If you have would like a copy of this version please contact info@davarpartners.org

Bareli Pauri New Testament, CC-BY-SA-4.0, Friends Missionary Prayer Band (Text), Bareli Pauri New Testament Audio Bible, CC-BY-SA-4.0, Davar Partners International, Bridge Connectivity Solutions, 2022 (Audio).

Bareli Pauri New Testament

Bareli Pauri New Testament (TLF)

Bareli Pauri (बारेली पावरी) Bible by The Love Fellowship is licensed under Creative Commons Attribution-ShareAlike 4.0 License.

ओवते जेतार प्रभू काजे मालूम होयो कि फरुशी सोमवला छे कि येसु योहान गोथू जादा चेला बोनावलु एने तीनुक बाप्तिस्मा आपतलु. हिमी तोक येसु खुद नि बाकीन तेरा चेला बाप्तिस्मा आपता होता. तेत्यार चू यहुदिक छुळीन ओवी गलीलमा गोयू, एने तीनाक सामरिया गोथो जानो जोरुरी होतो. इनान कोरता चू सूखार नावोन सामरिया पूठी एक सोहोरोमा आव्यु जो इनी जागा साते छे जीनाक याकुब तेरा पुऱ्या काजे जेरो नाव युसूफ से तीनाक आपलु होतु. एने याकुबोन कुवू बी चात होतु. आखरी येसु वाटे थाकलु तीना कुवा पोर चांत बोस गोयू. जी वात छोव घोनटान आस पास होयी. ओतरामात एक सामरिया पाणी भोरणे आवी, येसु तिनी काजे कोयू, “मेसेक पाणी पीवाळ.” काहाकि तेरा चेला ते खाणो मुले लेणे जाय रोया होता. ची सामरी बायर येसु काजे कोयी, “तू यहुदि होयीन मार सारखी सामरी जुव पाणी काहा मांगतलू?” (काहाकि यहुदि शमरोनी पुठी काहना रितीन व्योहार नी मेकतला). येसु जोवाब आप्यू, “ओगर तू परमेश्वरोन वरदान काजे उवखती, एने यो बी जानती कि चू कून छे, जू तुसेक कोयने बाज रोयु, मेसेक पाणी पाव, ती तू तीना जूव मागती एने चू तुसेक जीवनोन पाणी आपतू.” बायर येसु काजे कोयी, “हे प्रभू, तार जुव ते पाणी भोरणे बालटी नि होय, एने कुवू उंडूत छे; ती चो जीवनोन पाणी तार जुवू का गोथो आव्यो? काय तू आमरू बास याकुब गोथू मोटू छे, जू आमुक यु कुवू आपलु; एने चू खुद तेरा पुऱ्या साते, एने तेरा जीव जोनावर आखा पुठी इनामा गोथू पाणी पीदु?” येसु तिनी काजे जोवाब आप्यू, “जू कुदु यो पाणी पिसे चू पोछु तीसलू होय जासे, बाकीन जू कुदु तिना पाणीमा गोथू पीसे जो मी तीनाक आपीस, ओवतेन चू ओमोरकाई तोक तीसलु नि रोये; बाकीन यो पाणी मे तीनाक आपीस, चू तीनामा एक झोर बोन जासे जो ओमोर जीवनोन कोरता उमळतो रोयसे.” बायर तीनाक कोयी, “हे प्रभू चो पाणी मेसेक आप काहाकि मे तीसली नी होयो एने नि पाणी भोरनेन कोरता ओतरे नांबे आवो.” येसु तिनी काजे कोयू, “जा, तारा पाहणा काजे बुलाव लाव.” बायर येसु काजे जोवाब आपी, “मी बिना पाहणान छे,” येसु तिनी काजे कोयू, “तू छाचलीन कोयी, मे बिना पाहणान छे. काहाकि तू पाच पाहणा कोरली, एने जिना जुवू तू हिमी छे चू बी तारु पाहणू नि होय जो तू छाचलीन कोय रोयू.” बायर तीना काजे कोयी, “हे प्रभू मेसेक लागे कि भविष्य कोरता छे. आमरा डाहा-डाहा इना बोयळा पोर प्रार्थना कोरला, एने तुमु कोयतेला कि ची जागा जां आराधना कोरनो जुवे यरुशलेममा छे.” येसु तिनी काजे कोयू, “हे पूराय, मारा वातोन भुरसू कोर कि टेम आव रोयी कि तुमु नि ते इना बोयळा पोर बासोन आराधना कोरसू, नि ती यरुशलेममा.” तुमु जीनाक नि उवखतला तेरी आराधना कोरतेला; एने आमु जीनाक उवखतला तेरी आराधना कोरतेला; काहाकि छुटकारू यहुदिमा गोथू छे. बाकीन ची टेम आव लागी, एने हिमी बी छे, जीनामा खोरला भोक्ती कोरणे वावान बासोन आराधना आत्मा एने खोराइसी कोरसे, काहाकि बास तेरेन कोरता ओसोच भोक्ती कोरणे वावा काजे हेरतलु छे. परमेश्वर आत्मा छे, एने जोरुरी छे तेरी आराधना कोरने वावा आत्मा एने खोराइसी आराधना कोरे. बायर तीना काजे कोयी, “मेसेक मालूम छे कि मसिह यु मसिह कोवायतलु, आवने वावू छे; जेतार चू आवसे, ती आमुक आखा वाते कोय देसे.” येसु तिनी काजे कोयू, “मे जू तुसेक कोयने बाज रोयू, चू मे छे.”

तोतरामा तेरा चेला आव लाग्या, एने नोवलाय कोरणे बाज गोया कि चू बायर पुठी वात कोरणे बाज रोयू; ते बी कुदू नि पुछ्या, “तुसेक काय जुवे?” नि ती “कालगान कोरता तिनी पुठी वात कोरतेलू?” तेत्यार बायर तेरो डूचरो छुळीन सोहोरोमा जात रोयी, एने माणसो काजे कोयने बाज गोयी, “आवू, एक माणूस काजे देखू, जू आखो काहीन जो मे कोरली मेसेक कोय देदू कांखुर मायीन यु ते मसिह नि होय?” आखरी चे सोहोरोमा गोथा निकवीन तीनानचा आवने बाज गोया. तिंदरे इचमा चेला येसु काजे जी विनता कोऱ्या, “हे रब्बी, काहीन खायले.” बाकीन येसु तीनु काजे कोयू मारेंचा ओसलो खाणो से जीनाक तुमु नि जानतला. तेत्यार चेला आपोसमा कोया, “काय कुदू इना जुगू काहीन खाणेन कोरीन लाव रोया?” येसु तीनु काजे कोयू, “मारो खाणो यो छे कि मेसेक मुकलने वावान मोर्जीन अनसारे चालो एने तेरो काम पुरो कोरो. काय तुमु नि कोयतेला, ‘काटनी आवनेमा हिमी चार मोहोना पोड रोया?’ देखू, मे तुमु काजे कोयो तुमरा डूवा उचा कोरीन खेतो पोर नोजोर नाखू कि चे काटनीन कोरता पाक गोयला छे. काटने वावान दाहाळकी जोळतली एने ओमोर जीवनोन कोरता फोव काटतेलु, काहाकि वेरणे एने काटने वावू दुयू मेवीन खुशी कोरे. काहाकि या जी कोहावत खोरी बोसतली छे वेरणे वावू दिसरू छे एने काटने वावू दिसरू. मे तुमु काजे खेत कोरणेन कोरता मूकल्यु जीनामा तुमु मेहनत नि कोऱ्या दिसरू मेहनत कोऱ्यु एने तुमु तिंदरा मेहनोतोन फोव मा भागीदार होय रोया.”

तिना सोहोरोमा लोकेत सामरी तिनी बायर काजे कोयने पोरसी येसु पोर भुरसू कोऱ्या; काहाकि ची गोवायी आपली होती ची आखो काहीन जो मी कोरती होती, मेसेक कोय देदु;. इनान कोरता जेतार ये सामरी तेरेनचा आव्या, ती तीनाक विनता कोरणे बाज गोया कि आमरे या रोय आखरी चू चा दुय दाहळा तोक रोयू. तेरा वचनोन वजेसी एने घोणा सोवटा माणसे भुरसू कोऱ्या. एने तिनी बायर काजे कोया, “हिमी आमु तारा कोयना पोरसी भुरसू नि कोरता; काहाकि आमु खुद सोमवी लेदा, एने जानतला कि युत छाचलीन जोगोन छुटकारू आपन्यु छे.”

ओवतेन तीनु दुय दाहळान ओवते चू चा गोथू निकवीन गलीलमा गोयू, काहाकि येसु खुद गोवायी आप्यू कि भविष्य कोरताक आपना देसोमा मान नि जोळतलु. जेतार चू गलीलमा आव्यु, ती गलीली माणसे खुशीमा तीनाक भेट्या; काहाकि जोतरा कामे चू यरुशलेममा पेहेले टेमे कोरलु होतु, चे तीनाक देखला होता, काहाकि चे बी पेहेले गोयला होता.

तेत्यार चू ओवी गलीलोन काना गावमा आव्यु, जा चू पाणी काजे आंगुरोन रोस बोनावालु होतु चा राजान एक काम कोरणे वावू होतु जेरु पुऱ्यु कफर्णहुममा मांदलु होतु. चू यो सोमवीन येसु यहुदियान गलीलमा आव रोयू, तेरेनचा गोयू एने तीनाक विनता कोरणे बाज गोयू कि आवीन मारा पुऱ्या काजे वारू कोर दे काहाकि चू मोरने पोर होतु. येसु तीना काजे कोयू, “जेतार तोक तुमु चमत्कार एने मोटला काम नि देखे तेत्यार तोक कोबी बी भुरसू नि कोरे.” राजान कोरमोचारी तीना काजे कोयू, “हे प्रभू, मारा पुऱ्यान मोरनेन पेहेले चाल.” येसु तीनु काजे कोयू, “जा तारु पुऱ्यु जीवतलु छे” चू माणूस येसुन कोयला वातोन भुरसू कोऱ्यु एने जात रोयू. चू वाट्ये चालतु होतु कि तेरा दास तीनाक आवीन भेट्या एने कोयने बाज गोया, “तारू पुऱ्यु जीवतलु छे.” चू तीनु काजे पुछु, “काहने टेमे चू वारू होयने बाज गोयलु?” चे तीना काजे कोया, “काल सातवा घोळीमा तेरो सेरी उतरी गोयो” तेत्यार बास जान गोयू कि यो तिने टेमे होयो जिने टेमे येसु तीना काजे कोयू, “तारू पुऱ्यु जीवतलु छे, एने चू एने तेरा आखा घोर वावा भुरसू कोऱ्या, यो दुसरो चमत्कार होतो जो येसु यहुदामा गोथू गलीलमा आवीन देखाळ्यू.”

ស្ដាប់នូវ योहान 4