If you would like a copy of this version please contact info@davaraudiobibles.org

Kayort New Testament, CC-BY-SA-4.0, The Love Fellowship. Kayort New Testament Audio Bible, CC-BY-SA-4.0, Davar Partners International, The Love Fellowship, 2022.

Kayort New Testament

Kayort (केवट) Bible by The Love Fellowship is licensed under Creative Commons Attribution-ShareAlike 4.0 License.

आपन चेलासिके सभे दिन निराश नैभ्याके प्रार्थना कर्ते रहै कहिके शिक्षा दियैले येशू ओकरासिके यी खिसा कहैल्कै: “कोनो एकटा सहरमे परमेश्वरके डर नैमानेवाला आर आदमीसिके वास्ता नैकरेवाला एकटा न्यायधीश रहै। उहे सहरमे एकटा मोसामात रहै। ऊ ओकरलगत लगातार ऐते रहै आर कहै, ‘हमर झगडिया आर हमर बीचमे न्याय करि द्या।’ न्यायधीश कुछु समयतक ते नैमानल्कै, मगर पाछु आपन मनमे कहैल्कै, ‘हमे परमेश्वरके डर नैमानैछियै आर आदमीसिके वास्ता भी नैकरैछियै। मगर यी मोसामात हमरा हैरान करिदेल्कै, सेल्याके हमे एकर न्याय करिदेबै। नैते ऊ घुरी-घुरी आबिके हमरा दिक्दार करि देतै।’ ”
प्रभु येशू कहैल्कै, “यी अन्यायी न्यायधीश जे कहैल्कै, ओकर बारेमे ध्यानसे सोच। परमेश्वर आपन चुन्ल आदमीसिके लिए जेसब रात-दिन ओकर समनामे कानैछै न्याय कर्तै, ऊ ओकरसिके सहायता करैमे देर नैकर्तै। हमे तोरासिके कहैछियौ, परमेश्वर जल्दी ही आपन आदमीसिके न्याय करि देतौ। मगर जब हमे, आदमीके बेटा धर्तीमे वापस ऐबै ते, हमरा धर्तीमे कतनें आदमी मिल्तै जे हमरापर विश्वास करैछै?”

खाली अपने आपके बारेमे सोचेवाला आर अपनाके धर्मी कहिके दोसरसिके निचा नजरसे देखेवाला कुछु आदमीसिके येशू यी खिसा सुनैल्कै: “फरिसी समूहके आदमी आर कर उठाबेवाला आदमी प्रार्थना करैले परमेश्वरके मन्दिरमे गेलै। फरिसी समूहके आदमी आपन बारेमे एरंके प्रार्थना कैल्कै, ‘हे परमेश्वर, हमे तोरा धन्यवाद दैछिहौं कि हमे दोसर आदमीसिके जेरं अन्यायी, व्यबिचारी आर यी कर उठाबेवाला आदमीके जेरं भी नैछियै। हमे हप्तामे दी बेर उपास रहैछियै। हमर सभे चीजके दशांश भी तोरा दैछियै।’
मगर कर उठाबेवाला आदमी दूरसे खडा भ्याके स्वर्गमहर आँख भी नै उठ्याके एरं कहते दुःखके साथ आपन छाती पिटी-पिटीके कहे लाग्लै, ‘हे परमेश्वर, हमे एकटा पापी छियै। हमरापर दया कर आर हमरा माफ कर!’ हमे तोरासिके कहैछियौ, यी कर उठाबेवाला आदमी ऊ फरिसी समूहके आदमीसे बेसी परमेश्वरके नजरमे सही बनिके आपन घरमहर गेलै। कहिनेकी हरेक जे अपने आपके महान बनैतै, ऊ निचा गिरैल जैतै। मगर जे अपने आपके निचा बनैतै, ऊ महान बनैल जैतै।”


आदमीसब बच्चासिके येशूके लगत आने लाग्लै, कि ऊ ओकरासिपर हात राखिके आशीर्वाद देतै; मगर चेलासब आदमीसिके धोपल्कै। येशू ओकरासिके आपन लगत बोल्याके कहैल्कै, “छोटका बच्चासिके हमरलगत आबैले दहैं, एकरासिके नैरोक, कहिनेकी उहे आदमीसब जे यी बच्चासिके जुगुर भरोसाके लायक छै परमेश्वरके राज्यमे रहतै। हमे तोरासिके सच कहैछियौ, परमेश्वर आपन राज्यमे खाली ऊसब आदमीके स्वीकार कर्तै जे ओकर शासनके बच्चाके जुगुर स्वीकार कर्तै।”


कोय एकटा यहूदी शासक येशूके एरं कहिके पुछल्कै, “हे बढियाँ गुरु, हमे कोन काम करियै कि परमेश्वर हमरा कहियो खतम नैहुएवाला जीवन दै?” येशू ओकरा कहैल्कै, “तुहें हमरा कहिने बढियाँ कहैछैं? एकटा परमेश्वरके सिवाय कोय बढियाँ नैछै। तुहें परमेश्वरके आज्ञासब ते जानैछैं यानिकी,
हत्या नैकरिहैं, व्यबिचार नैकरिहैं, चोरी नैकरिहैं, झुट्ठा गवाही नैदिहैं,
आपन बाबु आर मयाँके आदर करिहैं।”
ऊ कहैल्कै, “गुरुजी, यी सभे आज्ञा ते हमे लडकपनसे पालन कैले ऐलियै छे।” यी सुन्लके बाद येशू ओकरा कहैल्कै, “एकटा काम छै जे तोरा आब करैके जरुरत छौ; जो, आर तोरलगत जे जतनें छौ बेचिके पैसा गरिबसिके दहैं, अगर तुहें एरं करैछैं ते, तोरलगत स्वर्गमे धन हैतौ। तोर एरं कैलके बाद, या आर हमर चेला बनिजो।” मगर यी बात सुनिके ऊ बहुते उदास भ्यागेलै, कहिनेकी ऊ बहुते मातबर रहै।
तब येशू ओकरा देखिके कहैल्कै, “मातबर आदमीसिके परमेश्वरके राज्यमे प्रवेश करना बहुते कठिन छै। एकटा ऊँटके लिए सियाके छेद द्याके ढुकना मुश्किल छै, मगर एकटा मातबर आदमीके लिए परमेश्वरके राज्यमे प्रवेश करना बहुते मुश्किल छै।” यी बात सुनेवालासब ओकरा कहैल्कै, “फेर ककरो लिए परमेश्वरके राज्यमे प्रवेश करैके लिए बचैल जाना केरंके सम्भव छै?” येशू ओकरासिके जबाब देते कहैल्कै, “यी आदमीसिके लिए ते यी असम्भव छै, मगर परमेश्वरके लिए नै, कहिनेकी परमेश्वरके लिए सभे कुछु सम्भव छै।” तब पत्रुस कहैल्कै, “हमरसिके कि हैतै? हमेसब तोर चेला बनैके लिए आपन घरद्वार छोडी देलियै छे।” तब ऊ ओकरासिके कहैल्कै, “हमे तोरासिके सच्चाई बताबैछियौ, हमर चेला बनैके लिए आर परमेश्वरके राज्यके लिए, जे भी आदमी आपन घरके त्याग करिदेल्कै या भ्या बहिनके या मयाँ-बाबुके या बेटा-बेटीके या जगह जमिनके त्यागैछै। ऊ आदमी इहे समयमे बहुते बडका प्रतिफल पैतै, आर आबेवाला युगमे कहियो खतम नैहुएवाला जीवन पैतै।”


येशू बारह चेलासिके एक बगल ल्यागेलै आर कहैल्कै, “देख, अपनासब यरूशलेम सहरमहर जैछियै, आर हमे, आदमीके बेटाके विषयमे परमेश्वरके वक्तासिके लिख्ल हरेक बात ओत्ते पुरा हैतै। कहिनेकी ऊ गैर यहूदी आदमीसिके हातमे सौंप्ल जैतै। ऊसब ओकर निन्दा कर्तै, बेज्जत कर्तै, थुक देतै, कोडा लगैतै, आर जान मार्तै। मगर तेसर दिनमे ऊ मुर्दासे जिन्दा भ्याके उठ्तै।” मगर चेलासब यी बात एक्कोटा नैबुझल्कै। ओकरसिके लिए यी बातके मतलब गुप्तमे राखल्कै, आर यी कहेल बात ओकरसिके समझमे नैऐलै।


जब येशू यरिहो सहरके नज्दिक पुग्लै। तब ओत्ते एकटा अनराह आदमी रस्ताके बगलमे बैठिके भीख माँग्ते रहै। आदमीसिके बडका भीड बगल द्याके जैछै कहिके सुनिके, ऊ अनराह मगनियाँ पुछल्कै, “एत्ते कोन चीजके हल्ला छै?” आदमीसब ओकरा कहैल्कै, “नासरत गाँवमे रहेवाला येशू यी द्याके जैछै।” तब ऊ यी बात सुनिके जोरसे चिकरीके कहैल्कै, “हे येशू दाऊद राजाके सन्तान हमरपर दया कर।” आगु-आगु चलेवाला आदमीसब ओकरा चुप र कहिके धोपल्कै। मगर ऊ आरहौ जोरसे हल्ला करे लाग्लै, “हे येशू, दाऊद राजाके बेटा हमरपर दया कर।” तब येशू रुक्लै, आर ओकरा हमरलगत आन कहैल्कै। ऊ नज्दिक ऐलके बाद येशू ओकरा पुछल्कै। “तुहें कोन्ची चाहैछैं? हमे तोर लिए कि करिदियौ?” ऊ कहैल्कै, “प्रभु हमे देखैले चाहैछियै।” तब येशू ओकरा कहैल्कै, तुहें देखेवाला भ्याजो। तोर विश्वाससे तुहें ठीक भेल्हैं छे। आर ऊ तुरन्ते देखेवाला भेलै, आर परमेश्वरके प्रशंसा कर्ते येशूके अनुसरण करे लाग्लै। यी बात देखिके सभे आदमीसब परमेश्वरके प्रशंसा कैल्कै।

ស្ដាប់នូវ लूका 18