ଇମ୍ତା ୟୀଶୁ ହ ବାପ୍ତିସ୍ମା ଇଦିକେତେ ବିନ୍ତି ତାଇକେନାଏ, ଏଣ୍ଡେ ରିମିଲ୍‍ଦିଶୁମ୍ ଖଲାଅ ଜାନା, ଆଡୋଃ ପାବିତାର୍ ଆତ୍ମା ହୋଡ଼ମୋ ରୂପ୍ ରେ ଦୁଦ୍‍ମୁଲ୍ ଲେକା ଇନିଜାଃ ଚେତାନ୍ ରେ ଆଡ଼୍‍ଗୁଜାନାଏ, ହାର୍ ନେ କାଜି ରିମିଲ୍‍ଦିଶୁମ୍ ତେ ହିଜୁଃଲେନା: “ଆମ୍ ଇଙ୍ଗ୍ଆଃ ଦୁଲାଡ଼ାନ୍ ହୋନ୍ ତାନ୍‍ମେ, ଇଙ୍ଗ୍ ଆମ୍ତେ ସୁକୁ ମେନାଇଙ୍ଗ୍‍ୟା।”

ଏଣ୍ଡେ ଯୋହାନ୍ ଏନ୍ ସବେନ୍ କୋକେ କାଜିକେଃକୋୱାଏ, “ଇଙ୍ଗ୍ ଦୋ ଆପେକେ ଦାଆ ଏତେ ବାପ୍ତିସ୍ମା ଏମାପେ ତାନିଙ୍ଗ୍, ମେନ୍ଦୋ ଇନିଃ ହିଜୁଃୱାଲା ମେନାଇଜା, ଅକନିଃ ଇଙ୍ଗ୍ଆଃ ତେ ପେଡ଼େଜାନ୍ ତାନିଃ; ଇଙ୍ଗ୍ ଦୋ ନେଲେକା ନିଈ ହ ନାହାଲାଇଙ୍ଗ୍, ଚି ଇନିଜାଃ ଖାର୍ପା ରାଃ ଥୋନୋଲ୍ ଖୋଲାଅୟାଇଙ୍ଗ୍, ଇନିଃ ଆପେକେ ପାବିତାର୍ ଆତ୍ମା ଆଡୋଃ ସେଙ୍ଗେଲ୍ ତେ ବାପ୍ତିସ୍ମା ଏମାପେୟାଏ।

ଏନାମେନ୍ତେ ଦାଣ୍ଡ୍ ଏତେ ବାଞ୍ଚାଅଃ ନାଙ୍ଗ୍ ଏନ୍‍ଲେକା କାମି କାମିପେ ଏନାତେ ସାରିଅଗା ଚି ଆପେ ପାପ୍ କାମି ବାଗେ କେଦାପେ, ହାର୍ ଆପେ ଆପେୟାଃ ମୋନ୍ ରେ ନେୟା ଆଲୋପେ ପାହୋମେୟା ଚି, ଆଲେୟାଃ ଆପୁ ଆବ୍ରାହାମ୍ ତାନିଃ ହାର୍ ପାର୍ମେଶ୍ଵାର୍ ଆବୁକେ କାଏ ଦାଣ୍ଡ୍ ଏମାବୁୱାଏ। ଚିୟାଃଚି ଇଙ୍ଗ୍ ଆପେକେ କାଜିୟାପେ ତାନାଇଙ୍ଗ୍, ଚି ପାର୍ମେଶ୍ଵାର୍ ନେ ଦିରି କୋଏତେ ଆବ୍ରାହାମ୍ ଲାଗିନ୍ ହୋନ୍‍ଗାଣା ଜାନାମ୍ ଧାଡ଼ିୟାଏ।

ପାର୍ମେଶ୍ଵାର୍ ଏନ୍ ହୋଡ଼ୋକୋକେ ଦାଣ୍ଡ୍ ଏମେ ନାଙ୍ଗ୍ ସେକାଡ଼୍ କାନାଏ ଜେଲେକା ମିୟାଃ ହୋଡ଼ ହାକେ କେ ଦାରୁ ରାଃ ରେହେଃ ତାଃ ଦୋହୋ କାଦାଏ, ଏନାମେନ୍ତେ ଅକନ୍ ହୋଡ଼ କୋ ଏନ୍ ଦାରୁ ଲେକା ବୁଗିନ୍ ଯଅ କାକୋ ଆଉୱେୟା, ଇନ୍‍କୁ କେ ପାର୍ମେଶ୍ଵାର୍ ବିଚାର୍ କୋୱାଏ ହାର୍ ସେଙ୍ଗେଲ୍ ରେ ଦୁଡ଼ିଙ୍ଗ୍ ରିକା କୋୱାଏ।

ଜେଲେକା ୟାଶାୟାହ୍ ନାବୀ ରାଃ କାଜିକାନ୍ ତେୟାଃ ବାଚାନ୍ କୋରାଃ କିତାବ୍ ରେ ଅଲାକାନା, “ସୁନ୍‍ସାନ୍ ଜାଗା ରେ ମିହୋଡ଼୍ କାଉରିତାନ୍ ନିଜାଃ କେଡ଼ା ଆୟୁମୋଃ ତାନା ଚି, ପ୍ରାଭୁ ଗାଃ ହୋରା ବାଇପେ, ଇନିଜାଃ ସାଣ୍ଡାକ୍ ସିଧା ବାଇୟେପେ। ସବେନ୍ ଗାଡା ଅତେକୋ ଫେରେଦୋଗା, ଆଡୋଃ ସବେନ୍ ବୁରୁ ହାର୍ ମାରାଙ୍ଗ୍‍ବୁରୁ କୋ ସାମାନ୍ ବାଇୟୋଗା; ହାର୍ ଅକନାଃ ବେଙ୍କୋ କାନା ସିଧାଅଗା, ହାର୍ ଅକନାଃ ଉବାଡ଼୍ ଖାବାଡ଼୍ ମେନାଃ ଏନା ସାମ୍ ହୋରା ବାଇୟୋଗା। ହାର୍ ସବେନ୍ ମାନ୍‍ୱା ହୋଡ଼ୋକୋ ପାର୍ମେଶ୍ଵାର୍ ରାଃ କୁଲାକାନ୍ ନିଃକେ ଅକନିଃ ଇନ୍‍କୁକେ ବାଞ୍ଚାଅ କୋୱାଏ ନେଲିୟାକୋ।”